কেন্দ্রগী য়ুম্লৈ-কৈরৈ অমসুং কোওপরেশন মন্ত্রী, শ্রী অমিত শাহনা গুজরাতকী গান্ধিনাগরদা হিরামনি আরোগ্যাধাম দে-কিয়র হোসপিতাল শঙ্গাখ্রে। থৌরম অসিদা গুজরাতকী মুখ্য মন্ত্রী, শ্রী ভুপেন্দ্র পতেল য়াওনা দিগ্নিতরী কয়া অমনা শরুক য়াখি।

শ্রী অমিত শাহনা থমখিবা মহাক্কী ৱারোলদা মহাক্না হায়খি মদুদি গুজরাতকী হান্নগী মুখ্য মন্ত্রী অমসুং হৌজিক্না লৈবাক অসিগী প্রধান মন্ত্রী, শ্রী নরেন্দ্র মোদীনা হেল্থকিয়র ফেসিলিতীশিং ফগৎহন্নবা অমসুং মখোয়বু মীয়ামদা ফংহন্নবা খোংথাং কয়া অমা লৌখৎলম্মি। মহাক্না পনখি মদুদি শ্রী নরহরি অমিননা খুনাই অসিগী সেবা তৌনবা অমসুং মখোয়গী অৱাবশিং অদুবু কোকহন্নবা লেপ্পা লৈতনা থবক তৌখি। শ্রী শাহনা হায়খি মদুদি নরহরি জীনা রাজ্যগী ক্রিকেত এসোসিয়েশনগী খুত্থাংদা গুজরাত শিনথুংনা এথলেতশিংগীদমক্তা ইনফ্রাস্ত্রকচর শেমগৎলম্মি। মসিগী মথক্তা স্কুলশিংগী খুত্থাংদা অঙাং ৪,০০০ রোমদা অফবা এজুকেশন পীনবা অমসুং মখোয়গী চাউখৎ-থৌরাংদা মতেং পাংনবা শিংথানিংঙাই ওইবা থবক কয়া অমা তৌরম্মি। শ্রী শাহনা মখা তারদুনা হায়রকখি মদুদি ওল্দ এজ হোমশিং অমসুং অন্নপুর্না ত্রস্ত লিংখত্তুনা, নরহরি জীনা হৌজিক্তি মহাক্কী ইমা-পাবুংগী নিংশিং খুদম ওইনা হিরামনি আরোগ্যধাম অসি শাখ্রে, মসিমক য়াম্না শিংথানিংঙাইনি।

কেন্দ্রগী য়ুম্লৈ-কৈরৈ মন্ত্রীনা হায়খি মদুদি মোদর্ন লাইফস্তাইলশিং, য়াম্না য়াংবা পুনশি মহিং, পুল্যুশন অমসুং অতোপ্পা মরম কয়া অমানা লাইনা কয়া অমা থোকহন্দুনা ঐখোয়গী হকচাং অসিবু শোকহন্দুনা মতম শাংনা লাইয়েংবগী মথৌ তাই। মহাক্না পনখি মদুদি মসিগী লাইওংশিং অসি অনম্বা মতমদা থেরাপীশিং, দাইলাইসিস, ফিজিয়োথেরাপী কয়া অমা অমসুং মসিগী লাইনাশিং অসিনা পীরিবা চৈথেংশিং অদুবু হন্থহন্নবা অতোপ্পা লাইয়েং কয়া অমা মথৌ তাই। শ্রী শাহনা তাক্লকখি মদুদি অসিগুম্বা লাইয়েশিং অসি অয়াম্বনা য়াম্না মমল য়াম্মি অমসুং লাইরবশিং, মিদল ক্লাসশিং, অমসুং খুঙ্গংগী মফমশিংদা লৈবা মীশিংদা ফংবা ঙমদে। মসিগী শিংনবশিং অসিগী খল্লগা, শ্রী নরহরি জীনা ঙসি শঙ্গাখিবা হিরামনি আরোগ্যধাম অসি শাখিবনি। শ্রী শাহনা পনখি মদুদি নরহরি জীনা মীয়ামগী হকশেলগা মরি লৈনবা অৱাবশিং অদুবু কোকহন্নবা ময়াম পুম্নমক্কী ওইবা খোংথাং অসি লৌখিবনি।  

