1 2

୫୫ତମ ଭାରତୀୟ ଅନ୍ତର୍ଜାତୀୟ ଚଳଚ୍ଚିତ୍ର ମହୋତ୍ସବ (ଆଇଏଫଏଫଆଇ) ଚଳିତ ନଭେମ୍ବର ୨୦ରୁ ୨୮ ତାରିଖ ପର୍ଯ୍ୟନ୍ତ ଗୋଆରେ ଏକ ଭବ୍ୟ ସାଂସ୍କୃତିକ ପରିବେଶ ମଧ୍ୟରେ ଆରମ୍ଭ ହେବାକୁ ଯାଉଛି। ଏଥିସହିତ ଫିଲ୍ମ ବଜାରର ଅଷ୍ଟାଦଶ ସଂସ୍କରଣ ମଧ୍ୟ ଚଳିତ ମାସ ୨୦ରୁ ୨୪ ତାରିଖ ପର୍ଯ୍ୟନ୍ତ ଆୟୋଜିତ ହେବ। ଏହା ଚଳଚ୍ଚିତ୍ର ନିର୍ମାତା ଓ ଏହି ଉଦ୍ୟୋଗର ପେସାଦାରମାନଙ୍କୁ ପରସ୍ପର ସହ ଯୋଡ଼ି ହେବା, ସହଭାଗିତା ସ୍ଥାପନ କରିବା ଏବଂ ନିଜ କାମ ପ୍ରଦର୍ଶନ କରିବା ଲାଗି ଏକ ଜୀବନ୍ତ ପରିବେଶ ଯୋଗାଇ ଦେବ।

ଚଳିତ ବର୍ଷ ପୁନର୍ବାର ମାରିଅଟ୍‌ ରିସର୍ଟରେ ଭ୍ୟୁଇଂ ରୁମ୍‌ ବା ଚଳଚ୍ଚିତ୍ର ପ୍ରଦର୍ଶନ କକ୍ଷ ଆୟୋଜିତ ହେବାକୁ ଯାଉଛି ଏବଂ ଏଥିରେ ଭାରତ ଓ ଦକ୍ଷିଣ ଏସିଆର ଶ୍ରେଷ୍ଠ ମାନର ଚଳଚ୍ଚିତ୍ର ପ୍ରଦର୍ଶିତ ହେବ । ବିତରଣ ଏବଂ ପାଣ୍ଠି ସହଯୋଗ ଚାହୁଁଥିବା ଚଳଚ୍ଚିତ୍ର ନିର୍ମାତାଙ୍କ ପାଇଁ ଏକ ଗୁରୁତ୍ବପୂର୍ଣ୍ଣ କେନ୍ଦ୍ର ରୂପେ ଡିଜାଇନ କରାଯାଇଥିବା ଭ୍ୟୁଇଂ ରୁମ୍‌ ରେ ସମ୍ପୂର୍ଣ୍ଣ ହୋଇଥିବା କିମ୍ବା ପୋଷ୍ଟ୍‌ ପ୍ରଡକ୍ସନ୍‌ ସ୍ତରରେ ଥିବା ଚଳଚ୍ଚିତ୍ର ପ୍ରଦର୍ଶିତ ହେବ। ଏହା ସେମାନଙ୍କୁ ବିଶ୍ବ ଚଳଚ୍ଚିତ୍ର ପ୍ରୋଗ୍ରାମର୍‌, ବିତରକ, ସେଲ୍ସ ଏଜେଣ୍ଟ ଏବଂ ନିବେଶକଙ୍କ ସହ ସମ୍ପର୍କ ସ୍ଥାପନ ପାଇଁ ସୁଯୋଗ ଦେବ। ନଭେମ୍ବର ୨୧ରୁ ୨୪ ପର୍ଯ୍ୟନ୍ତ ଭ୍ୟୁଇଂ ରୁମ୍‌ ଅଂଶୀଦାରଙ୍କ ପାଇଁ ଉପଲବ୍ଧ ହେବ।

