প্রধান মন্ত্রী, শ্রী নরেন্দ্র মোদীনা ঙসি রাজ্য সভাদা রাস্ত্রপতিনা পার্লিয়ামেন্তদা পীখিবা ৱারোল থাগৎপগী মোসন্দা পাউখুম পীখ্রে।

হাউস্তা ৱা ঙাংলদুনা প্রধান মন্ত্রীনা রাস্ত্রপতিবু ইথিল পোকহন্নীংঙাই অমসুং পুক্নিং থৌগৎনীংঙাই ওইবা ৱারোলগীদমক থাগৎখি। য়াওরিবা মেম্বর 70রোমনা রাস্ত্রপতিগী ৱারোলদা মখোয়গী ৱাখল্লোনশিং ফোঙদোকখি অমসুং প্রধান মন্ত্রীনা মেম্বরশিংবু থাগৎখি।

লৈবাক অসিগী দেমোক্রেসীগী খোঙচৎকী মতাংদা পল্লদুনা প্রধান মন্ত্রীনা হায়খি মদুদি চহি 60গী মতুংদা, ভারতকী ইলেক্তোরেৎশিংনা অহুমশুবা ওইনা সরকার অমা অমুক হন্না পুরকখ্রে। ইলেক্তোরেৎশিংগী ৱারেপ অদু শোন্থহন্নবা তৌরিবা ওপোজিসনগী খোঙথাং অদু য়ানিংদবা ফোঙদোক্লদুনা শ্রী মোদীনা হায়খি মদুদি হৌখিবা নুমিৎ খরনি অসিদা, মহাক্না উবা ফংখি মদুদি মখোয়না মায়থিরে অমসুং ঐখোয়গী মায় পাকপা অদু থম্মোয়দা নুংঙাইতবগা লোয়ননা য়াজখি।

প্রধান মন্ত্রীনা থাজবা ফোঙদোকখি মদুদি হৌজিক লৈরিবা সরকার অসিনা মাগী লৈঙাক্কী শরুক অহুম থোকপগী অমা হায়বদি চহি 10 মপুং ফানা লোইশিনখ্রে অমসুং শরুক অহুম থোকপগী অনি নত্ত্রগা চহি 20দি লৈরি। প্রধান মন্ত্রীনা হায়খি, "ভারতকী মীয়াম্না হৌখিবা চহী 10 অসিদা লৈবাক অসিগী সেবা তৌনবা ঐখোয়গী সরকারনা হোৎনরিবশিং অসিদা থম্মোয় শেংনা মতেং পাংখি অমসুং য়াইফ-মঙ্গোল পীখি।" মহাক্না প্রোপেগন্দাবু মায়থীবা পীরবা, পর্ফোমেন্সপু মরুওইবা পীরবা, ইলুজনশিংগী রাজনিতীবু য়াদবা অমসুং থাজবগী রাজনিতীদা মায় পাকপগী সিল থমখিবা প্রজাশিংনা উৎখিবা ৱারেপ অদুদা চাউথোকচবা ফোঙদোকখি।

ভারতনা সংবিধানগী 75শুবা চহিদা চঙশিল্লক্লিবা অসি পল্লদুনা প্রধান মন্ত্রীনা হায়খি মদুদি মসি অখন্নবা তাঙ্কক অমনি মরমদি ভারতকী পার্লিয়ামেন্তসু চহি 75 মপুং ফারক্লি, মসিনা নুংঙাইবা থৌদোক অমা ওইহল্লি। শ্রী মোদীনা বাবা সাহেব অম্বেদকরনা পীখিবা ভারতকী সংবিধানবু থাগৎপা ফোঙদোকখি। মহাক্না হায়খি মদুদি ভারত্তা রাজনিতীগী লমদা মরী লৈনবা ইমুংগী মীওই অমত্তা লৈখিদ্রিবা মীওইশিংনা লৈবাক অসিদা সেবা তৌবগী খুদোংচাবা ফংলি। মহাক্না হায়খি, "বাবা সাহেব অম্বেদকরনা পীরম্বা সংবিধান্না ঐগুম্বা রাজনিতীগী মরী লৈনদবা মীওইশিংবু রাজনিতীদা চংনবা অমসুং অসিগুম্বা থাক্তা য়ৌনবা ঙমহনখি।" মহাক্না মখা তারদুনা হায়খি মদুদি হৌজিক মীয়াম্না মখোয়গী অয়াবা পীখ্রবা মতুংদা, সরকার অসিনা মথং-মথং অহুমশুবা ওইনা মফম অসিদা লাক্লি। প্রধান মন্ত্রীনা হায়খি মদুদি ভারতকী সংবিধান অসি আর্তিকলশিংগী অপুনবা খক্তমক নত্তে মাগী স্পিরিৎ অমসুং ইম্প্রিন্ত অসি য়াম্না মমল য়াম্লবা অমনি।

শ্রী মোদীনা নীংশিংখি মদুদি মহাক্কী সরকারনা নবেম্বর 26বু 'কন্সতিত্যুসন দে' ওইনা পাংথোক্নবা পুখৎপদা ওপোজিান্না মসিগী মায়োক্তা লৈখি। মহাক্না মখা তাখি মদুদি সংবিধান নুমিৎ পালন তৌনবা মখোয়গী ৱারেপ অসিনা স্কুল অমসুং কোলেজশিংদা লৈরিবা নহাশিংগী মরক্তা সংবিধানগী ৱাখল্লোনবু হেন্না শন্দোকপদা, করিগীদমক অমসুং করম্না সংবিধানদা অকক্নবা প্রোবিজনশিং য়াওহনবগে অমসুং য়াওহন্দবগে হায়বগী মতাংদা খন্ন-নৈনবদা মতেং পাংলি। প্রধান মন্ত্রীনা হায়খি মদুদি সংবিধানগী তোঙান তোঙানবা হীরমশিংদা ঐখোয়গী মহৈরোয়শিংগী মরক্তা ৱারেং, দিবেৎ অমসুং এক্সতেম্পোরগুম্বা কম্পিতিসনশিং পাংথোক্তুনা সংবিধানগী মরমদা থাজবা অমসুং খংজিনবা হেনগৎহল্লগনি। মহাক্না মখা তাখি, "সংবিধান অসি ঐখোয়গী খ্বাইদগী চাউবা ইথিলনি।" শ্রী মোদীনা হায়খি মদুদি সংবিধান চৎনরকপা চহি 75শুবা চহি অসিদা মহাক্কী সরকারনা লৈবাক শিনবা থুংনা থৌরম পাংথোক্নবা "জন উৎসব" হায়না পাংথোক্নবা থৌরাং তৌখি। মহাক্না মখা তারদুনা হায়খি মদুদি লৈবাক অসিগী মফম খুদিংমক্তা সংবিধানগী ৱাখল্লোন অমসুং ৱাখল্লোন অসি খঙহন্নবা মখোয়না হোৎনগনি।

