مرکزی وزیر داخلہ اور امداد باہمی کے وزیر جناب امت شاہ نے آج نئی دہلی میں ’کیندریہ ہندی سمیتی‘ کی 32ویں میٹنگ کی صدارت کی۔ ’کیندریہ ہندی سمیتی‘ ایک اعلیٰ ترین ادارہ ہے جو ہندی زبان کی ترقی اور ترویج کے لیے رہنما اصول فراہم کرتا ہے۔

اپنے خطاب میں وزیر داخلہ نے کہا کہ وزیر اعظم جناب نریندر مودی نے ہندوستانی زبانوں کے تحفظ، فروغ اور وسیع پیمانے پر استعمال کے لیے کئی اقدامات کیے ہیں، جس سے 2014 سے 2024 کے عرصے کو ہندوستانی زبانوں کے تحفظ اور فروغ کے لیے پوری طرح وقف کیا گیا ہے۔ انہوں نے کہا کہ وزیر اعظم مودی کی قیادت میں حال ہی میں پانچ اور ہندوستانی زبانوں کو کلاسیکی زبان کا درجہ دیا گیا ہے۔ انہوں نے روشنی ڈالی کہ ہندوستان دنیا کا واحد ملک ہے جہاں 11 زبانوں کو کلاسیکی زبانوں کے طور پر تسلیم کیا جاتا ہے۔

مرکزی وزیر داخلہ نے کہا کہ وزیر اعظم مودی نے ہندی میں ہر بین الاقوامی فورم پر اپنے خیالات کا اظہار کرکے ہندی کی اہمیت کو بڑھایا ہے۔ انہوں نے مزید کہا کہ ہندوستانی زبانوں میں انجینئرنگ، میڈیکل، پرائمری اور سیکنڈری تعلیم کی دستیابی نے ملک میں تمام زبانوں کی ترقی کے لیے سازگار ماحول پیدا کیا ہے۔ جناب شاہ نے کہا کہ یہ ہندوستان میں زبان کی ترقی کی سمت میں ایک متاثر کن انقلابی تبدیلی ہے، جس کا مقصد ملک کی صلاحیتوں کو مکمل طور پر استعمال کرنا ہے۔ انہوں نے کہا کہ اگر ہم اپنے بچوں اور نوجوانوں کی بھرپور صلاحیتوں کو ملکی ترقی کے لیے بروئے کار لانا چاہتے ہیں تو ضروری ہے کہ وہ اپنی مادری زبان میں مطالعہ کریں، تجزیہ کریں اور فیصلے کریں۔ جناب شاہ نے کہا کہ ’کیندریہ ہندی سمیتی‘ کا مقصد ہندی کو فروغ دینا، ہندی ادب کو محفوظ کرنا اور اسے ملک کے رابطے کی زبان کے طور پر قائم کرنا ہے۔

جناب امت شاہ نے کہا کہ وزیر اعظم جناب نریندر مودی کی قیادت میں ہندی کو بااختیار بنانے کے لیے پچھلے پانچ سال میں تین بڑے اقدامات کیے گئے ہیں۔ انہوں نے کہا کہ پہلا بڑا اقدام ہندی شبدسندھو لغت تیار کرنا ہے۔ انہوں نے یقین ظاہر کیا کہ اگلے پانچ سال میں شبد سندھو دنیا کی سب سے جامع لغت بن جائے گی۔ جناب شاہ نے کہا کہ بھارتیہ بھاشا اون بھاگ (ہندوستانی زبان کے حصے) کا قیام دوسری اہم پہل ہے۔ جناب شاہ نے کہا کہ ہم اس وقت تک ترقی نہیں کر سکتے جب تک تمام ہندوستانی زبانوں کو مضبوط نہ کریں۔ انہوں نے کہا کہ اس سیکشن نے ترجمے کے لیے ٹیکنالوجی کو استعمال کرنے کی کوششیں شروع کی ہیں۔ مرکزی وزیر داخلہ نے مزید کہا کہ تیسرا بڑا اقدام ملک کے مختلف حصوں میں سرکاری زبان کی کانفرنس کا انعقاد ہے، جس سے سرکاری زبان کی اہمیت کو سمجھنا آسان ہو جائے گا۔

جناب امت شاہ نے ہندی کو مضبوط کرنے کے لیے دو بڑے اقدامات کرنے کی ضرورت پر زور دیا۔ پہلا یہ ہے کہ ہندی ادب اور اس کی مختلف قواعد شکلوں کی تیاری، تحفظ اور لمبے عرصے کے لیے ایک طویل مدتی پالیسی تیار کرنا ہے۔ انہوں نے کہا کہ اس کے ساتھ ساتھ تمام جدید تعلیمی نصاب کا ہندی اور دیگر تمام ہندوستانی زبانوں میں ترجمہ کرنا بھی ضروری ہے۔ وزیر داخلہ نے ہندی کو عالمی سطح پر مقبول اور لچکدار بنانے پر بھی زور دیا۔

اس میٹنگ میں صحت اور خاندانی بہبود کے مرکزی وزیر جناب جگت پرکاش نڈا، وزیر تعلیم جناب دھرمیندر پردھان، قانون و انصاف کے وزیر مملکت جناب ارجن رام میگھوال، پارلیمانی امور کے وزیر مملکت ڈاکٹر ایل مروگن، اوڈیشہ کے وزیر اعلیٰ جناب موہن چرن ماجھی، پارلیمانی کمیٹی برائے سرکاری زبان کے نائب چیئرمین جناب بھرتوہری مہتاب، سرکاری زبان سے متعلق پارلیمانی کمیٹی کی تین ذیلی کمیٹیوں کے کنوینر، دفتری زبان کے محکمے کی سکریٹری محترمہ انشولی آریہ اور جوائنٹ سکریٹری ڈاکٹر میناکشی جولی نے شرکت کی۔

’کیندریہ ہندی سمیتی‘ ایک اعلیٰ ترین ادارہ ہے جو ہندی کے فروغ اور ترقی پسند استعمال کے لیے رہنما اصول فراہم کرتا ہے۔ سمیتی کا کردار ہندی کی ترقی اور ترویج کے لیے حکومت ہند کی مختلف وزارتوں اور محکموں کے ذریعے نافذ کیے گئے کاموں اور پروگراموں کو مربوط کرنا ہے۔ سمیتی کو ذیلی کمیٹیوں کا تقرر کرنے اور اس کے کام کاج میں مدد کے لیے ضرورت کے مطابق اضافی اراکین کو منتخب کرنے کا اختیار حاصل ہے۔ سمیتی کی مدت عام طور پر تین سال ہوتی ہے۔ موجودہ سمیتی کی تشکیل نو نومبر 9، 2021 کو کی گئی تھی۔ 'کیندریہ ہندی سمیتی'، جس کے صدر وزیر اعظم جناب نریندر مودی ہیں، اس میں 9 مرکزی وزیر، 6 وزرائے اعلیٰ، پارلیمانی کمیٹی برائے سرکاری زبان کے نائب چیئرمین اور تین کنوینر شامل ہیں۔ اس میں مجموعی طور پر 21 ممبران ہیں۔

******

ش ح۔  م ع ۔  م ت 

U - 2088