প্রধান মন্ত্রী, শ্রী নরেন্দ্র মোদীনা ঙসি মহারাস্ত্রগী জলগাওদা পাংথোকপা লাখপতি দিদি সম্মেলনদা শরুক য়াখ্রে। মহাক্না হৌজিক পাল্লিবা সরকারগী অহুমশুবা তর্ম মনুংদা নৌনা লাখপতি ওইখিবা অনৌবা লাখপতি দিদি লাখ 11দা সর্তিফিকেৎশিং য়েন্থোকখি অমসুং ওকখি। প্রধান মন্ত্রীনা লৈবাক শিনবা থুংবদগী লাখপতি দিদিশিংগা লোয়ননা ৱারীসু শাখি। শ্রী মোদীনা সেল্ফ-হেল্প গ্রুপ (SHG) লাখ 4.3গী মেম্বর লাখ 48দা কান্নবা ফংহনগদবা লুপা করোর 2,500 গী রিভোলবিং ফন্দ অমা কাইথখি। মহাক্না SHG লাখ 2.35 গী মেম্বর লাখ 25.8 দা কান্নবা ফংহনগদবা লুপা করোর 5,000 গী বেঙ্ক লোনসু পীথখি। লাখপতি দিদি য়োজনা হৌদোকখিবদগী হৌদুনা নুপী করোর অমনা লাখপতি দিদি ওইখ্রে। সরকারনা লাখপতি দিদি করোর 3 শেমগৎনবা পান্দম থম্মি।

থৌরম অদুদা শরুক য়াখিবা মশিং য়াম্লবা মমা ওইবীশিং অমসুং মচল-মচেশিংগী প্রধান মন্ত্রীনা থাগৎপা ফোংদোক্তুনা মহাক্কী ৱারোল হৌদোকখি। মখা তানা চত্থদ্রিঙৈদা, প্রধান মন্ত্রীনা জলগাওদগী মীওই কয়া নেপালগী তানাহুনদা থোকখিবা বস এক্সিদেন্তকী থৌদোক অদুদা লৈখিদববু থম্মোয় শোক্না অৱাবা ফোংদোকখি। মহাক্না হায়খি মদুদি থৌদোক অদু হেক থোকপগী ওথোরিতীশিংনা নেপালগী মখোয়গী কাউন্তরপার্তশিংগা পাউ ফাওনখি অমসুং কেন্দ্রগী মন্ত্রী রক্ষাতাই খাদ্সেবু নেপালদা থাখি। মহাক্না হায়খি মদুদি লৈখিদ্রবশিংগী হকচাংশিং অসি এয়র ফোর্সকী অখন্নবা এয়রক্রাফতগী পুরকখ্রে অমসুং অশোকপশিং অদু য়েংশিল্লি। মহাক্না মখোয়না অথুবা মতমদা ফগৎলক্নবা থৌনিখি অমসুং কেন্দ্র অমসুং রাজ্য সরকারশিংনা পাংবা য়াবা মতেং পুম্নমক পীগনি হায়না থাজবা পীখি।

লাখপাতি দিদি সম্মেলনগী অচৌবা থৌরম অসিদা মশিং য়াম্লবা মমা ওইবীশিং অমসুং মচল-মচেশিংনা শরুক য়াবদা হরাওবা ফোংদোক্লদুনা শ্রী মোদীনা হায়খি, "ঙসি ভারত শিনবা থুংনা লৈরিবা নুপী SHG লাখ কয়াগীদমক লুপা করোর 6000 হেনবগী ফন্দশিং কাইথখি মহাক্না মখা তাখি মদুদি শেলগী মতেং অসিনা নুপী কয়াবু 'লাখপতি দিদি' ওইহন্নবা থৌনা পীগনি। প্রধান মন্ত্রীনা মহাক্কী য়াইফ পাউজেলসু পীখি।

