ਛੱਤੀਸਗੜ੍ਹ ਸਥਿਤ ਕੋਲ ਇੰਡੀਆ ਦੀ ਸਹਾਇਕ ਕੰਪਨੀ ਸਾਊਥ ਈਸਟਰਨ ਕੋਲਫੀਲਡਜ਼ ਲਿਮਿਟਡ (ਐੱਸਈਸੀਐੱਲ) ਦੀਆਂ ਗੇਵਰਾ ਅਤੇ ਕੁਸਮੁੰਡਾ ਕੋਲਾ ਖਾਣਾਂ ਨੇ ਵਰਲਡਐਟਲਸ ਡਾਟ ਕਾਮ ਵੱਲੋਂ ਜਾਰੀ ਦੁਨੀਆ ਦੀਆਂ 10 ਸਭ ਤੋਂ ਵੱਡੀਆਂ ਕੋਲਾ ਖਾਣਾਂ ਦੀ ਸੂਚੀ ਵਿੱਚ ਕ੍ਰਮਵਾਰ ਦੂਜਾ ਅਤੇ ਚੌਥਾ ਸਥਾਨ ਹਾਸਲ ਕੀਤਾ ਹੈ।

ਗੇਵਰਾ ਮੈਗਾਪ੍ਰੋਜੈਕਟ ਵਿੱਚ ਮਾਈਨਿੰਗ ਕਾਰਜਾਂ ਦਾ ਖ਼ੂਬਸੂਰਤ ਦ੍ਰਿਸ਼

ਛੱਤੀਸਗੜ੍ਹ ਰਾਜ ਦੇ ਕੋਰਬਾ ਜ਼ਿਲ੍ਹੇ ਵਿੱਚ ਸਥਿਤ ਇਹ ਦੋਵੇਂ ਖਾਣਾਂ 100 ਮਿਲੀਅਨ ਟਨ ਤੋਂ ਵੱਧ ਕੋਲੇ ਦਾ ਸਲਾਨਾ ਉਤਪਾਦਨ ਕਰਦੀਆਂ ਹਨ, ਜੋ ਭਾਰਤ ਦੇ ਕੁੱਲ ਕੋਲੇ ਦੇ ਉਤਪਾਦਨ ਦਾ ਲਗਭਗ 10% ਬਣਦਾ ਹੈ।

ਗੇਵਰਾ ਓਪਨਕਾਸਟ ਖਾਣ ਦੀ ਸਲਾਨਾ ਉਤਪਾਦਨ ਸਮਰੱਥਾ 70 ਮਿਲੀਅਨ ਟਨ ਹੈ ਅਤੇ ਵਿੱਤੀ ਸਾਲ 2023-24 ਵਿੱਚ ਇਸ ਖਾਣ ਨੇ 59 ਮਿਲੀਅਨ ਟਨ ਕੋਲੇ ਦਾ ਉਤਪਾਦਨ ਕੀਤਾ ਹੈ। ਇਸ ਖਾਣ ਨੇ ਸਾਲ 1981 ਵਿੱਚ ਕੰਮ ਸ਼ੁਰੂ ਕੀਤਾ ਸੀ ਅਤੇ ਇਸ ਵਿੱਚ ਅਗਲੇ 10 ਸਾਲਾਂ ਲਈ ਦੇਸ਼ ਦੀਆਂ ਊਰਜਾ ਲੋੜਾਂ ਨੂੰ ਪੂਰਾ ਕਰਨ ਲਈ ਕੋਲੇ ਦੇ ਕਾਫੀ ਭੰਡਾਰ ਮੌਜੂਦ ਹਨ।

ਕੁਸਮੁੰਡਾ ਓਪਨਕਾਸਟ ਖਾਣ ਨੇ ਵਿੱਤੀ ਸਾਲ 2023-24 ਵਿੱਚ 50 ਮਿਲੀਅਨ ਟਨ ਤੋਂ ਵੱਧ ਕੋਲੇ ਦਾ ਉਤਪਾਦਨ ਕੀਤਾ, ਇਹ ਮਹੱਤਵਪੂਰਨ ਉਪਲਬਧੀ ਹਾਸਲ ਕਰਨ ਵਾਲੀ ਗੇਵਰਾ ਤੋਂ ਬਾਅਦ ਭਾਰਤ ਦੀ ਦੂਜੀ ਖਾਣ ਹੈ।

ਕੁਸਮੁੰਡਾ ਮੈਗਾਪ੍ਰੋਜੈਕਟ ਵਿੱਚ ਕਾਰਜ ਖੇਤਰ ਦਾ ਡਰੋਨ ਸ਼ਾਟ

ਇਹਨਾਂ ਖਾਣਾਂ ਵਿੱਚ ਦੁਨੀਆ ਦੀਆਂ ਕੁਝ ਸਭ ਤੋਂ ਵੱਡੀਆਂ ਅਤੇ ਸਭ ਤੋਂ ਉੱਨਤ ਮਾਈਨਿੰਗ ਮਸ਼ੀਨਾਂ ਤਾਇਨਾਤ ਕੀਤੀਆਂ ਗਈਆਂ ਹਨ, ਜਿਵੇਂ ਕਿ "ਸਰਫੇਸ ਮਾਈਨਰ" ਜੋ ਕਿ ਈਕੋ-ਅਨੁਕੂਲ ਮਾਈਨਿੰਗ ਕਾਰਜਾਂ ਲਈ ਧਮਾਕਾ ਕੀਤੇ ਬਿਨਾਂ ਕੋਲੇ ਨੂੰ ਕੱਢਦੀ ਅਤੇ ਕੱਟਦੀ ਹੈ।

