কেন্দ্রগী গৃহ অমসুং কোওপরেসন মন্ত্রী, শ্রী অমিত শাহনা ঙসি চন্দিগরগী য়ুনিয়ন তেরিতোরীগী মনিমজ্রাদা স্মার্ত সিতী মিসনগী মখাদা লুপা করোর ৭৫ রোমগী শেনফমগা লোইননা ২৪X৭ ৱাতর সপ্লাই প্রোজেক্ত শঙ্গাখ্রে। পঞ্জবাকী গবর্নর অমসুং চন্দিগরগী এদ্মিনিস্ত্রেত শ্রী গুলাব চান্দ কতারিয়া, রাজ্য সভাগী এম.পি. শ্রী সত্নম সিংহ সন্ধু, কেন্দ্রগী গৃহ মন্ত্র অমসুং ইন্তেলিজেন্স ব্যুরোগী দিরেক্তরসু থৌরম অদুদা শরুক য়াখিবা শক্নাইরবা মীওইশিংগী মনুংদা অমনি।

থৌরম অদুগী হৌদোকপগী শরুক্তা ৱা ঙাংলদুনা কেন্দ্রগী গৃহ অমসুং কোর্পোরেসন মন্ত্রী, শ্রী অমিত শাহনা হায়খি, প্রোজেক্ত অসিগী মখাদা মীওই লাখ অমা হেনবনা কান্নবা ফংগনি অমসুং লম একর ৮৫৫ হেন্না শন্দোক্না লৈরিবা সেতলমেন্ত অসিদা কিলোমিতর ২২গী অপুনবা অশাংবা লৈবা অনৌবা পাইপ্লাইন অসিগী খুত্থাংদা পুংজা খুদিং ঈশিং ফংলগনি হায়খি। মহাক্না হায়খি মদুদি, অচৌবা রিজার্বর নি শাদুনা পুং ২৪ ঈশিং ফংহন্নবগী মওংদা শেম্লে। মহাক্না হায়খি, স্মার্ত মিতর পানবগা লোইননা, য়ুবদা চৎপা শেলশিং কঞ্জুমরশিংনা পুররোই, ঈশিং মখা তানা য়ুরিবা ইমুংশিং খুদক্তা খঙলগনি অমসুং ভি.এফ.দি. পম্প অমসু ঈশিংগী শাফু কনবগী চাং ৱাংনবা হাপ্লগনি।

কেন্দ্রগী গৃহ মন্ত্রীনা হায়খি মদুদি ঈশিং হায়বসিনা পুন্সিনি অমসুং ঈশিংনা মোৎলবদি নৎত্রগা মতীক চানা ফংদ্রবদি, মীয়াম্না অৱাবা মাইয়োক্নৈ অমসুং লায়না কয়ানা নাহল্লি। মহাক্না হায়খি, মফম অসিগী মীয়ামদা খ্বাইদগী অনৌবা ফিলত্রেসন প্লান্তকী খুথাংদা নোংমদা পুং ২৪ অমসুং চহি অমদা নুমিৎ ৩৬৫নি ফিলতর তৌরবা ঈশিং ফংলগনি।