প্রধান মন্ত্রী শ্রী মোদীনা হায়খি মদুদি মহারাস্ত্রগী ইমা অমসুং ইচে-ইচলশিংনা রাজ্য অসিগী শিংথানিংঙাই ওইবা নাৎ অমসুং চৎনবীগী মমি অমা পীরি। প্রধান মন্ত্রীনা হায়খি, "মহারাস্ত্রগী চৎনবীশিং অসি ভারত্তা খক্তা নত্তনা মালেম পুম্বদা খঙনরি।" মহাক্না পোলেন্দদা মহাক্না চৎখিবা খোঙচৎ মনুংদা মহারাস্ত্রগী চৎনবী উবা ফংখিবগী মতাংদা পনখি অমসুং পোলেন্দগী প্রজাশিংনা মহারাস্ত্রগী মীয়াম্বু য়াম্না ইকায় খুম্নৈ হায়খি। মহাক্না কোলহাপুর মেমোরিয়েলগী মরমদা পলন্দগী মীওইশিংনা কোলহাপুরগী মীয়ামগী সেবা তৌবগী ৱাখল্লোন অমসুং হোস্পিতালিতীদা কত্থোকখিবা অদুগী মতাংদা পনখি। মালেমগী অনিশুবা লাঞ্জাওগী মতমদা পোলেন্দদগী নুপী অমসুং অঙাং লিশিং কয়া শিবাজী মহারাজনা থমখিবা চৎনবীশিং ঙাক্না কোলহাপুরগী নিংথৌগী ইমুংনা চংজফম পীখিবা অদু নীংশিংলদুনা, প্রধান মন্ত্রীনা মহাক্কী লৈবাক অসিদা লাকপা মতমদা অসিগুম্বা থৌনা ফবগী ৱারীশিং লিরকপদা চাউথোকচবা ফোংদোকখি। মহাক্না নাগরিকশিংদা অসিগুম্বা লম্বী অসিদা চৎনবা অমসুং মালেমদা রাজ্য অসিগী মমিং চৎপা হেনগৎহন্নবা লেপ্পা লৈতনা হোৎননবা হায়খি।

শ্রী মোদীনা হায়খি মদুদি মহারাস্ত্রগী চৎনবী অসি লমদম অদুগী থৌনা ফরবা অমসুং থৌনা লৈরবা নুপীশিংনা শেমগৎপনি। মহাক্না মখা তাখি মদুদি ভারত পুম্বনা মহারাস্ত্রগী 'মাতৃশক্তি'দগী ইথিল ফংলি। প্রধান মন্ত্রীনা হায়খি, "ঐখোয়গী জলগাও অসি ৱারকরিগী চৎনবীগী খুভম অমনি। মসি অচৌবা মুন মুক্তাইগী লমদমনি। মহাক্না মখা তাখি মদুদি মহাক্কী মায়পাকপা অমসুং তপস্যা অসি ঙসিগী মীরোল অসিগীসু ইথিল অমনি।

শ্রী মোদীনা হায়খি মদুদি ঙসি ফাওবা বাহিনবাইগী শৈরেংশিংনা খুন্নাইবু স্তেরিওতাইপশিংগী ৱাংমদা খন্নবা পুক্নিং থৌগৎলি। "মহারাস্ত্রগী মফম অমা ওইরো, পুৱারীগী তাঙ্কক অমা ওইরো, মাতৃশক্তিনা শরুক তম্বা অসি লম্বা লৈতে," হায়না প্রধান মন্ত্রীনা মখা তাখি। মহারাস্ত্রগী মাতৃশক্তিগী মতাংদা মখা তানা শন্দোক্না তাক্লদুনা শ্রী মোদীনা হায়খি মদুদি মাতা জিজাবাইনা ছত্রপতি শিবাজীগী পুন্সিদা লমজিং-লমতাক পীখি। অতোপ্পা মরাথী নুপী সাবিত্রিবাই ফুলেনা খুন্নাই অসিনা নুপীশিংবু মরু ওইনা লৌবীখিদবা মতমদা নুপীমচাশিংগী এজুকেসন অমসুং মখোয়গী থবকশিংগীদমক থৌদাং লৌখি।

