কেন্দ্ৰীয় গৃহ আৰু সহযোগিতা মন্ত্ৰী শ্ৰী অমিত শ্বাহে আজি নতুন দিল্লীত বাওঁপন্থী উগ্ৰবাদ (এলডব্লিউই)ৰ ওপৰত এখন পৰ্যালোচনা বৈঠকৰ অধ্যক্ষতা কৰে। এই বৈঠকত ছত্তীশগড়, মধ্যপ্ৰদেশ, মহাৰাষ্ট্ৰ, ওড়িশা আৰু তেলেংগানাৰ মুখ্যমন্ত্ৰী, বিহাৰৰ উপ-মুখ্যমন্ত্ৰী আৰু অন্ধ্ৰ প্ৰদেশৰ গৃহমন্ত্ৰী উপস্থিত থাকে। বাওঁপন্থী উগ্ৰবাদ-প্ৰভাৱিত অঞ্চলসমূহত উন্নয়নমূলক কাম-কাজ ত্বৰান্বিত কৰাত ৰাজ্যসমূহক সহায় কৰি থকা কেন্দ্ৰীয় মন্ত্ৰালয়সমূহৰ মন্ত্ৰীসকলো উপস্থিত থাকে। ইয়াৰ উপৰিও, কেন্দ্ৰীয় গৃহ সচিব, চোৰাংচোৱা ব্যুৰোৰ সঞ্চালক, উপ-ৰাষ্ট্ৰীয় নিৰাপত্তা উপদেষ্টা, কেন্দ্ৰীয় সশস্ত্ৰ আৰক্ষী বাহিনী আৰু কেন্দ্ৰীয় চৰকাৰৰ জ্যেষ্ঠ বিষয়া, এলডব্লিউই-প্ৰভাৱিত ৰাজ্যসমূহৰ মুখ্য সচিব, আৰক্ষী সঞ্চালক প্ৰধান আৰু জ্যেষ্ঠ বিষয়াসকলেও এই বৈঠকত অংশগ্ৰহণ কৰে।

নিজৰ ভাষণত কেন্দ্ৰীয় গৃহ আৰু সহযোগিতা মন্ত্ৰী শ্ৰী অমিত শ্বাহে কয় যে প্ৰধানমন্ত্ৰী শ্ৰী নৰেন্দ্ৰ মোদীৰ নেতৃত্বত এলডব্লিউই-প্ৰভাৱিত সকলো ৰাজ্যই কান্ধত কান্ধ মিলাই ২০২৬ চনৰ মাৰ্চ মাহৰ ভিতৰত নক্সালবাদক সম্পূৰ্ণৰূপে নিৰ্মূল কৰাৰ বাবে প্ৰতিশ্ৰুতিবদ্ধ। তেওঁ কয় যে প্ৰধানমন্ত্ৰী মোদী জীয়ে ২০৪৭ চনৰ ভিতৰত ভাৰতক এখন উন্নত ৰাষ্ট্ৰ হিচাপে গঢ়ি তোলাৰ লক্ষ্য নিৰ্ধাৰণ কৰিছে আৰু ইয়াত আমাৰ ৮ কোটি জনজাতীয় ভাই-ভনীৰ অতি গুৰুত্বপূৰ্ণ ভূমিকা আছে। শ্ৰী শ্বাহে কয় যে উন্নত ভাৰতৰ প্ৰকৃত অৰ্থ হ’ল দেশৰ ১৪০ কোটি জনসাধাৰণৰ মাজলৈ উন্নয়ন গৈ পাব লাগে, য’ত আমাৰ ৮ কোটি জনজাতীয় ভাই-ভনী অন্তৰ্ভুক্ত আছে। তেওঁ কয় যে উন্নয়নক সঁচা অৰ্থত দুৰ্গম অঞ্চল আৰু জনজাতীয় লোকলৈ নিয়াৰ ক্ষেত্ৰত আজি আটাইতকৈ ডাঙৰ বাধা হৈছে নক্সালবাদ। নক্সালবাদে গাঁওবোৰলৈ শিক্ষা, স্বাস্থ্য সুবিধা, সংযোগ, বেংকিং আৰু ডাক সেৱা আদি যাবলৈ নিদিয়ে। শ্ৰী শ্বাহে কয় যে অন্তিম ব্যক্তিৰ ওচৰলৈ উন্নয়নক লৈ যাবলৈ হ’লে আমি নক্সালবাদক সম্পূৰ্ণৰূপে ধ্বংস কৰিব লাগিব।

