নমপ বুদ্ধায়!

কলচর মন্ত্রী, শ্রী গজেন্দ্র সিংহ সেখাৱতজী, মাইনোরিতী এফিয়র্সকী মন্ত্রী, শ্রী কিরেন রিজিজুজী, ভাদন্ত রাহুল বোধি মহাথেরোজী, বেনেরেবল জাঙ্গচুপ ছোতেনজী, মহাসংঘগী ইকাই খুম্নরবা মেম্বর পুম্নমক, এক্সিলেন্সীশিং, দিপ্লোমেতিক কম্ম্যুনিতীগী মেম্বরশিং, বুদ্ধিস্ত স্কোলরশিং, ধম্মগী তুংইনবশিং, নুপী অমদি নুপাশিং।

অমুক্কা হন্না, ঐহাক্না ইন্তর্নেস্নেল অভিধম্ম দিবস থৌরমগী শরুক অমা ওইবগী থাগৎপা ফোংদোকচরি। অভিধম্ম দিবসনা ঐখোয়দা নিংশিংহল্লি মদুদি নুংশিবা অমসুং অফবা তৌবগী থোংদা ঐখোয়না মালেম অসিবু হেন্না ফবা মফম অমা ওইহনবা ঙম্মি। অসিগুম্বা থৌরম অসি কুমজা 2021দা কুশিনগরদা পাংথোকখি অমসুং ঐহাক্না মসিদা শরুক য়াবগী খুদোংচাবা ফংখি। ঐহাক্না পোকপগা লোয়ননা হৌরকখিবা ভগবান বুদ্ধগা শম্নবগী খোঙচৎ অসি লেপ্পা লৈতনা চৎথরকপা অসি ঐহাক্কী নুংঙাইবা অমনি। ঐহাক গুজরাতকী বদনগরদা পোকখি। মতম অমদা বদ্ধ ধর্মগী অচৌবা মফম অমা ওইরম্মি। ইথিলশিং অসিগা লোয়ননা হিংদুনা, ঐহাক্না ধম্ম অমসুং বুদ্ধগী পাউতাকশিং শন্দোকপদা মশিং য়াম্লবা এক্সপরিয়েন্সশিং ফংজখি।

হৌখিবা চহি 10 অসিদা, ঐহাক্না ভারতকী পুৱারী ওইরবা বুদ্ধিস্তকী তীর্থাশিংদগী হৌরগা মালেমগী লৈবাক কয়াদা চৎপা, ভগৱান বুদ্ধগী পোক্নফম ওইরিবা নেপালগী লুম্বিনিদা চৎপা, মোঙ্গোলিয়াদা মহাক্কী মীতম উরেপ উয়ুং তম্বগী থৌরমশিংদগী হৌরগা শ্রী লঙ্কাদা ভেসক থৌরম পাংথোকপদা শরুক য়াবগী খুদোংচাবা ফংখি। ঐহাক্না থাজৈ মদুদি সংঘা অমসুং সীকরশিং পুনশিল্লিবা অসি ভগবান বুদ্ধগী য়াইফ-পাউজেলগী মহৈনি। ঙসিগী অভিধম্ম দিবসকী থৌরমদা, ঐহাক্না ময়াম পুম্নমকপু অমসুং ভগৱান বুদ্ধগী তুং ইনবশিংদা য়াইফ-পাউজেল পীজরি। ঙসি অসি শরদ পুর্নিমাগী য়াইফরবা কুহ্মৈসু ওইরি। মসি ভারতকী কন্সিয়সনেসকী অথোইবা সন্ত ওইরিবা, ভাল্মিকী জীগী মপোক কুমওনসু ওইরি। শরদ পুর্নিমা অমসুং ভাল্মিকী জয়েন্তীদা লৈবাক পুম্বদা ঐহাক্না য়াইফ-পাউজেল পীজরি।