প্রধান মন্ত্রীনা হায়খি মদুদি ভারতকী নুপীগী শক্তিনা খুন্নাই অমসুং লৈবাক অসিগী তুংলমচৎ শেমগৎপদা মতম পুম্নমক্তা থৌদাং লৌরি। ঙসি ভারতনা চাউখৎলবা লৈবাক অমা ওইনবা হোৎনরিঙৈদা, ঐখোয়গী নুপীগী শক্তি অসি অমুক হন্না মাংলোমদা চংশিল্লি হায়না শ্রী মোদীনা অকনবা ৱাফম থমখি। মহারাস্ত্রগী নুপীশিংনা হোৎনরিবশিং অদুগীদমক থাগৎপা ফোংদোক্লদুনা শ্রী মোদীনা হায়খি, "ঐহাক্না নখোয় পুম্নমক্তা রাজমাতা জিজাবাই অমসুং সাবিত্রিবাই ফুলেগী মমি অদু উবা ফংই।"

2024গী লোক সভা মীখলগী মনুংদা মহাক্না মহারাস্ত্রদা চৎখিবা অদু নীংশিংলদুনা শ্রী মোদীনা হায়খি মদুদি প্রধান মন্ত্রীনা লাখপতী দিদি করোর অহুম শেম্নবা অপাম্বা ফোংদোকখি। মহাক্না হায়খি মদুদি হৌখিবা চহি 10দা লাখপতী দিদি করোর অমা শেমখি। হৌখিবা থা অনি খক্তদা অনৌবা লাখপতী দিদি করোর 11 শেমখি। প্রধান মন্ত্রীনা রাজ্য সরকারনা হোৎনরিবশিং অদু থাগৎপা ফোংদোকখি। মহাক্না হায়খি মদুদি মুখ্য মন্ত্রী অমসুং উপ মুখ্য মন্ত্রীশিংগী অপুনবা তীম্না অনৌবা স্কিম অমসুং প্রোগ্রাম কয়া অমা হৌদোক্তুনা মহারাস্ত্রদা নুপীশিংবু মপাঙ্গল কনখৎহন্নবা পুন্না হোৎনরি।

লাখপতি দিদি কেম্পেন অসি ইমা অমসুং ইচে-ইচলশিংগী শেন্থোক হেনগৎহন্নবা পাম্বৈ অমা খক্তা নত্তে, মসি ইমুং অমসুং তুংগী মীরোলগী মপাঙ্গল কনখৎহন্নবা অচৌবা কেম্পেন অমনি হায়না পল্লদুনা প্রধান মন্ত্রীনা হায়খি মদুদি মসিনা খুঙ্গংগী শেন্মিৎলোনদা অহোংবা পুরক্লি। প্রধান মন্ত্রীনা হায়খি মদুদি “মফম অসিদা লৈরিবা নুপী খুদিংমক্না খঙই মদুদি মহাক্না হিংনবগীদমক থবক পায়খৎপা হৌরকপা মতমদা খুন্নাইদা মহাক্কী সোসিএল পোজিসন অসি হেন্না ৱাংখৎলকই” মহাক্না মসি ফোংদোক্লদুনা হায়খি মদুদি ইনকম হেনগৎলক্লবা মতমদা ইমুং অমগী পর্চেজিং পাৱর হেনগৎলকই। মহাক্না হায়খি মদুদি “ইচে-ইচল অমনা লাখপতি দিদি ওইরকপা মতমদা ইমুং পুম্বগী মরাইবক্তা অওননবা লাকই “।

