প্রধানমন্ত্রীগী লোইশঙ
প্রধান মন্ত্রী শ্রী নরেন্দ্র মোদীনা পেরিস ওলিম্পিক কন্তিঞ্জেন্তকা ৱারী শানখ্রে
“শান্ন-খোৎনবসি কনা অমত্তনা কৈদৌনুংদা পোবা নাইদবা অমসুং মীপুম খুদিংমক্না তম্লিবা লমখৈ নাইদবা অমত্তা ঙাইরবা লম্নি”
“শান্নরোই খুদিংমকপু শেন্নরি”
“ঐহাক্কী লৈবাক অসিগী শান্নরোই অমত্তনা ভারতকী মমিংদা অশোয়বা অমত্তা য়াওবা পামদে। মসি ঐখোয়গী খ্বাইদগী চাউবা লন্নি”
“মসিগী পেরিস ওলিম্পিক্স অসিনা ভারতকী ওইনা মওং কয়া অমদা পুৱারী ওইরক্লি”
“মায় পাকপনা ঐখোয়বু ঙাইরি। ঐখোয়না কৈদৌনুংদা লেপ্লোই”
“খেলো ইন্দিয়ানা ভারতকী য়াম্না মরু ওইবা প্রোগ্রাম অমা ওইরক্লি অমসুং মসিদা হেন্না মরুওইবা পীবা অমসুং পাঙ্গলগী অহেনবা মথৌ তারি”
“অদোমশিং অসি ঐহাক্কী ২০৩৬কী তীমগী লান্মীশিংনি, ঐখোয়না ২০৩৬তা মালেমদা হৌজিক ফাওবদা পাংথোকখিদ্রিবা ওলিম্পিক্স অমগী য়ুম্বু ওইদুনা উৎপা ঙম্নবা অদোম পুম্নমক্না ঐহাক্কী মতেং পাংবীগদবনি”
Posted On:
16 AUG 2024 11:50AM by PIB Imphal
প্রধান মন্ত্রী, শ্রী নরেন্দ্র মোদীনা ঙসি মহাক্কী লৈফম ওইরিবা ৭ লোক কল্যান মার্গতা পেরিস ওলিম্পিক্সতা ভারতকী মহুৎ শিন্দুনা শরুক য়াখিবা ভারতকী কন্তিঞ্জেন্তগা ৱারী শানখ্রে।
পেরিস ওলিম্পিক কন্তিঞ্জেন্ততা ৱা ঙাংলদুনা, প্রধান মন্ত্রীনা শান্ন-খোৎনবা হায়বসিদি কনা অমত্তনা পোবা নাইদবা অমসুং মীপুম খুদিংনা তমজবা অমত্তা ঙাইরবা লম অমনি হায়খি। মহাক্না হায়খি মদুদি মেদল অমত্তা ফংদ্রবশিংনা মখোয়না মাইথিবা ফংলে হায়বা ৱাখল্লোন থাদোক্কদবনি। প্রধান মন্ত্রীনা হায়খি, "নখোয়না লৈবাক অসিগী ফিরাল ৱাংনা পাইহল্লি অমসুং করিগুম্বা শরুক খরা তমদুনা হল্লক্লি।" মেদল লৌবা ঙমদ্রবশিংগী মফমদা থাগৎপা ফোংদোক্নবা প্রধান মন্ত্রীনা হায়রদুনা মখোয়না পোরে হায়না খল্লোইদবনি, অদুবু মখোয়গী এক্সপিরিএন্সতগী করিগুম্বা খরা তম্লগা লাক্লে হায়না খনগদবনি হায়খি। শান্নরোয়শিংনা ৱাফম অসিবু অমত্তা ওইনা য়াখি।