ইকাই খুম্নরবা মরুপশিং,

চহি অসিদা, অভিধম্ম দিবস পাংথোকপগা লোয়ননা পুৱারী ওইরবা মাইপাকপা অমা লৈরি। ভগৱান বুদ্ধগী অভিধম্ম, মহাক্কী ৱাহৈশিং অমসুং মহাক্কী পাউতাকশিং অসি মালেমদা পীরম্বা পালী লোল অসি ভারত সরকারনা থা অসিদা ক্লাসিকেল লোল ওইনা লাউথোকখ্রে। মরম অদুনা, ঙসিগী থৌরম অসি হেন্না অখন্নবা ওইরক্লি। পালীবু ক্লাসিকেল লোল অমা ওইনা শকখঙবা অসিনা ভগৱান বুদ্ধগী অচৌবা লেগেসী অদুগীদমক ইকায় খুম্নবা অমনি। ময়াম পুম্নমক্না খঙই মদুদি অভিধম্ম অসি ধম্মদা য়াওরি। ধম্মগী মগুন খঙনবগীদমক, পালী লোল খঙবা অসি তঙাইফদে। ধম্ম হায়বসিনা বুদ্ধগী পাউজেল, বুদ্ধগী ৱাখল্লোনশিং... ধম্ম হায়বসিনা মীওইবগী পুন্সিগা মরী লৈনবা ৱাহংশিংগী পাউখুম্নি... ধম্মনা মীওইবা খুন্নাইগীদমক শান্তিগী লম্বী তাকই... ধম্ম হায়বসিনা বুদ্ধগী মমল নাইদ্রবা পাউতাকশিংবু তাক্লি... অমসুং ধম্ম হায়বসিনা মীওইবা খুদিংমক্কী য়াইফনবগী অচেৎপা থাজবা অদু তাক্লি! মালেম পুম্বনা ভগৱান বুদ্ধগী ধম্মনা মঙাল পীখ্রে।

অদুবু মরুপশিং,

লাইবক থিবদি, ঙসিদি ভগৱান বুদ্ধগী অশেংবা ৱাহৈশিং য়াওরিবা অরিবা পালী লোল অসি মীয়াম্না শীজিন্নদ্রে। লোল অসি পাউ ফাওনবগী পাম্বৈ অমা খক্তা নত্তে! লোল অসি সভ্যাতা অমসুং নাৎকী থৱায়নি। লোল খুদিংমক্কী মশাগী ওইবা মগুন লৈজৈ। মরম অদুনা, ভগৱান বুদ্ধগী ৱাহৈশিং অসি মখোয়গী অশেংবা ৱাখল্লোন্দা হিংহন্নবা পালী লোল অসি হিংহনবা ঐখোয়গী থৌদাংনি। ঐখোয়গী সরকারনা মসিগী থৌদাং অসি ইকায়খুম্নবা উৎতুনা পাংথোক্লিবা অসিদা ঐহাক নুংঙাইবা ফাওই। ভগৱান বুদ্ধগী তুং ইল্লিবা মীওই মিলিয়ন কয়া অমসুং লম্বোইবা লিশিং কয়াগী অপাম্বা ফংনবা ঐখোয়না হোৎনরি। মসিগী মরু ওইবা ৱারেপ অসিগীদমক্তা ঐনা ময়াম পুম্নমকপু থাগৎচরি।

ইকাই খুম্নরবা মরুপশিং,

লোল, সাহিত্য, আর্ত, স্পিরিচুএলিতী - লনশিং অসিনা লৈবাক অমা ওইবগী মশক তাকই। মরম অসিনা, মালেমগী লৈবাক অমা হেক্তনা চহি চাম্মগী মমাংগী পোৎশক অমা ফংলকপা মতমদা, মালেমদা চাউথোকচবা ফাওই। লৈবাক খুদিংমক্না মাগী হেরিতেজ অসি মাগী আইদেন্তিতীগা শম্নহল্লি। লাইবক থিবদি, ভারত অসি মসিগী মতাংদা য়াম্না শোত্থখি। নীংতম্বা ফংদ্রিঙৈগী মমাংদা, লোইলমগী মীওইশিংনা ভারতকী শক্তম মুত্থৎনবা পান্দম থমখি অমসুং নীংতম্বা ফংলবা মতুংদা, কোলোনিএলগী ৱাখল্লোন লৈবা মীওইশিংনা খুদুম চনখি। ভারত্তা ইকোসিস্তেম অমা লৈরকখি অমসুং মসিনা ঐখোয়বু ওন্ন-তৈনবা মাইকৈদা পুখৎনবা হোৎনখি। ভারতকী থম্মোয়দা লৈরিবা বুদ্ধ অমসুং নীংতম্বা ফংলবা মতম অদুদা ভারতকী খুদম ওইনা লৌখৎখিবা বুদ্ধগী খুদমশিং অদু তুংগী দিকেদশিংদা তপ্না তপ্না নীংশিংলকখি। পালী লোলনা মাগী অশেংবা মফম অমা ফংনবগীদমক চহি তরেৎ চঙখি।