ਓਵਰਬਰਡਨ ਨੂੰ ਹਟਾਉਣ (ਕੋਲੇ ਦੀ ਪਰਤ ਨੂੰ ਉਜਾਗਰ ਕਰਨ ਲਈ ਮਿੱਟੀ, ਪੱਥਰ ਆਦਿ ਦੀਆਂ ਪਰਤਾਂ ਨੂੰ ਹਟਾਉਣ ਦੀ ਪ੍ਰਕਿਰਿਆ) ਲਈ ਖਾਣਾਂ ਵਿੱਚ ਵਾਤਾਵਰਨ ਅਨੁਕੂਲ ਅਤੇ ਧਮਾਕਾ ਮੁਕਤ ਓਬੀ ਹਟਾਉਣ ਲਈ ਦੁਨੀਆ ਦੀ ਸਭ ਤੋਂ ਵੱਡੀ ਐੱਚਈਐੱਮਐੱਮ (ਹੈਵੀ ਅਰਥ ਮੂਵਿੰਗ ਮਸ਼ੀਨਰੀ) ਜਿਵੇਂ ਕਿ 240-ਟਨ ਡੰਪਰ, 42 ਕਿਊਬਿਕ ਮੀਟਰ ਸ਼ਾਵਲ ਅਤੇ ਵਰਟੀਕਲ ਰਿਪਰਸ ਦਾ ਇਸਤੇਮਾਲ ਵੀ ਕੀਤਾ ਜਾਂਦਾ ਹੈ।  

ਗੇਵਰਾ ਵਿੱਚ ਭੂ ਤਲ ਮਾਈਨਿੰਗ ਮਸ਼ੀਨ ਦਾ ਸੰਚਾਲਨ

ਗੇਵਰਾ ਵਿਖੇ ਐੱਫਐੱਮਸੀ (ਫਸਟ ਮਾਈਲ ਕਨੈਕਟੀਵਿਟੀ) ਦੇ ਤਹਿਤ ਰੈਪਿਡ ਲੋਡਿੰਗ ਸਿਸਟਮ (ਆਰਐੱਲਐੱਸ) ਅਤੇ ਸਾਇਲੋ ਦਾ ਹਵਾਈ ਦ੍ਰਿਸ਼

ਇਸ ਮੌਕੇ 'ਤੇ ਬੋਲਦਿਆਂ ਐੱਸਈਸੀਐੱਲ ਦੇ ਚੇਅਰਮੈਨ ਅਤੇ ਪ੍ਰਬੰਧ ਨਿਦੇਸ਼ਕ ਡਾ. ਪ੍ਰੇਮ ਸਾਗਰ ਮਿਸ਼ਰਾ ਨੇ ਕਿਹਾ ਕਿ ਛੱਤੀਸਗੜ੍ਹ ਰਾਜ ਲਈ ਇਹ ਇੱਕ ਮਾਣ ਵਾਲੀ ਗੱਲ ਹੈ ਕਿ ਵਿਸ਼ਵ ਦੀਆਂ ਪੰਜ ਸਭ ਤੋਂ ਵੱਡੀਆਂ ਕੋਲਾ ਖਾਣਾਂ ਵਿੱਚੋਂ ਦੋ ਹੁਣ ਛਤੀਸਗੜ੍ਹ ਵਿੱਚ ਸਥਿਤ ਹਨ। ਸ੍ਰੀ ਮਿਸ਼ਰਾ ਨੇ ਕੋਲਾ ਮੰਤਰਾਲੇ, ਵਾਤਾਵਰਨ, ਵਣ ਅਤੇ ਜਲਵਾਯੁ ਪਰਿਵਰਤਨ ਮੰਤਰਾਲੇ, ਰਾਜ ਸਰਕਾਰ, ਕੋਲ ਇੰਡੀਆ, ਰੇਲਵੇ, ਵੱਖ-ਵੱਖ ਹਿੱਸੇਦਾਰਾਂ ਅਤੇ ਸਭ ਤੋਂ ਮਹੱਤਵਪੂਰਨ ਤੌਰ 'ਤੇ ਕੋਲਾ ਯੋਧਿਆਂ ਦਾ ਧੰਨਵਾਦ ਕੀਤਾ, ਜਿਨ੍ਹਾਂ ਨੇ ਇਸ ਇਤਹਾਸਕ ਉਪਲਬਧੀ ਨੂੰ ਪ੍ਰਾਪਤ ਕਰਨ ਲਈ ਅਣਥੱਕ ਮਿਹਨਤ ਕੀਤੀ ਹੈ।

*********

ਐੱਸਟੀ