ہندوستان کے وزیر اعظم جناب نریندر مودی نے ریو ڈی جنیرو میں جی 20 سربراہ اجلاس کے دوران  آج جمہوریہ اٹلی کی وزارتی کونسل کی صدر عزت مآب جیورجیا میلونی سے ملاقات کی ۔پچھلے دو سالوں میں دونوں وزرائے اعظم کے درمیان یہ پانچویں ملاقات تھی ۔ دونوں رہنماؤں کی آخری ملاقات جون 2024 میں اٹلی کے پگلیا میں وزیر اعظم میلونی کی صدارت میں جی 7 سربراہ اجلاس کے موقع پر ہوئی تھی ۔ وزیر اعظم نے اس مشکل وقت میں جی 7 کی قیادت کرنے پر وزیر اعظم میلونی کو مبارکباد دی ۔

پگلیا میں اپنی بات چیت کے بعد ، دونوں رہنماؤں نے بھارت-اٹلی اسٹریٹجک شراکت داری کو آگے بڑھانے کے لیے اپنے عزم کا اعادہ کیا تھا اور ایک مشترکہ اسٹریٹجک ایکشن پلان 29-2025 کا اعلان کیا تھا جس میں اگلے پانچ  برسوں کے لیے اپنے وژن کا خاکہ پیش کیا گیا ہے ۔ ایکشن پلان تجارت اور سرمایہ کاری ، سائنس اور ٹیکنالوجی ، نئی اور ابھرتی ہوئی ٹیکنالوجیز ، صاف ستھری توانائی ، خلا ، دفاع ، رابطے اور عوام سے عوام کے روابط کے اہم شعبوں میں مشترکہ تعاون ، پروگراموں اور اقدامات کو آگے بڑھائے گا ۔

دونوں فریق متعدد شعبوں میں باقاعدگی کے ساتھ وزارتی اور سرکاری  سطح پر مذاکرات کریں گے ۔ مشترکہ پیداوار ، متعلقہ صنعتوں اور اداروں ، اختراع اور نقل و  حمل کے درمیان شراکت داری کو رفتار اور مزید گہرائی فراہم کرے گی اور دونوں ممالک کی معیشتوں اور عوام کو فائدہ پہنچائے گی ۔

دونوں رہنما جمہوریت ، قانون کی حکمرانی اور پائیدار ترقی کی مشترکہ اقدار کو برقرار رکھنے کے لیے کثیرجہتی اور عالمی پلیٹ فارمز پر اپنی بات چیت جاری رکھنے اور مل کر کام کرنے کے منتظر ہیں ۔ انہوں نے کثیرجہتی اسٹریٹجک اقدامات کے نفاذ کے لیے مل کر کام جاری رکھنے پر اتفاق کیا جس میں گلوبل بائیو فیولز الائنس اور  بھارت – مشرقی وسطیٰ -یورپ اکنامک کوریڈور شامل ہیں  جس کے وہ بانی ارکان  ہیں ۔

***

ش ح۔ ف ا ۔ ش ب ن

U-No.2608