গৃহ মন্ত্ৰালয়
নতুন দিল্লীত কেন্দ্ৰীয় গৃহ পৰিক্ৰমা তথা সমবায় দপ্তৰৰ মন্ত্ৰী শ্ৰী অমিত শ্বাহৰ উপস্থিতিত ভাৰত চৰকাৰ, ত্ৰিপুৰা চৰকাৰ, 'এনএলএফটি' আৰু 'এটিটিএফ'-ৰ মাজত 'মীমাংসা চুক্তি' স্বাক্ষৰিত হয়
প্ৰধানমন্ত্ৰী শ্ৰী নৰেন্দ্ৰ মোদীৰ ‘শান্তিপূৰ্ণ, সমৃদ্ধিশালী আৰু বিদ্ৰোহী মুক্ত উত্তৰ-পূবৰ দৃষ্টিভংগী’ৰ দিশত এই চুক্তি হৈছে এক মাইলৰ খুঁটি
মোদী চৰকাৰৰ ওপৰত আস্থা প্ৰকাশ কৰি ‘এনএলএফটি’ আৰু ‘এটিটিএফ’-য়ে ৰাজ্যখনত ৩৫ বছৰ ধৰি চলি থকা সংঘাতৰ সমাপ্তি ঘটাই ত্ৰিপুৰাৰ উন্নয়নৰ প্ৰতি তেওঁলোকৰ প্ৰতিশ্ৰুতিবদ্ধতা পুনৰ ব্যক্ত কৰে
Posted On:
04 SEP 2024 7:22PM by PIB Guwahati
আজি নতুন দিল্লীত ভাৰত চৰকাৰ, ত্ৰিপুৰা চৰকাৰ আৰু ‘নেশ্যনেল লিবাৰেশ্যন ফ্ৰণ্ট অব ত্ৰিপুৰা’ (এনএলএফটি) আৰু ‘অল ত্ৰিপুৰা টাইগাৰ ফ'ৰ্চ’ (এটিটিএফ)ৰ মাজত কেন্দ্ৰীয় গৃহ পৰিক্ৰমা তথা সমবায় দপ্তৰৰ মন্ত্ৰী শ্ৰী অমিত শ্বাহৰ উপস্থিতিত ‘মীমাংসা চুক্তি’ স্বাক্ষৰিত হয়। প্ৰধানমন্ত্ৰী শ্ৰী নৰেন্দ্ৰ মোদীৰ ‘শান্তিপূৰ্ণ, সমৃদ্ধিশালী আৰু বিদ্ৰোহী মুক্ত উত্তৰ-পূবৰ দৃষ্টিভংগী’ বাস্তৱায়িত কৰাৰ বাবে এই চুক্তি হৈছে এক গুৰুত্বপূৰ্ণ মাইলৰ খুঁটি। ‘মীমাংসা চুক্তি’ স্বাক্ষৰৰ সময়ত ত্ৰিপুৰাৰ মুখ্যমন্ত্ৰী অধ্যাপক (ড০) মাণিক সাহা আৰু গৃহ মন্ত্ৰালয় আৰু ত্ৰিপুৰা চৰকাৰৰ জ্যেষ্ঠ বিষয়াসকলো উপস্থিত আছিল।
![](https://static.pib.gov.in/WriteReadData/userfiles/image/h131AV.jpg)
এই উপলক্ষে কেন্দ্ৰীয় গৃহ মন্ত্ৰী শ্ৰী অমিত শ্বাহে কয় যে আজিৰ দিনটো সমগ্ৰ দেশ আৰু ত্ৰিপুৰাৰ বাবে অতি গুৰুত্বপূৰ্ণ দিন। মোদী চৰকাৰৰ ওপৰত আস্থা প্ৰকাশ কৰি ‘এনএলএফটি’ আৰু ‘এটিটিএফ’-য়ে ৰাজ্যখনত ৩৫ বছৰ ধৰি চলি থকা সংঘাতৰ সমাপ্তি ঘটাই ত্ৰিপুৰাৰ উন্নয়নৰ প্ৰতি তেওঁলোকৰ প্ৰতিশ্ৰুতিবদ্ধতা পুনৰ ব্যক্ত কৰে।
