ইন্দিয়া-ওমান জোইন্ত মিলিতরী এক্সরসাইজ অল নাজাহকী 5শুবা এদিসনগীদমক ঙসি ইন্দিয়ন আর্মী কন্তিঞ্জেন্ত চৎখ্রে। এক্সরসাইজ অসি 2024গী সেপ্তেম্বর 13দগী 26 ফাওবা ওমানগী সালালাদা লৈবা রবকুত ত্রেনিং এরিয়াদা পাংথোক্কনি। এক্সরসাইজ অল নাজাহ অসি 2015দগী হৌদুনা ভারত অমসুং ওমানগী মরক্তা মথং-মনাও নাইনা চহি অনি খুদিংগী ওইনা পাংথোক্লি। মমাংগী এদিসন অসি রাজস্থানগী মহাজনদা পাংথোকখি।

মীওই 60 য়াওবা ইন্দিয়ন আর্মীগি কন্তিঞ্জেন্ত অদু অতোপ্পা লান্মী অমসুং সর্বিসশিংগী মীওইশিংগা লোয়ননা মেকানাইজ ইনফেন্ত্রি রেজিমেন্তকী বতালিয়ন অমনা মহুৎ শিনখি। মীওই 60 য়াওবা ওমানগী রোয়ল আর্মী কন্তিঞ্জেন্তসু ফ্রন্তিয়র ফোর্সকী লান্মীশিংনা মহুৎ শিনগনি।

জোইন্ত এক্সরসাইজ অসিগী পান্দমদি য়ুনাইতেদ নেসন্স চার্তরগী চেপ্তর VIIগী মখাদা তেরোরিজম থেংননবা ওপরেসনশিং পাংথোক্নবগীদমক নাকল অনিমক্কী জোইন্ত মিলিতরী কেপাসিতী হেনগৎহনবনি। এক্সরসাইজ অসিনা মরুভুমীগী ইনভাইরনমেন্ততা ওপরেসনশিং পাংথোকপদা মীৎয়েং থমগনি।

মহৈ-মরোং অসিগী মনুংদা পাংথোক্কদৌরিবা তেক্তিকেল দ্রিলশিংদা জোইন্ত প্লানিং, কোর্দোন অমসুং সর্চ ওপরেসন, বিল্ত-অপ এরিয়াদা লান্থেং, মোবাইল ভেহিকল চেক পোস্ত শেম্বা, কাউন্তর দ্রোন অমসুং রুম ইন্তরভেন্সন য়াওরি। রিএল ৱর্ল্দ কাউন্তর তেরোরিজম মিসনশিং পাংথোক্নবা ত্রেনিংগী থবকশিং পাংথোক্নবা থৌরাং তৌরি।

অল নাজাহ V এক্সরসাইজনা নাকল অনিমকপু অপুনবা ওপরেসনগীদমক তেকটিক্স, তেক্নিক অমসুং প্রোসিদ্যুরশিংগী খ্বাইদগী ফবা থৌওংশিং এক্সচেঞ্জ তৌনবা খুদোংচাবা পীগনি। মসিনা লান্মী অনিগী মরক্তা ইন্তরওপরেবিলিতী, অফবা ৱাখল্লোন অমসুং মরুপ-মপাং ওইবগী মরী হেনগৎহল্লগনি। মসিগী মথক্তা, জোইন্ত এক্সরসাইজ অসিনা দিফেন্স কোওপরেসন মপাঙ্গল কনখৎহল্লগনি অমসুং মরুপ-মপাং ওইবা লৈবাক অনিগী মরক্তা লৈরিবা নাকল অনিগী ওইবা মরী হেন্না ফগৎহল্লগনি।

***