অদুবু মরুপশিং,

লৈবাক অসিনা হৌজিক ইনফেরিওরিতী কমপ্লেক্স অসিদগী লাপ্না লৈরে অমসুং মশানা-মশা ইকাই খুম্নবা, মশানা-মশা থাজবা, অমসুং মশানা- মশা চাউথোকচবা পোক্তুনা মাংলোমদা চংশিল্লি। মসিগী মহৈ ওইনা লৈবাক অসিনা অচৌবা ৱারেপশিং লৌরি। মরম অসিনা ঙসিদি, পালী অসি ক্লাসিকেল লোল অমা ওইনা শকখঙনরিঙৈদা, মরাথী অসিসু মান্নবা ইকাই খুম্নবা ফংলি। অমসুং মসিগা দা. বাবাসাহেব অম্বেদকরগা মরী লৈনবসি য়াম্না নুংঙাইবা থৌওং অমনি। বুদ্ধ ধর্মগী ঐখোয়গী অচৌবা তুংলমচৎ অমা ওইরিবা বাবাসাহেব অম্বেদকরনা মহাক্কী ধম্ম ইনিসি‌এসন অসি পালীদা ফংখি, অমসুং মহাক্কী মমা লোলদি মারাথী ওইখি। মসিগা মান্ননা, ঐখোয়না বেঙ্গালী, অসামীজ অমসুং প্রাকৃতপুসু ক্লাসিকেল লোলগী থাক পীরি।

মরুপশিং,

ভারতকী লোলশিং অসিনা ঐখোয়গী দাইভর্সিতীবু মপাঙ্গল কনখৎহল্লি। মমাংদা, ঐখোয়গী লোল খুদিংমক্না লৈবাক শেমগৎপদা মরুওইবা থৌদাং অমা লৌরম্মি। ঙসিদি, লৈবাক অসিনা লৌখৎলিবা অনৌবা নেস্নেল এজুকেসন পোলিসী অসিসু হায়রিবা লোলশিং অসি ঙাক-শেন্নবা পাম্বৈ অমা ওইরক্লি। লৈবাক অসিগী নহারোলশিংগীদমক্তা মমা লোলদা এজুকেসনগী ওপ্সন হৌদোকখিবদগী, হায়রিবা লোলশিং অসি হেন্না মপাঙ্গল কনখৎলক্লি।