কেন্দ্ৰীয় গৃহমন্ত্ৰীগৰাকীয়ে কয় যে ২০১৯ চনৰ পৰা ২০২৪ চনলৈ নক্সালবাদৰ বিৰুদ্ধে যুঁজত যথেষ্ট সফলতা লাভ কৰা হৈছে। তেওঁ কয় যে আমি, কেন্দ্ৰ আৰু ৰাজ্য চৰকাৰৰ যৌথ প্ৰচেষ্টাত বাওঁপন্থী অন্ধকাৰৰ ঠাইত সাংবিধানিকভাৱে নিশ্চিত অধিকাৰ স্থাপন কৰিব বিচাৰিছোঁ আৰু বাওঁপন্থী হিংসাত্মক মতাদৰ্শৰ ঠাইত বিকাশ আৰু বিশ্বাসৰ এটা নতুন যুগ আৰম্ভ কৰিব বিচাৰিছোঁ। শ্ৰী শ্বাহে কয় যে আমি বাওঁপন্থী উগ্ৰবাদৰ বিৰুদ্ধে শূন্য সহনশীলতা আৰু চৰকাৰী আঁচনিসমূহৰ ১০০% ৰূপায়ণেৰে এলডব্লিউই-প্ৰভাৱিত অঞ্চলসমূহক সম্পূৰ্ণৰূপে উন্নত কৰি তুলিব বিচাৰোঁ।

শ্ৰী অমিত শ্বাহে কয় যে বাওঁপন্থী উগ্ৰবাদৰ বিৰুদ্ধে যুঁজিবলৈ চৰকাৰে দুটা Rule of Law নিৰ্ধাৰণ কৰিছিল। প্ৰথমতে, নক্সালবাদ-প্ৰভাৱিত অঞ্চলত আইনৰ শাসন প্ৰতিষ্ঠা কৰা আৰু অবৈধ হিংসাত্মক কাৰ্যকলাপ সম্পূৰ্ণৰূপে বন্ধ কৰা। দ্বিতীয়তে, দীৰ্ঘদিনীয়া নক্সালবাদী আন্দোলনৰ বাবে উন্নয়নৰ পৰা বঞ্চিত হৈ থকা অঞ্চলসমূহত সেই লোকচানৰ দ্ৰুতগতিত পূৰণ কৰা।

কেন্দ্ৰীয় গৃহমন্ত্ৰীগৰাকীয়ে কয় যে ৩০ বছৰৰ পাছত প্ৰথমবাৰৰ বাবে ২০২২ চনত বাওঁপন্থী উগ্ৰবাদৰ ফলত মৃত্যু হোৱা লোকৰ সংখ্যা ১০০তকৈ কম হয়, যিটো এক বৃহৎ সাফল্য। তেওঁ কয় যে ২০১৪ চনৰ পৰা ২০২৪ চনৰ ভিতৰত নক্সালবাদৰ অতি কম ঘটনা সংঘটিত হৈছিল। ইয়াৰ উপৰিও, ১৪গৰাকী শীৰ্ষ নক্সাল নেতাক নিষ্ক্ৰিয় কৰাৰ লগতে চৰকাৰী কল্যাণমূলক আঁচনিৰ গ্ৰাফো ওপৰলৈ উঠিছে। শ্ৰী শ্বাহে কয় যে বাওঁপন্থী উগ্ৰবাদৰ বিৰুদ্ধে যুঁজখন আজি চূড়ান্ত পৰ্যায়ত আছে আৰু ২০২৬ চনৰ মাৰ্চ মাহৰ ভিতৰত সকলোৰে সহযোগত দেশখন এই দশক পুৰণি সমস্যাৰ পৰা সম্পূৰ্ণৰূপে মুক্ত হ’ব। তেওঁ কয় যে আজি বুঢ়া পাহাৰ আৰু চকৰবন্ধাৰ দৰে বহু অঞ্চল বাওঁপন্থী উগ্ৰবাদৰ পৰা সম্পূৰ্ণৰূপে মুক্ত হৈছে। তেওঁ কয় যে ছত্তীশগড়ত এলডব্লিউইৰ ৮৫ শতাংশ কেডাৰ শক্তিহীন হৈছে আৰু এতিয়া আমি নক্সালবাদক চূড়ান্ত আঘাত দিয়াৰ প্ৰয়োজন আছে।