প্রধান মন্ত্রীনা পেরিস ওলিম্পিক্সকী মনুংদা মালেমগী মফম কয়াদগী লাকপা শান্নরোয়শিংগা উনবগী থবক য়াওনা শান্নরোয়শিংগী এক্সপরিয়েন্সকী মতাংদা হংলকপদা, লক্ষ্যা সেন, বেদমিন্তন শান্নরোয়না হায়খি মদুদি মতম শাংনা শাংনা চৎথরকপা মোৎচশিং য়াওবা তুর্নামেন্ত অমা ওইরবসু, মহাক্কী অহানবা ওলিম্পিক্সতা চৎপদা মহাক্না য়াম্না চাউনা তমখি। মহাক্না মহাক্কী অহাঙবা মতমদা তীমগা লোইননা চাক্লেন চাবা, অনৌবা শান্নরোইশিংগা উনবা অমসুং মখোয়দগী তমজবগী মতাংদা হায়খি। মহাক্না মীয়ামগী মমাংদা অচৌবা স্তেদিয়ম অমদা শান্নখিবগী মহাক্কী এক্সপরিয়েন্স অদুসু পাউদমখি অমসুং মহাক্না অহানবা মেৎচ অনি নৎত্রগা অহুমদা খরা পাখৎলম্মি অদুবু তুর্নামেন্তনা খুমাং চাওশিল্লকপগা লোয়ননা মহাক্কী থাজবা হেনগৎলকখি হায়না মহাক্না হায়খি। মহাক্না হায়খি মদুদি মায় পাকপগী থাক্তা নক্না চঙলুরগা মায় পাকপা ঙমদবনা থম্মোয় কায়হল্লি। লাক্কদৌরিবা মতম অসিদা মহাক্না মহাক্কী রিজল্ত ফগৎহল্লগনি হায়নসু লক্ষ্ম্যনা প্রধান মন্ত্রীদা থাজবা পীখি। প্রধান মন্ত্রীনা দিসিপ্লিনগী তঙাইফদবা অদুসু পনখি। লৈবাক অসিদা ওলিম্পিক গেম্স য়েংবগী চাং ৱাংখৎলক্লিবা অসিগী মতাংদা পল্লদুনা প্রধান মন্ত্রীনা হায়খি মদুদি ভারত মচাশিংনা মালেমগী অতৈ লৈবাকশিংগা মান্ননা শান্নবা অমসুং চাংয়েংনবা ঙম্মি হায়বা ৱাখল্লোন অমা নাগরিকশিংগী মরক্তা শেমগৎলক্লি।
প্রধান মন্ত্রীনা পেরিস ওলিম্পিক্সকী মতমদা অশাবা মতমগী শাফু হন্থহন্নবগীদমক শান্নরোইশিংদা এয়র কন্দিসনরশিং ফংহন্নবা ওথোরিতীশিংনা খোঙজেল য়াংনা লৌখৎলিবা থবকশিং অদু পনখি। শান্নরোই খুদিংমকপু শেন্নরি হায়না প্রধান মন্ত্রীনা মখা তাখি।
মশাগী অনিশুবা ওলিম্পিক গেম্সতা শরুক য়াখিবা শুতর, অঞ্জুম মোদগিলনা প্রধান মন্ত্রীদা মহাক্না পান্দম অমা ফংবদা য়াম্না নুংঙাইবা অমসুং মায় পাকপা ঙমদবগী মতুংদা য়াম্না নুংঙাইতবা ফাওবগী এক্সপরিয়েন্স অমা ফংখি অমসুং মসিদি শান্নরোই খুদিংমক্না নুমিৎ খুদিংগী থেংনৈ হায়না ফোংদোকখি। মনুনা মেদল ফংলবা মতুং, অদুগা শান্নরোইশিংনা মরিশুবা মফমদা লৈখিবগা লোয়ননা ভিনেসকী নুংঙাইতবা ৱারোইশিন অমদি হোকী মেদলগী মরক্তা উৎখিবা নুংঙাইবা ফোংদোকপগী মতৌশিগদা খেন্নবা অমা উৎখি হায়না মহাক্না হায়খি। মহাক্না হায়খি মদুদি শান্নরোয়শিংনা নুমিৎ খুদিংগী ফাওরিবা তোঙান তোঙানবা ইথিলশিং অসি লৈবাক পুম্বনা ফাওখি। অঞ্জুমনা হায়খি মদুদি ওলিম্পিক গেম্স অসি ভারত্তা স্পোর্তস কলচর অমা প্রমোৎ তৌনবা য়াম্না ফবা মতম অমদা লাক্লি অমসুং মসিনা নাগরিকশিংদা শান্নরোইশিংগী স্পোর্তসকী খোঙচৎ অদু খঙবা ঙমহনগনি। মহাক্না থাজবা থমখি মদুদি ঙসি উরিবা অফবা অহোংবশিং অসি তুংলমচৎতা হেন্না ফগৎলক্কনি। প্রধান মন্ত্রীনা মহাক্কী ৱাখল্লোনগা য়ানখি অমসুং হায়খি মদুদি ভারত পুম্বদা মান্নবা ৱাখল্লোন লৈ।