মরুপশিং,

ঐখোয়না ঐখোয়গী ৱারেপশিং অদু মপুং ফাহন্নবগীদমক লাল কিলাদগী লৈবাক মীয়ামদা 'পঞ্চ প্রন' (ৱাশক মঙা) গী ভিজন অদু পীখি। পঞ্চ প্রন হায়বসিনা “ভিকসিৎ ভারত” (চাউখৎলবা ভারত) অমা শেমগৎপা হায়বনি! কোলোনিএলগী ৱাখল্লোনদগী নীংতম্বা! লৈবাক্কী অপুনবা! মথৌ মপুং ফাহনবা! অমসুং ঐখোয়গী হেরিতেজ অসিদা চাউথোকচবা পোকচবা! মরম অসিনা ঙসি ভারতনা খোঙজেল য়াংনা চাউখৎপা অমসুং মাগী শিংথানীংঙাই ওইরবা হেরিতেজ অসিবু ঙাক-শেন্দুনা থম্নবগীদমক হোৎনরি। ভগৱান বুদ্ধগা মরী লৈনবা হেরিতেজ অসি ঙাক-শেন্দুনা থম্বা অসি মিসন অসিগী প্রাইওরিতী অমনি। ঐখোয়না মতৌ করম্না ভারত অমসুং নেপালদা বুদ্ধ সর্কিৎকী শরুক অমা ওইনা ভগৱান বুদ্ধগা মরী লৈনবা মফমশিং শেমগৎলি হায়বদু য়েংসি। কুশিনগরদা ইন্তর্নেস্নেল এয়রপোর্ত অমসু শঙ্গাখ্রে। লুম্বিনিদা, ঐখোয়না ইন্দিয়া ইন্তর্নেস্নেল সেন্তর ফোর বদ্ধ কলচর অমসুং হেরিতেজ শেমগৎলি। লুম্বিনিদা, ঐখোয়না বদ্ধ য়ুনিভর্সিতীদা দা. বাবাসাহেব অম্বেদকর চেয়র ফোর বদ্ধ স্তদিজ লিংখৎখি। বোধ গয়া, শ্রাভাস্তি, কপিলভাস্তু, সঞ্চি, সতনা অমসুং রেৱাগুম্বা মফমশিংদা চাউখৎ-থৌরাংগী প্রোজেক্ত কয়া অমা পায়খৎলি। ঙসিদগী নুমিৎ হুমগী মতুংদা, ওক্তোবরগী 20দা, ঐহাক্না বরানসীদা চৎকনি। মফম অসিদা সরনাথতা চাউখৎ-থৌরাংগী থবক কয়া অমা শঙ্গাগনি। অনৌবা বিলদিংশিংগা লোয়ননা ঐখোয়না ঐখোয়গী মমাংঙৈগী মতমসু ঙাক-শেন্দুনা থম্লি। হৌখিবা চহি 10 অসিদা, ঐখোয়না মালেমগী তোঙান তোঙানবা লৈবাকশিংদগী অরিবা হেরিতেজ আর্তেফেক্ত, আর্ত ৱার্ক অমসুং রিলিক্স 600 হেন্না পুরকখ্রে। অমসুং মসিগী অশেংবা লৈহৌবশিং অসিদগী অয়াম্বদি বুধিজমগা মরী লৈনৈ। অতোপ্পা ৱাহৈ অমদা হায়রগদি, ভারতনা বুদ্ধগী লিগেসিগী রেনেসন্সতা মসিগী কলচর অমসুং সিভিলাইজেসনবু নৌনা পুথোক্লি।

ইকাই খুম্নরবা মরুপশিং,

বুদ্ধদা ভারতকী থাজবা অসি মশাগীদমক্তা নত্তে অদুবু মীওইবা খুন্নাই পুম্নমক্কী সেবা তৌবগী লম্বী অমসুনি। মালেমগী লৈবাকশিং, অমসুং বুদ্ধবু খঙজবা অমসুং থাজরিবা পুম্নমকপু ঐখোয়না মসিগী মিসন অসিদা পুনশিল্লি। মালেমগী লৈবাক কয়ানা মসিগী মাইকৈ অসিদা কন্না হোৎনরিবা অসিদা ঐহাক্না নুংঙাইবা ফাওই। ম্যান্মার, শ্রী লঙ্কা, অমসুং থাইলেন্দগুম্বা লৈবাকশিংদা পালীদা কম্মেন্তরীশিং শেমগৎলি। ভারতকীসু অসিগুম্বা থবকশিং ঐখোয়না খোঙজেল য়াংশিল্লি। ত্রেদিস্নেল মেথদশিংগা লোয়ননা ঐখোয়না ওনলাইন প্লেৎফোর্মশিং, দিজিতেল আর্কাইবশিং অমসুং এপশিংগী খুত্থাংদা পালীবুসু প্রমোৎ তৌরি। ঐহাক্না ভগৱান বুদ্ধগী মরমদা মমাংদা হায়খ্রে “বুদ্ধ বোধসু লৈরি, অমসুং বুদ্ধ রিসর্চসু লৈরি” । মরম অদুনা, ঐখোয়না ভগৱান বুদ্ধবু খঙনবগীদমক্তা ইন্তর্নেল অমসুং একাদমিক রিসর্চ অনিমক্তা মীৎয়েং থম্লি। অমসুং ঐখোয়গী সংঘ, ঐখোয়গী বুদ্ধ ইন্সতিত্যুসনশিং, অমসুং ঐখোয়গী লম্বোইবশিংনা নহারোলশিংবু মসিগী মাইকৈ অসিদা লমজিংলিবা অসিদা ঐহাক নুংঙাইবা ফাওই।