শ্ৰী অমিত শ্বাহে কয় যে ২০১৯ চনৰ পৰা মোদী চৰকাৰে বহুমুখী কৌশল ৰূপায়ণ কৰিবলৈ আৰম্ভ কৰিছিল যাৰ অধীনত কেন্দ্ৰীয় সশস্ত্ৰ আৰক্ষী বাহিনী (চিএপিএফ) নিয়োগৰ বাবে খালী ঠাই বিচাৰি পোৱা গৈছিল। ইয়াৰ ফলত এবছৰত ১৯৪টাতকৈও অধিক শিবিৰ স্থাপন কৰি আমি এক বৃহৎ সফলতা লাভ কৰিলোঁ। শ্ৰী শ্বাহে কয় যে আমি ৪৫টা থানাৰ জৰিয়তে নিৰাপত্তাৰ শূন্যতা দূৰ কৰি, ৰাজ্যৰ চোৰাংচোৱা শাখাসমূহ শক্তিশালী কৰি আৰু ৰাজ্যসমূহৰ বিশেষ বাহিনীৰ অতি উত্তম প্ৰদৰ্শনেৰে আমাৰ কৌশলত সফলতা লাভ কৰিছোঁ। তেওঁ কয় যে হেলিকপ্টাৰ ব্যৱস্থাৰ বাবে আমাৰ জোৱানৰ মৃত্যুৰ সংখ্যা যথেষ্ট হ্ৰাস পাইছে। ইয়াৰ পূৰ্বে য’ত ২খন হেলিকপ্টাৰ জোৱানৰ সেৱাত নিয়োজিত হৈছিল, আজি ১২খন হেলিকপ্টাৰ (৬খন বিএছএএফ আৰু ৬খন বায়ুসেনা) নিয়োগ কৰা হৈছে।

ছত্তীশগড় চৰকাৰক অভিনন্দন জনাই কেন্দ্ৰীয় গৃহ আৰু সহযোগিতা মন্ত্ৰীগৰাকীয়ে কয় যে চলিত বৰ্ষৰ জানুৱাৰী মাহৰ পৰা ৰাজ্যখনত মুঠ ২৩৭জন নক্সালবাদীক হত্যা, ৮১২জন গ্ৰেপ্তাৰ আৰু ৭২৩জন আত্মসমৰ্পণ হৈছে। নক্সালবাদৰ সৈতে জড়িত যুৱক-যুৱতীসকলক হিংসাৰ পথ এৰি সমাজৰ মূলসুঁতিত যোগদান কৰি দেশৰ উন্নয়নত অৰিহণা যোগাবলৈ গৃহমন্ত্ৰীগৰাকীয়ে আহ্বান জনায়। তেওঁ কয় যে উত্তৰ-পূব, কাশ্মীৰ আৰু বাওঁপন্থী উগ্ৰবাদ ক্ষতিগ্ৰস্ত অঞ্চলৰ ১৩ হাজাৰৰো অধিক লোকে হিংসা এৰি সমাজৰ মূলসুঁতিত যোগদান কৰিছে। শ্ৰী শ্বাহে কয় যে তেওঁ নক্সালবাদৰ সৈতে জড়িত যুৱক-যুৱতীসকলক কয় যে সকলো ৰাজ্যই তেওঁলোকৰ পুনৰ্বাসনৰ বাবে লাভজনক পৰিকল্পনা কৰিছে। তেওঁ কয় যে নক্সালবাদে কেতিয়াও কাৰো উপকাৰ নকৰে, এই কথা এতিয়া সম্পূৰ্ণৰূপে প্ৰমাণিত হৈছে।

