Ki Kam shna phlim, kumba long ka put ka tem, ka don ia ka bor ban tam ia u pud bad pyniasoh ia ki mynsiem lyngba kawei ka ktien jong ki jingsngew. Ha ka jingrakhe ia kane ka rukom saindur kaba wanrah jingkylla, la pynlong ia ka International Film Festival of India (IFFI) kaba 55 hapdeng ka deiriti kaba iphuh iphieng jong ka Goa, ha kaba la plie paidbah da ka phlim “Better Man” ba la direct da u Michael Gracey. Ka phlim kadei kaba pyni ia ka jingskhem jingmut, ka jingpawnam bad ka jingim jong u nongrwai na Bilat, u Robbie Williams. Ki nongiashim bynta ha kane ka phlim ki la iaid ha ka IFFI Red Carpet hashuwa ban pyni ia kane ka phlim.

Peit ia ka trailer hangne:

Ka jingplie paidbah kaba iphuh iphieng ha ka IFFI

Hashuwa ban pyni ia ka phlim, ki nongiashim bynta ki la iaid ha ka Red Carpet bad u Secretary, Tnad Information & Broadcasting, u Sanjay Jaju, Joint Secretary, Tnad Information and Broadcasting, ka Vrunda Desai, u Festival Director IFFI, Shekhar Kapoor bad ka Vice-Chairman jong ka Entertainment Society of Goa (ESG), ka Delilah M. Lobo, ki la pynkup burom ia u producer jong ka phlim, Paul Currie bad ka actress Raechelle Banno.

Ha ka jingai jingkren hashuwa ka jingpyni ia ka phlim, u Paul Currie u la ong, “Ka phlim kadei shaphang kumno ka pyrthei ka peit ia u Robbie, hynrei shaphang kumno u Robbie u peit ialade.” U la pynpaw ruh ia ka jingioh mynsiem jong u ban wanrah ia kane ka phlim ha kane ka rynsan. Ka Raechelle Banno ka la iasam da kaba ong, “Ka IFFI ka long kaba kongsan bha ia nga, bad nga sngewkmen ban wanrah ia kane ka phlim sha phi baroh.” U director jong ka phlim, Michael Gracey u la iasoh lyngba ka video call bad u la ong, “Ka Bollywood ka la ai mynsiem ha ka kam jong nga.”

Ka phlim kaba don ki jingrwai

La direct da u nongshna phlim, Michael Gracey ka Better Man kadei ka phlim kaba don ki jingrwai. Kane ka phlim ka dei kaba pyni ia ki jinglong jingman na ka liang jong u Robbie Williams, ha kaba u Williams u pyni ia la ka jong ka jinglong.

Ka ‘Better Man’ ka pyni ia ka jingim jong u Robbie Williams, ki kam paidbah bad ka jingim shimet jong u. Katba ki briew ki iohi ia ka jingkiew jong u sha ka jingpawnam, ki iohi ruh ia ka jinglong jong ka jingim jong u – ka jingiaid lynti jong u ha ka jingioh ia ka jingsuk mynsiem ha ka put ka tem bad ka jingbatai kaei kata ka jingim kaba shisha. U Michael Gracey, uba la paw bha namar ka kam jong u ha ka phlim The Greatest Showman (2017), u la wanrah ia ka phlim kaba itynnad bha. Lyngba ka jingdon bynta u Robbie Williams, ka jingshisha jong ka khana ka long kaba ym lah ban ianujor ha kaba ki briew ki lah ban iohi shisha ia ka jinglong jong une u nongrwai ba pawnam. Ia ka khana la iathuh na ka liang jong u Williams, ha kaba kane ka phlim ka pyni ia ka mynsiem shynrang jong u. Ka pyni ia ka jingiaid lynti jong u naduh ka por ba u dang khynnah, ka jinglong dkhot jong u ha ka kynhun Take That, bad ki jingjop jong u haba u la sdang ia ka kam kum u nongrwai shimet – katba u iakynduh ia ki jingeh kiba wan bad ka jingpawnam.

Ka phlim ka long kaba itynnad bha, ha kaba ka rukom ak, ki rukom ring ki long kiba itynnad bha ha ryngkat ki jingrwai ba pawnam tam jong u Robbie. Man ka bynta jong kane ka phlim ka don ia ka bor bad ka khring ia ki nongpeit haba ki iohi ia ki jingjop bad ki por jong ka jingeh ha ka jingim jong u Williams.

Ka jingpyni ia ka “Better Man” ka la ioh ka jingiaroh kaba khraw, bad ka la pynskhem ia ka kyrdan jong ka kum kawei na ki phlim ba sah jingkynmaw tam ha ka IFFI mynta u snem. Ki briew ki la iaroh ia kane ka phlim namar ka jingpyni shai ia ki jingeh kiba wan na ka jingpawnam bad ka jingrakhe ia ka jingskhem jingmut bad ka jingshem ialade.

* * *