ঙাকশেল মন্ত্রী শ্রী রাজনাথ সিংহনা ভারতকী দিফেন্স ইন্দস্ত্রীগা খুৎশম্নদুনা থবক তৌমিন্নদুনা মপাঙ্গল কনখৎহন্নবা অমসুং লৈবাক অসিবু মালেমগী মেনুফেকচরিং হব অমা ওইহন্নবা প্রধান মন্ত্রী শ্রী নরেন্দ্র মোদীগী মঙলান অদু মংফাওনহন্নবা সরকারগী অচেৎপা ফিরেপ অদু অমুক হন্না ফোংদোকখ্রে। 2024গী ওক্তোবর 4দা ন্যু দিল্লীদা সোসাইতী ওফ ইন্দিয়ন দিফেন্স মেনুফেকচর্রস (SIDM) গী তরেৎশুবা চহিগী মীফমদা ৱা ঙাংলদুনা ঙাকশেল মন্ত্রীনা হৌজিক চত্থরিবা রসিয়া-য়ুক্রেনগী লান অসি মতমগী মতুং ইন্না মপাঙ্গল কনখৎহনবা অমসুং পাকথোক চাউথোকহনবা য়াবা মপাঙ্গল লৈবা দিফেন্স ইন্দস্ত্রীএল বেজ অমা শেমগৎনবা নীংশিংহল্লিবা অমনি হায়না ফোঙদোকখি।

শ্রী রাজনাথ সিংহনা হায়খি মদুদি সরকার অসিনা থংন-থংননা অহুমশুবা তর্মদা মপাঙ্গল লৈরবা, ইন্নোভেতিব অমসুং মশা-মরোমদোম লেপচবা ঙম্বা দিফেন্স ইকোসিস্তেম অমা শেমগৎনবা হোৎনরিবা অসিদা অনৌবা থৌনা অমা পীরগনি। উত্তর প্রদেশ অমসুং তামিল নাদুদা দিফেন্স ইন্দস্ত্রীএল কোরিদোরশিং শেম্বা, পোজিতিব ইন্দিজিনাইজেসন লিস্তশিং (PILশিং) ইসু তৌবা, ওর্দিনান্স ফেক্তরী বোর্দপু কোর্পোরেতাইজেসন তৌবা, DRDO প্রাইবেৎ ইন্দস্ত্রীশিং হেন্দহোল্দ তৌবা অমসুং দিফেন্স এক্বিজিসন প্রোসিজর 2020 পুথোকপা য়াওনা মহাক্না দিফেন্সতা 'আত্মনির্ভরতা' ফংনবা লৌখৎলিবা খোঙথাংশিং পনখি।

আইতেম 5,500 হেনবা য়াওনা নোতিফাই তৌরবা PIL 10 অদুগী মতাংদা, ঙাকশেল মন্ত্রীনা হায়খি মদুদি ৱাখল্লোন অসি আর্মদ ফোর্সেসপু ভারতকী লৈমায়দা পুথোকপা প্লেৎফোর্মশিং/ইক্বিপমেন্তশিং শীজিন্নহনবনি। লিস্তশিং অসি স্তেতিক নত্তে, দাইনামিকনি হায়না পল্লদুনা মহাক্না ইন্দস্ত্রীদা হায়রিবা পোৎলমশিং অসিগীদমক্তা লেপ্লিবা মতমগী মনুংদা মপুং ফানা মশা-মরোমদোম লেপচবা ঙমহন্নবা অমসুং লিস্ত অসি মখা তানা তেনশিনহন্নবা তকশিনখি। মালেম শীনবা থুংনা ঙাকশেলগী লমদা য়াম্না থুনা অহোংবা লাক্লিবা অসি য়েংলগা PILশিংদা হাপচিনবা য়াবা পোৎলমশিং য়েংশিন্নবা অমসুং মশক খঙদোক্নবা মহাক্না মখোয়দা তকশিনখি।

শ্রী রাজনাথ সিংহনা হায়খি মদুদি সরকারনা হোৎনরিবশিং অসিগী মতুং ইন্না লৈবাক অসিদা ইজ ওফ দুইং বিজিনেসকীদমক খুদোংচাবা পীরবা এনভাইর্নমেন্ত অমা শেম্লে অমসুং ভারতকী দিফেন্স ইন্দস্ত্রী অসি এক্সপোর্ত ওরিয়েন্তেদ ওইহন্নবা পান্দম থম্লে। শেনবা চহি 2023-24দা দিফেন্স এক্সপোর্ত অসি রেকোর্দ ওইনা লুপা করোর 21,000 হেনবদা য়ৌহনবদা প্রাইবেৎ সেক্তরগী অচৌবা থৌদাং অদু মহাক্না থাগৎপা ফোংদোকখি। মহাক্না ইন্দস্ত্রীদা এক্সপোর্ত অমসুং ইম্পোর্তকী মশিংশিং অদু খঙজিন্নবা অমসুং তার্গেৎ ওরিয়েন্তেদ  এপ্রোচ অমগা লোয়ননা অনিগী মরক্তা লৈরিবা রেসিও অসি হন্থহন্নবা হোৎননবা হায়খি।