শ্ৰী অমিত শ্বাহে কয় যে ২০০৪ চনৰ পৰা ২০১৪ চনলৈকে নিৰাপত্তা সম্পৰ্কীয় ব্যয় পৰিকল্পনাত ১১৮০ কোটি টকা ব্যয় কৰা হৈছিল, যিটো ২০১৪ চনৰ পৰা ২০২৪ চনৰ ভিতৰত মোদী চৰকাৰে প্ৰায় ৩গুণ বৃদ্ধি কৰাত ৩,০০৬ কোটি টকা হৈছে। তেওঁ কয় যে এলডব্লিউই পৰিচালনাৰ বাবে কেন্দ্ৰীয় সংস্থাসমূহক ১০৫৫ কোটি টকা সাহায্য আঁচনিত দিয়া হৈছিল। শ্ৰী শ্বাহে কয় যে বিশেষ কেন্দ্ৰীয় সাহায্য হৈছে এক নতুন আঁচনি যাৰ অধীনত মোদী চৰকাৰে বিগত ১০ বছৰত ৩৫৯০ কোটি টকা ব্যয় কৰিছে। তেওঁ কয় যে এই পৰ্যন্ত মুঠ ১৪,৩৬৭ কোটি টকা অনুমোদন কৰা হৈছে, ইয়াৰে ১২,০০০ কোটি টকা ব্যয় কৰা হৈছে।

কেন্দ্ৰীয় গৃহমন্ত্ৰীগৰাকীয়ে কয় যে ২০০৪ চনৰ পৰা ২০১৪ চনৰ ভিতৰত ১০ বছৰত ৬৬টা দুৰ্গম থানা নিৰ্মাণ কৰা হৈছে, আনহাতে ২০১৪ চনৰ পৰা ২০২৪ চনৰ ভিতৰত ১০ বছৰত ৫৪৪টা থানা নিৰ্মাণ কৰা হৈছে। ২০১৪ চনৰ আগৰ ১০ বছৰত ২৯০০ কিলোমিটাৰ পথ নেটৱৰ্ক নিৰ্মাণ কৰা হৈছিল, যিটো যোৱা ১০ বছৰত ১৪,৪০০ কিলোমিটাৰলৈ বৃদ্ধি পাইছে। ইয়াৰ লগতে ২০০৪ চনৰ পৰা ২০১৪ চনলৈকে মোবাইল সংযোগৰ বাবে কোনো প্ৰচেষ্টা চলোৱা হোৱা নাছিল, আনহাতে ২০১৪ চনৰ পৰা ২০২৪ চনলৈকে ৬০০০টা টাৱাৰ স্থাপন কৰা হৈছে আৰু ইয়াৰে ৩৫৫১টা টাৱাৰক ৪জি বনোৱাৰ কামো সম্পূৰ্ণ হৈছে। ২০১৪ চনৰ আগতে মাত্ৰ ৩৮খন একলব্য আদৰ্শ বিদ্যালয়ৰ অনুমোদন পোৱা গৈছিল, এতিয়া যোৱা ১০ বছৰত ২১৬খন বিদ্যালয় অনুমোদিত হৈছে, ইয়াৰে ১৬৫খন একলব্য আৰ্হি বিদ্যালয় অস্তিত্বলৈ আহিছে। গৃহমন্ত্ৰীগৰাকীয়ে কয় যে এই সকলোবোৰ প্ৰচেষ্টাই দেখুৱাইছে যে আমি কিমান একাগ্ৰতাৰে উন্নয়ন ত্বৰান্বিত কৰাৰ বাবে কাম কৰিছোঁ।

শ্ৰী অমিত শ্বাহে কয় যে ২০০৪ চনৰ পৰা ২০১৪ চনৰ ভিতৰত ১০ বছৰত ১৬৪৬৩টা হিংসাৰ ঘটনা সংঘটিত হৈছিল যিবোৰ এতিয়া প্ৰায় ৫৩% অৰ্থাৎ ৭৭০০ লৈ হ্ৰাস পাইছে। একেদৰে অসামৰিক আৰু নিৰাপত্তা বাহিনীৰ মৃত্যুৰ হাৰ ৭০% হ্ৰাস পাইছে, হিংসাৰ ৰিপোৰ্ট কৰা ৯৬খন জিলাত এতিয়া ৫৭ শতাংশ হ্ৰাস পাই ১৬ হৈছেগৈ। হিংসাৰ খবৰ দিয়া আৰক্ষী থানাৰ সংখ্যাও ৪৬৫ৰ পৰা ১৭১টালৈ হ্ৰাস পাইছে, ইয়াৰে ৫০খন থানা নতুনকৈ নিৰ্মাণ কৰা হৈছে। শ্ৰী শ্বাহে কয় যে এই সফলতা সকলো ৰাজ্য আৰু কেন্দ্ৰীয় চৰকাৰৰ যৌথ প্ৰচেষ্টাৰ ফল আৰু আমি ইয়াক অধিক দৃঢ়তা আৰু উৎসাহেৰে আগুৱাই নিব লাগিব।