ইলেক্তোরেৎপু থাগৎলদুনা, প্রধান মন্ত্রীনা হায়খি মদুদি ভারতকী মীয়াম্না ‘ভিকসিত ভারত' অমসুং 'আত্মনির্ভর ভারত'কী খুত্থাংদা চাউখৎপা অমসুং মরোমদোম লেপচনবগী পান্দমশিং ফংনবা মহাক্কী সরকারবু অহুম্লক হন্না ভোৎ পীখ্রে। শ্রী মোদীনা মখা তানা হায়খি মদুদি মীখলদা মায় পাকখিবসি হৌখিবা চহি 10দা মহাক্কী সরকারনা লৌখিবা ৱারেপশিংদা প্রজাশিংনা অয়াবা পীরকপগী ইথিল অমা ওইবতা নত্তনা মখোয়গী তুংলমচৎকী মঙলান অমসুং আশাশিং মপুং ফাহন্নবগী মেন্দেত অমসুনি। মহাক্না হায়খি, “লৈবাক অসিগী মীয়াম্না মখোয়গী তুংলমচৎকী ৱারেপশিং অদু মপুং ফাহন্নবগী খুদোংচাবা অদু ঐখোয়দা শীন্নরি”।

মালেমগী অপনবা অমসুং লাইচৎ অসিনচিংবা শীংনবশিং লৈরবসু হৌখিবা চহি 10 অসিদা ভারতকী ইকনোমীনা খ্বাইদগী চাউবা তরাশুবা মফমদগী মঙাশুবা মফমদা হেনগৎলকপা লৈবাক অসিনা উবা ফংলি হায়না প্রধান মন্ত্রীনা নীংশিংখি। প্রধান মন্ত্রীনা মেন্দেত অসি থুংহন্নবগী থাজবা অদু ফোঙদোক্লদুনা মখা তারদুনা হায়খি, "মসিগী মেন্দেত অসি শেন্মিৎলোনবু হৌজিক লৈরিবা মঙাশুবা মফমদগী অহুমশুবা মফমদা পুখৎপনি।"

হৌখিবা চহি 10দা লৈরকখিবা চাউখৎ-থৌরাংগী খোঙজেল অমসুং পাক-চাউবা হেনগৎহন্নবা সরকারনা হোৎনরি হায়না শ্রী মোদীনা অমুক হন্না ফোঙদোকখি। লাক্কদৌরিবা চহি 5দা, সরকার অসিনা মীয়ামগী তঙাই ফদবশিং ফংহন্নবা থবক পায়খৎকনি হায়না প্রধান মন্ত্রীনা হাউস্তা থাজবা পীখি। প্রধান মন্ত্রীনা হায়খি, "ঐখোয়না চহিচা অসি অফবা লৈঙাক্কী মতেংদগী মরুওইবা তঙাইফদবশিংগী সেচুরেসন ফংবা চহিচা অমদা ওন্থোকপা পাম্মি।" মহাক্না হায়খি মদুদি লাক্কদৌরিবা চহি 5 অসি লায়রবা লান্থেংনবদা য়াম্না মরু ওই। মহাক্না হৌখিবা চহি 10গী এক্সপরিয়েন্সকী মতুং ইন্না লায়রবশিং থেংননবগী অপুনবা কেপাসিতিদা থাজবা থমখি।

ভারতনা মীওইবগী পুন্সিগী হীরম খুদিংদা খ্বাইদগী চাউবা অহুমশুবা ইকনোমী ওইরকপগী ইথিলগী মতাংদা পল্লদুনা শ্রী মোদীনা হায়খি মদুদি মসিগী থৌওং অসিনা মালেমগী ফিভমদা মমাংদা অমুক্তা ওইখিদ্রিবা ইথিল অমা পীরগনি। মহাক্না লাক্কদৌরিবা চহি মঙা অসিদা মালেমগী ওইনা ভারতকী স্তার্ত অপশিং অমসুং কম্পনীশিং অমুক হন্না থোরকপা অমসুং তায়র 2 অমসুং তায়র 3গী সহরশিং গ্রোথ ইঞ্জিনশিং ওইনা থোরকপগী মতাংদা পনখি।

হৌজিক্কী চহিচা অসি তেক্নোলোজীনা পুরকপা চহিচা অমনি হায়না পল্লদুনা, পি.এম. মোদীনা পব্লিক ত্রান্সপোর্তকুম্বা সেক্তর কয়াদা অনৌবা তেক্নোলোজীগী ফুত প্রিন্তকী মতাংদা পনখি। মেদিসিন, এজুকেসন নৎত্রগা ইন্নোভেসনগুম্বা লমশিংদা অপীকপা সহরশিংনা মরু ওইবা থৌদাং অমা লৌগনি হায়নসু মহাক্না আশা তৌখি।

লৌমীশিং, লায়রবশিং, নরিশক্তি অমসুং নহারোলগী য়ুম্বী মরি মপাঙ্গল কনখৎহনবগী মরুওইবা অদু পল্লদুনা প্রধান মন্ত্রীনা হায়খি মদুদি ভারতকী চাউখৎপগী খোঙচৎ অসিদা সরকারনা হীরমশিং অসিদা মীৎয়েং চংলি।

লৌউ-শিংউ অমসুং লৌমীশিংগীদমক্তা পীরকপা সজেসনশিংগীদমক মেম্বরশিংদা থাগৎপা ফোঙদোক্লদুনা, প্রধান মন্ত্রীনা হৌখিবা চহি 10দা লৌউ-শিংউবু লৌমীশিংগীদমক্তা কান্নবা ওইহন্নবা সরকারনা হোৎনরিবশিং অদু নৌহৌনা নীংশিংখি। মহাক্না ক্রেদিৎ, মরু, মমল হোংবা হার, মহৈ-মরোংগী ইন্সুরেন্স, MSP প্রোক্যুর্মেন্তগী মতাংদা পনখি। প্রধান মন্ত্রীনা হায়খি, "মাইক্রো-প্লানিংগী খুত্থাংদা স্তেজ খুদিংমক্তা লৌমীশিংদা মহৈ-মরোংদগী হৌরগা কৈথেল ফাওবা মপাঙ্গল কনবা পথাপ অমা ফংহন্নবা ঐখোয়না হোৎনরি।"

