کھیلو انڈیا  اسکیم کی جنرل کونسل (جی سی) کی چوتھی میٹنگ آج نئی دہلی میں نوجوانوں  و کھیل  کود کے امور اور محنت و روزگار کے مرکزی وزیر  ڈاکٹر منسکھ مانڈویا کی صدارت میں منعقد  ہوئی ۔ میٹنگ میں ریاستوں کے سینئر عہدیداروں، نمایاں اسپورٹس کنٹرول بورڈوں، قومی اسپورٹس فیڈریشنوں اور مرکزی وزارتوں کے اہم نمائندوں نے شرکت کی۔

ایک اہم اعلان میں  مرکزی وزیر نے اطلاع دی کہ وزارت کی ویب سائٹ پر عوامی مشاورت کے لیے مسودہ اسپورٹس پالیسی جاری کر دی گئی ہے۔ اس پالیسی کا مقصد ملک میں کھیلوں کے بدلتے ہوئے منظرنامے کے مطابق موجودہ ڈھانچے کو جدید  بنانا اور اپ ڈیٹ کرنا ہے۔ ریاستوں اور مرکز کے زیر انتظام  علاقوں کی حکومتوں سمیت تمام متعلقہ فریقوں  اور عوام سے رائے دینے کی دعوت دی گئی ہے۔ پالیسی کو حتمی شکل دینے کے بعد، یہ ان ریاستوں کے لیے بھی ایک ماڈل کے طور پر کام کرے گی  ، جنہوں نے ابھی تک اپنی کھیلوں  سے متعلق پالیسیاں نہیں  بنائی ہیں۔

میٹنگ کے دوران ڈاکٹر منسکھ مانڈویا نے کھیلو انڈیا اسکیم کی پیش رفت کا جائزہ لیا اور کھلاڑیوں کی کارکردگی کو بہتر بنانے کے لیے کھیلوں کے بنیادی ڈھانچے اور سہولیات کو بہتر بنانے  کے بارے میں تفصیلی بات چیت کی۔ انہوں نے مختلف مرکزی اور ریاستی حکومتی اسکیموں، پبلک سیکٹر انڈرٹیکنگز (پی ایس یوز ) اور کھیلوں کی  قومی فیڈریشنوں  کے تحت ٹیلنٹ کی شناخت اور  انہیں پروان چڑھانے میں شامل مختلف ایجنسیوں کے درمیان ہم آہنگی کو یقینی بنانے کے لیے  ہول – آف – گورنمنٹ اپروچ کی ضرورت پر زور دیا۔

مرکزی وزیر نے ذیلی کمیٹیوں کی ازسرنو تشکیل کی ہدایت دی تاکہ درج ذیل نکات پر توجہ دی جا سکے:

1. وزارتی اور محکمہ جاتی سطح پر بھرتی کی پالیسیوں اور طریقہ ٔ کار کو بہتر بنایا جائے تاکہ کھلاڑیوں کے لیے بہتر کیریئر کی ترقی کو یقینی بنایا جا سکے۔
2. کھلاڑیوں کی فلاح و بہبود اور معاون نظام کو بہتر بنایا جائے۔
3. زمینی سطح پر ٹیلنٹ کی شناخت کے لیے موثر پروگرام تیار کیے جائیں۔

ایک اور اہم فیصلے میں مرکزی وزیر نے ایک مخصوص پورٹل کے قیام کا اعلان کیا، جو مرکزی وزارتوں میں کھیلوں سے متعلق بھرتی  کے بارے میں معلومات فراہم کرے گا۔ ریاستوں کو بھی اس پلیٹ فارم کو استعمال کرنے کی ترغیب دی جائے گی تاکہ کھیلوں  سے متعلق کوٹے کی اسامیوں کے اشتہار شفافیت  کے ساتھ جاری کئے جا سکیں اور بھرتی تک رسائی کو بہتر بنایا جا سکے۔

میٹنگ میں پی ایم گتی شکتی کے تحت متحدہ کھیلوں کے بنیادی ڈھانچے کے ڈاٹا بیس  کی سمت میں ہونے والی پیش رفت کا جائزہ بھی شامل تھا۔ ڈاکٹر مانڈویا نے ریاستوں، اسپورٹس فیڈریشنوں  اور دیگر اداروں سے ڈاٹا اکٹھا کرنے کی ہدایت دی تاکہ ملک میں تمام کھیلوں کے  بنیادی ڈھانچے کی ایک جامع فہرست تیار کی جا سکے۔

*****

( ش ح  ۔ م م    ۔ ع ا  )

U.No. 809