শ্রী অমিত শাহনা হায়খি মদুদি ঈশিং অমসুং সিৱেরেজগী খুদোংচাবসি চন্দিগরদা হেক হৌরকপদগী ফংদুনা লাক্লি। অদুবু মী মশীং হেনগৎলকপদগী, ঈশিংগী মগুন অসি মতমগী মতুং ইন্না হন্থরক্লি। মহাক্না হায়খি মদুদি ফিলত্রেসন প্লান্তশিং অসি মতমগা চুন্নবা মওংদা শেমগদবনি, অনৌবা পাইপলাইনশিং হাপকদবনি অমসুং ঈশিং ফংবগী চাং হেনগৎহনগদবনি। মহাক্না হায়খি, অসিগুম্বা ৱাখল্লোন অসি থমদুনা মনিমজ্রাদা লৈরিবা মীয়ামদা পুংজা খুদিং ঈশিং ফংহন্নবগীদমক স্কিম অসি শঙ্গাবনি। কেন্দ্রগী গৃহ মন্ত্রীনা হায়খি মদুদি হৌজিক্তগীদি মফম অসিগী নুপীশিংনা মখোয়গী মোবাইল ফোন্দা ঈশিংগীদমক এলার্ম থম্বগী মথৌ তাররোই। মহাক্না হায়খি, মখোয়না হেক ঈশিং দরকার লৈবা মীকুপতা মখোয়গী তেপশিংদগী ফংলগনি। শ্রী অমিৎ শাহনা হায়খি মদুদি হৌজিক্তি, তেঙ্করশিং লোইররোই, অমসুং য়ুমগী অহানবা ফ্লোর ওইগেরা, মরিশুবা ফ্লোর ওইগেরা, মনিমজ্রাদা লৈরিবা মীওই লাখ ১ না ঙসিদগী হৌদুনা ঈশিং নীংথিজনা ফংলগনি।

শ্রী অমিত শাহনা হায়খি, শ্রী নরেন্দ্র মোদীনা ২০১৪দা প্রধান মন্ত্রী হেক ওইবা হৌরকপদগী মহাক্না স্মার্ত সিতী মিসন চলাইদুনা শহরগী পুন্সি মহিং ফগৎনবগীদমক হোৎনরক্লি। মহাক্না হায়খি, চন্দিগরনা অহানবা স্মার্ত সিতীনি হায়না লাউথোক্কদবশিংগী মরক্তা অমা ওইরি। ভারত সরকারনা চন্দিগরদা স্মার্ত সিতী প্রোজেক্তকী মখাদা লুপা করোর ১০০০ হেন্না চাদিং তৌখ্রে।

কেন্দ্রগী গৃহ অমসুং কোওপরেসন মন্ত্রীনা হায়খি মদুদি প্রধান মন্ত্রী শ্রী নরেন্দ্র মোদীনা মহাক্কী অনিশুবা তার্মদা জল জীবন মিসনগী মখাদা লৈবাকসিগী খুদিংমক্তা অরুবা ঈশিং অমসুং ইমুং খুদিংদা তোতি ঈশিং ফংহন্নবগীদমক স্কিম অসি হৌদোকখি। মহাক্না হায়খি, চহি তরেৎ ফাদনা, ইমুং মিলিয়ন ১৫০দা তোতিগী খুত্থাংদা ঈশিং পীখ্রে, মসিনা লৈবাক অসিগী ইমুং চাদা ৭৪ রোমদা অরুবা থক্নবা ঈশিং ফংহনবদা মতেং ওইরক্লি। শ্রী শাহনা হায়খি মদুদি 'জল জীবন মিসন' স্কিম হৌদোকপদগী, লৈবাক অসিদা দাইরিয়াগা মরী লৈননা শিবগী চাং লাখ ৩ হন্থরে। দাইরিয়ানা মরম ওইদুনা শিবগী চাং অসি লাখ মরিরোম ওইরম্মি। মহাক্না হায়খি, 'হর ঘর নল সে জল'গী মখদা, কনেক্সন করোর অহুমলোম ২০২৩দা পীখি। শ্রী শাহনা থাজবা ফোংদোকখি মদুদি, শ্রী নরেন্দ্রগী মোদীনা প্রধান মন্ত্রী ওইনা অহুমশুবা তার্ম লোইদ্রিঙৈ মমাংদা লৈবাকসিগী ইমুং খুদিংমক্তা অরুবা তোতি ঈশিং ফংহনগনি।