শ্রী অমিত শাহনা হায়খি মদুদি পর্ধান মন্ত্রী, শ্রী নরেন্দ্র মোদীনা মীয়ামগী হকশেলগী মতাংদা খল্লগা স্বচ্ছ ভারত মিসন হোদোকখিবনি, মসিনা অনহাইজিনিক ওইবা ফিভমশিংনা মরম ওইরগা থোকহনবা লাইনাশিংদগী ঙাকথোকপদা মীয়ামগী মতেং পাংলি। মহাক্না মখাতানা পনখি মদুদি মসিগী মতুংদা, সরকার অসিনা য়ুমথোং খুদিংদা অশেংবা থক্নবা ঈশিংশিং ফংহল্লে, য়ুম খুদিংদা তোইলেতশিং শাহল্লে, মসিনা ঈশিংদগী থোরকপা লাইনাশিংদগী ঙাকথোকপদা মতেং পাংখি। মসিগী মতুং ইল্লদুনা য়ুম খুদিংগী তোইলেতশিং শাখ্রে, অমসুং চাং নাইনা হকচাং শেজেল তৌববু মীয়ামগী নোংমগী তৌদবা য়াদ্রবা শরুক অমা ওইহন্নবা ইন্তর্নেস্নেল য়োগ দে হৌদোকখ্রে। শ্রী শাহনা মখা তারকখি মদুদি প্রধান মন্ত্রী অয়ুশমান কার্দকী খুত্থাংদা, পি.এম. মোদীনা মী মিলিয়ন কয়াদা লুপা লাখ মঙা ফাওবগী কমপ্রেহেন্সিব হেল্থকিয়র কোবরেজ পীখ্রে, মসিনা মখোয়বু মমল য়াম্বা লাইয়েংশিংগী অৱাবা পোৎলুম অদুদগী কোকহনবীরে।

কেন্দ্রগী য়ুম্লৈ-কৈরৈ মন্ত্রীনা পনখি হায়খি মদুদি সরকারনা থৌরাং কয়া অমদি তৌবা য়াই অদুবু মতিকচাবা ইনফ্রাস্ত্রকচর লৈতনা ময়ামগী পুল্লপকী হেল্থকিয়র তৌবা হায়বসি ওইথোক্তে। মহাক্না পনখি মদুদি, মসিবু কোকহন্নবগীদমক্তা, প্রধান মন্ত্রী, নরেন্দ্র মোদীনা লৈবাক শিনথুংনা হেল্থ ইনফ্রাস্ত্রকচর শেমগৎনবগী থবক হৌখি। শ্রী শাহনা হায়খি মদুদি মোদী সরকার না মথংগী চহি ১০ অসিদা মেদিকেল সীতশিংগী মশিং অদু ৭৫,০০০দা হেনগৎনবগী পান্দম থম্লি। মমল তাংবা হিদাক-লাংথক্কী অৱাবা অদুবু কোকহন্নবা, সরকারনা জেনরিক মেদিসিন পীনবা মেকানিজম অমা থমখ্রে, মসিনা লাইরবশিংদা চাদা ১০দগীনা ৩০ ফাওবা হন্থবা মমলদা হিদাক-লাংথকশিং ফংবা ঙমহল্লি হায়নশু মহাক্না পনখি।

শ্রী অমিত শাহনা হায়খি মদুদি হেল্থকিয়র সেতঅপ পুম্নমক অসি তোঙান-তোঙান স্কীম ৩৭ রোম পুনশীন্দুনা শেমখিবনি। মসিগী তোঙান-তোঙানবা অনৌবা থৌরাং ৩৭ অসি পুনশিন্দুনা লৈবাক অসি মী বিলিয়ন ১.৪ অসিগী হেল্থকা মরি লৈননা মায়োক্নরিবা অৱাবশিং অদুবু কোকহন্নবা পাখৎখিবা থবক্নি। মসি মীয়ামগী অৱাবশিংবু কোকহন্নবা য়াম্না ৱাখল খন্থদুনা অমসুং তুংগী খল্লগা শেম্বা থৌরাংশিংগী ময়েক লারবা খুদম অমনি হায়না শ্রী শাহনা য়াম্না মরু ওইনা পনখি।

কেন্দ্রগী য়ুম্লৈ-কৈরৈ মন্ত্রীনা হায়খি মদুদি করিগুম্বা ক্রোনিক ওইবা লাইনাশিংগী নুমিৎ খুদিংগী লাইয়েং চত্থনবগী ফেসিলিতীশিং, খুদম ওইনা দাইলাইসিস অমসুং ফিজিয়োথেরাপীগুম্বা অসি মনাক নক্না অমসুং অহোংবা মমলদা ফংলবদি, লাইরবশিংনা মসিদগী কান্নগনি। মহাক্না পনখি মদুদি হিরামনি আরোগ্যধামদা, লাইওং কয়া অমগী থেরাপীশিং, দাইলাইসিসশিং অমসুং ফিজিয়োথেরাপীবু মীচম প্রজাশিংগীদমক্তা য়াম্না হোংনা ফংহল্লে।

*****