প্রধান মন্ত্রীনা নুপাগী হোকী তীমগী গোল কীপর পি.আর. শ্রীজেশনা মাংজৌননা রিতাইয়র তৌনবা ৱারেপ লৌখিবগী মতাংদা হংলকপদা শ্রীজেশনা প্রধান মন্ত্রীদা হায়খি মদুদি মহাক্না চহি খরগী মমাংদগী খল্লম্লবসু, মহাক্না লৈবাক অসিদা চহি ২০ চুপ্না থবক তৌরবা মতুংদা ওলিম্পিক্সকী গ্রান্দ প্লেৎফোর্মদা থাদোকপা পাম্মি। প্রধান মন্ত্রীনা শ্রীজেশতা তীমনা পীখিবা অথোইবা বিদায়গী থৌরম অদু পনখি অমসুং তীমনা মহাকপু য়াম্না নীংশিংগনি হায়না ফোংদোকখি। সেমি ফাইনেলদা মায়থীবা পীরকপা অসি নুংঙাইতবা অমনি অদুবু তীম পুম্নমক্না মহাক্কীদমক ব্রোঞ্জ মেদলগী মোৎচতা মায় পাক্নবা হোৎনখি হায়না শ্রীজেশনা হায়খি। মহাক্না হায়খি মদুদি মহাক্না পোদিয়ম অদুদগী তীমদা য়াইফ-পাউজেল পীবগী খুদোংচাবা ফংখিবদু য়াম্না নুংঙাইখি অমসুং লাইবক ফবা খুদোংচাবা অমনি।
অহানবা ক্বার্তরদা শান্নরোয় ১০ খক্তমক য়াওখিবা গ্রেৎ ব্রিতেনগী মায়োক্তা শান্নখিবা মেৎচ অদুদা থেংনখিবা অৱাবাশিংগী মতাংদা প্রধান মন্ত্রীনা হংলকপদা, নুপাগী হোকী তীমগী কেপ্তেন, হরমনপ্রীত সিংহনা কোচিং স্তাফকী মরুওইবা থৌদাং অদু পনখি অমসুং থৌশিল থৌরাং কয়া মপুং ফানা পাংথোক্তুনা তীমদা পুক্নিং থৌগৎপা হেনগৎহনখি হায়না ফোংদোকখি। মহাক্না হোকিদা গ্রেৎ ব্রিতেনগা হৌজিক ফাওবদা লৈনরিবা য়েংশিন্নবগী থৌওং অদুসু পনখি। মসিগী মতাংদা প্রধান মন্ত্রীনা য়াম্না নুংঙাইনা পাউখুম পীখি অমসুং হায়খি, "মসি চহী ১৫০গী মমাংদগী লৈরক্লি।" হরমনপ্রীতনা হায়খি, "ঐখোয়না চৎনবী অদু ঙাক্না চৎলি।" মহাক্না ওলিম্পিক্সতা ওস্ত্রেলিয়াবু চহি ৫২গী শাংলবা মতমগী মতুংদা হোকীদা মায়থীবা পীবগী মতাংদসু ৱা ঙাংখি। প্রধান মন্ত্রীনা তীম্না মায় পাক্লিবা অসিগীদমক্তা থাগৎপা ফোংদোক্লদুনা ওলিম্পিক্স অনিদা থংন-থংননা মেদল লৌবা ঙম্লিবা অসিবুশু মিৎয়েং চঙখি।