ঙসি ভারতপু মালেমগী খ্বাইদগী চাউবা অহুমশুবা ইকনোমী ওইহনবদা নুপীশিংগী থৌদাংশিং অদু পল্লদুনা, প্রধান মন্ত্রী মোদীনা মমাংদা নুপীশিংগী চাউখৎ থৌরাংগী মায়কৈদা তৌরম্বা থবকশিং অদু পনখি। মহাক্না হায়খি মদুদি লৈবাক অসিদা নুপী করোর কয়াগী মশাগী লন-থুম অমত্তা লৈতে। মসিনা অপীকপা বিজিনেসশিং হৌদোক্নবগীদমক বেঙ্ক লোন লৌবদা অচৌবা অৱাবা অমা ওইহল্লি। প্রধান মন্ত্রীনা হায়খি, “মরম অসিনা” নুপীশিংদা পীবা পোৎলুম হন্থহন্নবা ঐনা ৱাশক লৌখি, অমসুং মোদী সরকারনা নুপীশিংগী কান্ননবগীদমক ৱারেপশিং লৌখি।" হৌজিক লৈরিবা সরকার অসিগী চহি 10গা মমাংগী সরকারশিংগী দিকেদ তরেৎকী মতমগা চাংদম্নদুনা প্রধান মন্ত্রীনা হায়খি মদুদি হৌজিক লৈরিবা সরকার অসিনা মমাংগী সরকারশিংদগী নুপীশিংগী য়াইফনবা থবক হেন্না তৌরি।

প্রধান মন্ত্রীনা ফোংদোকখি মদুদি মহাক্কী সরকারনা লাইরবশিংগীদমক য়ুমশিং অসি য়ুম অদুগী নুপীগী মিংদা রেজিস্তর তৌনবা ৱারেপ লৌখ্রে। শ্রী মোদীনা হায়খি মদুদি হৌজিক ফাওবদা শাখিবা য়ুম করোর 4গী মনুংদা অয়াম্বনা নুপীশিংগী মিংদা রেজিস্তর তৌখ্রে। শারক্কদৌরিবা য়ুম করোর অহুমগী মনুংদা অয়াম্বনা নুপীশিংগী মিংদা রেজিস্তর তৌগনি হায়না প্রধান মন্ত্রীনা থাজবা পীখি।

বেঙ্কিং সেক্তরদা পায়খৎলিবা রিফোর্মশিং অদু পল্লদুনা শ্রী মোদীনা হায়খি মদুদি প্রধান মন্ত্রী জন ধন য়োজনাগী মনুংদা বেঙ্ক একাউন্ত অয়াম্বা নুপীশিংগী মিংদা হাংদোকখি। প্রধান মন্ত্রী মুদ্রা য়োজনাগী কান্নবা ফংলবশিংগী চাদা 70দি লৈবাক অসিগী ইমা অমসুং ইচে-ইচলশিংনি হায়না মহাক্না অকনবা ৱাফম থমখি।

মমাংদা নুপীশিংদা লোন পীনবগী মায়োক্তা মঙোন্দা চেকশিন ৱা থমলকখিবা অদু নীংশিংলদুনা, শ্রী মোদীনা হায়খি মদুদি মহাক্না মাতৃশক্তিদা মপুং ফানা থাজবা থম্লি অমসুং মখোয়না লোন অদু শোয়দনা শীংগৎকনি। নুপীশিংগী রেস্পোন্সনা পুক্নিং থৌগৎলদুনা মহাক্না মখা তাখি মদুদি মহাক্কী সরকারনা পি.এম. মুদ্রা য়োজনাগী লোন লিমিৎ অসি লুপা লাখ 20দা হেনগৎহনখ্রে।

লম্বীদা পোৎ য়োল্লিবশিংগীদমক হৌদোকখিবা স্বানিধি স্কিমগী মতাংদা প্রধান মন্ত্রীনা হায়খি মদুদি স্বানিধিদসু গেরেন্তী য়াওদনা লোন পীরি, মসিগী কান্নবা অসি নুপীশিংদা য়ৌহনখি। শ্রী মোদীনা মখা তাখি মদুদি মহাক্কী সরকারনা বিশ্বকর্মা ইমুংশিংগী খুৎশা হৈবগী থবক তৌরিবা নুপী কয়াদা গেরেন্তী য়াওদনা কান্নবা পীরি।