শ্রী অমিত শাহনা হায়খি মদুদি প্রধান মন্ত্রী শ্রী নরেন্দ্র মোদীগী সরকার অসিনা চন্দিগরবু স্মার্ত সিতী কন্সেপ্তকী মতুং ইন্না শেমগৎনবা হোৎনরক্লি। মহাক্না হায়খি, চন্দিগরদা সিৱেজ প্রোজেক্ত মঙা লিংখৎখি, সোলিদ ৱেস্ত মেনেজমেন্তকীদমক লম একর ২০গী শেম শাখ্রে, ইন্তিগ্রেতেদ কম্মান্দ অমসুং কন্ত্রোল সেন্তর লিংখৎতুনা ত্রাফিক রিগুলারাইজ তৌনবা থবক পায়খৎখ্রে, মসিনা ত্রাফিক ভাইওলেসনগী চাং ৪০% হন্থহল্লে, অমসুং লম্বীদা এক্সিদেন্ত থোক্তুনা শিবগী চাং ৩১% হন্থরে। শ্রী শাহনা হায়খি মদুদি, প্রধান মন্ত্রী শ্রী নরেন্দ্র মোদীনা হৌখিবা চহি ১০ রোম অসিদা চন্দিগরগীদমক লুপা করোর ৩০,০০০ চাদিং তৌখি। মসিগী মনুংদা ইনফ্রাস্ত্রকচরদা লুপা করোর ২৯,০০০ চাদিং তৌখি অমসুং করোর ৫০০না রেলৱে শেমগৎপদা চাদিং তৌখি হায়না মহাক্না ফোংদোকখি।

কেন্দ্রগী গৃহ অমসুং কোওপরেসন মন্ত্রীনা হায়খি মদুদি ২০১৪ দগী ২০২৪ ফাওবগী চহিশিং অসি লৈবাক অসিগী খুমাং চাউশিনবগী পুৱারীদা খ্বাইদগী লংবা চহি ওইনা লৌবদা মতীক চাই। মোদীজিনা অহোংবা পুরক্নবা হোৎনখিদবা হীরম অমতা লৈতে। লৈবাক অসিনা চহি ১০রোম অসিদা মায় পাকপা কয়া অমা পুরকখ্রে। থা লৈবাক্তা মচু অহুমগী ফিরাল থাগৎলুবা ওইরবসু, ঐখোয়গী য়েক্নবশিংদা সর্জিকেল স্ত্রাইক অমসুং এয়র স্ত্রাইক তৌদুনা মতীক চাবা পাউখুম পীববু ওইরো নৎত্রগা আর্তিকল ৩৭০ মুত্থৎতুনা কাশ্মিরবু ভারতকী শরুক অমা মতম চুপ্পগী ওইনা ওইহনববু ওইরো, রাম লাইশঙ শাবা নৎত্রগা লম্বী থোং শেমদুনা ইনফ্রাস্ত্রকচর শেমগৎপবু ওইরো। লৈবাক অসিগী মীয়াম্না হীরম খুদিংমক্তা চাউখৎপগী মশক উবা ফংলে।

শ্রী অমিত শাহনা হায়খি মদুদি স্তার্ত অপ ইন্দিয়া অমসুং দিজিতেল ইন্দিয়া থৌরাংগুম্বা কয়ানা ভারতপু মালেমদা ঙসিদি পোত্থোক পূথোকপগী হব অমা ওইহল্লে, অমসুং মসিনা মরম ওইদুনা চহি ৬০গী মতুংদা, লৈবাক অসিগী মীয়াম্না মোদীবু অহুমশুবা তার্মগী প্রধান মন্ত্রী ওইল্লিবনি অমসুং এবসোলুত মেজোরিতী ফংহন্দুনা এন.দি.এ. লৈঙাক শেম্লিবনি। মহাক্না হায়খি মদুদি ১৯৬০ গী মতমদগী ইহান হানবা ওইনা লনাই মীওই, ওর্গানাইজেসন অমসুং পার্তীশিংগী গ্রুপ অমনা থংন-থংননা অহুম্লকশুবা ওইনা এবসোলুত মেজোরিতী ফংলি। মসি অমরোমদা মোদীজিবু অমসুং মহাক্কী চাউখৎপগী থবকশিংবু মীয়াম্না য়াই হায়বগী খুদম্নি।