প্রধান মন্ত্রী মোদীনা কিসান ক্রেদিৎ কার্দকী কান্নবশিংগী মতাংদা পনখি অমসুং মসিনা অপীকপা লৌমীশিংগীদমক লোন ফংনবগী থৌওংবু লাইথোকহল্লে হায়না ফোঙদোকখি। মহাক্না মখা তানা হায়খি মদুদি কিসান ক্রেদিৎ কার্দকী কান্নবা অসি ঙামীশিং অমসুং শা-শন য়োক্লিবশিংদা ফংহনখ্রে। প্রধান মন্ত্রীনা অপীকপা লৌমীশিংগী য়াইফনবা স্কিমশিংগী মতাংদসু পনখি। মহাক্না পি.এম. কিসান সম্মান নিধিগী মতাংদসু পনখি। মসিনা হৌখিবা চহি 6দা লৌমী করোর 10দা কান্নবা ফংহনখ্রে। প্রধান মন্ত্রীনা মমাংগী লৈঙাক্কী মতমদা লোন কোক্নবগী স্কিমশিং অসি মতিক চাদবা অমসুং থাজবা লৈতবগী ৱাফম থমখি অমসুং হৌজিক লৈরিবা লৈঙাক্কী কিসান কল্যান স্কিমশিং অদুসু পনখি।

ওপোজিসনগী থোকখিবগী মতুংদা মহাক্কী ৱারোল মখা চত্থদুনা প্রধান মন্ত্রীনা হাউসকী চেয়রমেন অদুবু নুংঙাইতবা ফোঙদোকখি অমসুং হায়খি, "ঐহাক্না মীয়ামগী সেবা তৌবগী থৌদাং লৌরি। ঐহাক্কী মতমগী মিনিত খুদিং ঐহাক্না মীয়ামগী থৌদাং লৌরি।“ মহাক্না হাউস অসিগী চৎনবীশিংবু ইকায় খুম্নদবা উৎখি হায়বগীদমক ওপোজিসনবু য়ানীংদবা ফোঙদোকখি।

প্রধান মন্ত্রীনা হায়খি মদুদি মহাক্কী সরকারনা লায়রবা লৌমীশিংদা ফর্তিলাইজরগীদমক লুপা করোর লাখ 12গী সবসিদী পীরি। মসি নীংতম্লবা মতুংদগী খ্বাইদগী ৱাংবা মশিংনি। শ্রী মোদীনা হায়খি মদুদি লৌমীশিংবু মপাঙ্গল কনখৎহন্নবা, মহাক্কী সরকারনা মিনিমম সপোর্ত প্রাইস (MSP) গী রেকোর্দ হেনগৎহনবতা নত্তনা মখোয়দগী পোৎ-চৈ লৌবগী অনৌবা রেকোর্দসু শেমখ্রে। মমাংগী সরকারগা চাংদম্নবা অমা তৌরদুনা মহাক্না হায়খি মদুদি মহাক্কী সরকারনা হৌখিবা চহি 10দা ফৌ অমসুং গেহুগী লৌমীশিংদা শরুক অনি মখায় হেন্না শেল পীখ্রে। “ঐখোয়না মফমসিদা লেপ্পোই। লাক্কদৌরিবা চহী মঙা অসিদা, ঐখোয়না সেক্তরশিং অসিদা থোরক্লিবা সমস্যাশিং অসি নৈনদুনা লোইশিন্নবা হোৎনরি। হৌজিক্তি ঐখোয়না মালেমগী খ্বাইদগী চাউবা চিঞ্জাক স্তোরেজ কেম্পেন পায়খৎলে," হায়না মহাক্না হায়খি। কেন্দ্রগী থৌরাংগী মখাদা গ্রেনরী লাখ কয়া শেমগৎনবা থবক হৌরে হায়না মহাক্না মখা তাখি।

প্রধান মন্ত্রীনা অকনবা ৱাফম থমখি মদুদি হোর্তিকলচর অসি লৌউ-শিংউগী মরুওইবা সেক্তর অমনি অমসুং মহাক্কী সরকারনা মসিগী সেফ স্তোরেজ, ত্রান্সপোর্ত অমসুং সেলগী ইনফ্রাস্ত্রকচর হেনগৎহন্নবা লেপ্পা লৈতনা থবক তৌরি।

প্রধান মন্ত্রীনা হায়খি মদুদি “সরকারনা 'সবকা সাথ, সবকা বিকাস'কী মরুওইবা মন্ত্রগা লোয়ননা ভারতকী চাউখৎ-থৌরাংগী খোঙচৎ অসি লেপ্পা লৈতনা পাকথোক চাউথোকহল্লি। প্রজাশিংগীদমক ইকাই খুম্নরবা পুন্সি অমা ফংহনবা অসি সরকারগী খ্বাইদগী মরুওইবা থৌদাং অমনি হায়না মহাক্না ফোঙদোকখি। নীংতম্লবা মতুং দিকেদ কয়াগী মমাংদগী মীৎয়েং থম্বা ঙমখিদ্রবা মীওইশিং অদু ঙসিদি য়েংশিনবা খক নত্তনা মখোয়গীদমক ৱাংনা থাংগৎলি হায়না পল্লদুনা প্রধান মন্ত্রীনা হায়খি মদুদি দিব্যাং ইচিল ইনাওশিংগী ইসুশিং অসি মিসন মোদতা অমসুং মাইক্রো লেভেলদা খন্ন-নৈনবগী মথৌ তাই। মসিনা মখোয়না মগুন লৈনা পুন্সি অমা হিংবা ঙম্লগনি অমসুং অতোপ্পদা মীপাল তাংবা হন্থহন্দুনা হিংবা ঙম্লগনি। মহাক্কী সরকারগী ইনক্লুসিব ওইবা মওং অদু পল্লদুনা, শ্রী মোদীনা হায়খি মদুদি মসিনা খুন্নাইগী কান্নবা ফংদ্রিবা শরুক অমা ওইরিবা ত্রান্সজেন্দরশিংগীদমক আইন অমা চৎনহন্নবা থবক পায়খৎলে। মহাক্না মখা তাখি মদুদি ঙসি নোংচুপলোমগী লৈবাকশিংনসু ভারতকী প্রোগ্রেসিব নেচরবু চাউথোকচবা ফাওবগা লোয়ননা উরি। মহাক্না হায়খি মদুদি মমিং লৈরবা পদ্ম এৱার্দশিং অসিসু ত্রান্সজেন্দরশিংদা মহাক্কী সরকারনা পীরি।