প্রধান মন্ত্রীনা হায়খি মদুদি ঙল্লিঙৈদা সখী মন্দলশিং অমসুং নুপীগী সেল্ফ হেল্প গ্রুপশিংগী মরুওইবা অদু খঙনরমদে, অদুগা ঙসিদি মখোয় অসি ভারতকী শেন্মিৎলোনদা অচৌবা শক্তি অমা ওইরকপগী লম্বীদা চংশিল্লি। মহাক্না হায়খি মদুদি খুঙ্গং অমসুং ত্রাইবেল লমদম খুদিংমক্না নুপীগী সেল্ফ হেল্প গ্রুপশিংনা পুরক্লিবা পোজিতিব ওইবা অহোংবশিং অদু উবা ফংলি। মহাক্না হায়খি মদুদি হৌখিবা চহি 10দা নুপী করোর 10না কেম্পেন অসিদা য়াওখি অমসুং মখোয় অসি বেঙ্কিং সিস্তেমগী শরুক অমা ওইদুনা শেন্দোই হন্থবা লোনগী খুদোংচাবশিং ফংহনখি। মহাক্না হায়খি মদুদি 2014দা সেল্ফ হেল্প গ্রুপশিংগীদমক লুপা করোর 25,000গী মখাদা বেঙ্ক লোন অয়াবা পীখি, অদুগা ঙসিদি হৌখিবা চহি 10দা লুপা করোর লাখ 9দা হেনগৎখ্রে। মহাক্না মখা তারদুনা হায়খি মদুদি সরকারনা পীরিবা দাইরেক্ত এসিস্তেন্স অসিসু শরুক 30 হেনগৎখ্রে।

প্রধান মন্ত্রীনা হায়খি মদুদি ঙসিদি ইমা অমসুং ইচে-ইচলশিংগী থৌদাংশিং অদু খংহল্লি। মহাক্না খুঙ্গং খুদিংমক্তা বেঙ্কিং সর্ভিসশিং ফংহন্নবা বেঙ্ক সখী লাখ 1.25 হেনবa, নুপীশিংনা দ্রোনশিং শIজিন্নদুনা মোদর্ন ফার্মিংদা মতেং পাংনবা দ্রোন পাইলোৎশিং ওইরকপা অমসুং লাইবস্তোক ফার্মরশিংদা মতেং পাংনবা পশু সখী লাখ 2 ত্রেনিং পীরকপগী খুদমশিং পনখি। মোদর্ন ফার্মিং অমসুং নেচরেল ফার্মিংগীদমক নরিশক্তিনা লুচিংনবগীদমক 'কৃশি সখী' প্রোগ্রাম হৌদোকখিবগী ৱাফমসু প্রধান মন্ত্রীনা পনখি। মহাক্না হায়খি মদুদি সরকারনা লাক্কদৌরিবা মতমশিংদা লৈবাক অসিগী খুঙ্গং খুদিংদা অসিগুম্বা লৌউ-শিংউগী সখী লাখ কয়া শেম্লগনি। প্রধান মন্ত্রীনা হায়খি মদুদি কেম্পেনশিং অসিনা নুপীমচাশিংদা থবক পীগনি অমসুং মখোয়গী থাজবা হেনগৎহল্লগনি। শ্রী মোদীনা হায়খি মদুদি নুপীমচাশিংগী শক্তিগী মতাংদা খুন্নাইদা অনৌবা ৱাখল্লোন অমা শেম্লগনি।

মমাং থাদা হাউসনা পাস তৌখিবা য়ুনিয়ন বজেৎ অদুগী মতাংদা পল্লদুনা প্রধান মন্ত্রীনা হায়খি মদুদি নুপীগা মরী লৈনবা স্কিমশিংগীদমক লুপা করোর লাখ 3গী অয়াবা পীখ্রে। মহাক্না ফেক্তরীশিং অমসুং ওফিসশিংদা থবক তৌরিবা নুপীশিংগীদমক্তা ৱার্কিং ৱুমেন হোস্তেলশিং অমসুং অঙাংশিংগীদমক্তা ক্রেচ ফেসিলিতীশিং শেমগৎনবা লৌখিবা ৱারেপশিং অদু পনখি। মহাক্না হায়খি মদুদি সরকারনা নুপীশিংগীদমক অথিংবা থম্লম্বা সেক্তর পুম্নমক হাংদোক্নবা হোৎনরি। মহাক্না ফাইতর পাইলোৎশিং য়াওনা আর্মদ ফোর্স অহুমদা নুপী ওফিসরশিং, সৈনিক স্কুলশিং অমসুং একাদমীশিংদা এদমিসন অমসুং পুলিস ফোর্স অমসুং পেরামিলিতরী ফোর্সতা নুপী মশিং হেনগৎলকপগী খুদমশিং পনখি। খুঙ্গংশিংদা লৌউ-শিংউ অমসুং দাইরী সেক্তরদগী হৌরগা স্তার্ত-অপ রিভোলুসন ফাওবদা নুপী মশিং য়াম্না বিজিনেস মেনেজ তৌরি হায়না প্রধান মন্ত্রীনা পনখি। রাজনিতীদা ইচানুপীশিংগী শরুক য়াবা হেনগৎহন্নবা মহাক্না নরিশক্তি বন্দন আদিনিয়মগী মতাংদসু পনখি।

