ভারতকী উপ-রাস্ত্রপতি, শ্রী জগদীপ ধনখরনা নাগরিকশিংদা "ভারতপু দিস্তেবিলাইজ তৌনবা অমসুং ঐখোয়গী চাউখৎ-থৌরাংদা অপনবা পীবনা অমত্তা ঙাইরবা মোতো ওইরিবা তমথিরবা দিজাইনশিং য়াওবা অকিবনা থল্লবা শক্তিশিং" অসিগা মতাংদা চেকশিন্না লৈনবা তকশিনখি।

ঙসি ভারত মান্দপমদগী হর ঘর তিরঙ্গা বাইক রেল্লী লমথাদ্রিঙৈ মমাংদা মীয়ামদা ৱা ঙাংলদুনা উপ-রাস্ত্রপতিনা হায়খি, "মীওই খরনা ঐখোয়গী চাউখৎপগী খোঙজেল য়াংনা চৎলিবা অসি খাংবা ঙমদে। মখোয়না অপনবশিং পবা, তংদু লৈতাহনদবা পাম্মি”।

তিরঙ্গাগী মরুওইবা অদু খঙলদুনা মহাক্না নাগরিকশিংদা মদুদগী ইথিল লৌদুনা মায়োক্নরিবা ফোর্সশিংগী মায়োক্তা পুন্না চৎমিন্ননবা হায়খি অমসুং খুদোংচাদবা ফীভম খুদিংমক্তা লৈবাক্কী ইন্তরেস্তপু খ্বাইদগী মরুওইনা লৌনবা নাগরিক পুম্নমক্তা আপিল তৌখি।

2021দা হৌদোকখিবা 'হর ঘর তিরঙ্গা' কেম্পেনগী মরুওইবা অদু পল্লদুনা শ্রী ধনখরনা হায়খি মদুদি খোঙথাং অসিনা ভারত মচা পুম্নমক্কী মরক্তা লৈবাক নুংশিবা অমসুং জাতিগীদমক চাউথোকচবা পোকপগী মপুং ওইবা ৱাখল্লোন অমা পোকহন্নবা অমসুং অমত্তা ওইবগী ৱাখল্লোন অমা পোকহন্নবা পান্দম থম্লি। মহাক্না কেম্পেন অসি ঙসিদি 'জন অন্দোলন' অমা ওইরকপগী ৱাফমসু থমখি।

ভারতকী তিরঙ্গাগী মরুওইবা অদু পল্লদুনা উপ-রাস্ত্রপতিনা ফোংদোকখি মদুদি মসি তিরঙ্গা অমখক্তা নত্তে, মসি ঐখোয়গী নীংতম্বা অমসুং অপুনবা শক্তমগী খুদম অমনি।

ভারতকী শক্তম অসি ঐখোয়গী ঈদা য়াওরি হায়বা ৱাফম থম্লদুনা উপ রাস্ত্রপতিনা হায়খি মদুদি ঐখোয়গী ভারতকী শক্তমদা শীংনবসি ঐখোয়গী অশেংবা শক্তম অদুদা শীংনবগা মান্নৈ। মহাক্না মীয়াম্বু তিরঙ্গাগী ইকাই খুম্নবা, অমসুং চাউথোকচবা মতম পুম্নমক্তা ঙাক্না চৎনবা পুক্নিং থৌগৎখি।

ঐখোয়গী নীংতম লানফম অসিদা নেতাজী সুভাস চন্দ্র বোসনা থম্বীরম্বা লেগেসী অদু পল্লদুনা শ্রী ধনখরনা নেতাজীনা ইং 1943গী দিসেম্বর 30দা বৃটিশকী লৈঙাক্কী মায়োক্তা পুৱারী ওইরবা থৌওং ওইনা আন্দামান অমসুং নিকোবর ঈথৎশিংদা ভারতকী ফিরাল চীংখৎখিবগী থৌওং অদু পনখি। মহাক্না হায়খি মদুদি নেতাজীগী লিগেসী অসি পরাক্রম দিবসতা চহি খুদিংগী পাংথোক্লি অমসুং কর্তব্য পথতা মহাক্কী মীতম অসিনা অমর ওইহল্লি।