রেস্তলর অমন শেরাৱতনা প্রধান মন্ত্রীদা মহাক্কী মপা-মমা লৈখিদ্রবা মতুংদা মহাক্না চহি ১০ শুরকপদগী থেংনরকখিবা অৱাবা অদুগী মতাংদা পাউদমখি। মহাক্না হায়খি মদুদি মহাক্না মেদল অমা ফংদুনা মহাক্কী মমা-মপাদা ইকায় খুম্নবা উৎখ্রে। শান্নরোই অমা ওইনা মহাক্কী দিবেলপমেন্ততা তেংবাংখিবা অসিগীদমক মহাক্না TOPS, SAI অমসুং WFIগী মফমদা থাগৎপা ফোংদোকখি।
প্রধান মন্ত্রীনা কন্তিঞ্জেন্ত অসিদা শান্নরোইশিংদা পীরিবা মিংথোলশিংগী মতাংদা হংখি। বিহারগী লেজিস্লেতিব এসেমব্লীগী মেম্বরসু ওইরিবা শুতর, শ্রেয়াসি সিংহনা প্রধান মন্ত্রীদা মহাক্কী তীমমমেতশিংনা মহাকপু 'বিধায়ক দিদি' হায়না কৌনৈ হায়না পাউদমখি।
সোসিএল মীদিয়া শিজিন্নবগী মতাংদা প্রধান মন্ত্রীনা হংলকপা ৱাহং অদুগী মতাংদা, হর্মনপ্রীতনা প্রধান মন্ত্রীদা ওলিম্পিক্সকী মতম পুম্নমক্তা মোবাইল ফোন অমসুং সোসিএল মীদিয়া শীজিন্নদনবা অপুনবা হোকী তীমনা ৱারেপ লৌখি হায়না ফোংদোকখি। মসিগী মরমদি অফবা ওইরো, নত্ত্রগা ফত্তবা ওইরো, কম্মেন্ত খুদিংনা মখোয়দা শাফু পীবা য়াবগী ওইথোকপা লৈবননি হায়না মহাক্না মখা তাখি। প্রধান মন্ত্রীনা থৌওং অসিবু থাগৎলদুনা নহাশিংনা মসিমক পাংথোকফম থোকই হায়না ফোংদোকখি।
অহানবা ওলিম্পিয়ন ওইরিবা অমসুং পোইন্ত অমখক্না মরম ওইরগা রাউন্দ মায়থীখিবী রিতিকা হুদা, রেস্তলরবু প্রধান মন্ত্রীনা পুক্নিং থৌগৎলদুনা মহাক্কী চহিনা মহাক্কী মায়কৈদা লৈরি হায়না ফোংদোকখি। মহাক্না থাজবা থমখি মদুদি মহাক্না তুংলমচৎতা লৈবাক অসিদা চাউথোকচনীংঙাই ওইরবা থৌদাং লৌগনি।
পেরিস ওলিম্পিক্সকী চিফ মেদিকেল ওফিসর, দোক্তর দিনশো পারদিৱালানা প্রধান মন্ত্রীদা ওলিম্পিক্স মনুংদা শান্নরোয়শিংদা অশোক-অপন থোকখিদে হায়না পাউতাক পীখি। মমাংগী ওলিম্পিক্স 3-4গা চাংদম্নবদা ওপরেসন মথৌ তাবা শাথীবা অশোকপা 1-2 খক্তমক থোকখি। মহাক্না হায়খি মদুদি পোলিক্লিনিক অমসুং অতোপ্পা ফেসিলিতীশিং অসি শান্নরোয়শিংবু হকচাং ফনা লৈনবা, অশোকপা লৈতবা অমসুং শেম-শাবা য়াহন্নবা বিলদিং অমখক্তদা লৈ। মহাক্না হায়খি মদুদি মসিনা শান্নরোয়শিংদা থাজবা য়াম্না পীরম্মি। মহাক্না শান্নরোয়শিংবু মতেং পাংনবা তুংদা মখা তানা থবক অসি চত্থনবা অপাম্বা ফোঙদোকখি। প্রধান মন্ত্রীনা হোৎনরিবশিং অদু থাগৎপা ফোংদোকখি। মহাক্না হায়খি মদুদি অশোক-অপন হন্থবনা শান্ন-খোৎনবগী হীরম খুদিংমক্তা এক্সপর্তাইস পীরি। মহাক্না শান্নরোয়শিংনা অচৌবা অশোক-অপন থোকহন্দনবা অপীকপা শিংনবশিং নৎত্রগা অৱাবা কয়া থেংননবা শেম-শারিবা অদুগীদমক থাগৎপা ফোংদোকখি। “ঐহাক্না থাজৈ মদুদি অদোম্না অদোমগী হকচাংবু ত্রেন তৌদুনা অমসুং কন্না হোৎনদুনা লৈরমগনি। অদোম পুম্নমকপু থাগৎপা ফোংদোকচরি”, প্রধান মন্ত্রীনা হায়খি।