মসিগা মান্ননা, নোমেদ অমসুং সেমি-নোমেদ কম্ম্যুনিতীশিংগী য়াইফ-থৌরাংগী বোর্দ অমা শেমখ্রে। প্রধান মন্ত্রীনা জন মন স্কিমগী মখাদা লুপা করোর লিশিং 24 কাইথোকখিবা পার্তিক্যুলর্লী ভলনরেবল ত্রাইবেল গ্রুপ (PVTG)কী লৌখৎখিবা খোঙথাংশিংগী মতাংদসু পনখি। প্রধান মন্ত্রীনা হায়খি মদুদি মসি সরকার অসিনা ভোৎ পোলিসীগী মহুত্তা চাউখৎ-থৌরাংগী পোলিসীদা চংশিল্লিবা অসিগী খুদম অমনি।

ভারতকী চাউখৎ থৌরাংগী খোঙচৎতা মরুওইবা থৌদাং লৌখিবা ভারতকী বিশ্বকর্মাশিংগী মতাংদসু প্রধান মন্ত্রী মোদীনা পনখি। মহাক্না হায়খি মদুদি সরকারনা চাউরাক্না করোর লিশিং 13গী মতেংগা লোয়ননা মখোয়গী পুন্সিদা অহোংবা পুরক্লে। মহাক্না পি.এম. স্বনিধি স্কিমগী মতাংদসু পনখি, মসিনা লম্বীদা পোৎ য়োনবা মীওইশিংদা বেঙ্ক লোনগী খুদোংচাবা ফংহনখি অমসুং মখোয়গী ইনকম হেন্না হেনগৎহনখি। মহাক্না হায়খি মদুদি লায়রবশিং, দলিতশিং, বেকৱার্দ কম্ম্যুনিতীশিং, ত্রাইবেলশিং নৎত্রগা নুপীশিং ওইরো, মখোয়না ঐখোয়বু মপুং ফানা মতেং পাংখি।

প্রধান মন্ত্রীনা ভারতকী নুপীনা লুচিংবা চাউখৎ-থৌরাংগী ৱাখল্লোন অদু পনখি। লৈবাক অসিনা স্লোগান খক্তদা নত্তনা অচেৎপা ফিরেপ অমগা লোয়ননা মসিগী মায়কৈদা চংশিল্লি। নুপীশিংগী হকশেলগী মতাংদা শ্রীমতী সুধা মুর্তীগী ৱা ঙাংখিবগী মতাংদা পল্লদুনা, ইমুং মনুংদা মমাগী মরুওইবা অদু পি.এম. মোদীনা পনখি। শ্রী মোদীনা হায়খি মদুদি নুপীশিংগী হকশেল, সেনিতেসন অমসুং ৱেলনেসতা অখন্নবা মীৎয়েং থমগদবনি। মহাক্না হায়খি মদুদি তোইলেৎশিং, সেনিতেরী পেদশিং, ভেক্সিনেসনশিং, চাকথোং গ্যাস অসি মসিগী মায়কৈ অসিদা মরুওইবা খোঙথাং অমনি। মহাক্না হায়খি মদুদি লায়রবশিংদা য়ুম করোর 4 পীখিবগী মনুংদা অয়াম্বদি নুপীশিংগী মিংদা রেজিস্তর তৌবনি। মহাক্না মুদ্রা অমসুং সুকন্যা সমৃদ্ধি য়োজনাগুম্বা স্কিমশিংসু পনখি। স্কিমশিং অসিনা নুপীশিংবু শেন্মিৎলোনগী লমদা শক্তি পীরি। মসিনা মখোয়বু মনিং তমহল্লি অমসুং ৱারেপ লৌবদা মখোয়গী ৱা ঙাংবা ঙম্নবগী খুদোংচাবা পীরি। শ্রী মোদীনা হায়খি মদুদি হৌজিক ফাওবদা অপীকপা খুঙ্গংশিংদা সেল্ফ হেল্প গ্রুপশিংদা থবক তৌরিবা নুপী করোর অমা ঙসি লক্ষপাতি দিদী ওইখ্রে। হৌজিক লৈরিবা মতম অসিদা সরকারনা মখোয়গী মশিং অসি করোর অহুম হেনগৎহন্নবা থবক পায়খৎলি।

শ্রী মোদীনা আশা তৌখি মদুদি মহাক্কী সরকারনা অনৌবা সেক্তর খুদিংদা নুপীশিংবু লুচিংবা ওইহন্নবা অমসুং অনৌবা তেক্নোলোজী খুদিংমক অহানবদা নুপীশিংদা য়ৌহন্নবা হোৎনরি। ঙসিদি নমো দ্রোন দিদি অভিয়ান অসি খুঙ্গংশিংদা নুপীশিংনা মাংজিল থাদুনা মায় পাক্না পায়খৎলি। প্রধান মন্ত্রী মোদীনা হায়খি মদুদি দ্রোনশিং ওপরেৎ তৌরিবা নুপীশিং অসি 'পাইলোৎ দিদিশিং' হায়না খঙনরম্মি অমসুং অসিগুম্বা মখলগী শকখঙবা অসি নুপীশিংগীদমক দ্রাইভিং ফোর্স অমনি।

নুপীশিংগী ইসুশিংবু রাজনিতীগী মচাক ওইহন্নবা অমসুং সেলেক্তিব এত্তিত্যুদপু য়ানিংদবা ফোঙদোক্লদুনা প্রধান মন্ত্রীনা নোংচুপ বেঙ্গলদা নুপীশিংগী মায়োক্তা চত্থরিবা হিংসাগী মতাংদা নুংঙাইতবা ফোঙদোকখি। লৈবাক অসিগী অনৌবা গ্লোবেল ইমেজ অদু পল্লদুনা প্রধান মন্ত্রীনা হায়খি মদুদি ঙসিদি ভারতনা মপান লমগী ইনভেস্তমেন্তশিং তরাম্না ওক্লি। মসিনা নহারোলশিংগীদমক থবক ফংহন্নবা লম্বী য়াৎলি অমসুং মালেমগী প্লেৎফোর্মদা মখোয়গী পোতেন্সিএল অমসুং তেলেন্ত উৎলি। প্রধান মন্ত্রীনা হায়খি মদুদি ঙসিগী ভারতকী মায় পাকপা অসিনা মালেমগী শেন্মিৎলোনদা বেলেন্স অমা লৈবা পাম্লিবা ইনভেস্তরশিংগীদমক আশা অমা ওইহনখি। শ্রী মোদীনা হায়খি মদুদি ঙসিদি ভারত অসি ত্রান্সপরেন্সীগী লমদম অমা অফবা লৈবাক ওইরক্লি।