শেনবা চহি 2023-24দা চহিগী দিফেন্স প্রদক্সন লুপা করোর লাখ 1.27গী রেকোর্দ লৈরকপদা ঙাকশেল মন্ত্রীনা নুংঙাইবা ফোংদোকখি। DPSUশিংগী শরুক লুপা করোর লাখ অমা ওইরি, প্রাইবেৎ কম্পনীশিংনা লুপা করোর 27,000 গী শেনফম শরুক তমখি। মহাক্না হায়খি মদুদি প্রাইবেৎ ইন্দস্ত্রীশিংগী শরুক হেনগৎহন্নবা অচৌবা খুদোংচাবা লৈরি, অমসুং মথংগী পান্দমদি মখোয়গী শরুক য়ামদ্রবদা অপুনবা দিফেন্স প্রদক্সনগী শরুক অনি ওইহনবনি। পান্দম অসি ফংনবা সরকারনা মপুং ফানা মতেং পাংগনি হায়না মহাক্না থাজবা পীখি।

সরকারনা মপান লৈবাক্কী কম্পনীশিং অমসুং ওরিজিনেল ইক্বিপপমেন্ত মেনুফেকচর্রশিং (OEMশিং) ভারত্তা শেল থাদনবা নত্ত্রগা প্রাইবেৎ ইন্দস্ত্রীগা লোয়ননা জোইন্ত ভেঞ্চরশিং হাংদোক্নবা পুক্নিং থৌগৎনবা মীৎয়েং থম্লি হায়না পল্লদুনা শ্রী রাজনাথ সিংহনা SIDMদা ফার্ম-তু-ফার্মদা তেংবাং পীনবগী রোদমেপ অমা শেম্নবা হায়খি। ভারতকী ইন্দস্ত্রীদা নিচ তেক্নোলোজীশিং নৎত্রগা থৌওংশিং ভারত্তা পুরকপগী পোতেন্সিএল লৈ হায়না মহাক্না ফোংদোকখি।

দিফেন্স সেক্তরদা স্মোল অমসুং মেদিয়ম ইন্তর্প্রাইজশিং (SME) অমসুং স্তার্ত-অপশিংগী পোতেন্সিএল অদু খঙলদুনা, ঙাকশেল মন্ত্রীনা ইজ ওফ দুইং বিজিনেস ফংবদা মখোয়না থেংনরিবা শীংনবশিং অদু খঙখি। SIDMনা লৈঙাক্কা নক্না থবক তৌমিন্নদুনা গ্রাউন্দ লেবেলগী ইসুশিং কোকহন্নবা অমসুং মসিগী ইন্তর্প্রাইজশিং অসি দিফেন্স মেন্যুফেকচরিংদা হেন্না চাউবা থৌদাং লৌবদা মতেং পাংনবা মহাক্না তকশিনখি। “ঐখোয়গী পোলিসীশিং অসি গ্রাউন্দ লেভেলদা ইজ ওফ দুইং বিজিনেস ওন্থোকপা হায়বসি য়াম্না মরু ওই। SIDMনা স্তার্ত-অপশিং অমসুং SMEশিংনা থেংনরিবা প্রেক্তিকেল ওইবা শীংনবশিং মশক খঙদোকপদা মতেং পাংবা য়াই,” হায়না মহাক্না মখা তাখি।

শ্রী রাজনাথ সিংহনা ইন্দস্ত্রীদা আর্তিফিসিএল ইন্তেলিজেন্স (AI), সাইবর দিফেন্স, অমসুং ওতোনোমস সিস্তেমশিংগুম্বা অৱাংবা থাক্কী তেক্নোলোজীশিংদা অহেনবা ইনভেস্তমেন্ত তৌনবা তকশিনখি। “ভারতকী দিফেন্স ইন্দস্ত্রীনা মালেমগী চৎনবীগা লোয়ননা চৎমিন্নবা অমসুং অৱাংবা থাক্কী তেক্নোলোজীদা মীৎয়েং থমগদবনি। AI অমসুং ওতোনোমস সিস্তেমশিংগুম্বা লমশিংদা ইনভেস্তমেন্তশিং হেনগৎহনবগী তঙাই ফদবা লৈ, মসিনা লানগী তুংলমচৎ মশক তাক্কনি। সরকারনা মথৌ তাবা মতেং পুম্নমক পীনবা শেম-শারি," হায়না মহাক্না ফোংদোকখি।

সেসন অদুগী মনুংদা, ঙাকশেল মন্ত্রীনা দিফেন্স মেনুফেকচরিংদা মশক থোকপা মায়পাকপশিং শকখঙনবা SIDM চেম্পিয়ন এৱার্দশিংসু য়েন্থোকখি। মহাক্না এৱার্দশিং অসি সেক্তর অসিগী খ্বাইদগী ফবা থবকশিং অসিগী বেঞ্চমার্ক অমা ওইনা থবক তৌগদবা ভারতকী মেনুফেকচররশিংগী দেদিকেসন অমসুং এক্সিলেন্সকী মমি অমা ওইরি হায়না ফোংদোকখি।

থৌরম অদুদা চীফ ওফ দিফেন্স স্তাফ, জেনরেল অনিল চৌহান, সেক্রেতরী (দিফেন্স প্রদক্সন) শ্রী সঞ্জীব কুমার, SIDMগী প্রসিদেন্ত শ্রী রাজিন্দর সিংহ ভাতিয়া অমসুং ইন্দস্ত্রীগী কেপ্তেনশিংসু শরুক য়াখি। সেসন অসিগী থিমদি "ইন্দিয়ন দিফেন্স ইন্দস্ত্রীদা শক্তি পীবা: এক্সপোর্তশিং অমসুং ইন্দিজিনস ইন্নোভেসন কেতালাইজ তৌবা"নি। মসিনা মালেমগী দিফেন্স এক্সপোর্তর অমসুং ইন্নোভেসন হব অমা ওইনা ভারতকী চাউখৎলক্লিবা থৌদাং অদুদা স্তেকহোল্দরশিংনা খন্ন-নৈনবগী ফোরম অমা ওইখি।

****