শ্রী ধনখরনা হৌজিক চত্থরিবা 'আজাদী কা অমৃত মহোৎসব' থৌরমদা ভারতকী নীংতম লানগী অথৌবশিংবু ইকায় খুম্নবা উৎনবা লৈবাক অসিনা হোৎনরিবশিং অদু থাগৎপা ফোংদোকখি। “ঐখোয়গী নীংতম লানফম অসিদা থৌদাং লৌখিবা মীওই খুদিংমক ঐখোয়না নীংশিংলি। লৈবাক অসিগী মফম খুদিংমক্না মখোয়বু শকখঙখি অমসুং ইকায় খুম্নবা উৎখি,” হায়না মহাক্না ফোংদোকখি।

মালেমগী থাক্তা ভারতকী অহোংবা পুরকপগী খোঙচৎ অমসুং শান্তি অমসুং চাউখৎ-থৌরাংগীদমক অচেৎপা ফিরেপ লৌবগী মতাংদা পল্লদুনা, শ্রী ধনখরনা হায়খি মদুদি মপানগী ইন্সতিত্যুসনশিংনা হৌজিক ভারত অসি লৈবাক অসিগী য়াম্না থুনা চাউখৎলক্লিবা শেন্মিৎলোন অমসুং মালেমগী ইথিলগী ফিদম্নফম ওইবা খুদম অমা ওইনা উরি। ভারত অসি হৌজিক্তি পোতেন্সিএল অমসুং ওইথোকপা য়াবগী লৈবাক অমা খক্তা নত্তে, মমাংদা অমুক্তা ওইখিদ্রিবা মওংদা চাউখৎলক্লিবা লৈবাক অমা ওইরে হায়না মহাক্না অকনবা ৱাফম থমখি। “ঐখোয়গী চাউখৎপা অসি থিংবা ঙম্লোই, অমসুং ঐখোয়গী চাউখৎপা অসিনা ঐখোয়বু 2047 ফাওবদা চাউখৎলবা লৈবাক অমা ওইহল্লগনি," হায়না মহাক্না হায়খি।

রেল্লী অসি লমথারদুনা শ্রী ধনখরনা হায়খি, "ঐহাক্কী গ্রীন ফ্লেগ অসি তিরঙ্গা বাইক রেল্লী অসি হৌদোক্নবা ইঙ্গিৎ অমা খক্তা নত্তে। মসিনা ঐখোয়গী নীংতম্বগী চহি চা মপুং ফারকপদা ভিকসিৎ ভারতকী মংলানগী মায়কৈদা ঐখোয়গী মেরাথোন খোঙচৎকী ইন্তিগ্রেন্ত ফেসেৎ অমা হৌরকপগী খুদম ওইরি”।

কেন্দ্রগী তুরিজম অমসুং কলচর মন্ত্রী শ্রী গজেন্দ্র সিংহ শেখাৱত; কেন্দ্রগী পার্লিয়ামেন্তরী এফিয়র্স অমসুং মাইনোরিতী এফিয়র্স মন্ত্রী শ্রী কিরেন রিজিজু; কেন্দ্রগী য়ুথ এফিয়র্স অমসুং স্পোর্তসকী কেন্দ্রগী মন্ত্রী দা. মনসুখ মান্দাবিয়া, কেন্দ্রগী সিভিল এভিয়েসনগী মন্ত্রী শ্রী কিঞ্জারাপু রাম মোহন নাইদু অমসুং অতোপ্পা শক্নাইরবশিংসু থৌরম অদুদা শরুক য়াখি।

মপুং ফাবা ৱারোল মসিদা পাবীয়ু: https://pib.gov.in/PressReleseDetail.aspx?PRID=2044745

****