শ্ৰী অমিত শ্বাহে কয় যে শ্ৰী নৰেন্দ্ৰ মোদী দেশৰ প্ৰধানমন্ত্ৰী হোৱাৰ পিছৰে পৰা তেওঁ শান্তি আৰু আলোচনাৰ জৰিয়তে এক সক্ষম আৰু উন্নত উত্তৰ-পূবৰ দৃষ্টিভংগী আগবঢ়াই আহিছে। শ্ৰী শ্বাহে লগতে কয় যে প্ৰধানমন্ত্ৰী মোদীয়ে কেৱল পথ, ৰে'ল আৰু বিমান সংযোগৰ জৰিয়তেই নতুন দিল্লী আৰু উত্তৰ-পূবৰ মাজৰ দূৰত্ব আঁতৰোৱা নাই, লগতে তেওঁলোকৰ হৃদয়ৰ পাৰ্থক্যও দূৰ কৰিছে। তেওঁ কয় যে ভাৰত চৰকাৰে 'অষ্টলক্ষ্মী' আৰু 'পূৰ্বোদয়'ৰ ধাৰণাসমূহ একত্ৰিত কৰি ত্ৰিপুৰাকে ধৰি সমগ্ৰ উত্তৰ-পূবৰ বিকাশৰ সংকল্প লৈছে, য'ত আজিৰ চুক্তিখন এক মাইলৰ খুঁটি হিচাপে প্ৰমাণিত হ'ব।
![](https://static.pib.gov.in/WriteReadData/userfiles/image/h2FZBE.jpg)
কেন্দ্ৰীয় গৃহ মন্ত্ৰীগৰাকীয়ে উল্লেখ কৰে যে আজিৰ ‘মীমাংসা চুক্তি’ হৈছে উত্তৰ-পূবৰ দ্বাদশ চুক্তি আৰু ত্ৰিপুৰা সম্পৰ্কীয় তৃতীয় খন চুক্তি। তেওঁ লগতে কয় যে এই চুক্তিসমূহৰ জৰিয়তে প্ৰায় ১০ হাজাৰ বিদ্ৰোহীয়ে অস্ত্ৰ ত্যাগ কৰি মূলসুঁতিত যোগদান কৰিছে। তেওঁ কয় যে হাজাৰ হাজাৰ নিৰীহ লোকৰ প্ৰাণ হানি প্ৰতিহত কৰাত এই ১২ খন চুক্তিয়ে মুখ্য ভূমিকা পালন কৰিছে।
শ্ৰী শ্বাহে কয় যে ‘এনএলএফটি’ আৰু ‘এটিটিএফ’-ৰ সৈতে আজি স্বাক্ষৰিত চুক্তিৰ অধীনত ৩২৮ জনতকৈয়ো অধিক সশস্ত্ৰ কেডাৰে হিংসা ত্যাগ কৰিব আৰু সমাজৰ মূলসুঁতিত যোগদান কৰিব আৰু কেৱল উন্নত ত্ৰিপুৰা গঢ়ি তোলাতেই নহয়, বৰঞ্চ উন্নত ভাৰত গঢ়ি তোলাতো অৰিহণা যোগাব। তেওঁ কয় যে যিসকলে হিংসা ত্যাগ কৰিছে তেওঁলোকে দেশৰ গৌৰৱান্বিত নাগৰিক হিচাপে এখন উন্নত ত্ৰিপুৰা সৃষ্টিত অৰিহণা যোগাব পাৰিব। শ্ৰী শ্বাহে কয় যে ভাৰত চৰকাৰে অঞ্চলটোৰ উন্নয়ন নিশ্চিত কৰিবলৈ আৰু মানুহে অস্ত্ৰ গ্ৰহণ কৰিবলগীয়া হোৱা পৰিস্থিতিৰ বাবে দায়ী কাৰণবোৰ আঁতৰ কৰাৰ বাবে সকলো চুক্তি ৰূপায়ণৰ ক্ষেত্ৰত সংবেদনশীলতাৰে আন্তৰিক প্ৰচেষ্টা চলাই আছে। তেওঁ কয় যে ত্ৰিপুৰাৰ জনজাতীয় লোকসকলৰ সামগ্ৰিক উন্নয়নৰ বাবে কেন্দ্ৰই ২৫০ কোটি টকাৰ এক ‘বিশেষ পেকেজ’লৈ অনুমোদন জনাইছে।
কেন্দ্ৰীয় গৃহ মন্ত্ৰীয়ে কয় যে মোদী চৰকাৰে সকলো চুক্তি আক্ষৰিক অৰ্থৰে ৰূপায়ণ কৰিছে। তেওঁ কয় যে আন্তৰিকতাৰে প্ৰতিখন চুক্তি ৰূপায়ণ কৰাটো হৈছে মোদী চৰকাৰৰ উত্তৰাধিকাৰিত্ব। তেওঁ লগতে কয় যে ‘ব্ৰু-ৰিয়াং চুক্তি’ স্বাক্ষৰৰ পিছত আজি হাজাৰ হাজাৰ ‘ব্ৰু-ৰিয়াং’ ভাই-ভনী