ఖేలో ఇండియా పథకం జనరల్ కౌన్సిల్ (జీసీ) 4వ సమావేశం ఈరోజు న్యూఢిల్లీలో కేంద్ర యువజన వ్యవహారాలు & క్రీడలు, కార్మిక & ఉపాధి మంత్రి డాక్టర్ మాన్‌సుఖ్ మాండవీయ అధ్యక్షతన జరిగింది. ఈ సమావేశానికి అన్ని రాష్ట్రాల సీనియర్ అధికారులు, ప్రముఖ క్రీడా నియంత్రణ మండళ్లు, జాతీయ క్రీడా సమాఖ్యలు, కేంద్ర మంత్రిత్వ శాఖలకు చెందిన ముఖ్య ప్రతినిధులు హాజరయ్యారు.

ఈ సందర్భంగా... ప్రజాభిప్రాయం కోసం నూతన క్రీడా విధాన ముసాయిదాను మంత్రిత్వ శాఖ వెబ్‌సైట్‌లో విడుదల చేసినట్లు కేంద్ర మంత్రి ప్రకటించారు. దేశంలో అభివృద్ధి చెందుతున్న క్రీడారంగానికి అనుగుణంగా ప్రస్తుత కార్యాచరణను ఆధునీకరించే, నవీకరించే లక్ష్యంతో ఈ క్రీడా విధానాన్ని రూపొందించామని తెలిపారు. ఈ క్రీడా విధానం గురించి రాష్ట్రాలు, కేంద్రపాలిత ప్రాంతాల ప్రభుత్వాలతో పాటు సాధారణ ప్రజల అభిప్రాయాలను ఆహ్వానిస్తున్నామన్నారు. ఈ అభిప్రాయాల మేరకు ఖరారు చేసే క్రీడా విధానం రాష్ట్రాలు వారి సొంత విధానాన్ని రూపొందించుకోవడంలో ఒక నమూనాగా ఉపయోగపడనుంది.

సమావేశం సందర్భంగా, డాక్టర్ మాండవీయ ఖేలో ఇండియా పథకం పురోగతిని సమీక్షించారు. క్రీడాకారులు, అథ్లెట్ల ప్రదర్శన మెరుగుపరిచేందుకు క్రీడా మౌలికసదుపాయాలు, వసతుల అభివృద్ధి గురించి వివరంగా చర్చించారు. ప్రతిభను వెలికితీయడంలో అలాగే మెరుగుపరచడంలో కృషి చేస్తున్న వివిధ సంస్థలు, కేంద్ర, రాష్ట్ర ప్రభుత్వ పథకాలు, ప్రభుత్వ రంగ సంస్థలు (పీఎస్‌యూలు), జాతీయ క్రీడా సమాఖ్యల మధ్య సమన్వయం కోసం ఒక సంయుక్త కార్యాచరణ అవసరాన్ని కేంద్ర మంత్రి ప్రధానంగా ప్రస్తావించారు.

కింది విషయాలపై దృష్టి సారించడం కోసం కేంద్ర మంత్రి సబ్-కమిటీల ఏర్పాటుకు ఆదేశించారు:

1. క్రీడాకారుల మెరుగైన కెరీర్ పురోగతి కోసం మంత్రిత్వ శాఖలు, విభాగాలలో నియామక విధానాలను మెరుగుపరచడం

2.  అథ్లెట్ల సంక్షేమం, సహాయం కోసం గల వ్యవస్థలను మెరుగుపరచడం.  

3.  అట్టడుగు స్థాయి నుంచి ప్రతిభను గుర్తించేందుకు సమర్థమంతమైన కార్యక్రమాలను అభివృద్ధి చేయడం.

కేంద్ర మంత్రిత్వ శాఖల్లో క్రీడాసంబంధ నియామకాల సమాచారం కోసం ప్రత్యేక పోర్టల్‌ను రూపొందించినట్లు కేంద్ర మంత్రి ప్రకటించారు. క్రీడల కోటాలో ఖాళీల సమాచారాన్ని ప్రచారం చేయడానికి, అందరికీ అందుబాటులో ఉంచడానికి అలాగే నియామకాల్లో పారదర్శకతను పెంచడానికి ఈ ప్లాట్‌ఫామ్‌ను ఉపయోగించుకునేలా రాష్ట్రాలను ప్రోత్సహిస్తామన్నారు.

ఈ సమావేశంలో పీఎం గతి శక్తి కింద క్రీడా మౌలిక సదుపాయాల ఏకీకృత డేటాబేస్‌ ఏర్పాటు పురోగతిపై సమీక్ష నిర్వహించారు. దేశంలోని అన్ని క్రీడా మౌలిక సదుపాయాల సమగ్ర జాబితా రూపొందించడానికి రాష్ట్రాలు, క్రీడా సమాఖ్యలు, ఇతర సంస్థలు సమాచారాన్ని సేకరించాలని డాక్టర్ మాండవీయ ఆదేశించారు.

***