ঙাকশেল মন্ত্রী শ্রী রাজনাথ সিংহনা সেপ্তেম্বর 19, 2024দা নই দিল্লীদা নেভেল কম্মান্দরশিংগী কনফরেন্স ‘24গী অনিশুবা ইদিসনদা ৱা ঙাংখ্রে। ইন্দিয়ন ওসিন্দা শান্তি অমসুং চাউখৎপা পুরকপদা মরুওইবা থৌদাং লৌরিবা ভারতকী নেভীবু মহাক্না থাগৎখি। মহাক্না লমদম অসি শেন্মিৎলোন, জিওপোলিতিকেল, ত্রেদ অমসুং সেক্যুরিতীগী হীরমশিংদা মমল য়াম্লবা অমসুং সেন্সিতিব ওইবা লমদম অমনি হায়না ফোংদোকখি।

ভারত অসি মমাংঙৈদা সমুদ্রনা কোইশিনবা লৈবাক অমা ওইরম্মি অদুবু হৌজিক্তি মসি কংফালগী ঙমখৈ লৈবা ঈথৎকী লৈবাক অমা ওইনা উবা ফংলে হায়না পল্লদুনা ঙাকশেল মন্ত্রীনা লৈবাক অসিগী মেরিতাইম ইন্তরেস্তশিং ঙাক-শেনবগীদমক ইন্দিয়ন নেভীনা শেম-শারিবা অদু থাগৎপা ফোংদোকখি। মসিনা লমদম অসিদা অহানবা রেস্পোন্দর অমা ওইনা ভারতকী থাজবা লৈহল্লি।

“মালেমগী ললোন-ইতিক্কী শরুক অয়াম্বা লমদম অসিগী খুত্থাংদা চৎলি, মসিনা মফম অসিবু মমল য়াম্বা ওইহল্লি। মসিগা লোয়ননা, পাইরেসী, হাইজেকিং, দ্রোন এতেক, মিসাইল এতেক অমসুং সমুদ্রদা সমুদ্রগী কেবল কনেক্সন থুগাইবগুম্বা থৌদোকশিংনা মসি য়াম্না সেন্সিতিব ওইহল্লি। ঐখোয়গী নেভীনা ইন্দো-পেসিফিককী স্তেকহোল্দর লৈবাক পুম্নমক্কী শেন্মিৎলোনগী ইন্তরেস্ত ঙাক্নবা অমসুং ভারত মহাসাগর লমদমদা গুদশিং লেপ্পা লৈতনা মুফমেন্ত তৌহনবদ চাউনা তেংবাংলি। মাগী এন্তি-পাইরেসী ওপরেসনশিং অসি ভারত খক্তদা নত্তনা মালেম পুম্বদা থাগৎপা ফোংদোক্লি। হৌজিক ভারত অসি লমদম অসিদা সেক্যুরিতীগী মরুওইবা পার্তনর অমা ওইরে। করিগুম্বা মথৌ তারবদি, লমদম অসিদা ঐখোয়না সেক্যুরিতী লৈহল্লগনি," হায়না শ্ররী রাজনাথ সিংহনা ফোংদোকখি।

ইন্দো-পেসিফিক লমদমদা ভারতকী নেভীগী মপাঙ্গল হেনগৎলক্লিবা অসি লায়না লৌরোইদবনি হায়না ঙাকশেল মন্ত্রীনা ফোংদোকখি। মহাক্না কম্মান্দরশিংদা মতম মতমগী ওইনা ইন্ত্রোস্পেক্সন তৌদুনা লৈনবা অমসুং হৌজিক মালেমগী ওইরক্লিবা মতৌ অসিগী ফীভম খুদিংমক্কীদমক শেম-শাদুনা লৈনবা হায়খি। শেন্মিৎলোন, ললোন-ইতিক, ত্রান্সপোর্ত অমসুং অপুনবা নেস্নেল ইন্তরেস্তশিং ঙাকথোক্নবা মপাঙ্গল কনবা নেভেল কেপাসিতী অমা মথৌ তাই হায়না মহাক্না অকনবা ৱাফম থমখি।

শ্রী রাজনাথ সিংহনা প্রধান মন্ত্রী শ্রী নরেন্দ্র মোদীনা লুচিংবা সরকারনা আত্মনির্ভর ওইবদা মীৎয়েং থমদুনা, ইন্দিয়ন নেভীবু হেন্না মপাঙ্গল কনখৎহন্নবা, মাগী কেপাসিতী দিবেলপমেন্তকীদমক স্তেৎ-ওফ-দি-আর্ত শিপশিং, সবমেরিনশিং অসিনচিংবা য়াওহন্দুনা ভারত নেভীবু হেন্না মপাঙ্গল কনখৎহন্নবা হোৎনরি হায়না অমুক হন্না ফোংদোকখি। মহাক্না হায়খি মদুদি হৌজিক ভারতকী শিপয়ার্দশিংদা জহাজ অমসুং সবমেরিন 64 শাবগী থবক চত্থরি অমসুং অহেনবা প্লেৎফোর্ম 24গী ওর্দর পীখ্রে।

