ঙসি শন্দোকখিবা মহাক্কী মন কি বাত মনুংদা প্রধান মন্ত্রী শ্রী নরেন্দ্র মোদীনা হন্দক পাংথোক্কদৌরিবা পেরিস ওলেম্পিক্সতা শরুক য়াগদবা ভারতকী শান্নরোয়শিংদা মহাক্কী য়াইফ-পাউজেল পীখ্রে। তোকিওদা মখোয়না শিংথাবা য়ানা শান্নখ্রবা মতুংদা ভারতকী শান্নরোয়শিংগী কৎথোকপা অমসুং শেম-শাবা অদু শক খঙলদুনা, মখোয়গী মতিক মগুনশিং অমুক হন্না মালেমগী থাক্তা ঙানগনি হায়না প্রধান মন্ত্রীনা থাজবা ফোঙদোকখি।

মহাক্না হায়খি তোকিও ওলেম্পিক্স হেক মতুংদা, ঐখোয়গী শান্নরোয়শিং পেরিস ওলেম্পিক্সকীদমক থৱায় য়াওনা শেম-শারে। করিগুম্বা ঐখোয়গী শান্নরোয়শিং অসি পুনশিল্লবদি, মখোয়না মালেমগী ওইবা চাংদম্নবা ৯০০ রোম শরুক য়াবা ঙমগনি। মসি য়াম্লবা মশিং অমনি।

লৈবাক অসিদা অহানবা ওইনা থোকপা খর পল্লদুনা, প্রধান মন্ত্রীনা হায়খি, সুতিংদা ঐখোয়গী শান্নরোয়শিংগী হৈথোই-শিংথোইবা মাঙজিল থারে। তেবল তেন্নিসকী নুপা অমসুং নুপীগী তিম অনিমক ক্বালিফাই ওইরে। ভারতকী সোতগুন তিমদা ঐখোয়গী সুত্তর ইচানুপীশিং শরুক য়ারে। মমাঙদা অমুক্তা শরুক য়াখিদবা হোর্স রাইদিং অমসুং রেস্তলিংগী ঐখোয়গী তিম শরুক য়ারগনি। ঐখোয়না হন্দক অসি শান্নবদা তোঙানবা হরাওবা অমা  উরগনি।

ভারতনা মমাঙদা শান্নখিবশিং অদু নিংশিংলদুনা, প্রধান মন্ত্রীনা হায়খি থা খরগী মমাংদা, ঐখোয়না ৱার্ল্দ পেরা এথলেতিক্স চেম্পিয়নশিপতা ঐখোয়না খ্বাইদগী ফজনা শান্নবা অদু উৎখ্রে। চেস অমসুং বেতমিন্তনদা ঐখোয়গী শান্নরোয়শিংনা মিংচৎ কয়া পুরক্লে।

পেরিস ওলেম্পিক্তা অঙকপা শান্নবা অমা উবা ফংগনি হায়না লৈবাক মীয়াম্না থাজবা অমা থম্লি অমসুং শান্নরোয়শিংগী মতুংদা মখোয়গী পুক্নিং থৌগৎনবা হেস্তেগ #Cheer4Bharat শীজিন্ননবা প্রধান মন্ত্রীনা মীয়ামদা তকশিনখি।

মহাক্না হায়খি নুমিৎ খরনিগী মতুংদা, মহাক্না পেরিস ওলেম্পিক্স শরুক য়াগদবা ভারতকী তিম উনগনি অমসুং লৈবাক মীয়ামগী মহুৎশীন্দুনা মখোয়গী পুক্নিং থৌগৎকনি।

মন কি বাতকী ১১১শুবা তাঙ্কক্তা প্রধান মন্ত্রীগী ৱারোল পানবা মফম অসিদা নম্বীয়ু।

*****