প্রধান মন্ত্রীনা স্পোর্তস অমসুং য়ুথ এফিয়র্স, শ্রী মনসুখ মান্দবিয়া, স্পোর্তসকী রাজ্য মন্ত্রী, শ্রীমতি রক্ষা খাদসে অমসুং ইন্দিয়ন ওলিম্পিক এসোসিয়েসনগী প্রসিদেন্ত, শ্রীমতি পি.তি. উশানা ঙসিগী থৌরমদা শরুক য়াখিবুশু শকখঙখি। শ্রী মোদীনা শান্নরোইশিংনা পেরিসতগী হল্লকপদা তরাম্না ওকখি অমসুং মখোয়গী হোৎনরিবশিংবু থাগৎপা ফোংদোকখি। মহাক্না চাউথোকচবা ফোংদোকখি অমসুং হায়খি মদুদি মালেম পুম্বনা ভারতকী শান্নরোয়শিংগী পুক্নিং চেৎপা, দিসিপ্লিন অমসুং মখোয়গী লমচৎ শাজৎকীদমক থাগৎপা ফোংদোক্লি। “ঐহাক্কী লৈবাক অসিগী শান্নরোই অমত্তনা ভারতকী মমিংদা অশোয়বা অমত্তা য়াওবা পামদে। মসি ঐখোয়গী খ্বাইদগী চাউবা লন্নি" হায়না প্রধান মন্ত্রীনা কন্তিঞ্জেন্ত পুম্নমকপু থাগৎলদুনা হায়খি।
মালেম পুম্বদা ভারতকী ফিরাল পাইহন্দুনা কন্তিঞ্জেন্ত অসিনা লৈবাক অসিদা হল্লকখিবদা প্রধান মন্ত্রীনা চাউথোকচবা ফোংদোকখি। মহাক্না পেরিস ওলিম্পিক্স হৌদ্রিঙৈগী মমাংদা কন্তিঞ্জেন্ত অদুগা ৱারী শানখিবা অদু নীংশিংখি অমসুং মীপুম খুদিংমক্না মখোয়গী খ্বাইদগী ফবা পরফোর্মেন্স পীখি হায়না মহাক্না হায়খি। ভারতকী শান্নরোয়শিং অসি নহা ওইরি অমসুং মসিগী এক্সপরিয়েন্স অসিগা লোইননা, মখোয়না হেন্না মায় পাক্নবা মতম লৈরে হায়না মহাক্না পনখি। মহাক্না মখা তাখি, "লৈবাক অসিনা মসিগী এক্সপরিয়েন্স অসিদগী কান্নবা ফংগনি।"
লৈবাক অসিগীদমক তোঙান তোঙানবা রেকোর্দ কয়া থমখিদুনা নহা লাখ কয়াদা ইথিল পীরিবা অসিগী মতাংদা পল্লদুনা প্রধান মন্ত্রীনা হায়খি, "পেরিস ওলিম্পিক্স অসি ভারতকী ওইনা তোঙান তোঙানবা মওংদা পুৱারী ওইরি।" মহাক্না ওলিম্পিক্সকী চহি ১২৫ রোমগী পুৱারীদা ভারতকী শান্নরোই অমা ওইনা ইভেন্ত অমদা মেদল অনি ফংখিবা অহানবা নুপী ওইখিবা মানু ভাকর, শুতরগী মতাংদা পনখি। মহাক্না ত্রেক অমসুং ফিল্দ এথলেৎ, নীরাজ চোপ্রাগী মতাংদসু পনখি। মহাক্না ইন্দিয়ন প্লেয়র ওইনা