প্রধান মন্ত্রী শ্রী নরেন্দ্র মোদীনা ময়াই তাংবল লৌদুনা ঙসি ফমখিবা কেন্দ্রগী কেবিনেতনা লৌউশিংউ অমসুং লৌমীশিংগী য়াইফ থৌরাং মন্ত্রালয়না থাংগৎলকপগী মতুং ইন্না ক্লিন প্লান্ত প্রোগ্রাম (সি.পি.পি.) অয়াবা পীখ্রে।

লুপা করোর ১,৭৬৫.৬৭ গী মতীক চারবা ইনভেস্তমেন্তকা লোইননা, হায়রিবা মশক থোক্লবা থৌরাং অসিনা ভারতকী হোর্তিকলচর সেক্তরদা অহোংবা পুরক্লগনি অমসুং মীকোক থোংবা অমসুং তুং কোইনা চৎপা হায়বদুগী অনৌবা থাক অমা শেমগনি হায়না থাজরি। শেলথুম মন্ত্রীনা ফেব্রুৱারীদা পীখিবা বজেতকী ৱারোলদা লাউথোকখিবগী মতুং ইন্না সি.পি.পি.না লৈবাক অসিগী অকোইবদা লৈরিবা উহৈ পুথকপগী চাং অসি অমসুং মগুন ফগৎহন্নবগী মায়কৈদা খোঙ থাংজিল্লি।

ক্লিন প্লান্ত প্রোগ্রাম (সি.পি.পি.)গী মরুওইবা কান্নবশিং 

লৌমীশিংদাঃ সি.পি.পি.না ভাইরস চেন্দ্রবা, মগুন লৈবা থানবগী মচাকশিং পীদুনা মহৈ মরোংগী চাথোক হেনগৎহনগনি অমসুং চাগা তানবগী খুদোংচাবা হেনগৎকনি।

নর্সরীঃ সর্তিফিকেসনগী থৌওং অমসুং ইনফ্রাস্ত্রকচর স্ত্রিম্লাইন তৌবনা নর্সরীশিংদা মতীক চানা তরু তনানবা থানবগী পোৎলমশিং পীহনবা ঙমহনগনি, চাথোক লৈহনগনি অমসুং তুং কোইনা চৎপা হেনগৎকনি।

কঞ্জুমরঃ থৌরাং অসিনা কঞ্জুমরশিংবু ভারস চেন্দ্রবা, মহাও লৈরবা, মশক ফজবা,অমসুং মচি ওইবা পোৎলম য়াওবগী চাং ৱাংবা উহৈশিংদগী কান্নবা ফংবা হেলহনগনি।

এক্সপোর্তঃ হেন্না ফবা, লাইনা চেন্দ্রবা উহৈশিং পুথোক্তুনা ভারতনা মালেমগী এক্সপোর্ত ওইবগী থাক হেনগৎহনগনি, মার্কেতকী খুদোংচাবা পাকথোক চাউথোক্কনি অমসুং ইন্তর্নেসনেল ফ্রুত ত্রেদতা পীরিবা শরুক হেনগৎহনগনি।

থৌরাং অসিনা লৌমী খুদিংমক্তা মখোয়গী লমগী পাক চাউবগী চাং নৎত্রগা সোসিও একনোমিক স্তেতস থিদনা তরু তনানবা পাম্বীগী মচাকশিং ফংহনবা ঙমহনগনি।

থৌরাং অসিনা নুপী লৌমীশিংবু প্লান্নিং অমসুং ইমপ্লিমেন্তেসন্দা চাউনা শরুক য়াবা ঙমহনগনি, মসিনা মখোয়দা রিসোর্স ফংবা হেলহনগনি, ত্রেনিং অমসুং ৱারেপ লৌবগী খুদোংচাবসু ফংহনগনি।

থৌরাং অসিনা ভারত্তা লৈরিবা তোঙান-তোঙানবা এগ্রো ক্লাইমেতিক কন্দিসনশিংদা লমদম লমদমদুগী চান্নবা ক্লিন ওইবা পাম্বীগী ভেরাইতীশিং অমসুং তেক্নোলোজীশিং শেমগৎকনি।