কেন্দ্ৰীয় গৃহমন্ত্ৰীগৰাকীয়ে কয় যে নক্সালবাদৰ বিৰুদ্ধে ছত্তীশগড়ত যি সফলতা লাভ কৰা হৈছে সেয়াই আমাৰ সকলোকে অনুপ্ৰাণিত কৰে। তেওঁ কয় যে বাওঁপন্থী উগ্ৰবাদৰ দ্বাৰা ক্ষতিগ্ৰস্ত সকলো জিলাতে ছত্তীশগড় চৰকাৰে উন্নয়নৰ এক নতুন অভিযান আৰম্ভ কৰিছে। ব্যক্তিগত আৰু পাৰিবাৰিক কল্যাণৰ বাবে ভাৰত চৰকাৰ আৰু ছত্তীশগড় চৰকাৰৰ প্ৰায় ৩০০ আঁচনিৰ ১০০% চেচুৰেচনৰ লক্ষ্য নিৰ্ধাৰণ কৰা হৈছে। তেওঁ কয় যে এই আঁচনিৰ বাবে বিদ্যালয়, সস্তীয়া শস্য, সস্তীয়া ঔষধ, জনস্বাস্থ্য কেন্দ্ৰ আদি এতিয়া গাঁওসমূহত উপস্থিত হৈছে।

শ্ৰী অমিত শ্বাহে কয় যে নিৰাপত্তাৰ শূন্যতা পূৰণৰ বাবে ২০১৯ চনৰ পৰা আমি ২৮০টা নতুন শিবিৰ সৃষ্টি কৰিছোঁ, ১৫টা নতুন যৌথ টাস্ক ফ’ৰ্চ গঠন কৰিছোঁ আৰু বিভিন্ন ৰাজ্যত ৰাজ্যৰ আৰক্ষীক সহায় কৰিবলৈ চিআৰপিএফৰ ৬টা বেটেলিয়ন প্ৰেৰণ কৰিছোঁ। ইয়াৰ সমান্তৰালকৈ এনআইএও সক্ৰিয় কৰা হৈছে আৰু নক্সালবাদীৰ বিত্তীয় সাহায্য বন্ধ কৰাৰ বাবে আক্ৰমণাত্মক কৌশল গ্ৰহণ কৰা হৈছে যাৰ বাবে তেওঁলোকৰ আৰ্থিক সম্পদৰ অভাৱ হৈছে। গৃহমন্ত্ৰীগৰাকীয়ে কয় যে কেইবাদিনো ধৰি বহু অভিযান চলোৱা হৈছিল যাৰ বাবে নক্সালবাদী ঘেৰাও হৈ যায় আৰু তেওঁলোকে পলায়নৰ সুযোগ নাপায়।