ଭ୍ୟୁଇଂ ରୁମ୍ ଲାଇବ୍ରେରୀର ଚଳିତ ବର୍ଷର ସଂସ୍କରଣରେ ୨୦୮ଟି ଚଳଚ୍ଚିତ୍ର ଦେଖିବା ପାଇଁ ଉପଲବ୍ଧ ହେବ, ଯେଉଁଥିରୁ ୧୪୫ଟି ଫିଚର ଫିଲ୍ମ, ୨୩ଟି ମଧ୍ୟମ ସମୟ ଅବଧି ବିଶିଷ୍ଟ ଚଳଚ୍ଚିତ୍ର, ୩୦ଟି କ୍ଷୁଦ୍ର ଚଳଚ୍ଚିତ୍ର ରହିଛି। ଫିଚର ଏବଂ ମଧ୍ୟମ ସମୟ ଅବଧି ବିଶିଷ୍ଟ ଚଳଚ୍ଚିତ୍ରଗୁଡ଼ିକ ମଧ୍ୟରେ ଏନଏଫଡିସି ପ୍ରଯୋଜନା ଏବଂ ସହ-ପ୍ରଯୋଜନାରେ ନିର୍ମିତ ୧୨ଟି ଚଳଚ୍ଚିତ୍ର ସାମିଲ ରହିଛି । ସେହିପରି ଏନଏଫଡିସି-ଏନଏଫଏଆଇରୁ ଆସିଥିବା ୧୦ଟି ଶ୍ରେଷ୍ଠ ଚଳଚ୍ଚିତ୍ରକୁ ମଧ୍ୟ ଏଥିରେ ସାମିଲ କରାଯାଇଛି । ୩୦-୭୦ ମିନିଟ୍ ମଧ୍ୟରେ ଚାଲୁଥିବା ଚଳଚ୍ଚିତ୍ରଗୁଡ଼ିକୁ ଭ୍ୟୁଇଂ ରୁମରେ ଦାଖଲ କରାଯାଏ, ଯାହାକୁ ମିଡ୍-ଲେଂଥ୍ ଫିଲ୍ମସ୍ ବା ମଧ୍ୟମ ସମୟ ଅବଧି ବିଶିଷ୍ଟ ଚଳଚ୍ଚିତ୍ର ନାମକ ଏକ ବର୍ଗରେ ପ୍ରଦର୍ଶିତ କରାଯାଏ। ଏହାବ୍ୟତୀତ ୩୦ ମିନିଟରୁ କମ୍ ଅବଧି ବିଶିଷ୍ଟ କ୍ଷୁଦ୍ର ଚଳଚ୍ଚିତ୍ର ବର୍ଗରେ ରହିବେ।

ଫିଲ୍ମ ବଜାର ସୁପାରିସ (ଏଫବିଆର)

ଫିଲ୍ମ ବଜାର ସୁପାରିସ (ଏଫବିଆର) ତାଲିକାରେ ୧୯ଟି ଫିଚର ଫିଲ୍ମ, ୩ଟି ମଧ୍ୟମ ସମୟ ଅବଧି ବିଶିଷ୍ଟ ଚଳଚ୍ଚିତ୍ର, ୨ଟି କ୍ଷୁଦ୍ର ଚଳଚ୍ଚିତ୍ର ଏବଂ ୩ଟି ପୁନରୁଦ୍ଧାର ହୋଇଥିବା ଶ୍ରେଷ୍ଠ ଚଳଚ୍ଚିତ୍ରକୁ ମିଶାଇ ୨୭ଟି ପ୍ରକଳ୍ପ ଉପରେ ଗୁରୁତ୍ବ ଦିଆଯାଇଛି।

ଏନ୍ଏଫଡିସିର ପରିଚାଳନା ନିର୍ଦେଶକ ପୃଥୁଲ କୁମାର କହନ୍ତି, ‘‘ଚଳଚ୍ଚିତ୍ର ନିର୍ମାତାଙ୍କ ସୃଜନଶୀଳତା ଏବଂ ଉତ୍ସାହକୁ ସମ୍ମାନ ଦେଉଥିବା ଏଫବିଆର ପାଇଁ ଚଳଚ୍ଚିତ୍ର ତାଲିକା ଘୋଷଣା କରି ଆମେ ଆନନ୍ଦିତ। ଏହି ପଦକ୍ଷେପ କେବଳ ସ୍ୱୀକୃତି ପାଇଁ ନୁହେଁ; ଏହା କାହାଣୀକାରମାନଙ୍କୁ ସେମାନଙ୍କର ଦୃଷ୍ଟିକୋଣକୁ ବିଶ୍ୱ ସହିତ ବାଣ୍ଟିବା ପାଇଁ ସଶକ୍ତ କରିବା ଉପରେ ଗୁରୁତ୍ବ ଦେଇଥାଏ। ଆମେ ଚଳଚ୍ଚିତ୍ରର ପରିବର୍ତ୍ତନଶୀଳ ଶକ୍ତିରେ ବିଶ୍ୱାସ କରୁ ଏବଂ ପ୍ରେରଣା ଏବଂ ମନୋରଞ୍ଜନ ପାଇଁ ପ୍ରସ୍ତୁତ ହେଉଥିବା ପରବର୍ତ୍ତୀ ପିଢ଼ିର କଳାକାରମାନଙ୍କୁ ସମର୍ଥନ କରିବାକୁ ପ୍ରତିଶ୍ରୁତିବଦ୍ଧ।