প্রধান মন্ত্রীনা হায়খি মদুদি নুপীশিংগী সেক্যুরিতী অসি মখোয়গী এম্পাৱরমেন্তকা লোয়ননা লৈবাক অসিগী খ্বাইদগী মরুওইবা অমনি। শ্রী মোদীনা মখা তাখি, "রাজ্যশিংগী খেন্নবা থমদনা ঐহাক্কী ইচে-ইচলশিং অমসুং ইচানুপীশিংগী অৱাবা অমসুং অশাওবা অদু ঐনা খঙই”। অচেৎপা ফিরেপ অমা লৌরদুনা, প্রধান মন্ত্রীনা রাজ্য সরকারশিং অমসুং লৈবাক অসিগী রাজনিতী দল পুম্নমকপু নুপীশিংগী মায়োক্তা চত্থরিবা হিংসাশিং অসি ঙাকপীফম থোক্তবা পাপ অমনি অমসুং মরাল লৈবা মীওই অমসুং মহাকপু মতেং পাংলিবশিং লেম্না থারোইদবনি হায়না ফোংদোকখি।

প্রধান মন্ত্রীনা হায়খি মদুদি পব্লিক ইন্সতিত্যুসনশিং হায়বদি হোস্পিতাল অমা নৎত্রগা স্কুল অমা নৎত্রগা ওফিস অমা নৎত্রগা পুলিস সিস্তেম অমা, মখোয়না একাউন্তেবল ওইগদবনি অমসুং মখোয়গী মায়কৈদগী করিগুম্বা মখলগী অশোইবা অমা য়াওবা অসি য়াবা ঙমলোইদবনি। শ্রী মোদীনা হায়খি, "সরকারশিং হোংবা য়াই, অদুবু খুন্নাই অমা ওইনা অমসুং সরকার অমা ওইনা ঐখোয়গী খ্বাইদগী চাউবা থৌদাংদি নুপীশিংগী পুন্সি অমসুং ইকাই খুম্নবা ঙাকশেনবনি।"