1977গী লোক সভা মীখলগী মতম অদু প্রধান মন্ত্রীনা নীংশিংখি মদুদা প্রেস অমসুং রেদিওদা অথিংবা থমখি অমসুং মীয়ামগী ৱা ঙাংবদা অথিংবা থমখি। মহাক্না হায়খি মদুদি ইলেক্তরশিংনা ভারতকী সংবিধান ঙাক্নবা অমসুং গনতন্ত্র অমুক হন্না লিংখৎনবা ভোৎ পীখি। অদুগা ঙসিদি সংবিধান অসি ঙাকথোক্নবা লান্থেংনরিবা অসিদা ভারতকী মীয়ামগী অহানবা অপাম্বদি হৌজিক লৈরিবা সরকার অসিনি। শ্রী মোদীনা ইমর্জেন্সীগী মতমদা লৈবাক অসিদা থোকখিবা অৱা-অনাশিং অদুসু পনখি। মহাক্না ইমর্জেন্সীগী মতমদা শেমদোকখিবা সংবিধানগী 38শুবা, 39শুবা অমসুং 42শুবা এমেন্দমেন্ত অমসুং অতোপ্পা আর্তিকল কয়া অমা পনখি। মন্ত্রীমন্দলনা লৌখিবা ৱারেপশিং লৌথোক্নবা শক্তি লৈবা নেস্নেল এদভাইজরী কাউন্সিল (NAC) শেমদোকখি অমসুং চৎন-কাংলোনশিং ঙাক্না চৎলবসু ইমুং অমখক্তদা অখন্নবা মীৎয়েং থম্লিবা অসিগী মতাংদসু শ্রী মোদীনা অকনবা ৱাফম থমখি। প্রধান মন্ত্রী মোদীনা ইমর্জেন্সীগী মতমগী মতাংদা খন্ন-নৈননবা হোৎনবদা ওপোজিসন্না শীজিন্নরিবা থৌওংশিং অদুগীসু য়ানীংদবা ফোঙদোকখি।

“ইমর্জেন্সীগী মতম অসি রাজনিতীগী ৱাফম খক্তা নত্তে, মসি ভারতকী দেমোক্রেসী, সংবিধান অমসুং মীওইবা খুন্নাইগা মরী লৈনৈ হায়না প্রধান মন্ত্রীনা হায়খি। মতমদুগী ফাজিনখিবা ওপোজিসনগী লুচিংবশিংদা চত্থখিবা মীওৎ-মীনৈগী মতাংদা পল্লদুনা শ্রী মোদীনা লৈখিদ্রবা শ্রী জয় প্রকাশ নারায়নজীগী মরমদা পনখি। ইমর্জেন্সীগী মতুংদা য়ুমদগী মপান থোকখিবা মীওই কয়ানা হল্লকখিদে।" ইমর্জেন্সীগী মতমদা মুজাফফরনগর অমসুং তুর্কমান গেৎতা লৈবা মাইনোরিতীশিংগী ফীভম নীংশিংলদুনা প্রধান মন্ত্রীনা অৱাবা ফোঙদোকখি।

প্রধান মন্ত্রীনা ওপোজিসনগী শরুক খরনা করপ্সন তৌবশিংবু ঙাক-শেনবগী চৎনবী লৈবগী মতাংদা নুংঙাইবা ফোঙদোকখি। ওপোজিসন পার্তীশিংনা লুচিংবা তোঙান তোঙানবা সরকারশিংনা পাংথোকখিবা তোঙান তোঙানবা স্কেমশিং পনদুনা প্রধান মন্ত্রীনা এনফোর্সমেন্ত এজেন্সীশিংবু লান্না শীজিন্নবগী মরালশিং অদু য়াখিদে। মহাক্না শেঞ্জা-থুমজা তৌবগী মায়োক্তা লান্থেংনবগী লমদা দবল স্তেন্দর্দশিংগী মতাংদা ৱা ঙাংখি। মহাক্না মমাংগী সরকারশিংদা ইনভেস্তিগেতিব এজেন্সীশিংবু লান্না শীজিন্নবগী থৌদোকশিংসু পনখি। প্রধান মন্ত্রীনা হায়খি, "শেঞ্জা-থুমজাগী লান্থেং অসি ঐহাক্কীদমক্তা ইলেক্তোরেলগী ৱাফম নত্তে অদুবু মসি ঐহাক্কীদমক্তা মিসন অমনি।" প্রধান মন্ত্রীনা 2014দা অনৌবা সরকার লাকপা মতমদা লায়রবশিংগীদমক কত্থোকপা অমসুং শেঞ্জা-থুমজাগী মায়োক্তা অকনবা খোঙজং চংশিনগনি হায়না ৱাশক অনি শক্তুনা থাজবা পীরম্বশিং অদু নৌহৌনা নীংশিংখি। মালেমগী খ্বাইদগী চাউবা লায়রবশিংগী য়াইফনবা স্কিম অমসুং ব্লেক মনী, বেনামী অমসুং দাইরেক্ত বেনিফিৎ ত্রান্সফর তৌবগী প্রোভিজনশিং অমসুং ইলিজিবল ওইবা মীওই খুদিংদা কান্নবা ত্রান্সফর তৌবশিং অসিগা মরী লৈনবা অনৌবা আইনশিংদা উবা ফংলি। প্রধান মন্ত্রীনা হায়খি, "ঐহাক্না ইনভেস্তিগেতিব এজেন্সীশিংদা অরানবা তৌবশিংগী মায়োক্তা থবক লৌখৎনবা মপুং ফানা শক্তি পীরে।"

হন্দক থোকখিবা পেপর লীক ওইবগী মতাংদা রাস্ত্রপতিগী নুংনাংবা অদু অমুক হন্না ফোঙদোক্লদুনা, প্রধান মন্ত্রীনা নহাশিংদা মহাক্কী সরকারনা ঐখোয়গী লৈবাক অসিগী তুংলমচৎকা শান্নরিবা মীওইশিংগী মায়োক্তা অকনবা থবক লৌখৎলি অমসুং মখোয়শিং অদু শাফদনা লৈহল্লরোই হায়না থাজবা পীখি। "ঐখোয়গী নহারোলশিংনা করিগুম্বা মখল অমত্তগী চিংনবা লৈতনবা অমসুং মখোয়গী ওইথোকপা য়াবশিংবু থাজবা থম্বা উৎনবগীদমক ঐখোয়না পথাপ অসি মপাঙ্গল কনখৎহল্লি।"

