مرکزی وزیر داخلہ اور وزیر تعاون جناب امت شاہ کی موجودگی میں حکومت ہند، حکومت تریپورہ اور نیشنل لبریشن فرنٹ آف تریپورہ (این ایل ایف ٹی) اور آل تریپورہ ٹائیگر فورس (اے ٹی ٹی ایف) کے درمیان آج نئی دہلی میں ایک یادداشت پر دستخط کیے گئے۔ یہ معاہدہ وزیر اعظم جناب نریندر مودی کے پرامن، خوشحال اور شورش سے پاک شمال مشرق کے وژن کو پورا کرنے کے لیے ایک اہم سنگ میل ہے۔ تریپورہ کے وزیر اعلیٰ، پروفیسر (ڈاکٹر) مانک ساہا اور وزارت داخلہ اور حکومت تریپورہ کے سینئر افسران بھی مفاہمت نامے پر دستخط کے دوران موجود تھے۔

اس موقع پر مرکزی وزیر داخلہ اور تعاون کے وزیر جناب امت شاہ نے کہا کہ آج کا دن پورے ملک اور تریپورہ کے لیے بہت اہم ہے۔ مودی حکومت میں اعتماد کا اظہار کرتے ہوئے، این ایل ایف ٹی اور اے ٹی ٹی ایف نے ریاست میں 35 سال سے جاری تنازع کو ختم کرتے ہوئے تریپورہ کی ترقی کے لیے اپنے عزم کا اعادہ کیا۔

جناب امت شاہ نے کہا کہ جب سے جناب نریندر مودی ملک کے وزیر اعظم بنے ہیں، انہوں نے امن اور بات چیت کے ذریعے ایک قابل اور ترقی یافتہ شمال مشرق کا وژن پیش کیا ہے۔ جناب شاہ نے مزید کہا کہ وزیر اعظم مودی نے سڑک، ریل اور فلائٹ روابط کے ذریعے نہ صرف نئی دہلی اور شمال مشرق کے درمیان فاصلے کم کیا ہے بلکہ ان کے دلوں میں موجود اختلافات کو بھی ختم کیا ہے۔ انہوں نے کہا کہ حکومت ہند نے 'اشٹلکشمی' اور 'پورودیا' کے تصورات کو ملا کر تریپورہ سمیت پورے شمال مشرق کی ترقی کا عزم کیا ہے، جس میں آج کا معاہدہ ایک سنگ میل ثابت ہوگا۔

مرکزی وزیر داخلہ نے اس بات پر زور دیا کہ آج کا میمورنڈم آف سیٹلمنٹ شمال مشرق کے لیے 12واں اور تریپورہ سے متعلق تیسرا معاہدہ ہے۔ انہوں نے مزید کہا کہ ان معاہدوں کے ذریعے تقریباً 10 ہزار باغی ہتھیار چھوڑ کر قومی دھارے میں شامل ہو چکے ہیں۔ انہوں نے کہا کہ یہ 12 معاہدے ہزاروں معصوم جانوں کے ضیاع کو روکنے میں اہم کردار ادا کر رہے ہیں۔

جناب امت شاہ نے کہا کہ این ایل ایف ٹی اور اے ٹی ٹی ایف کے ساتھ آج دستخط کیے گئے معاہدے کے تحت 328 سے زیادہ مسلح کیڈر تشدد ترک کر کے سماج کے مرکزی دھارے میں شامل ہوں گے اور نہ صرف ایک ترقی یافتہ تریپورہ کی تعمیر میں بلکہ ایک ترقی یافتہ ہندوستان کی تعمیر میں بھی اپنا تعاون کریں گے۔ انہوں نے کہا کہ تشدد ترک کرنے والے ملک کے قابل فخر شہری کے طور پر ترقی یافتہ تریپورہ کی تشکیل میں اپنا تعاون کر سکیں گے۔ جناب شاہ نے کہا کہ حکومت ہند علاقے کی ترقی کو یقینی بنانے اور لوگوں کے ہتھیار اٹھانے کی ذمہ دار وجوہات کو ختم کرنے کے لیے تمام معاہدوں پر عمل درآمد میں تمام حساسیت کو مدنظر رکھتے ہوئے پوری کوشش کر رہی ہے۔ انہوں نے کہا کہ مرکز نے تریپورہ کی قبائلی آبادی کی مجموعی ترقی کے لیے 250 کروڑ روپے کے خصوصی پیکیج کو منظوری دی ہے۔

جناب امت شاہ نے کہا کہ مودی حکومت نے 2015 میں ہی تریپورہ سے آرمڈ فورسز اسپیشل پاور ایکٹ (اے ایف ایس پی اے) کو ہٹا لیا ہے اور اسے شمال مشرق کے کئی حصوں سے بھی واپس لے لیا گیا ہے۔ انہوں نے کہا کہ مسلح افواج کی تعیناتی کے بجائے مودی حکومت شمال مشرق کی ثقافت، زبانوں، شناخت، خاص طور پر قبائلی گروہوں کے تحفظ اور ترقی کے ذریعے پورے شمال مشرق کی ترقی کے لیے پرعزم ہے۔

آج کے معاہدے کے تحت، این ایل ایف ٹی اور اے ٹی ٹی ایف نے تشدد کا راستہ ترک کرنے، اپنے تمام ہتھیار اور گولہ بارود کو حوالے کرنے اور اپنی مسلح تنظیموں کو ختم کرنے پر اتفاق کیا ہے۔ اس کے علاوہ این ایل ایف ٹی اور اے ٹی ٹی ایف کے مسلح کیڈر نے بھی قانون کے ذریعے قائم کردہ پرامن جمہوری عمل میں حصہ لینے اور ملک کی سالمیت کو برقرار رکھنے پر آمادگی ظاہر کی ہے۔

اس موقع پر تریپورہ کے وزیر اعلیٰ ڈاکٹر مانک ساہا نے پورے شمال مشرق میں دیرپا امن، خوشحالی اور خیر سگالی کے قیام کے لیے وزیر اعظم جناب نریندر مودی اور مرکزی وزیر داخلہ اور وزیر تعاون جناب امت شاہ کا شکریہ ادا کیا۔

************

ش ح۔ ف ش ع- م ر

U: 10559