ভারতকী রাস্ত্রপতি শ্রীমতি দ্রৌপদি মুর্মুনা মধ্য প্রদেশকী উজৈন্দা পাঙথোকপা সফাই মিত্র সম্মেলন থৌরমদা ঙসি (সেপ্তেম্বর ১৯, ২০২৪)দা শরুক য়াদুনা ৱা ঙাংখ্রে। মহাক্না ইন্দোর-উজৈনা সিক্স লেন রোদ প্রোজেক্তসু থৌরম অদুদা উরেপ উয়ুং তমখি।

তিল্লিবা মীয়ামদা ৱা ঙাংলদুনা রাস্ত্রপতিনা হায়খি মদুদি ঐখোয়গী সফাই মিত্রশিংনা সেনিতেসনগী ফ্রন্ত লাইন ৱারিয়রনি। মখোয়না ঐখোয়বু লায়না, উফুল ৱাইফুল, অমসুং হকশেলদা লাক্কদবা অকিবা কয়াদগী ঙাকথোকপীরি। মখোয়না লৈবাক শেম্বা মতমদা য়াম্না মরু ওইবা থৌদাং লৌরি। ঐখোয়না লোকেল, রাজ্য, অমসুং জাতিগী থাক্তা লু নানবগী হীরমদা অচৌবা মায় পাকপা পুরকপা তারবদি মসি সফাই মিত্রশিংগী অচৌবা থৌদাংনি।

রাস্ত্রপতিনা হায়খি মদুদি সফাই মিত্রশিংগী তেক্ত কায়দবা, ইকাইখুম্নবা অমসুং নুংঙাই য়াইফবা পুরকপা হায়বসি লৈঙাক অমসুং খুনাই অসিগী য়াম্না মরুওইবা থৌদাং অমনি। মেন হোল মুত্থৎনবা অমসুং মখোয়বু মেচিন হোলশিংনা শেংদোক্নবগী থৌরাংশিং শেম্লে। সফাই মিত্রশিংবু কেন্দ্র অমসুং রাজ্য সরকারগী তোঙান-তোঙানবা স্কিমশিংগী খুত্থাংদা কান্নবা পীনবা হোৎনরি। হকশেল চেক অপ তৌনবা খুদোংচাবশিং মখোয়দা সফাই মিত্র সুরক্সা কেম্পশিংগী খুত্থাংদা পীরি। মধ্য প্রদেশকী শহরশিংবু সফাই মিত্র সুরক্সা সিতী হায়না লাউথোকপা তাবদা নুংঙাইবা ফাওখি।

রাস্ত্রপতিনা হায়খি মদুদি ২০২৫তগী হৌদবা স্বচ্ছ ভারত মিসনগী অনিশুবা তাংকক্তা ঐখোয়না অপুনবা লু নানবা পুরক্নবগী পান্দম ফংগনি। জাতিগী পান্দম অসি সোলিদ অমসুং লিক্বিদ ৱেস্ত মেনেজমেন্ততা ফংগদবনি অদুগা 'ফ্রী ফ্রোম ওপন দিফেকেসন'গী থাকসু কায়হন্দনা থমগদবনি।

রাস্ত্রপতিনা হায়খি মদুদি 'স্বভাব স্বচ্ছতা, সনস্কার স্বচ্ছতা'গী পাউজেল শন্দোক্নবগী কেম্পেন অমা লৈবাক শীনবা থুংবদা চৎলি। মীয়াম্না ইমা ভারতপু অমোৎপা অমসুং ফত্তবশিং লৌথোক্তুনা সেবা তৌনবা ৱাশক্লি। মহাক্না থাজবা ফোংদোকখি মদুদি মীয়াম পুম্বনা মাংজিল থানা চঙশিল্লক্তুনা স্বচ্ছ ভারত মিসনবু খুঙ্গং খুদিং অমসুং লম্বী খুদিংদা শন্দোক্নবা হোৎনগনি অমসুং কেম্পেন অসিগী শ্রামদানসু তৌগনি। মহাক্না হায়খি মদুদি মসি পাঙথোক্তুনা ঐখোয়না লৈবাক অসিগী মপা ওইরিবা মহাত্মা গান্ধীগী লু নানবগী অৱাংবা ৱাখল্লোন থবক্তা ওন্থোপা ঙমগনি। লু নানবগী মায়কৈদা ঐখোয়গী খোঙথাং অমনা লৈবাক অসিবু লু নান্না থম্নবগী অচৌবা খোঙথাং ওইগনি। মহাক্না মীপুম খুদিংমক্তা তরু তনানবা ভারত, মশা মউ ফবা ভারত অমসুং চাউখৎলবা ভারত অমা শেম্নবা ৱাশকমিন্ননবা পুক্নিং চিংশিনখি।

রাস্ত্রপতিগী পাউজেল পাবীনবা মফম অসিদা নম্বীয়ু -

***