জম্মু অমসুং কাশ্মীরদা হন্দক্কী লোক সভাগী মীখলদা ভোৎ থাদবগী মশিং পল্লদুনা প্রধান মন্ত্রীনা হায়খি মদুদি য়ুনিয়ন তেরিতোরী অসিগী মীয়ামনা মশিং য়াম্না ভোৎ থাদনবগীদমক্তা থোরকখ্রে। মসিনা হৌখিবা চহি তরাগী খুজিং মরিগী রেকোর্দশিং থুগাইখ্রে। মহাক্না হায়খি, "জম্মু অমসুং কাশ্মীরগী মীয়াম্না ভারতকী সংবিধান, মাগী দেমোক্রেসী অমসুং ইলেক্সন কম্মিসনবু অয়াবা পীখ্রে।" শ্রী মোদীনা হায়খি মদুদি মসি লৈবাক অসিগী প্রজাশিংগীদমক ঙাইজরকপা তাঙ্কক অমনি। য়ুনিয়ন তেরিতোরীগী ভোতরশিংদা নুংঙাইবা ফোঙদোক্লদুনা প্রধান মন্ত্রীনা হায়খি মদুদি হৌখিবা দিকেদ খরা অসিদা বন্ধ, প্রোতেস্ত, ব্লাস্ত অমসুং তেরোরিস্তকী থবক থৌরম কয়া অমনা জম্মু অমসুং কাশ্মীরদা দেমোক্রেসীবু কুপশিন্দুনা থমখি। অদুম ওইনমক, জম্মু অমসুং কাশ্মীরগী মীয়াম্না সংবিধানদা মখোয়গী থাজবা অদু উৎখি অমসুং মখোয়গী তুংলমচৎকী ৱারেপ লৌখি। জম্মু অমসুং কাশ্মীরদা তেরোরিজমগী মায়োক্তা ঐখোয়না লান্থেংনরিবা অসিগী অরোইবা তাঙ্কক অদুদা লৈরে। ঐখোয়না লেমহৌরিবা তেরোরিস্ত নেৎৱার্কশিং অসি থুগাইনবা কন্না হোৎনরি," হায়না মহাক্না হায়খি। মহাক্না মখা তাখি মদুদি য়ুনিয়ন তেরিতোরীগী মীয়াম্না মখোয়বু লান্থেংনবদা মতেং পাংলি অমসুং লমজিংলি।

প্রধান মন্ত্রীনা হায়খি মদুদি অৱাং-নোংপোক লমদম অসি লৈবাক অসিগী চাউখৎপগী গেৎৱে ওইরক্লি। মহাক্না হৌখিবা চহি খরা অসিদা মসিগী মায়কৈদা পায়খৎলিবা খোঙথাংশিং অদু শন্দোক্না তাকখি। অৱাং-নোংপোক লমদমদা ইনফ্রাস্ত্রকচরদা মমাংদা অমুক্তা ওইখিদ্রিবা মওংদা চাউখৎলকপগী মতাংদা মহাক্না পনখি। রাজ্যশিংগী মরক্তা লৈরিবা ঙমখৈগী চয়েৎনবশিং অসি কন্সেন্সসকী মতুং ইন্না তুং ফগদবা মওংদা লোইশিন্নবা হোৎনরিবা অসিনা লমদম অসিদা মতম শাংনা শান্তি লৈহন্নবা হোৎনরিবা অসিদা শাফু পীগনি হায়বগী থাজবসু মহাক্না ফোঙদোকখি।

রাজ্য সভাগী মমাংগী মীফমদা মনিপুরগী মতাংদা মহাক্না ঙাংখিবা ৱারোল অদু নীংশিংলদুনা শ্রী মোদীনা হায়খি মদুদি সরকারনা মনিপুরদা ওইরিবা ফীভম অসি হন্থহন্নবা লেপ্পা লৈতনা হোৎনরি। মহাক্না মখা তারদুনা হায়খি মদুদি মনিপুরদা ইরাং মনুংদা অমসুং মতুংদা FIR 11,000  হেন্না লৌখৎখি অমসুং অরানবা তৌবা 500 হেন্না ফাগৎখি। মনিপুরদা হিংসাগী থৌদোকশিং অসি লেপ্তনা হন্থরক্লি হায়বা ঐখোয়না খঙগদবনি হায়না প্রধান মন্ত্রীনা অকনবা ৱাফম থমখি। মহাক্না মখা তাখি মদুদি মসিনা তাকপদি মনিপুরদা শান্তিগী ওইথোকপা য়াবগী আশা লৈরে। শ্রী মোদীনা ঙসি মনিপুরদা স্কুলশিং, কোলেজশিং, ওফিসশিং অমসুং অতোপ্পা ইন্সতিত্যুসনশিং মহৌশাগুম্না মথৌ তৌরি হায়না হাউস অদুদা পাউদমখি। মহাক্না হায়খি মদুদি অঙাংশিংগী চাউখৎ-থৌরাংগী খোঙচৎ অসিদসু করিগুম্বা মওং অমত্তদা অথিংবা লৈতে। প্রধান মন্ত্রীনা হায়খি মদুদি কেন্দ্র অমসুং রাজ্য সরকারনা মনিপুরদা শান্তি অমসুং নুংশি-চান্নবা লৈহন্নবা স্তেকহোল্দর পুম্নমক্কা খন্ন-নৈনরি। মহাক্না হায়খি মদুদি হোম মিনিস্তর মশামক্না মনিপুরদা লৈদুনা ফ্রন্ততগী শান্তিগী খোঙথাংশিং অদু লুচিংখি। মহাক্না মখা তারদুনা হায়খি মদুদি মকোক থোংবা ওফিসিএলশিং ফাওবা প্রোব্লেমশিং অসিগী সোলুসন পুথোক্নবা অমসুং শান্তি লৈহন্নবা হোৎনবদা পুক্নিং চিংশিনখি।