ঙাকশেল মন্ত্রীনা মখা তাখি মদুদি হৌখিবা চহি মঙা অসিদা নেভীগী মোদর্নাইজেসন বজেৎকী শরুক অহুম থোকপগী অনীদগী হেন্না লৈবাক অসিদা পোৎ লৈবদা শিজিন্নখ্রে। মসিনা লৈবাক অসিগী ঙাকশেলগী ইকোসিস্তেম অসি খুমাং চাউশিলহনখ্রে। শ্রী রাজনাথ সিংহনা নেভীগী ইন্দিজেনাইজেসনগী থবকশিং থাগৎপা ফোংদোক্লদুনা, মহাক্না কম্মান্দরশিংদা "আত্মানির্ভরতা" ফংনবগী ৱারেপ অদু হেন্না মপাঙ্গল কনখৎহন্নবা পাম্বৈশিং থিদোক্নবা খঙহনখি। মহাক্না থাজবা ফোংদোকখি মদুদি নেভীবু "বয়র" অমদগী "বিল্দর" অমদা ওন্থোক্নবা পান্দম অসি 2047 ফাওবদা মপুং ফানা মশা-মরোমদোম লেপচবদা মতেং ওইগনি।

ঙাকশেল মন্ত্রীনা পুন্না থবক তৌমিন্নবগী মরুওইবা অমসুং রিসোর্সশিংবু খ্বাইদগী ফবা মওংদা শিজিন্নবগী মতাংদসু ৱা ঙাংখি। মহাক্না হায়খি মদুদি ইন্দিয়ন নেভী অমসুং ইন্দিয়ন কোস্ত গার্দকী মশাগী মপাঙ্গল, মেন্দেত অমসুং থবক তৌবগী মওং লৈরবসু, লৈবাক অসিগী মেরিতাইম সেক্যুরিতী মপাঙ্গল কনখৎহন্নবগীদমক হেন্না কোওর্দিনেসন মথৌ তাই।

থৌরম অদুদা শ্রী রাজনাথ সিংহনা থৌরম অদুগী শরুক অমা ওইনা পাংথোকপা তেক দেমো অমদা শরুক য়াখি। নেভীগী প্রিমিয়র R&D ওর্গানাইজেসন, ৱীপন্স এন্দ ইলেক্ত্রোনিক্স সিস্তেম্স ইঞ্জিনীয়রিং ইস্তাব্লিশমেন্ত য়াওনা তোঙান তোঙানবা এজেন্সীশিংনা ওতোনোমস সিস্তেম, দোমেন এৱেরনেস, সোফৱেয়র দিফাইন রেদিও অমসুং অতৈ নিচ তেক্নোলোজীগী খোঙথাংশিং য়াওনা লমদমসিগী ওইবা সোলুসনশিং উৎখি। থৌরম অদুদা দিফেন্স স্তাফকী চীফ, জেনরেল অনিল চৌহান, নেভেল স্তাফকী চীফ, এদমিরেল দিনেশ কে ত্রিপাথি, দিফেন্স সেক্রেতরী শ্রী গিরিধর অরামানে অমসুং অতোপ্পা সেনিয়র সিবিল অমসুং মিলিতরী ওফিসিএলশিংসু শরুক য়াখি।

কনফরেন্স অসি নেভেল কম্মান্দরশিংগী মরক্তা মরু ওইবা স্ত্রেতেজিক, ওপরেস্নেল অমসুং এদমিনিস্ত্রেতিব ইসুশিংদা খন্ন-নৈনবগী খুদোংচাবা পীরিবা অৱাংবা থাক্কী চহি অনিগী ওইবা থৌরম অমনি। জিওপোলিতিকেল অমসুং জিওস্ত্রেতিজিক দাইনামিক্স, রিজনেল চেলেঞ্জশিং অমসুং ৱেস্ত এসিয়াদা মেরিতাইম সেক্যুরিতীগী ফিভমদা কম্প্লেক্সিতী লৈরক্লিবা অসিগী মতাংদা পাংথোকপা কনফরেন্স অসিনা ইন্দিয়ন নেভীগী তুংগী খোঙচৎ শেম্বদা মরুওইবা থৌদাং অমা লৌরি।

কনফরেন্স অসিনা মরুওইবা প্লেৎফোর্ম অমা ওইদুনা, ভারতকী মেরিতাইম ইন্তরেস্তশিং ঙাক্নবা নেভীগী অচেৎপা ফিরেপ অমসুং নেভীগী ফীভম অসি "কোম্বেত রেদি, ক্রেদিবেল, কোহেসিভ অমসুং ফ্যুচর রেদি ফোর্স" অমা ওইনা শৌগৎলি।

******