మదింపు సంవత్సరం 2024-25లో ఆదాయపు పన్ను విభాగం ఇ-ఫైలింగ్ పోర్టల్ లో గడువు తేదీ ముగిసే సరికల్లా 34.84 లక్షలకు పైగా ఆడిట్ నివేదికలు దాఖలయ్యాయి. వాటిలో సుమారు 34.09 టాక్స్ ఆడిట్ రిపోర్టులు (టీఏఆర్ స్) కూడా కలిసి ఉన్నాయి. ఏవై 2023-24 కు నిర్దేశించిన గడువు తేదీ నాటికి అందిన టీఏఆర్ లతో పోలిస్తే, ఏవై 2024-25 లో దాఖలైన టీఏఆర్ లలో రమారమి 4.8 శాతం వృద్ధి నమోదైంది.

పన్ను చెల్లింపుదారులకు సహాయకారిగా ఉండాలన్న ఉద్దేశంతో, ఆదాయపు పన్ను విభాగం ఎలక్ట్రానిక్-మెయిల్స్, సంక్షిప్త సందేశాలు, వెబినార్ల ద్వారా ఆదాయపు పన్ను పోర్టల్ లో ఉంచిన సందేశాల రూపంలో ప్రచార ఉద్యమాలను చేపట్టారు. పన్ను చెల్లింపుదారులు వారి టిఎఆర్ లను,  ఇంకా ఇతర ఆడిట్ ఫారాలను గడువు తేదీ లోపల దాఖలు చేసేటట్లుగా వారిలో చైతన్యాన్ని కలిగించడం, తత్సంబంధిత అవగాహనను పెంపొందించడం ఈ ప్రచార ఉద్యమాల ఉద్దేశాలు.  తగిన మార్గదర్శకత్వం వహిస్తూ, వినియోగదారులలో చైతన్యమే ప్రధానంగా రూపొందించినటువంటి అనేక వీడియోలను ఆదాయపు పన్ను వెబ్ సైట్లో అప్ లోడ్ చేశారు. పన్ను చెల్లింపుదారులు, పన్నుల సంబంధిత వృత్తి నిపుణులు ఫారమ్ నంబర్స్ 10బీ, 10బీబీ, 3సీఎ-సీడీ, 3సీబీ-సీడీ ల రూపాలలో టీఎఆర్ లను, ఇంకా ఫారమ్ నంబర్స్ 29బీ, 29సీ, 10సీసీబీ వంటి ఇతర ఆడిట్ రిపోర్టులను నిర్దిష్ట కాలం లోపల సమర్పించడంలో ఈ ఉమ్మడి ప్రయత్నాలు తోడ్పడ్డాయి.

పన్ను చెల్లింపుదారులు ఈ సంవత్సరం సెప్టెంబరు, అక్టోబరు నెలల్లో దాఖలు చేసిన దాదాపు 1.23 లక్షల ప్రశ్నలకు జవాబులను ఇచ్చి, వారికి రిపోర్టు దాఖలు గడువు కాలమంతటా ఇ-ఫైలింగ్ హెల్ప్ డెస్క్ జట్టు అండదండలను అందించింది.  ఈ జట్టు పన్ను చెల్లింపుదారులు, పన్నుల రంగంలోని వృత్తి నిపుణులకు వారు ఎదుర్కొన్న జటిల సమస్యలను పరిష్కరించడంతో పాటు, ఆడిట్ ఫారాల సమర్పణ సాఫీగా సాగేటట్లు తోడ్పడింది. హెల్ప్ డెస్క్ కు వచ్చిన ఫోన్ కాల్స్,హెల్ప్ డెస్క్ నుండి వినియోగదారులకు వెళ్లిన ఫోన్ కాల్స్, వినియోగదారులతో సంభాషణలు, వెబ్ఎక్స్, ఇంటర్ నెట్ ఆధారిత సంప్రదింపులలో వినియోగదారులకు తగిన సూచనలను, సలహాలను ఇవ్వడం వంటి పద్దతులలో హెల్ప్ డెస్క్ సహకరించింది. ఆదాయపు పన్ను విభాగానికి ఉన్న ‘ఎక్స్’ ఖాతా ద్వారా వినియోగదారులు అడిగిన ప్రశ్నలకు కూడా ఈ జట్టు ఆన్ లైన్ రెస్పాన్స్ మేనేజ్ మెంట్ (ఓఆర్ఎమ్) మాధ్యమం ద్వారా సమాధానాలను పంపింది. ఈ విధానంతో వాస్తవ కాల ప్రాతిపదికన వేర్వేరు అంశాలపై పన్ను చెల్లిపుదారులకు, సంబంధిత వర్గాల వారికి సహాయాన్ని అందించినట్లు ఆర్థిక మంత్రిత్వ శాఖ తెలిపింది.

***