ইন্দিভিজুএল ইভেন্তশিংদা গোল্দ অমসুং সিলভর ফংখিবা অহানবা শান্নরোই ওইখি। হোকিদা চহী ৫২গী মতুংদা মথং-মথং মেদল অনি ফংলকপা, অমন শেরাৱতনা চহী ২১গী ময়াদা মেদল অমা ফংলকপা অমসুং ভিনেস ফোগত, রেস্তলরনা রেস্তলিংদা ফাইনেল চঙলকপা অহানবা ভারতমচা ওইরকপগী ৱাফমসু মহাক্না পনখি। মহাক্না ভারতকী শুতরশিংগীদমক চাউথোকচবা ফোংদোকখি, মখোয়না অহানবা ওইনা শুতিং ইভেন্ত তরেৎকী ফাইনেলদা চংখ্রে। মতৌ অসুম্না, আর্চরীদা, ধিরেজ অমসুং অঙ্কিতা অসি মেদল ফংনবা শান্নখিবা ভারতকী অহানবা আর্চরশিং ওইখি, লক্ষ্য সেন অসি ওলিম্পিক্সতা সেমি-ফাইনেল চঙবা অমত্তা ঙাইরবা নুপা বেদমিন্তন শান্নরোই ওইখি, অবিনাশ সবলেনা ফাইনেলগীদমক ক্বালিফাই তৌখি।
শ্রী মোদীনা হায়খি মদুদি মেদল ফংলবশিংগী মনুংদগী অয়াম্বদি চহি ২০গী মনুংদা ওইরি। মহাক্না মসিসু পনখি মদুদি তোকিও অমসুং পেরিস ওলিম্পিক্স অসি চহি মরিগী মহুত্তা চহি অহুমগী মনুংদা পাংথোকখি অমসুং শান্নরোয়শিংনা চহি অমা হেন্না লৈরম্লবদি হেন্না ফবা পরফোর্মেন্স পাংথোক্লমগনি হায়খি। শান্নরোইশিংনা মখোয়গী শাংলবা কেরিয়রদা অচৌবা তুর্নামেন্ত কয়া অমা শান্নগনি হায়না মহাক্না ফোংদোকখি অমসুং মখোয়গী খোঙচৎ অসিবু মখা চত্থনবা মখোয়দা তকশিনখি। অদোম্না মেৎচ অমত্তা মাংহন্দবা তাই। “নহা ওইরিবা তীম অসিনা স্পোর্তসকী লমদা ভারতকী তুংলমচৎ অসিদা করম্বা মঙাল লৈবা তীম অমা ওইরক্কদগে হায়বগী খুদম্নি", প্রধান মন্ত্রীনা হায়খি। প্রধান মন্ত্রীনা পেরিস ওলিম্পিক্স অসি ভারতকী শান্ন-খোৎনবশিংগী লমজেল অসি হৌদোকপগী মফম অমা ওইরগনি হায়না থাজবা থমখি। মহাক্না হায়খি, "মায় পাকপনা ঐখোয়বু ঙাইরি। ঐখোয়না কৈদৌনুংদা লেপ্লোই”।
মালেমগী থাক্কী স্পোর্তস ইকোসিস্তেম অমা শেমগৎপদা সরকারনা অখন্নবা মীৎয়েং থম্লি হায়না প্রধান মন্ত্রীনা ফোংদোকখি। মহাক্না গ্রাসরুত্তগী লাকপা শান্নরোইশিং থিদোকপা অমসুং শেমগৎপগী তঙাইফদবা অদুদা অকনবা ৱাফম থমখি। মহাক্না খুঙ্গং অমসুং শহর খুদিংদগী নহা ওইরিবা তেলেন্তশিংবু শৌগৎনবা চত্থরিবা খেলো ইন্দিয়া কেম্পেনগী মতাংদা পনখি। খেলো ইন্দিয়াগী শান্নরোয় ২৮না ওলিম্পিক গ্রুপ অসিগী শরুক অমা ওইরকপদা পি.