প্রধান মন্ত্রীনা হৌজিক মণিপুরদা ওইরক্লিবা অরুবা ঈচাউগী ফিভম অসিগী মতাংদা অৱাবা ফোঙদোকখি। ঈশিং-ঈচাউদগী কন্নবা থবকশিংদা NDRFকী কম্পনী 2 থাখিবা অদু হাউস্তা পাউদম্লদুনা শ্রী মোদীনা হায়খি মদুদি কেন্দ্র সরকারনা রাজ্য সরকারগা লোয়ননা কন্নবা = থবকশিংদা পুন্না থবক তৌমিন্নরি। শ্রী মোদীনা হায়খি মদুদি মনিপুরদা শান্তি অমসুং নোর্মেলসী লৈহন্নবগীদমক্তা স্তেকহোল্দর পুম্নমক্না পোলিতিকেল অমসুং পার্তীগী লাইনশিং ঙাক্না চৎপগী মতম ওইরে অমসুং থৌদাংনি। প্রধান মন্ত্রীনা দিসিদেন্তশিংদা মনিপুরগী সেক্যুরিতীগী ফীভমদা হেন্না খুদোংথীবা থোকহনবা অমসুং পুক্নিং থৌগৎপা থিংনবা হায়খি। মনিপুরদা খুন্নাইগী ওইবা অৱা-অনা অসি য়াম্না শাংলবা পুৱারীদা য়ুম্ফম ওইদুনা লৈরি অমসুং মসিনা মরম ওইদুনা নীংতম্বা ফংলবা মতুংদগী প্রসিদেন্তস রুল অসি 10 রক থমখ্রে হায়না মহাক্না হাউস অসিদা নিংশিংখি। 1993দগী হৌদুনা মণিপুরদা চহি মঙা চুপ্না চত্থরকখিবা সোসিএল কনফ্লিক্তকী মতাংদা পল্লদুনা শ্রী মোদীনা ফীভম অসি হৈশীংনা অমসুং মীনুংশিগা লোয়ননা য়েংশিনবগী তঙাই ফদবা লৈ হায়না অকনবা ৱাফম থমখি। মহাক্না মান্নবা ৱাখল্লোন চেনবা মীওই পুম্নমকপু মনিপুরদা নোর্মেলসী অমসুং শান্তি পুরক্নবা হোৎনবদা মতেং পাংনবা হায়খি।

মন্ত্রীনা ফোঙদোকখি মদুদি মহাক্না লোক সভাদা চঙদ্রিঙৈ অমসুং ভারতকী প্রধান মন্ত্রী ওইদ্রিঙৈগী মমাংদা মহাক্না রাজ্য অমগী মুখ্য মন্ত্রী ওইরম্বা অসিদগী ফেদরেলিজমগী মরুওইবা অদু মহাক্না খঙখি। শ্রী মোদীনা কোওপরেতিব অমসুং কম্পিতিতিব ফেদরেলিজম মপাঙ্গল কনখৎহন্নবা মহাক্কী ফিরেপ অদু পনখি অমসুং মালেমগী থাক্তা রাজ্য অমসুং মসিগী তৌবা ঙম্বশিংবু প্রমোৎ তৌনবা লৈবাক অসিগী রাজ্য খুদিংমক্তা G20গী মরুওইবা প্রোগ্রামশিং পাংথোকপগী মতাংদা পনখি। কোবিদ লাইচৎ মনুংদা রাজ্য অমসুং কেন্দ্রগী মনুংদা রেকোর্দ ওইবা মশিংদা খন্ন-নৈনবা পাংথোকখি হায়নসু মহাক্না খঙহনখি।

রাজ্য সভা অসি রাজ্যশিংগী হাউসনি হায়না পল্লদুনা প্রধান মন্ত্রীনা হায়খি মদুদি ভারতনা সেমিকন্দক্তর অমসুং ইলেক্ত্রোনিক্স মেন্যুফেকচরিংদা মথংগী রিভোলুসনগী লমজিং লমতাক্লি। মহাক্না ভারতকী রাজ্যশিংদা চাউখৎ-থৌরাং, অফবা লৈঙাক, পোলিসী শেম্বা, থবক পীবা অমসুং মপান লমগী ইনভেস্তমেন্তশিং পুক্নিং চিংশিন্নবা পুক্নিং থৌগৎখি। প্রধান মন্ত্রী মোদীনা থাজবা ফোঙদোকখি মদুদি মালেম্না ভারতকী থোঙদা চঙলকপা মতমদা ভারতকী রাজ্য খুদিংমক্তা খুদোংচাবা অমা লৈ। মহাক্না রাজ্য খুদিংমকপু ভারতকী গ্রোথ স্তোরীদা শরুক য়াবা অমসুং মসিগী কান্নবা লৌনবা হায়খি। রাজ্যশিংগী মরক্তা চাংদম্নবা অসিনা নহারোলশিংদা অনৌবা খুদোংচাবশিং ফংহনবদা য়াম্না মতেং পাংগনি হায়না মহাক্না হায়খি। অৱাং নোংপোক্কী আসামগী খুদম পীরদুনা মহাক্না হায়খি মদুদি সেমিকন্দক্তরগা মরী লৈনবা থবকশিং য়াম্না থুনা পায়খৎলি।

2023 অসি য়ুনাইতেদ নেসন্সনা 'ইয়র ওফ মিল্লেৎস' হায়না লাউথোকখিবা অদুগী মতাংদা পল্লদুনা প্রধান মন্ত্রীনা হায়খি মদুদি মসিনা ভারতকী অপীকপা লৌমীশিংগী শক্তি তাক্লি। মহাক্না রাজ্যশিংদা মিলেৎ পুথোকপদা পুক্নিং থৌগৎনবা অমসুং মালেমগী কৈথেলদা পুখৎনবা রোদমেপ অমা শেম্নবা হায়খি। মালেমগী ন্যুত্রিসন মার্কেৎতা মিল্লেৎনা মরুওইবা থৌদাং অমা লৌবা ঙম্মি অমসুং মচি ওইবা চিঞ্জাক ফংদ্রিবা মীওইশিং লৈবা মফমশিংদা মরুওইবা চিঞ্জাক অমা ওইরকপা ঙম্মি হায়নসু মহাক্না পনখি।

প্রধান মন্ত্রীনা রাজ্যশিংদা প্রজাশিংগী মরক্তা "ইজ ওফ লিভিং" হেঙ্গৎহনগদবা পোলিসীশিং শেম্নবা অমসুং আইনশিং শেম্নবা পুক্নিং থৌগৎখি। মহাক্না পঞ্চায়ত, নগর পালিকা, মহানগর পালিকা, তেহসিল নৎত্রগা জিলা পরিশদ ওইগেরা, থাক খুদিংমক্তা লল্লোন-ইতিক্কী মায়োক্তা লান্থেংনবগী তঙাইফদবা অদু ফোঙদোকখি অমসুং রাজ্যশিংদা অমত্তা ওইনা চংশিনবা হায়খি।

