ভারতকী রাস্ত্রপতি, শ্রীমতি দ্রৌপদি মুর্মুনা ঙসি অয়ুক (জুলাই ৮, ২০২৪)দা চহিগী রথ য়াত্রা শরুক য়ারুরবা নোংঙাল্লবা মতুংদা শেংলবা পুরি শহরগী শমুদ্র খোঙবালদা মতম খরা লেনখ্রে। তুংদা মহাক্না মহৌশাগা নক্না লোইনরুবগী ৱাখল্লোনশিং ইখি। মহাক্না X তা থাগৎখিবা ৱারোলঃ "পুন্সিগী মরুওইবা মগুনশিংগা নকশিন্নহনবা মফম খরা লৈরি অমসুং মখোয়না ঐখোয়সি মহৌশাগী শরুক অমনি হায়বসি নীংশিংহল্লি। চীংশাং, উমং, তুরেল অমসুং শমুদ্র খোঙবালনা ঐখোয়গী নুং পান ফাওনা করিগুম্বা খরা ফাওহল্লি। ঐহাক্না ঙসি শমুদ্র খোঙবালদা চৎপা মতমদা, ঐহাক্না অকোইবগা লোইনদুনা লৈবগী ইথিল অমা ফাওই – নামিবা নুংশিৎ, ঈথৎশিংগী ঈরাওখোল, অমসুং পাক্না শন্দোক্না লৈরিবা ঈশিং। পুম্নমক অদু য়াম্না ঈং তপ্পা অমা ফাওহল্লি।

মদুনা ঐহাক্কী ইফমদা, ঐহাক্না ঙরাং মহাপ্রভু শ্রী জগন্নাথজিবু খুরমজবা মীকুপ্তা ফাওখিবা য়াম্না ঈংবা ইথিল অমা ফাওহল্লি। অমসুং ঐহাক্না অদুগুম্বা ইথিল অসি ফাওরিবসি ইথন্তা নত্তে; ঐখোয়দগী হেন্না চাউবা করিগুম্বা অমা থেংনবা মতমদা ঐখোয় পুম্নমক্না ফাওরিবনি, মসিনা ঐখোয়বু হিংহল্লি অমসুং ঐখোয়গী পুন্সিবু হেন্না ৱাহন্থোক লৈহল্লি।

নোংমগী চিল্লবা মতম কয়া অসিনা, ঐখোয়না মহৌশা ইমাগা শম্নরিবসি কাওথোকহল্লি। মীওইবা খুন্নাইনা থাজৈ মদুদি মহৌশাবু অতেনবা মতমগী নুংঙাইবা খজিক্কীদমক মহৌশাবু মাঙহল্লি। মসিগী মহৈ পুম্বা ঐখোয় পুম্নমক্না উরে। হন্দক্কী কালেন্থা অসিদা, ভারতকী মফম কয়াদা কা হেন্না শাবগী অৱাবা কয়া মাইয়োক্নখি। কা হেন্না শাথিবা অইং অশাগী থৌদোক কয়া মালেম অসিদা হৌখিবা চহি খরা অসিদা তোয়না থোকপা হেনগৎলক্লি। মসিগী ফিভম অসি লাক্কদবা চহি তরারোম অসিদা হেন্না হেঞ্জিল্লক্কনি।

মালেম লৈমাইগী চাদা হুম্ফু তরাদি ওসিন্না কল্লি, অমসুং মালেম অপুনবা ওইনা শাগৎলকপনা মালেমগী লৈরিবা শমুদ্রগী ঈমাই অসি ৱাংবা হেনগৎলক্লি, মসিনা শমুদ্র খোঙবালগী মফমশিং থুমজিনখিগদ্রা হায়বগী মীপাইবা ফাওরি। শমুদ্র অমসুং মনা মশীং অমসুং জিব পানবা কয়ানা তোঙান-তোঙানবা পোলুসন্না মরম ওইদুনা কা হেন্না অৱাবা নংলি।

লাইবক ফবদি, মহৌশাগী তম্পাক্তা হিংলকপা মীওইশিংনা তুংকোইনা চৎপা য়াবা মহৌশাগী চৎনরোল কয়া অমা তাকপীরকখ্রে। শমুদ্র খোঙবালদা লৈরিবা মীওইশিংনা, খুদম ওইনা, নুংশিৎকী মরোল অমসুং শমদ্রগী ইথৎকী খোঞ্জেল খঙই। ঐখোয়গী ইপা ইপুগী  লীক্লম লীদুনা, মখোয়না শমুদ্রবু লাইগুম্না লাৎলম্মি।

অকোইবগী খল ঙাক্ননবা লম্বী অনি লৈ হায়দনা ঐহাক্না থাজৈ; পাক চাউবা খোঙথাংনা লৈঙাক্কী অমসুং অন্তর্জাতিগী ওর্গানাইজেসনশিংগী মায়কৈদগী লৌখৎপা য়াই অমসুং অপীকপা খোংথাংশিংনা লোকেল মীয়ামদগী লৈবাক মচা অমা ওইনা পায়খৎপা য়াই। অনি অসি তশেংনা অমনা অমগী মখা পোন্নৈ। ঐখোয়না কদাই ফাওবা তৌবা ঙম্বগে হায়বদু ঐখোয়না পায়খৎনবা হোৎনসি, লনাই ওইনা, লোকেলদা – হেন্না ফবা হয়েং অমগীদমক। ঐখোয়না মসি ঐখোয়গী অঙাংশিংগীদমক তৌবীরমগদবনি।"

***