এম. মোদীনা নুংঙাইবা ফোঙদোকখি। খেলো ইন্দিয়া এথলেৎশিং ওইনা মখোয়গী খোঙচৎ হৌখিবা অমন, অনন্তজিৎ, ধিরেজ অমসুং সরভজোৎকী মতাংদা মহাক্না পনখি। খেলো ইন্দিয়ানা ভারতকী য়াম্না মরু ওইবা প্রোগ্রাম অমা ওইরক্লি অমসুং মসিদা হেন্না মরুওইবা পীবা অমসুং পাঙ্গল হাপ্পগী হেন্না মথৌ তাই হায়না মহাক্না মখা তাখি। মহাক্না হায়খি মদুদি লৈবাক অসিগীদমক খেলো ইন্দিয়াগী শান্নরোইশিংগী অচৌবা লান্মী অমা শেমগৎলি অমসুং শান্নরোইশিংনা ত্রেনিং তৌরিঙৈদা খুদোংচাবশিং অমসুং রিসোর্সশিংগী অৱাবা মায়োক্নদনবা বজেৎসু লেপ্পা লৈতনা হেনগৎহল্লি। শান্নরোই পুম্নমক্না ওলিম্পিক্স মমাংদা মালেমগী ওইবা কম্পিতিসন কয়াদা শরুক য়াবা ফংখিবদা মহাক্না নুংঙাইবা ফোংদোকখি। কোচশিং অমসুং এক্সপর্তশিংনা দাইত অমসুং ইক্বিপমেন্তদা অকনবা মীৎয়েং চংখি অমসুং মালেমগী থাক্কী ফেসিলিতীশিং ফংহন্নবা হোৎনখি। শান্নরোইশিংবু মতেং পাংনবা ইকোসিস্তেম অমা শেম্লে হায়না মহাক্না ফোংদোকখি। শ্রী মোদীনা হায়খি, "মসিনা শান্ন-খোৎনবগা মরী লৈনবা লৈবাক্কী পোলিসীশিংদা অহোংবা অমা ওইবতা নত্তনা, মসিদি লৈবাক অসিনা নহা ওইরিবা চারোল শুরোন্দা থাজবা থম্লিবা অসিগী খুদম অমশু ওইরি"।
প্রধান মন্ত্রী মোদীনা হায়খি মদুদি শান্নরোই পুম্নমক অসি লৈবাক অসিগী নহারোলশিংগীদমক অচৌবা ইথিল অমনি। মহাক্না মমাংগী ওলিম্পিক্সতা তেক্নিকেল ইসুশিং থেংনখ্রবা মতুংদা মনুনা অমুক হন্না মায় পাক্লকপা, অঙ্কিতানা চহি অসিগী খ্বাইদগী ফবা পর্ফোমেন্স পীখিবা অমসুং মোনিকা বত্রা অমসুং শ্রীজা একুলানা মীপুম খুদিংমক্কী পুক্নিং চিংশিনখিবা অদু পনখি। মতৌ অসুম্না, মহাক্না নীরজকী কনসিস্তেন্সী অমসুং দিসিপ্লিন, স্বপনীলনা অৱাবা কয়া মায়োক্নদুনা মেদল ফংখিবা অমসুং হোকী তীমগী পর্ফোমেন্সকী মতাংদা পনখি। “মেদল ফংলবা নত্ত্রগা পোইন্ত অমখক নত্ত্রগা সেকেন্দ খরা মাংখিবদগী মেদল ফংহৌদ্রবা মীওই খুদিংমক্না চপ মান্নবা ৱারেপ লৌখি। মসিগী পরিং অসি গোল্দ ফংদ্রিবমখৈ লেপ্লরোই", হায়না প্রধান মন্ত্রীনা হায়খি লৈবাক অসিগী নহাশিংনা মসিদগী য়াম্না তমগনি হায়বগী থাজবা ফোংদোকখি।