ভারত অসি 21শুবা চহিচাগী ব্লুপ্রিন্ত অমা ওইহন্নবা সরকারগী ৱারেপ লৌবা, দেলিভর তৌবা অমসুং গবর্নান্স মোদেলদা ইফিসিএন্সীগী মরুওইবা অদু পল্লদুনা, প্রধান মন্ত্রীনা সেক্তরশিং অসিদা পায়খৎলিবা থবকশিং অসি খুমাং চাউশিলহল্লগনি হায়না থাজবা থমখি। মহাক্না মসিসু পনখি মদুদি ইফিসিএন্সীনা সিস্তেম অসিদা ত্রান্সপরেন্সী পুরকই, মসিনা সিতিজনশিংগী হকশিং ঙাকথোকই, ইজ ওফ লিভিংবু প্রমোৎ তৌই অমসুং "করিগুম্বা অমসুং অদুবু" মুত্থৎলি।

প্রধান মন্ত্রীনা প্রজাশিংগী পুন্সিদা লৈঙাক্না খুৎ থিংজিনবা হন্থহনবগী তঙাইফদবা অদুদা অকনবা ৱাফম থমখি।

অইং-অশা হোংলকপগী মতাংদা নুংনাংবা ফোঙদোক্লদুনা প্রধান মন্ত্রীনা হায়খি মদুদি মহৌশাগী খুদোংথিবা হেনগৎলক্লি। মহাক্না রাজ্য পুম্নমকপু মাংলোমদা চংশিন্নবা অমসুং মসিগী মায়োক্তা লান্থেংননবা পুক্নিং থৌগৎখি। শ্রী মোদীনা হায়খি মদুদি মীপুম খুদিংমক্তা থক্নবা ঈশিং ফংহন্নবা অমসুং হকশেলগী সর্ভিসশিং হেন্না ফগৎহন্নবা মীপুম খুদিংমক্না পুন্না হোৎনমিন্নবা মথৌ তাই। অসিগুম্বা মরুওইবা পান্দমশিং অসি রাজনিতীগী ওইবা অপাম্বগী খুত্থাংদা ফংহনবা ঙমগনি হায়না মহাক্না থাজবা ফোংদোকখি অমসুং হায়রিবা পান্দমশিং অসি ফংনবগীদমক রাজ্য খুদিংমক্না খোঙজং য়াংশিনগনি অমসুং মতেং পাংগনি।

হৌজিক চত্থরিবা চহিচা অসি ভারতকী চহিচা অমা ওইরগনি হায়না অমুক হন্না ফোঙদোক্লদুনা, প্রধান মন্ত্রীনা হায়খি মদুদি হৌজিক ঐখোয়না মসিগী খুদোংচাবা অসি মাংহন্দবা য়ারোই। ভারতনা খুদোংচাবা কয়া অমা মাংখিবা অদুগা মান্নবা মতমদা লৈখিবা লৈবাক কয়া অমা চাউখৎলক্লি হায়না মহাক্না পনখি। মহাক্না হায়খি রিফোর্মশিং থাদোকপগী তঙাইফদবা লৈতে অমসুং সিতিজেনশিংদা ৱারেপ লৌবগী শক্তি হেন্না পীরকপগা লোয়ননা প্রোগ্রেস অমসুং গ্রোথ লাক্কনি।

“ভিকসিৎ ভারত অসি লৈবাক অসিগী প্রজা করোর 140গী মিসননি' হায়না প্রধান মন্ত্রীনা হায়খি। মহাক্না মসিগী পান্দম অসি ফংনবগীদমক অমত্তা ওইবগী মরুওইবা অদু পনখি। মহাক্না অমুক হন্না হায়খি মদুদি মালেম পুম্বনা ভারতকী পোতেন্সিএলদা ইনভেস্ত তৌনবা শেম-শারি অমসুং হায়খি, "ভারত অসি মালেমগী অহানবা অপাম্বনি।" মহাক্না রাজ্যশিংদা খুদোংচাবা অসি লৌনবা হায়খি।

প্রধান মন্ত্রী রাস্ত্রপতিনা লমজিং লমতাকপীবা অমসুং মহাক্কী ৱারোলদা ইস্যুশিং পুখৎপীরকপগীদমক থাগৎপা ফোঙদোক্লদুনা ৱারোল পীবা লোইশিনখি।

Speaking in the Rajya Sabha.https://t.co/vIAJM8omMa

— Narendra Modi (@narendramodi) July 3, 2024

The people of India have wholeheartedly supported and blessed our government’s efforts to serve the country over the past 10 years. pic.twitter.com/bvqgrwtbbo

— PMO India (@PMOIndia) July 3, 2024

It is the Constitution given by Baba Saheb Ambedkar which has allowed people like me, who have zero political lineage, to enter politics and reach such a stage, says PM. pic.twitter.com/vqARo9bUKd

— PMO India (@PMOIndia) July 3, 2024

हमारा संविधान Light House का काम करता है, हमारा मार्गदर्शन करता है। pic.twitter.com/FbuhhFU5Yj

— PMO India (@PMOIndia) July 3, 2024

People have given us a third mandate with the confidence and firm belief that we will make India’s economy the third largest, says PM. pic.twitter.com/1mCvX2Pd0j

— PMO India (@PMOIndia) July 3, 2024

The next 5 years are crucial for the country. pic.twitter.com/x2jMEpUojO

— PMO India (@PMOIndia) July 3, 2024

देश की जनता ने हमें तीसरी बार अवसर दिया है। यह विकसित भारत के संकल्प को सिद्धि तक ले जाने के लिए देश के कोटि-कोटि जनों का आशीर्वाद है। pic.twitter.com/ZRFklrqQ2f

— PMO India (@PMOIndia) July 3, 2024

बीज से बाजार तक हमने किसानों के लिए हर व्यवस्था को माइक्रो प्लानिंग के साथ मजबूती देने का प्रयास किया है। pic.twitter.com/i6x7LnKENR

— PMO India (@PMOIndia) July 3, 2024

आजादी के बाद अनेक दशकों तक जिनको कभी पूछा नहीं गया, आज मेरी सरकार उनको पूछती है, उनको पूजती भी है: PM pic.twitter.com/tvDani7Pxa

— PMO India (@PMOIndia) July 3, 2024

भारत ने नारा नहीं, बल्कि निष्ठा के साथ Women Led Development की ओर कदम बढ़ाए हैं। pic.twitter.com/etA3Tgikbn

— PMO India (@PMOIndia) July 3, 2024

***