সি.পি.পি.গী মরুওইবা মচাকশিং:

ক্লিন প্লান্ত সেন্তর্স (সি.পি.সি.): মালেমগী থাক্তা লৈবা, দাইএগ্নোস্তিক থেরাপ্যুতিক অমসুং তিসু কলচর লেব থম্লবা অনৌবা মখলগী সি.পি.সি. মাপন ভারতকী তোঙান-তোঙানবা মফমশিংদা লিংখৎকনি। মসিদা অঙ্গুর (এন.আর.সি., পুনে), তেম্পরেত ওইবা উহৈশিং – সেম, আল্মন্দ, হৈজুগা অসিনচিংবশিং (সি.আই.তি.ঐচ., শ্রীনাগর অমসুং মুক্তেশ্বর), সাইত্রস ফ্রুতশিং (সি.সি.আর.আই., নাগপুর অমসুং সি.আই.এ.ঐচ., বিকানের), হৈনৌ/পুংথোল/এভাকাদো (আই.আই.ঐচ.আর., বেঙ্গলুরু), হৈনৌ/পুংথোল/লিতচি (সি.আই.এস.ঐচ., লখনৌ), কফোই (এন.আর.সি., শোলাপুর) অমসুং ত্রোপিকেল/সব-ত্রোপিকেল ওইবা হৈশিংনা নোংপোক থংবা ভারত্তা য়াওরি। হায়রিবা সেন্তরশিং অসিনা হেন্না শন্দোকপা হেনগৎনবা ভাইরস চেন্দ্রবা পাম্বীগী মচাকশিং পীবদা অচৌবা থৌদাং লৌগনি।

সর্তিফিকেসন অমসুং লিগেল ফ্রেমৱার্কঃ মপাঙ্গল লৈবা সর্তিফিকেসন সিস্তেম অমা চলাইগনি, মসি সীদস এক্ত ১৯৬৬কী মখাদা লৈবা রিগুলেতরী ফ্রেমৱার্ক অমনা শৌগৎকনি, মসিনা মতীক চানা থাজবা হেনগৎনবা অমসুং পাম্বীশিংগী মচাকশিং পুথোকপা অমসুং য়োনবদা ত্রেস তৌবা ঙম্বগী চাং হেনগৎহনগনি।

হেন্না ফরবা ইনফ্রাস্ত্রকচরঃ চাউনা হাংবা নর্সরীশিংদা ইনফ্রাস্ত্রকচর ফগৎনবা মতেং পীগনি, মসিনা ক্লিন প্লান্তেসন মতিরিএল য়ামখৎহনবদা মতেং ওইগনি।

ক্লিন প্লান্ত প্রোগ্রাম অসিনা ভারতকী হোর্তিকলচর সেক্তরগবু মিসন লাইফ অমসুং ৱান হেল্থ থৌরাংগা চৎমিন্নরদুনা ফগৎহনবা ঙম্লগনি। মসিনা তুং কোইনা চৎপা অমসুং ইকো ফ্রেন্দলী ওইবা লৌউশিংউগী পথাপশিং শীজিন্নবা হেনগৎকনি অমসুং মপান্দগী পুশিল্লকপা প্লান্তিং মতিরিএলশিংদা তাংবা হন্থহল্লগনি। থৌরাং অসি ভারতনা মালেমগী উহৈ মপান্দা থাদোকপদা মকোক থোংবা ঙম্নবগী মায়কৈদা থাংজিনবা মরুওইবা খোংথাং অমা ওইরগনি অমসুং মসিনা সেক্তর অসিদা অহোংবা কয়া পুরকপা ঙম্বা অমা ওইরগনি। থৌরাং অসি নেসনেল হোর্তিকলচর বোর্দনা ইন্দিয়ন কাউন্সিল ওব এগ্রিকলচর রিসর্চ (আই.সি.এ.আর.)গা লোইননা চলাইগনি।

***