న్యూఢిల్లీలో సెప్టెంబర్ 19న జరిగిన భారత నావికాదళ కమాండర్ల రెండో సదస్సును ఉద్దేశించి రక్షణ మంత్రి శ్రీ రాజ్ నాధ్ సింగ్ ప్రసంగించారు. హిందూ మహాసముద్ర ప్రాంతంలో శాంతి సుస్థిరతలను కొనసాగించడంలో భారత నావికాదళం ముఖ్యమైన పాత్ర పోషిస్తోందని ప్రశంసిస్తూ, ఆర్థిక, భౌగోళిక, రాజకీయ, వాణిజ్య, భద్రతాపరమైన అంశాల దృష్ట్యా ఈ ప్రాంతం ఎంతో సున్నితమైనదనీ, విలువైనదనీ ఆయన పేర్కొన్నారు.

రెండు వైపులా నీళ్లు ఉన్నందున, భారతదేశాన్ని పూర్వం భూపరివేష్టిత దేశంగా భావించేవారనీ, కానీ ఇప్పుడు ఒక భూ సరిహద్దులు గల ద్వీపంలా భారతదేశాన్ని చూస్తున్నారని మంత్రి వ్యాఖ్యానించారు. దేశ నావికా వాణిజ్య ప్రయోజనాలను భారత నావికాదళం సమర్ధవంతంగా పరిరక్షిస్తోందని కొనియాడారు. దీని వల్ల, విపత్తు సంభవించినప్పుడు మొదటగా స్పందించేది భారత నావికాదళమేనన్న పేరుని తెచ్చుకుందని రాజ్ నాధ్ సింగ్ వ్యాఖ్యానించారు.

 “ప్రపంచ దేశాల వాణిజ్యం ఎక్కువగా హిందూ మహాసముద్ర ప్రాంతం మీదుగానే సాగుతున్నందున, ఈ ప్రాంతానికి ప్రాముఖ్యత ఉందన్నారు. అదే సమయంలో, సముద్ర దొంగల దుశ్చర్యలు, హైజాకింగ్, డ్రోన్ దాడులు, క్షిపణి దాడులు, సముద్రంలోని కేబుళ్ళను కత్తిరించడం వంటి సమస్యలను ఎదుర్కొంటున్న సున్నితమైన ప్రాంతమిది.

ఇండో-పసిఫిక్ ప్రాంత భాగస్వామ్య దేశాల ఆర్థిక అవసరాలను పరిరక్షిస్తూ, హిందూ మహాసముద్రంలో వాణిజ్య కార్యకలాపాలు సజావుగా సాగిపోవడంలో మన నావికా దళం కీలక పాత్ర పోషిస్తోంది. సముద్ర దొంగలను నిలువరించడంలో భారత నావికాదళం చేపట్టిన చర్యలకు కేవలం దేశం నుంచే కాక ప్రపంచవ్యాప్తంగా ప్రశంసలు లభిస్తున్నాయి. హిందూ మహాసముద్ర ప్రాంతంలో అత్యుత్తమ రక్షణ భాగస్వామిగా భారత్ నిలుస్తోంది. అవసరం వచ్చినపుడు, ఈ ప్రాంతం అంతటికీ మనం భద్రతను అందించగలం” అని శ్రీ రాజ్ నాధ్ సింగ్  పేర్కొన్నారు.

ఇండో-పసిఫిక్ ప్రాంతంలో భారత నౌకదళ ప్రాబల్యం పెరుగుతున్నప్పటికీ ప్రపంచవ్యాప్తంగా నెలకొని ఉన్న అనిశ్చిత పరిస్థితుల దృష్ట్యా, ఎటువంటి పరిస్థితినైనా ఎదుర్కొనేందుకు, ఎప్పటికప్పుడు కొత్త వ్యూహాలతో సిద్ధంగా ఉండాలని నావికాదళ కమాండర్లకు మంత్రి ఉద్బోధించారు. ఆర్థికపరమైన, వాణిజ్య, రవాణా రంగాల్లోనే కాక దేశ ప్రయోజనాలను కాపాడేందుకు బలమైన నావికాదళం అవసరమని రాజ్ నాధ్ సింగ్ స్పష్టం చేశారు. 

ఆత్మ నిర్భర్ లేదా స్వావలంబన సాధన ఆశయంగా భారత నావికా దళాన్ని మరింత బలోపేతం చేయడం ప్రధానమంత్రి నేతృత్వంలోని కేంద్రప్రభుత్వ లక్ష్యమనీ, ఇందుకోసం అత్యాధునిక యుద్ధ నౌకలు, జలాంతర్గాములతో  దళానికి అదనపు బలాన్ని జోడిస్తున్నామని మంత్రి చెప్పారు. దేశంలోని ఓడరేవుల్లో ఇప్పటికే 64 నౌకలు, జలాంతర్గాముల  నిర్మాణం జరుగుతోందని, మరో 24 తయారు చేయాల్సిందిగా చెప్పామని అన్నారు.