তেওঁলোকৰ ঘৰসমূহত বসবাস কৰি আছে। তেওঁলোকৰ সন্তানে ভাল বিদ্যালয়ত অধ্যয়ন কৰি আছে, তেওঁলোকৰ নিযুক্তিৰ যত্ন লোৱা হৈছে আৰু তেওঁলোকে ভাৰত চৰকাৰ আৰু ৰাজ্য চৰকাৰৰ সকলো ৰাজহুৱা কল্যাণমূলক আঁচনিৰ সুফলসমূহ লাভ কৰি আছে। গৃহমন্ত্ৰীয়ে কয় যে চৰকাৰেও এই চুক্তি সম্পূৰ্ণৰূপে মানি চলিব আৰু গৃহ মন্ত্ৰালয়ে সকলোৰে আশা পূৰণৰ বাবে সকলো প্ৰচেষ্টা কৰিব। তেওঁ কয় যে আমি সকলোৱে একেলগে এক শক্তিশালী ত্ৰিপুৰা গঢ়াৰ দিশত কাম কৰি যাম।
![](https://static.pib.gov.in/WriteReadData/userfiles/image/h38F6D.jpg)
শ্ৰী অমিত শ্বাহে কয় যে মোদী চৰকাৰে ২০১৫ চনত ত্ৰিপুৰাৰ পৰা ‘সশস্ত্ৰ বাহিনী বিশেষ ক্ষমতা আইন’ (এএফএছপিএ) উঠাই লৈছে আৰু উত্তৰ-পূবৰ বহু ঠাইৰ পৰাও ইয়াক প্ৰত্যাহাৰ কৰা হৈছে। তেওঁ কয় যে সশস্ত্ৰ বাহিনী মোতায়েন কৰাৰ পৰিৱৰ্তে মোদী চৰকাৰ উত্তৰ-পূবৰ সংস্কৃতি, ভাষা, পৰিচয়, বিশেষকৈ জনজাতীয় গোটসমূহৰ সংৰক্ষণ আৰু বিকাশৰ দ্বাৰা সমগ্ৰ উত্তৰ-পূবৰ বিকাশৰ বাবেহে প্ৰতিশ্ৰুতিবদ্ধ।
আজিৰ চুক্তিখনৰ অধীনত ‘এনএলএফটি’ আৰু ‘এটিটিএফ’-য়ে হিংসাৰ পথ প্ৰত্যাহাৰ কৰিবলৈ, তেওঁলোকৰ সকলো অস্ত্ৰ-শস্ত্ৰ আৰু গোলাবাৰুদ সমৰ্পণ কৰিবলৈ আৰু তেওঁলোকৰ সশস্ত্ৰ সংগঠনবোৰ ভংগ কৰিবলৈ সন্মত হৈছে। ইয়াৰ উপৰিও, ‘এনএলএফটি’ আৰু ‘এটিটিএফ’ৰ ‘সশস্ত্ৰ কেডাৰ’সকলেও আইনৰ দ্বাৰা স্থাপিত শান্তিপূৰ্ণ গণতান্ত্ৰিক প্ৰক্ৰিয়াসমূহত অংশগ্ৰহণ কৰিবলৈ আৰু দেশৰ অখণ্ডতা বৰ্তাই ৰাখিবলৈ সন্মত হৈছে।
![](https://static.pib.gov.in/WriteReadData/userfiles/image/h4OJQO.jpg)
এই উপলক্ষে ত্ৰিপুৰাৰ মুখ্যমন্ত্ৰী ড০ মাণিক সাহাই সমগ্ৰ উত্তৰ-পূৰ্বাঞ্চলত স্থায়ী শান্তি, সমৃদ্ধি আৰু সদিচ্ছা প্ৰতিষ্ঠা কৰাৰ বাবে প্ৰধানমন্ত্ৰী শ্ৰী নৰেন্দ্ৰ মোদী আৰু কেন্দ্ৰীয় গৃহ তথা সমবায় মন্ত্ৰী শ্ৰী অমিত শ্বাহলৈ কৃতজ্ঞতা জ্ঞাপন কৰে।
*****
RK/VV/PR/PS/KB
(Release ID: 2052007)
Visitor Counter : 21
Read this release in:
Odia
,
English
,
Khasi
,
Urdu
,
Marathi
,
Hindi
,
Nepali
,
Bengali-TR
,
Gujarati
,
Tamil
,
Telugu
,
Kannada