தெலுங்கானா மாநிலம் ஹைதராபாத்தில் உள்ள நல்சார் சட்டப் பல்கலைக்கழகத்தின் 21-வது பட்டமளிப்பு விழாவில் குடியரசுத் தலைவர் திருமதி திரௌபதி முர்மு இன்று (செப்டம்பர் 28, 2024) கலந்து கொண்டார்.

மாணவர்கள் மத்தியில் உரையாற்றிய குடியரசுத் தலைவர் , நமது சுதந்திரப் போராட்டத்தின் கொள்கைகளான நீதி, சுதந்திரம், சமத்துவம், சகோதரத்துவம் ஆகியவை நமது அரசியலமைப்புச் சட்டத்தில் இடம்பெற்றுள்ளன என்று கூறினார். முகப்புரையிலும், அடிப்படை உரிமைகளிலும் பொறிக்கப்பட்டுள்ள சமத்துவ லட்சியம், நீதி வழங்குதல் தொடர்பான அரசுக் கொள்கையின் வழிகாட்டும் கோட்பாடுகளில் ஒன்றிலும் வெளிப்பாட்டைக் காண்கிறது. சமமான நீதி மற்றும் இலவச சட்ட உதவியை வழங்க இந்த உத்தரவு முயல்கிறது. இது அரசை பொறுப்பாக்குகிறது என்று கூறினார். 

பொருளாதார அல்லது பிற இயலாமைகள் காரணமாக எந்தவொரு குடிமகனுக்கும் நீதியைப் பெறுவதற்கான வாய்ப்புகள் மறுக்கப்படக்கூடாது என்பதை உறுதி செய்யவேண்டும் என அவர் கூறினார். துரதிர்ஷ்டவசமாக, ஒரு பணக்காரருக்கு கிடைக்கும் அதே நீதி ஒரு ஏழைக்கு கிடைப்பதில்லை. இந்த நியாயமற்ற சூழ்நிலை சிறப்பாக மாற வேண்டும். இளம் சட்ட வல்லுநர்கள் மாற்றத்தின் முகவர்களாக இருக்க வேண்டும் என்று அவர் வலியுறுத்தினார்.

வழக்குரைஞர்கள் என்ற முறையில், தங்கள் கட்சிக்காரர்களின் நலன்களில் அக்கறை செலுத்துவதுடன், நீதி வழங்குவதில் நீதிமன்றத்திற்கு உதவ வேண்டிய கடமை தங்களுக்கு உள்ளது என்று குடியரசுத் தலைவர் மாணவர்களிடம் கூறினார். ஒரு சட்ட நிபுணராக அவர்கள் எந்தப் பாத்திரத்தைத் தேர்ந்தெடுத்தாலும், அவர்கள் எப்போதும் நேர்மை மற்றும் தைரியத்தின் மதிப்புகளில் ஒட்டிக்கொள்ள வேண்டும் என்று அவர் கூறினார். அதிகாரத்திடம் உண்மையைப் பேசுவது அவர்களை மேலும் சக்திவாய்ந்தவர்களாக ஆக்குகிறது என்று அவர் மேலும் கூறினார்.

பல்வேறு துறைகளில் நல்சார் சட்டப் பல்கலைக்கழகம் முன்னிலை வகித்துள்ளது குறித்து குடியரசுத் தலைவர் மகிழ்ச்சி தெரிவித்தார். இயலாமை, நீதிக்கான அணுகல், சிறை மற்றும் சிறார் நீதி மற்றும் சட்ட உதவி தொடர்பான பிரச்சினைகளில் நல்சார் மேற்கொண்ட முயற்சிகளை அவர் பாராட்டினார். நல்சார் விலங்குகள் சட்ட மையத்தை அமைத்துள்ளது குறித்து அவர் மகிழ்ச்சி தெரிவித்தார். விலங்குகள் மற்றும் பறவைகள், மரங்கள் மற்றும் நீர்நிலைகளை மனிதகுலத்தின் நல்வாழ்வுக்கான தேவைகளாக இளைய தலைமுறையினர் பாதுகாக்க எதிர்பார்க்கிறார்கள் என்றும், நல்சாரின் விலங்கு சட்ட மையம் அந்த திசையில் ஒரு நல்ல படியாகும் என்றும் அவர் கூறினார்.

பெண்களின் பாதுகாப்பை மேம்படுத்துவதில் சமூகத்தின் ஒவ்வொரு பிரிவினரும் ஒரு பங்குதாரர் என்று குடியரசுத் தலைவர் கூறினார். நல்சார் உட்பட அதன் முன்னாள் மாணவர்கள் அனைவரின் ஆதரவையும் பெற்று, பெண் வழக்கறிஞர்கள் மற்றும் சட்ட மாணவர்களின் நாடு தழுவிய வலையமைப்பை அமைக்க உதவுமாறு அவர் வலியுறுத்தினார். பெண்களுக்கு எதிரான வன்கொடுமைகளைத் தடுக்கவும், இதுபோன்ற வன்கொடுமைகள் தொடர்பான வழக்குகளைக் கையாளவும் இந்த நெட்வொர்க் ஒருங்கிணைந்த முயற்சிகளை மேற்கொள்ளும் என்று அவர் நம்பிக்கை தெரிவித்தார்..

*****

PKV/ KV