ইকাই খুম্নরবা মরুপশিং,

21শুবা চহিচা অমসুং ঙসিগী জিওপোলিতিকেগী ফীভম... মালেম অসি অমুক্কা হন্না শীংনরকপা অমসুং তম্বা ঙমদবা কয়া অমনা কোইশিল্লি। অসিগুম্বা মতমশিংদা বুদ্ধ অসি মরু ওইবতা নত্তনা তঙাইফদবা ওইরক্লি। ঐহাক্না মতম অমদা য়ুনাইতেদ নেসন্সতা হায়খি মদুদি ভারতনা মালেমদা লান পীদে বুদ্ধ পীখি। অমসুং ঙসি, ঐহাক্না থাজবগা লোয়ননা হায়জরি মদুদি মালেম পুম্বনা লান্না ৱারোইশিন পুরক্লোই, বুদ্ধদা সোলুসন ফংলগনি। অভিধম্ম দিবসকী থৌরম অসিদা, ঐনা মালেমদা হায়জরি: বুদ্ধদগী তম্মু... লানদগী লাপ্না লৈয়ু... শান্তিগী লম্বী শেম্মু... মরমদি বুদ্ধনা হায়রি, "শান্তিদগী হেন্না চাউবা নুংঙাইবা অমত্তা লৈতে।" ভগৱান বুদ্ধনা হায়খি:

“নহী বেরেন বৈরানি সম্মন্তীথ কুদাচনম

অবেরেন চ সম্মন্তি এস ধম্মো সনন্ততো”

নুংশিনদবা হায়বসি নুংশিনদবনা লোইশিনদে। নুংশিনদবা অসি মীওইবগী নুংশি-চান্নবনা নুংশিবনা লোইশিনগনি। বুদ্ধনা হায়রি, "মখোয় পুম্নমক নুংঙাইবা ওইরসনু, পুম্নমকপু য়াইফ-পাউজেল পীবিয়ু।" মসি বুদ্ধগী পাউজেলনি, অমসুং মসি মীওইবা খুন্নাইগী লম্বীনি।

ইকাই খুম্নরবা মরুপশিং,

মথংগী চহি 25, 2047 ফাওবা অসি অমৃত কালনি। অমৃত কালগী মতম অসি ভারতকী খুমাং চাউশিনবা মতম ওইগনি। মসি ভিকসিৎ ভারত শেমগৎনবা মতমনি। রোদমেপ ভারতনা মাগী চাউখৎ-থৌরাং অসি ভগৱান বুদ্ধনা তাকপীরম্বশিংনা লমজিংহনগনি। বুদ্ধগী লমদম অসিদা মালেমগী খ্বাইদগী চাউবা পোপুলেসন্না রিসোর্সশিং শীজিন্নবদা ৱাখল তারি। মালেমনা ঙসি ক্লাইমেৎ চেঞ্জকী শক্লোনদা থেংনরিবা অচৌবা খুদোংচাদবশিং অসি য়েংঙু। ভাতনা মশাগী খক্তা নত্তা শীংনবশিং অসিগী সোল্যুসনশিং থিদুনা মালেমদা শিয়র তৌরি। ঐখোয়না মিসন LiFE হৌদোক্তুনা মসিদা লৈবাক কয়া য়াওহল্লি। ভগৱান বুদ্ধনা হায়রমখি, “ঐখোয় ইশানা অফবা থবক তৌবা হৌগদবনি”। মসি মিসন LiFEকী মরু ওইবা ওইরি, মসিদা মীওই অমগী সস্তেনেবল ওইবা লাইফস্তাইলদগী সস্তেনেবল ওইবা তুংলমচৎ অমগী লম্বী পীগনি।

