U Myntri Kam Pohiing bad Cooperation jong ka sorkar pdeng, Amit shah u la ai jingkren ha ka jingialang bad ki lad pathai khubor halor ki kam pyntriem Left Wing ha Raipur, Chhattisgarh mynta ka sngi. Ha ka jingai jingkren ha ka jingialang bad ki lad pathai khubor, u Amit Shah u la ong ba hapoh ka jingialam jong u Myntri Rangbah duh, Narendra Modi, ka jingiakhun pyrshah ia ki kam pyntriem left wing ka don ha ka bynta ba khatduh mynta. U la ong ba mynta kadei ka por ban pynkut syndon ia ki kam pyntriem left wing lyngba ka rukom treikam kaba khlain bad ka bym don jingmap. U la ong ba ki kam pyntriem left wing kin duh jait syndon ha ka ri shuwa u Lber 2026.

U Amit Shah u la ong ba ka sorkar ka trei ban wanrah ka jingshaniah ha ki briew ha ka roi ka par ha ka jaka ka jingngeit ia ki kam pyntriem left wing. U Myntri Kam pohiing u la ong ba ki kam pyntriem left wing kilong ka jingeh kaba khraw hakhmat ka synshar paidbah jong ka ri bad ka sorkar Modi ka la shim ia ki kam pyntriem left wing kum ka thong bad ka kut jingmut ban pynduh ia kane ka jingeh na ka ri. U Myntri Kam Pohiing u la kyntu ia ki samla ba donkti ha ki kam pyntriem left wing ba kin iehnoh ia ki kam thombor bad iasoh bad ka Mahayagya jong ka roi ka par jong ka ri ba ialam da u Myntri Rangbah duh Modi.

U Amit Shah u la ong ba ka sorkar Modi ka iaid shaphrang da ka jingngeit ha ka roi ka par bad ka jingkyntait ia ki jingngeit jong ki kam pyntriem left wing. U la ong ba ka sorkar pdeng ka shim man ka sienjam ban pyndap ia ka jaka ba suda jong ka jingbym don ka roi ka par namar ki kam pyntriem Left Wing. U Shah u la kdew ba namar ka jingsted ka sorkar Modi, bun ki jylla ki la lait na ki kam pyntriem Left Wing ha u 2019-2024.

U Myntri Kam Pohiing bad Cooperation u la ong ba ha u 2022, ha ka sien ba nyngkong ha ki 4 phew snem, ka jingdon kiba khlad namar ki kam thombor left wing ka la hiar hapoh ka 100. U la ong ba kaba duna tam ha ki jingjia ba iadei bad ki kam thombor left wing ba la ioh lum hapdeng u 2022 bad 2024. U Shah u la ong katba ka jingdon bun tam kiba iap ba la ioh jingtip ha u 2010 kalong 1005, kane kala hiar sha ka 138 ngut ha u 2023. U la ong ba ka jingpynbiang ia ka jingshngain ka la ktah bha ia ka kam bei tyngka ia ki kam pyntriem left wing. Ka jingpynduna ia ki kam thombor left wing kalong ka jingjop jong ki kynhun shipai jong ka ri bad ka synshar paidbah, u la ong.

U Amit Shah u la ong ba ia ka ‘Bastariya Battalion’ la kyntiew ha ka CRPF ha u 2017 ha kaba baroh ki shipai kidei na ka thain Bastar. U la ong ba hadien ba la ioh jingmynjur na ka kynhun Myntri sorkar pdeng, 200 ngut ki shipai kiba dei ki riewlum na Dantewada, Sukma bad Bijapur ki la rung kam ha kane ka battalion hapoh ka campaign ba kyrpang ha u 2022.

U Myntri Kam Pohiing u la ong ba nalor ka jingiakhun ia kane ka jingeh, ki kynhun pahara ki la peitngor ruh ia ki kam pynroi ha ki jaka ba shah ktah ha ki kam pyntriem left wing. U la ong ba ha ki 10 snem ba la leit jong ka sorkar Modi, la leh shibun ki kam ha Chhattisgarh na ka bynta ka jingpyniasoh, ka jingshna ia ki surok bad ka jingpynbeit ia ki kam pisa. U shah u la ong ba ka sorkar Chhattisgarh shen kan sa wanrah ka polisi wan pyndem kaba thymmai khnang ba ki samla kin lah ban wan aiti bad iasoh bad ka imlang sahlang jong ka roi ka par ha ka rukom kaba bit ba biang.  U la ong ba ka sorkar Chhattisgarh ka la buh thong Lber 2025 ban kot 100 percent ka jingpynpoi pura baroh ki skhim sorkar. U Shah u la ong ba ka Tnat Kam Pohiing bad ka sorkar Chhattisgarh kin sdang ia ka campaign ban ai jinghikai ia ki briew kiba la sah ha ka jingdum namar ki kam pyntriem left wing.

*****