గత అయిదేళ్లలో నావికదళ ఆధునీకరణ కోసం కేటాయించిన నిధుల్లో మూడింట రెండు వంతుల కంటే ఎక్కువగా ఖర్చు చేసి, స్వదేశీ పరిశ్రమల నుంచే అవసరమైన వాటిని తీసుకున్నామని, దేశ రక్షణ వ్యవస్థల్ని మునుపటి కంటే ఎంతో మెరుగ్గా తీర్చిదిద్దినట్లు చెప్పారు. భారత నావికదళం స్వదేశీ ఉత్పత్తులకు ప్రాధాన్యం ఇవ్వడాన్ని ప్రశంసించిన రాజ్ నాధ్ సింగ్, ‘ఆత్మనిర్బరతా’ లక్ష్యాన్ని అందుకునేందుకు మరిన్ని అవకాశాలను పరిశీలించాలని పిలుపునిచ్చారు. భారత నావికదళం కొనుగోలుదారు నుండి ఉత్పత్తిదారుగా పరివర్తనం చెందాలన్న ఆశయం నెరవేరి, 2047 సంవత్సరాల కల్లా నావికాదళం  స్వావలంబన సాధించగలదన్న ఆశాభావాన్ని వ్యక్తం చేశారు.

సహదళాలతో సహకారం, వనరుల సద్వినియోగం ప్రాముఖ్యత గురించి ప్రస్తావిస్తూ, భారత నావికాదళం,  భారత తీర రక్షణ దళం, వేటికవే బలమైనవని అన్నారు. స్థిరమైన చక్కని పద్ధతులు/వ్యవస్థలను కలిగి ఉన్నప్పటికీ, ఇరు దళాలు సహకారంతో కలిసి పని చేస్తూ దేశ తీర రక్షణను బలోపేతం చేసేందుకు కలిసికట్టుగా పనిచేయాలని పిలుపునిచ్చారు. కార్యక్రమంలో భాగంగా ఏర్పాటైన సాంకేతిక ప్రదర్శనను రాజ్ నాధ్ సింగ్ సందర్శించారు. ఇందులో భారత నావికాదళ పరిశోధన అభివృద్ధి సంస్థ, ఆయుధ/ఎలక్ట్రానిక్స్ ఇంజనీరింగ్ సంస్థ సహా వివిధ రక్షణ సంస్థలు ప్రదర్శించిన దేశవాళీ ఉత్పత్తులు, స్వయం ప్రతిపత్తి గల రక్షణ వ్యవస్థలు, సాఫ్ట్ వేర్ ఆధారిత రేడియోలు, ఒక ప్రాంతాన్ని అవగాహన చేసుకునే వ్యవస్థలు, తదితర అత్యాధునిక/అత్యున్నత శ్రేణి ఉత్పత్తులను ప్రదర్శించింది. రక్షణ మంత్రి సందర్శన సందర్భంగా రక్షణ దళాల ప్రధానాధికారి జనరల్ అనిల్ చౌహాన్, నావికాదళ అధిపతి అడ్మిరల్ దినేష్ కే త్రిపాఠి, రక్షణ కార్యదర్శి శ్రీ గిరిధర్ అరమానే, ఇతర రక్షణ, ఉన్నతాధికారులు పాల్గొన్నారు. 

ఏడాదికి రెండుసార్లు జరిగే ఈ అత్యున్నత స్థాయి సమావేశాల్లో కీలకమైన వ్యూహాత్మక పాలనాపరమైన అంశాలను నావికాదళ కమాండర్లు చర్చిస్తారు. ఎప్పటికప్పుడు మారుతున్న భౌగోళిక రాజకీయ పరిస్థితులు, భౌగోళిక వ్యూహాత్మక అంశాలు, పశ్చిమాసియాలో తలెత్తుతున్న ప్రాంతీయ సవాళ్లు/ తీర ప్రాంత భద్రతలో ఎదురయ్యే సంక్లిష్టమైన సమస్యల దృష్ట్యా భారత నావికాదళ పాత్రను తీర్చిదిద్దడంలో ఈ సమావేశాలు కీలక పాత్ర పోషిస్తాయి

ఈ అత్యున్నత స్థాయి సదస్సులు భారత తీర ప్రాంత ప్రయోజనాలను కాపాడగలమన్న నౌకాదళ నిబద్ధతకు వేదికగా నిలుస్తూ, నావికాదళ యుద్ధసన్నద్ధత, విశ్వసనీయత, ఐక్యత, సవాళ్ళకు సన్నద్ధంగా ఉండే నావికాదళ ప్రతిష్ఠకు గుర్తుగా నిలుస్తున్నాయి.

***