ভারতনা মালেমদা ইন্তর্নেস্নেল সোলর এল্লাইন্সগুম্বা প্লেৎফোর্ম অমা পীবা মতমদা, G-20 প্রসিদেন্সী মনুংদা গ্লোবেল বাইওফ্যুএল এল্লাইন্স শেমখিবা মতমদা অমসুং ভারতনা ৱান সন, ৱান ৱর্ল্দ, ৱান গ্রিদকী ভিজন পীবা মতমদা খোঙথাংশিং অসিদা বুদ্ধনা তাকপীরম্বশিংগী মমি তারি। ঐখোয়গী থৌশিলনা মালেমগীদমক সস্তেনেবল ওইবা তুংলমচৎ অমা পীরি। ইন্দিয়া-মিদ্দল ইস্ত-য়ুরোপ ইকনোমিক কোরিদোর, ঐখোয়গী গ্রীন হাইদ্রোজেন মিসন, ইন্দিয়ন রেলৱেজপু 2030 ফাওবদা নেৎ জিরো ওইহনবগী পান্দম নত্ত্রগা পেত্রোলদা ইথানোল য়ানবা চাদা 20দা হেনগৎহনবা ওইরবসু খোঙথাংশিং অসিগী খুত্থাংদা  ঐখোয়না পৃথিবীবু ঙাকশেন্নবগী ঐখোয়গী অচেৎপা ফিরেপ অদু উৎলি।

মরুপশিং,

ঐখোয়গী সরকারগী ৱারেপশিং অসি বুদ্ধ, ধম্ম অমসুং সংঘনা ইথিল পীখি। ঙসি মালেমদা খুদোংচাদবা অমা মায়োক্নবা মতমদা ভারতনা ফার্স্ত রেস্পোন্দর ওইরি। মসি বুদ্ধগী মীনুংশিগী প্রিন্সিপলগী এক্সতেন্সন্নি। তর্কীদা য়ুহার হাবা, শ্রী লঙ্কাদা ইকনোমিক ক্রাইসিস থোকপা ওইরবসু নত্ত্রগা কোবিদ-19 লাইচৎ মনুংদা ওইখিবা ফীভম ওইরবসু ভারতনা মতেং পাংনবা মাংদা থোরকখি। ভারতনা ‘বিশ্বা বন্ধু’ অমা ওইনা মীপুম খুদিংমক্কা লোয়ননা চৎলি। য়োগ মুফমেন্ত, মিল্লেৎকা মরী লৈনবা কেম্পেন , অয়ুর্বেদ, নত্ত্রগা মহৌশাগী লৌউ-পথাপ ওইরবসু ঐখোয়গী খোঙথাংশিং অসি বুদ্ধগী ইথিলনা লমজিংলি।

ইকাই খুম্নরবা মরুপশিং,

ভারতনা চাউখৎপা লৈবাক অমা ওইনবা মাইকৈদা চংশিনবগা লোয়ননা মসিনা ঐখোয়গী হৌরকফমবুসু চেৎশিনহল্লি। ঐখোয়গী পান্দমদি ভারতকী নহারোলনা সাইন্স অমসুং তেক্নোলোজীগী লমদা লমজিংবনি অমরোমদা মখোয়গী নাৎ অমসুং ভেল্যুশিংদসু চাউথোকচবা পোকপনি। খোঙথাংশিং অসিদা বুদ্ধিজমগী তাকপী-তম্বীরম্বশিংনা চাউনা লমজিংলি। ঐহাক্না থাজৈ মদুদি ঐখোয়গী সন্ত অমসুং লম্বোইবশিংগী লমজিং মখাদা অমসুং ভগৱান বুদ্ধগী তাকপী তম্বীরম্বাশিং অসিনা পুন্না মখা তানা খুমাং চাউশিনহনগনি।

য়াইফরবা নুমিৎ অসিদা ঐহাক্না অমুক হন্না থৌরম অসিগীদমক ময়াম পুম্নমক্তা নুংঙাইবা ফোংদোকচরি। পালীনা ক্লাসিকেল লোল ওইবগী নুংঙাইবগা লোয়ননা ঐখোয়না লোল অসি ঙাকশেনবা অমসুং য়োকখৎপগী অপুনবা থৌদাংসু লৌগদবনি। ঐখোয়না মসি ঙাক্নবা অমসুং থুংহন্নবা ফিরেপ লৌরসি। থাজবশিং অসিগা লোয়ননা ঐহাক্না পুম্নমপু হন্না-হন্না থাগৎচরি।

নমো বুদ্ধায়!

****