কেন্দ্ৰীয় গৃহ আৰু সহযোগিতা মন্ত্ৰীগৰাকীয়ে কয় যে ফ্লেগশ্বিপ আঁচনিসমূহৰ উপৰিও মোদী চৰকাৰে পথ সংযোগ, দূৰসংযোগৰ সুবিধাসমূহৰ উন্নতি, আৰ্থিক অন্তৰ্ভুক্তি, দক্ষতা বিকাশ, শিক্ষা, স্বাস্থ্য আৰু পুষ্টি ইত্যাদি গুৰুত্বপূৰ্ণ উন্নয়নমূলক বিন্দুসমূহত কঠোৰ পৰিশ্ৰম কৰিছে আৰু ইয়াৰ ফল লাভ কৰিছে, ভাল ফলাফলো পাইছে। প্ৰধানমন্ত্ৰী শ্ৰী নৰেন্দ্ৰ মোদীয়ে ২ অক্টোবৰত ঝাৰখণ্ডৰ ভূমিৰ পৰা ধৰতী আবা জনজাতি গ্ৰাম উৎকৰ্ষ অভিযানৰ শুভাৰম্ভ কৰে। তেওঁ কয় যে বাওঁপন্থী উগ্ৰবাদ-প্ৰভাৱিত অঞ্চলত প্ৰায় ডেৰ কোটি জনসংখ্যাৰ ১৫ হাজাৰৰো অধিক গাঁও আৰু প্ৰায় ডেৰ কোটি জনসংখ্যাৰ ব্যক্তিগত সা-সুবিধা প্ৰদান আৰু গ্ৰামাঞ্চলৰ সম্পূৰ্ণ পৰিপূৰকতাৰ বাবে ধৰতী আবা জনজাতীয় উৎকৰ্ষ অভিযান এক মাইলৰ খুঁটি হিচাপে প্ৰমাণিত হ’বলৈ গৈ আছে। শ্ৰী শ্বাহে কয় যে মোদী চৰকাৰে ৩-চি অৰ্থাৎ পথ সংযোগ, মোবাইল সংযোগ আৰু বিত্তীয় সংযোগ শক্তিশালী কৰি আছে।

গৃহমন্ত্ৰীগৰাকীয়ে কয় যে জনজাতীয় অঞ্চলৰ উন্নয়নত নক্সালবাদ আটাইতকৈ ডাঙৰ বাধা আৰু সমগ্ৰ মানৱতাৰ শত্ৰু আৰু মানৱ অধিকাৰৰ আটাইতকৈ ডাঙৰ উলংঘাও। তেওঁ কয় যে ৮ কোটি লোকক মৌলিক সা-সুবিধাৰ পৰা বঞ্চিত কৰাটো মানৱ অধিকাৰৰ আটাইতকৈ ডাঙৰ উলংঘা। শ্ৰী শ্বাহে কয় যে নক্সালবাদীয়ে সংস্থাপন কৰা লেণ্ডমাইনৰ ফলত হাজাৰ হাজাৰ নিৰীহ জনজাতীয় ভাই-ভনীৰ মৃত্যু হয় আৰু নক্সালবাদৰ বাবেই এই অঞ্চলসমূহত উন্নয়ন স্তব্ধ হৈ পৰিছে।

কেন্দ্ৰীয় গৃহমন্ত্ৰীগৰাকীয়ে কয় যে নক্সালবাদ সম্পূৰ্ণৰূপে শেষ কৰিবলৈ হ’লে আমি এই সমস্যা চিৰদিনৰ বাবে শেষ কৰিবলৈ চূড়ান্ত হেঁচা দিয়াটো প্ৰয়োজনীয়। তেওঁ আটাইকেইখন ৰাজ্যৰ মুখ্যমন্ত্ৰীসকলক মাহত এবাৰকৈ আৰু আৰক্ষী সঞ্চালক প্ৰধানসকলক ১৫ দিনত অন্ততঃ এবাৰ হ’লেও উন্নয়ন আৰু নক্সাল বিৰোধী অভিযানৰ পুনৰীক্ষণ কৰিবলৈ কয়।

শ্ৰী অমিত শ্বাহে কয় যে আমি নক্সালবাদ সম্পূৰ্ণৰূপে নিৰ্মূলৰ দিশত কাম কৰা উচিত। আমি ২০২৬ চনৰ এপ্ৰিল মাহত দেশবাসীৰ সামূহিক শক্তিৰ জৰিয়তে দেশক এই কথা ক’ব লাগিব যে ৰাজ্য চৰকাৰসমূহ আৰু কেন্দ্ৰীয় চৰকাৰে মিলি নক্সালবাদৰ সমস্যা সম্পূৰ্ণৰূপে সমাপ্ত কৰি পেলাইছে। তেওঁ কয় যে ইয়াৰ পিছত উন্নয়নৰ পথত কোনো বাধা নাথাকিব, কেতিয়াও মানৱ অধিকাৰৰ উলংঘা নহ’ব আৰু মতাদৰ্শৰ নামত হিংসাও নহ’ব।

**********

RK/ASH/PR/PS