প্রধান মন্ত্রীনা হায়খি মদুদি সরকারনা নুপীশিংদা হিংসা চত্থরিবা মীওইশিংদা খ্বাইদগী শাথীবা চৈরাক পীনবা লেপ্পা লৈতনা আইনশিং হেন্না স্ত্রিক্ত ওইনবা হোৎনরি। মমাংদা এফ.আই.আর.শিং মতম চানা রেজিস্তর তৌখিদে অমসুং কেসশিং অসি মতম য়াম্না চংখি হায়না পল্লদুনা প্রধান মন্ত্রীনা হায়খি মদুদি অসিগুম্বা অপনবশিং অসি ভারতীয নায় সনাহিতা (বি.এন.এস.) দা লৌথোকখ্রে, মদা নুপী অমসুং অঙাংশিংগী মায়োক্তা চত্থরিবা হিংসাশিংগী মতাংদা চেপ্তর অমা শেমখ্রে। মহাক্না হায়খি মদুদি ভিক্তিমশিংনা করিগুম্বা মখোয়না পুলিস স্তেসনদা চৎপা পামদ্রবদি ই-এফ.আই.আর. রেজিস্তর তৌবা য়াগনি অমসুং পুলিস স্তেসনগী থাক্তা ই-এফ.আই.আর.দা তেম্পর তৌদনবা অমসুং অথুবা মতমদা থবক লৌখৎনবা থৌরাং পায়খৎলি। মহাক্না হায়খি মদুদি মসিনা খোঙজেল য়াংনা থিজিন হুমজিনবদা অমসুং মরাল লৈবশিংদা অকনবা চৈরাক পীনবদা মতেং পাংগনি। প্রধান মন্ত্রীনা মখা তানা হায়খি মদুদি অনৌবা আইনশিং অসিদা মাইনরশিংগী মায়োক্তা সেকচুএল ক্রাইম চত্থরিবশিংদা শিবগী ফাদোক অমসুং পুন্সি চুপ্পগী জেলদা থম্বগী প্রোভিজনশিং য়াওরি। মহাক্না মসিসু হায়খি মদুদি বি.এন.এস.না লুহোংবগী মমিংদা নমথাক তৌবা অমসুং লুহোংবগী মমিংদা অরানবা থবক তৌবগী মায়োক্তা থবক তৌনবা ময়েক শেংনা ৱাহন্থোক পীরি। ঐহাক্না ময়ামদা থাজবা পীজরি মদুদি কেন্দ্র সরকারনা নুপীশিংগী মায়োক্তা চত্থরিবা থৌওংশিং অসি থিংনবা রাজ্য সরকারশিংগা লোয়ননা হোৎনরি। ভারতকী খুন্নাইদগী অসিগুম্বা পাপ লৈবা ৱাখল্লোন অসি মুত্থত্রিবা ফাওবা ঐখোয়না লেপ্লোই" হায়না প্রধান মন্ত্রীনা হায়খি।

ভারতনা চাউখৎপগী লম্বীদা খুমাং চাউশিল্লকপদা মহারাস্ত্রগী থৌদাং অদু প্রধান মন্ত্রীনা পনখি। মহারাস্ত্র অসি ভিকসিৎ ভারতকী মঙাল লৈবা থৱানমিচাক অমনি হায়না মহাক্না হায়খি। মহাক্না হায়খি মদুদি মহারাস্ত্র অসি মালেম পুম্বগী ইনভেস্তরশিংগী পুক্নিং চিংশিনবা মফম অমা ওইরক্লি অমসুং রাজ্য অসিগী তুংলমচৎ অসি ইনভেস্তমেন্ত অমসুং অনৌবা থবক ফংবগী খুদোংচাবশিংদা য়ুম্ফম ওইরি। প্রধান মন্ত্রীনা রাজ্য অসিদা ইন্দস্ত্রীশিং পুক্নিং থৌগৎপা ঙম্বা অমসুং নহারোলশিংগী এজুকেসন, স্কিল অমসুং থবক ফংহনবদা মরুওইবা পীরবা স্তেবল ওইবা সরকার অমগী মথৌ তাবগী মতাংদসু হায়খি। ৱারোল পীবা লোইশিল্লদুনা প্রধান মন্ত্রীনা রাজ্য অসিগী ইমাশিং অমসুং ইচে-ইচলশিংনা তংদু লৈতাবা অমসুং চাউখৎপা মহারাস্ত্র অমগীদমক অমত্তা ওইনা পুনশিনগনি হায়বগী থাজবা ফোংদোকখি।

থৌরম অসিদা মহারাস্ত্রগী রাজ্যপাল, শ্রী সি.পি. রাধাকৃষ্ণন, মহারাস্ত্রগী মুখ্য মন্ত্রী, শ্রী একনাথ শিন্দে, মহারাস্ত্রগী উপ মুখ্য মন্ত্রী, শ্রী দেবেন্দ্র ফদনাবিস অমসুং অজিৎ পাৱর, কেন্দ্রগী লৌউ-শিংউ অমসুং লৌমীশিংগী য়াইফ-থৌরাং মন্ত্রী, শ্রী শিবরাজ সিংহ চৌহান্না শরুক য়াখি।

***