ଫିଲ୍ମ ବଜାରରେ ଏକ ଖୋଲା ଉପସ୍ଥାପନ ଅଧିବେଶନରେ ଏଫବିଆର ପାଇଁ ମନୋନୀତ ପ୍ରକଳ୍ପଗୁଡ଼ିକ ସେମାନଙ୍କ ଚଳଚ୍ଚିତ୍ରଗୁଡ଼ିକୁ ପ୍ରଯୋଜକ, ସେଲ୍ସ ଏଜେଣ୍ଟ, ବିତରକ, ମହୋତ୍ସବ ପ୍ରୋଗ୍ରାମର ଏବଂ ସମ୍ଭାବ୍ୟ ନିବେଶକଙ୍କ ସମେତ ଶିଳ୍ପ ନେତୃବୃନ୍ଦଙ୍କ ନିକଟରେ ଉପସ୍ଥାପନ କରିବାର ସୁଯୋଗ ପାଇବେ । ଏଠାରେ ଚଳଚ୍ଚିତ୍ରର ପୁରା ତାଲିକା ଦେଖନ୍ତୁ।

*ଏହା ଜାଣିବା ଗୁରୁତ୍ୱପୂର୍ଣ୍ଣ ଯେ ଏଫବିଆର ତାଲିକା କିମ୍ବା ପ୍ରଦର୍ଶନ କକ୍ଷରେ ଥିବା ଚଳଚ୍ଚିତ୍ରଗୁଡ଼ିକୁ ସେମାନଙ୍କ କ୍ରେଡିଟ୍ କିମ୍ବା ପ୍ରମୋସନ୍ ସାମଗ୍ରୀରେ ଫିଲ୍ମ ବଜାର ଲୋଗୋ ବ୍ୟବହାର କରିବାକୁ ଅନୁମତି ନାହିଁ।

ଫିଲ୍ମ ବଜାର ବିଷୟରେ

ଫିଲ୍ମ ବଜାର ହେଉଛି ଏକ ବିଟୁବି ପ୍ଲାଟଫର୍ମ ଯାହାର ଉଦ୍ଦେଶ୍ୟ ହେଉଛି ଦକ୍ଷିଣ ଏସୀୟ ଚଳଚ୍ଚିତ୍ରକୁ ଅନ୍ତର୍ଜାତୀୟ ଏବଂ ଜାତୀୟ ବଜାରରେ ପ୍ରୋତ୍ସାହିତ କରିବା । ଫିଲ୍ମ ବଜାରରେ ଭ୍ୟୁଇଂ ରୁମ୍ ହେଉଛି ଏକ ପେଡ୍ ପ୍ଲାଟଫର୍ମ ଯାହା ଚଳଚ୍ଚିତ୍ର ନିର୍ମାତାମାନଙ୍କୁ ଅନ୍ତର୍ଜାତୀୟ ଚଳଚ୍ଚିତ୍ର ମହୋତ୍ସବ, ବିଶ୍ୱ ବିକ୍ରୟ ଏଜେଣ୍ଟ ଏବଂ କ୍ରେତାମାନଙ୍କୁ ବ୍ୟକ୍ତିଗତ ଭାବରେ ସେମାନଙ୍କ ଚଳଚ୍ଚିତ୍ରର ପ୍ରଚାର କରିବା ପାଇଁ ପ୍ରଦାନ କରିଥାଏ ।

ଭ୍ୟୁଇଂ ରୁମ୍ ହେଉଛି ଏକ ନିଷିଦ୍ଧ ଜୋନ୍ ଯାହା ସାରା ବିଶ୍ୱର କ୍ରେତା (ଚଳଚ୍ଚିତ୍ର ପ୍ରୋଗ୍ରାମର, ବିତରକ, ବିଶ୍ୱସ୍ତରୀୟ ସେଲ୍ସ ଏଜେଣ୍ଟ ଏବଂ ନିବେଶକ) ସହିତ ବିକ୍ରେତା (ଚଳଚ୍ଚିତ୍ର ନିର୍ମାତା)ଙ୍କୁ ଯୋଡ଼ିଥାଏ। ଫିଲ୍ମ ବଜାର ଟିମ୍ ସେମାନଙ୍କ ପ୍ରୋଫାଇଲ୍ ଆଧାରରେ 'କ୍ରେତା'ଙ୍କୁ ଯାଞ୍ଚ କରିଥାନ୍ତି। କ୍ରେତାମାନେ ସ୍ୱତନ୍ତ୍ର ଭାବେ ଡିଜାଇନ୍ ହୋଇଥିବା ଭ୍ୟୁଇଂ ରୁମ୍ ସଫ୍ଟୱେୟାର୍ ମାଧ୍ୟମରେ ଚଳଚ୍ଚିତ୍ର ଗୁଡ଼ିକ ବିଷୟରେ ବିବରଣୀ ପାଇବା ସହିତ ଚଳଚ୍ଚିତ୍ର ନିର୍ମାତାଙ୍କ ସହ ଯୋଗାଯୋଗ କରିପାରିବେ।

ଚଳଚ୍ଚିତ୍ର ବଜାରରେ ଅଧିକ ଜାଣିବା ପାଇଁ, ଦୟାକରି ନିମ୍ନରେ ଥିବା ଲିଙ୍କଗୁଡିକ ଦେଖନ୍ତୁ:

https://filmbazaarindia.com/the-bazaar/about-film-bazaar/

https://pib.gov.in/PressReleasePage.aspx?PRID=2068120

*******

PIB Bhubaneswar| P.S/Swadhin