مرکزی وزیر داخلہ اور امداد باہمی کے وزیر جناب امت شاہ نے کہا ہے کہ وزیر اعظم جناب نریندر مودی کی قیادت میں حکومت ہمارے نوجوانوں کو منشیات کی لعنت سے بچا کر منشیات سے پاک بھارت کی تعمیر کے لیے پرعزم ہے۔

ایکس پلیٹ فارم پر ایک پوسٹ میں، جناب امت شاہ نے کہا کہ منشیات اور نشہ آور  اشیاء کے کاروبار کے خلاف کارروائی بغیر کسی سستی کے جاری رہے گی۔ جناب شاہ نے دہلی پولیس کو 13000 کروڑ روپے کی مالیت کی منشیات ضبط کرنے کی کئی کامیاب کارروائیوں پر مبارکباد پیش کی، جس میں حال ہی میں گجرات پولیس کے ساتھ 5000 کروڑ روپے ما لیت کی کوکین کی برآمد گی شامل ہے۔

منشیات کے کاروبار کے خلاف حالیہ کریک ڈاؤن میں، دہلی پولیس اور گجرات پولیس کے خصوصی سیل نے 13 اکتوبر 2024 کو گجرات کے انکلیشور میں واقع ایک کمپنی میں تلاشی مہم کے دوران 518 کلو گرام کوکین برآمد کی۔ ضبط کی گئی کوکین کی بین الاقوامی مارکیٹ میں قیمت تقریباً 5000 کروڑ روپے ہے۔

اس سے پہلے، 01 اکتوبر 2024 کو، دہلی پولیس کے اسپیشل سیل نے مہیپال پور میں ایک گودام پر چھاپہ مارا اور 562 کلو گرام کوکین اور 40 کلو گرام ہائیڈروپونک چرس کی کھیپ ضبط کی۔ تحقیقات کے دوران 10 اکتوبر 2024 کو دہلی کے رمیش نگر میں ایک دکان سے تقریباً 208 کلو گرام اضافی کوکین برآمد ہوئی۔ تحقیقات کے دوران پتہ چلا کہ برآمد شدہ منشیات گجرات کے انکلیشور میں قائم ایک کمپنی کی ہے۔

اس معاملے میں اب تک کل 1289 کلو گرام کوکین اور 40 کلو گرام ہائیڈروپونک تھائی لینڈ چرس برآمد ہوئی ہے، جس کی بین الاقوامی مارکیٹ میں قیمت 13000 کروڑ روپے ہے۔

************

U.No:1240

ش ح۔اک۔ق ر