ખેલો ઇન્ડિયા યોજનાની જનરલ કાઉન્સિલ (જીસી)ની ચોથી બેઠક આજે નવી દિલ્હીમાં કેન્દ્રીય યુવા બાબતો અને રમતગમત તથા શ્રમ અને રોજગાર મંત્રી ડૉ. મનસુખ માંડવિયાની અધ્યક્ષતામાં યોજાઈ હતી. આ બેઠકમાં રાજ્યોનાં વરિષ્ઠ અધિકારીઓ, રમતગમત નિયંત્રણ બોર્ડ, રાષ્ટ્રીય રમત સંઘો અને કેન્દ્રીય મંત્રાલયોનાં મુખ્ય પ્રતિનિધિઓ સામેલ થયાં હતાં.

કેન્દ્રીય મંત્રીએ એક મહત્ત્વપૂર્ણ જાહેરાત કરતાં માહિતી આપી હતી કે, મંત્રાલયની વેબસાઇટ પર રમત-ગમત નીતિનો મુસદ્દો જાહેર ચર્ચાવિચારણા માટે બહાર પાડવામાં આવ્યો છે. આ નીતિનો ઉદ્દેશ દેશના વિકસિત થતા રમતગમતના લેન્ડસ્કેપને અનુરૂપ વર્તમાન માળખાને આધુનિક અને અપડેટ કરવાનો છે. રાજ્યો અને કેન્દ્રશાસિત પ્રદેશોની સરકારો તેમજ સામાન્ય લોકો સહિતના હિતધારકોને તેમના પ્રતિભાવો રજૂ કરવા માટે આમંત્રિત કરવામાં આવે છે. એક વખત આખરી ઓપ અપાયા બાદ, આ નીતિ એવા રાજ્યો માટે પણ એક નમૂનારૂપ બની રહેશે, જેમણે હજુ સુધી પોતાની રમતગમતની નીતિઓ પ્રસ્થાપિત કરી નથી.

આ બેઠક દરમિયાન ડૉ. માંડવિયાએ ખેલો ઇન્ડિયા યોજનાની પ્રગતિની સમીક્ષા કરી હતી અને રમતવીરોનું પ્રદર્શન વધારવા માટે રમતગમતની માળખાગત સુવિધાઓ અને સુવિધાઓમાં સુધારો કરવા અંગે વિસ્તૃત ચર્ચા કરી હતી. તેમણે કેન્દ્ર અને રાજ્ય સરકારની વિવિધ યોજનાઓ, જાહેર ક્ષેત્રના એકમો (પીએસયુ) અને રાષ્ટ્રીય રમતગમત સંઘો હેઠળ પ્રતિભાઓની ઓળખ અને સંવર્ધનમાં સામેલ વિવિધ એજન્સીઓ વચ્ચે સંકલન સુનિશ્ચિત કરવા સંપૂર્ણ સરકારી અભિગમની જરૂરિયાત પર ભાર મૂક્યો હતો.

કેન્દ્રીય મંત્રીએ પેટા-સમિતિઓના પુનર્ગઠનને નીચેની બાબતો પર ધ્યાન કેન્દ્રિત કરવા સૂચના આપી હતીઃ

1. રમતવીરો માટે કારકિર્દીની વધુ સારી પ્રગતિ સુનિશ્ચિત કરવા માટે મંત્રાલયો અને વિભાગોમાં ભરતી નીતિઓ અને પ્રક્રિયાઓમાં સુધારો કરવો.
2. રમતવીરો માટે કલ્યાણ અને સપોર્ટ સિસ્ટમમાં વધારો કરવો.
3. જમીની સ્તરે પ્રતિભાની ઓળખ માટે અસરકારક કાર્યક્રમોનો વિકાસ કરવો.

અન્ય એક મહત્ત્વપૂર્ણ નિર્ણયમાં કેન્દ્રીય મંત્રીએ એક સમર્પિત પોર્ટલની રચના કરવાની જાહેરાત કરી હતી, જેમાં તમામ કેન્દ્રીય મંત્રાલયોમાં રમતગમતની ભરતી અંગેની માહિતી હશે. રાજ્યોને સ્પોર્ટ્સ ક્વોટાની ખાલી જગ્યાઓની જાહેરાત કરવા, ભરતીમાં સુલભતા અને પારદર્શિતા વધારવા માટે આ પ્લેટફોર્મનો ઉપયોગ કરવા માટે પણ પ્રોત્સાહિત કરવામાં આવશે.

આ બેઠકમાં પીએમ ગતિ શક્તિ હેઠળ યુનિફાઇડ સ્પોર્ટ્સ ઇન્ફ્રાસ્ટ્રક્ચર ડેટાબેઝ પરની પ્રગતિની સમીક્ષા પણ સામેલ છે. ડૉ. માંડવિયાએ દેશમાં રમતગમતના તમામ માળખાની વિસ્તૃત યાદી ઊભી કરવા રાજ્યો, રમતગમતનાં મહાસંઘો અને અન્ય સંસ્થાઓનાં ડેટાનું સંકલન કરવાની સૂચના આપી હતી.

AP/GP/JT

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com