ভারতনা ২০৩৬কী ওলিম্পিক্স পাংথোক্নবা শেম-শারি হায়না প্রধান মন্ত্রীনা খঙহনখি অমসুং মমাংগী ওলিম্পিক্সতা শরুক য়াখিবা শান্নরোয়শিংগী ইনপুৎকী মরুওইবা অদু পনখি। “ওলিম্পিক্সকী থৌরাং তৌবদগী হৌরগা এরেঞ্জমেন্ত ফাওবা, স্পোর্তস মেনেজমেন্তদগী হৌরগা থৌরম অদুগী মেনেজমেন্ত ফাওবা, অদোম্না ইশাগী এক্সপরিয়েন্স অমসুং ওবজর্বেসনশিং অদু ইদুনা লৈঙাক্তা তাক্কদবনি। মসিনা ঐখোয়না ২০৩৬কীদমক শান্নরোইশিংনা মখোয়গা লোয়ননা পুরকপা মিনিত দেতেলশিং অদুদগী শেম-শাবা ঙমগনি। মখোয়গী পাউতাকশিং অসি ২০৩৬কী শেম-শাবদা কান্নবা ওইগনি”, প্রধান মন্ত্রীনা হায়খি। "অদোমশিং অসি ঐহাক্কী ২০৩৬কী তীমগী লান্মীশিংনি, ঐখোয়না ২০৩৬তা মালেমদা হৌজিক ফাওবদা পাংথোকখিদ্রিবা ওলিম্পিক্স অমগী য়ুম্বু ওইদুনা উৎপা ঙম্নবা অদোম পুম্নমক্না ঐহাক্কী মতেং পাংবীগদবনি", শ্রী মোদীনা হায়খি। মহাক্না স্পোর্তস মিনিস্ত্রীদা মসিগীদমক দ্রাফ্ত অমা শেম্নবা অমসুং শান্নরোই পুম্নমক্তগী অকুপ্পা মরোলশিং লৌনবা হায়খি।
তুংগী শান্নরোইশিংগা সোসিএল মীদিয়াগী ফম্বাক্তা মরী শাগত্তুনা ইথিল পীনবা থবক তৌনবা প্রধান মন্ত্রীনা শান্নরোইশিংগী মফমদা হায়খি। তোঙান-তোঙানবা চহিগী কাঙলুপকী মীওই কয়াগা ৱারী শানবা মসিগুম্বা থৌরম কয়া শিন্নবা প্রধান মন্ত্রীনা স্পোর্ত মন্ত্রালয়দা খঙহনখি।
প্রধান মন্ত্রীনা শান্নরোইশিংদা অকোয়বগী ফিভম ঙাক্নবা হৌজিক চত্থরিবা 'এক পের মা কে নাম' কেম্পেনদা শরুক য়াবীনবসু হায়খি। মহাক্না পেরিসতা হোৎনরিবশিং অদুসু পনখি অমসুং অকোইবগী ফিভমগা চান্নবা ইকোসিস্তেমগী মরমদসু ঙাংখি। ঐখোয়গী পৃথিবীগী ঙাক-শেনবগীদমক নেচরেল ফার্মিংগী ৱাখল্লোন অসি শন্দোক্নবা অমসুং নহাশিংবু স্পোর্তস অমসুং ফিৎনেসতা শরুক য়ানবা পুক্নিং থৌগৎনবা মহাক্না মখোয়দা হায়খি।
মহাক্কী ৱারোল লোইশিল্লদুনা, প্রধান মন্ত্রীনা শান্নরোইশিংনা লৈবাক অসিগীদমক্তা মতম পুম্নমক্তা মিংচৎ পুরক্কনি হায়না থাজবা থমখি। মহাক্না হায়খি মদুদি চাউখৎলবা ভারত অমগী মায়কৈদা চংশিল্লিবা খোঙচৎ অসি নহা ওইরিবা তেলেন্তশিংগী মাইপাকপগা লোয়ননা হেন্না ফবা ওইগনি। “ঐগীদমক্তদি, অদোম পুম্নমক মায় পাকপা মীওইশিংনি। মীপুম খুদিংমক্না করিগুম্বা খরা ফংলি। অমসুং ঐহাক্কী লৈবাক অসিগী অসিগুম্বা নহারোলশিংনা করিগুম্বা খরা ফংলকপা মতমদা, লৈবাক অসিনা মখোয়দা থাজবা থমদুনা মান্নবা মায় পাকপা অসি ফংনবা শেম-শারি", হায়না প্রধান মন্ত্রীনা মহাক্কী ৱারোল লোইশিনখি।
***
(Release ID: 2047031)
Visitor Counter : 10