0 5

#IFFIWood, 21 नोव्‍हेंबर 2024 

55व्या भारतीय आंतरराष्ट्रीय चित्रपट महोत्सवाची पयली पॅनल चर्चा आयज बायलांची सुरक्षीतताय आनी सिनेमाचेर संवाद सादून सुरू जाली.  नामनेची अभिनेत्री आनी निर्माती वाणी त्रिपाठी टिकू हीणे मॉडरेट केल्ल्या ह्या सत्रांत फिल्म निर्माते इम्तियाज अली, कलाकार सुहासिनी मणिरत्नम, कुशबू सुंदर आनी भूमी पेडणेकर हांचो आस्पाव आशिल्ल्या पॅनेलिस्टांनी एकठांय येवन चित्रपट उद्देगांत बायलांची सुरक्षीतताय, लिंग प्रतिनिधीत्व आनी सिनेमाचो समाजीक मुल्यांक आकार दिवपातलो वाटो, अश्या म्हत्वाच्या प्रस्नांचेर चर्चा केली.

चित्रपट उद्देग बायलांक पडद्याचेर आनी पडद्या फाटल्यान कसो बरो आदार दिवन, सशक्त करूंक शकता हाचेर पॅनेलिस्टांनी वैयक्तीक अणभव आनी विचार सांगून चर्चा केली. सिनेमांत काम करपी बायलांक त्रास वा शोशणाचो हुस्को करिनासतना, मुक्तपणान काम करपाक मेळचें, अशें सुरक्षीत वातावरण आसपाचे म्हत्व तांणी हे वेळार सांगलें.

गुन्यांवकाराची वळख जाली जाल्यार, फिल्म सेटानी ताका कसो प्रतिसाद दिवचो, हाचे भोंवतणी भोवपी चर्चेत एक म्हत्वाचो विषय आयलो. कामाच्या सुवातेर लैंगीक अन्याय सोंसप आतां मान्य ना, हाचेर पॅनेलिस्टांनी भर दिलो.  दादले कलाकार चड करून सेटांचेर कशे येतात आनी एखाद्या सीनात बदल सुचयतात, ही पद्दत बायलांकडेन क्वचितच घडटा, हाचो अणभव सुहासिनी मणिरत्नान हिणे सांगलो.  तांच्या प्रतिनिधीत्वांत निष्क्रिय भाग घेवपी जावचे परस, बायलांनी लेगीत आपल्या सीनाचो ताबो घेवचो आनी सूचना दिवपाक सुरवात करची. ह्या उद्देगातल्या लोकानी ह्या मळार प्रवेश करचे पयलीं कामाची नीती समजून घेवप म्हत्वाचें, अशें तिणें मुखार सांगलें.

सेटाचेर आशिल्ल्या बायलांक तांकां कशी वागणूक मेळटली हाचो हुस्को करिनासतना, फकत कलेचेर लक्ष केंद्रीत करपाक मेळपाक जाय. कामाची संस्कृताय अश्या तरेन तयार करपाच्या म्हत्वाचेर इम्तियाज अली हांणी भर दिलो. सेटांचेर जावपी लैंगीक अन्यायाक फिल्म निर्माते सोंसूंक शकनात, अशें तांणी सांगलें.

चित्रपटांतले बायलांचें चित्रण आनी तांकां सुरक्षीत सुवात तयार करपाचेर ताचो थेट परिणाम कसो जाता, हाचेरय ह्या संवादांत भर दिलो.  बायलांचो स्वाभिमान आनी पडद्याचेर तांका दखोवपाची पद्दत, आदरपूर्ण आनी सशक्त करपी वातावरण तयार करपाक म्हत्वाचे थारता, अशें भूमी पेडणेकार हिणे सांगले.  

मनरिजवण करपी चित्रपट तयार करपाचेर लक्ष केंद्रीत करताना, तिच्या वावरांत समानताय आनी आदर ह्या तत्वांकडेन तडजोड जावची न्हय, हाची खात्री करून ती जबाबदारपणान काम करता, अशें कुशबू सुंदर हीणे सांगलें.  बायलांचे स्वाभिमानान चित्रण करप म्हणल्यार फकत पात्रांतच न्हय, तर मोट्या प्रमाणांत उद्देगाक लेगीत तयार करप आसा, अशें पॅनेलिस्टांनी सामुहीकपणान मान्य केलें.

तशेंच ह्या चर्चेंत प्रेक्षकांचो सक्रिय वांटो दिसून आयलो. प्रेक्षकांनी सिनेमांतल्या बायलांची विकसीत जावपी भुमिका आनी तांच्या सुरक्षेकडेन वा स्वाभिमाना कडेन तडजोड करिनासतना तांकां येस मेळोवपाक सुवात कशी तयार करपाक शकता, हाचेर प्रस्न विचारले.

इफ्फी 2024 चें पयलें पॅनल म्हूण ह्या संवादान सिनेमा कलेची परब मनोवपीच न्हय तर सगळ्यां खातीर सुरक्षीत, चड समावेशक फुडार घडोवपी उद्देगाची जापसालदारकी थारोवन महोत्सवाखातीर एक उंचेलो स्तर तयार केलो.

* * *

PIB IFFI CAST AND CREW | Subhash/Manali/Darshana | IFFI 55

सोशल मिडियावर आम्हाला फॉलो करा:@PIBPanaji    /PIBPanaji    /pib_goa   pibgoa[at]gmail[dot]com  /PIBGoa