ملک بھر میں پسماندہ مزدوروں کی فلاح و بہبود کو یقینی بنانے کی سمت ایک اہم قدم کے طور پر محنت اور روزگار کی وزارت نے پردھان منتری آواس یوجنا(پی ایم اے وائی)کے فوائد کو پسماندہ کارکنوں تک پہنچانے کے لیے ایک قدم اٹھایا ہے۔ محنت اور روزگار کی وزارت کی طرف سے تمام ریاستی حکومتوں کو ایک خط جاری کیا گیا ہے، جس میں ہاؤسنگ اسکیم کے تحت مائیگرینٹ مزدوروں، بلڈنگ ورکرز، بیڑی ورکرز، سنے ورکرز، غیر کوئلے کی کان میں کام کرنے والے مزدوروں، کنٹریکٹ مزدوروں اور دیگر غیر منظم مزدوروں کو شامل کرنے پر زور دیا گیا ہے۔

یہ فیصلہ مرکزی کابینہ کی منظوری کے بعد  پی ایم اے وائی کے نفاذ کو مالی سال 25-2024 سے 29-2028 تک مزید پانچ سال کے لیے توسیع دینے کے لیے کیا گیا ہے، جس کا مقصد اہل استفادہ کنندگان کو 2 کروڑ اضافی مکانات فراہم کرنا ہے۔ یہ اقدام معاشی طور پر کمزور کارکنوں کی رہائش کی ضروریات کو تسلیم کرتا ہے۔

وزارت نے اس بات پر زور دیا ہے کہ یہ مزدورمعاشرے کے ایک پسماندہ طبقے کی نمائندگی کرتے ہیں اور پی ایم اے وائی کے تحت ان کی کوریج کو یقینی بنانا نہ صرف سماجی انصاف کا معاملہ ہے بلکہ ان کے حالات زندگی کو بہتر بنانے کی طرف ایک ضروری قدم بھی ہے۔

مزدوروں کی بہبود کے لیے مکمل طور پر فعال ایم آئی ایس پورٹل

اس کے علاوہ، وزارت نے اعلان کیا ہے کہ مینجمنٹ انفارمیشن سسٹم (ایم آئی ایس) پورٹل، جو 21 اگست 2024 کو بلڈنگ اینڈ کنسٹرکشن اور مائیگرنٹ ورکرز کے لیے شروع کیا گیا تھا، اب پوری طرح سے کام کر رہا ہے۔

پورٹل کو اعداد و شمار کے جمع کرنے اور تجزیہ کرنے میں سہولت فراہم کرنے کے لیے ڈیزائن کیا گیا ہے جس میں فنڈ کے استعمال اور کارکنوں کی مختلف مرکزی اور ریاستی سماجی تحفظ کی اسکیموں، جیسے بیمہ، صحت کے فوائد، اور ہاؤسنگ اسکیموں کے تحت معلومات شامل ہیں۔

سینٹرلائزڈ ڈیٹا مینجمنٹ سسٹم ریاستی حکومتوں اور مرکز کے زیر انتظام علاقوں کو باخبر فیصلے کرنے اور ان محروم مزدوروں کی ضروریات کے مطابق زیادہ موثر فلاحی پالیسیاں تیار کرنے کے قابل بنائے گا۔

مزدوروں کی بہتری کے لیے باہمی تعاون کی کوشش

ان پسماندہ محنت کشوں کی بہتری کے لیے مشترکہ کوششوں کی اہمیت کو دہراتے ہوئے، وزارت نے مختلف ریاستوں میں تعینات ویلفیئر کمشنروں کو ہدایت دی ہے کہ وہ ان اقدامات کے کامیاب نفاذ کو یقینی بنانے کے لیے مقامی حکام کے ساتھ قریبی تعاون کریں۔

ریاستوں اور مرکز کے زیر انتظام علاقوں کے ساتھ 29 اگست اور 4 اکتوبر 2024 کے درمیان لیبر اور روزگار کی وزارت کی طرف سے شروع کی جانے والی علاقائی میٹنگوں کی ایک سیریز میں اس پہل پر فالو اپ کیا جا رہا ہے۔

اس اقدام سے لاکھوں کارکنوں کی زندگیوں میں نمایاں بہتری آنے کی امید ہے، اس بات کو یقینی بناتے ہوئے کہ وہ رہائش اور سماجی تحفظ کے فوائد حاصل کریں گے جس کے وہ حقدار ہیں۔

********

ش ح۔  ف ا۔ع ن

 (U: 10476)