কেন্দ্রগী গৃহ মন্ত্রীনা হায়খি মদুদি ওপোজিসনশিংদি মখোয়না তৌনিংবদু অদুমক তৌজসনু, অদুবু চহি ২০২৯দদি, এন.দি.এ.না শ্রী নরেন্দ্র মোদীজিগা লোইননা শক্তি অমুক্তা হন্না পায়গনি। শ্রী শাহনা হায়খি মদুদি লৈঙাক অসি কুইনা চৎলোই হায়না শন্দোক্তুনা তংদু লৈতাদনবগী ইথিল অমা শন্দোক্নবা হোৎনরিবা মীওইশিং অসিনা খঙজিনগদবনি লৈঙাক অসিনা মপুং ফানা চহি মঙাগী তার্ম পায়গনি।

শ্রী অমিত শাহনা হায়খি মদুদি প্রধান মন্ত্রী শ্রী নরেন্দ্র মোদীনা হীরম খুদিংমক্তা অচৌবা মঙলান কয়াগা লোইননা থবক পায়খৎলি। নীংতম্বগী চহি ২৫ অমসুং ৫০ মপুং ফারকপদা পায়খৎখিবা থৌরমশিং অদু ইচম চম্বা ফোর্মেলিতীশিংগা মান্নৈ। অদুবু নীংতমবগী চহি ৭৫ মপুং ফারকপদা, অজাদি কা অমৃত মহোতসব পাঙথোকপা মতমদদি, মোদীজিনা মীয়ামদা লৈবাক নুংশিবগী ইথিল হিংগৎহনবদা নত্তনা, মীওই করোর ১৩০ বু অফবা থৌনা অমগা লোইননা হোৎননিংবা পোকহল্লে। ঙসিদি, লৈবাক পুম্বা অমসুং লৈবাক অসিগী মীওই করোর ১৩০ না ভারতপু ২০৪৭ ফাওবদা চাউখৎলবা লৈবাক অমা ওইহন্নবা অমসুং মালেমদা হীরম খুদিংমক্তা ভারতপু মকোক্তা লৈহন্নবা হোৎনমিন্নরি।

কেন্দ্রগী গৃহ মন্ত্রীনা হায়খি মদুদি লৈবাক অসিগী মীয়ামগী ফিরেপনা লৈবাক অসিবু চাউখৎলবা লৈবাক অমা ওইহন্নবা লম্বীদা পুগনি। মহাক্না হায়খি মদুদি, অঙাং অমনা মহাক্কী প্লেত্তা চানবা হুন্দোক্তনবা হোৎনবা, নৎত্রগা নুমিৎ খুদিংগী মমা মপাগী খোঙ শোকপা, নৎত্রগা কর্বার ৱালা অমনা তেক্স থীদনবা হোৎনবা লেপ্নবা, নৎত্রগা মীয়াম্না ত্রাফিক্কী কাংলোন কায়দনবা হোৎনবগী ফিরেপনা লৈবাক অসিবু মপাঙ্গল কলহনগনি অমসুং মাংজিল থানা পুখৎকনি। মহাক্না হায়খি মদুদি মীওই করোর ১৩০না লৌবা খোঙথাং অমগা লৈবাক অসিনা খোঙথাং করোর ১৩০ থাংজিনবগা মান্নৈ, মসিনি মোদীজিনা পুরকপা অঙকপা মিত্রং হায়ববু। শ্রী অমিত শাহনা হায়খি মদুদি অচেৎপা ফিরেপ লৈবা মীওই করোর ১৩০না ভারতপু চাউখৎলবা লৈবাক অমা ওইহন্নবা লেপ্লি অমসুং ঙসিদি চন্দিগরদা মায়কৈ অসিদা অতোপ্পা খোঙথাংশিং থাংজিল্লি।

***************