2023-24ರಲ್ಲಿ ಫೈನಾನ್ಶಿಯಲ್ ಆಕ್ಷನ್ ಟಾಸ್ಕ್ ಫೋರ್ಸ್ (ಎಫ್‌ ಎ ಟಿ ಎಫ್) ನಡೆಸಿದ ಪರಸ್ಪರ ಮೌಲ್ಯಮಾಪನದಲ್ಲಿ ಭಾರತವು ಅತ್ಯುತ್ತಮ ಫಲಿತಾಂಶವನ್ನು ಸಾಧಿಸಿದೆ. 2024 ರ ಜೂನ್ 26- 28 ರಂದು ಸಿಂಗಾಪುರದಲ್ಲಿ ನಡೆದ ಎಫ್‌ ಎ ಟಿ ಎಫ್ ಸಮಾವೇಶದಲ್ಲಿ ಅಂಗೀಕಾರವಾದ ಭಾರತದ ಪರಸ್ಪರ ಮೌಲ್ಯಮಾಪನ ವರದಿಯು ಭಾರತವನ್ನು 'ನಿಯಮಿತ ಅನುಸರಣೆ' (Regular follow-up) ವರ್ಗದಲ್ಲಿ ಇರಿಸಿದೆ, ಇದು ಜಿ20 ದೇಶಗಳ ಪೈಕಿ ಇತರ ಕೇವಲ ನಾಲ್ಕು ರಾಷ್ಟ್ರಗಳಿಗೆ ಮಾತ್ರ ಲಭಿಸಿದೆ. ಅಕ್ರಮ ಹಣ ಸಾಗಣೆ ಮತ್ತು ಭಯೋತ್ಪಾದನೆಗೆ ಹಣಕಾಸು ವಿರುದ್ಧ ಹೋರಾಡುವ ರಾಷ್ಟ್ರದ ಪ್ರಯತ್ನಗಳಲ್ಲಿ ಇದು ಮಹತ್ವದ ಮೈಲಿಗಲ್ಲಾಗಿದೆ.

ಇತರ ವಿಷಯಗಳ ಜೊತೆಗೆ, ಭಾರತವು ಮಾಡಿದ ಈ ಪ್ರಯತ್ನಗಳನ್ನು ಎಫ್‌ ಎ ಟಿ ಎಫ್ ಗುರುತಿಸಿದೆ:

• ಭ್ರಷ್ಟಾಚಾರ, ವಂಚನೆ ಮತ್ತು ಸಂಘಟಿತ ಅಪರಾಧದಿಂದ ಬರುವ ಆದಾಯದ ಅಕ್ರಮ ಸಾಗಣೆ ಸೇರಿದಂತೆ ಅಕ್ರಮ ಹಣ ಸಾಗಣೆ ಮತ್ತು ಭಯೋತ್ಪಾದನೆಗೆ ಹಣಕಾಸಿನಿಂದ ಉಂಟಾಗುವ ಅಪಾಯಗಳನ್ನು ತಗ್ಗಿಸುವುದು.
• ಅಕ್ರಮ ಹಣ ಸಾಗಣೆ ಮತ್ತು ಭಯೋತ್ಪಾದನೆಗೆ ಹಣಕಾಸು ಅಪಾಯಗಳನ್ನು ಕಡಿಮೆ ಮಾಡಲು ನಗದು-ಆಧಾರಿತ ಡಿಜಿಟಲ್ ಆರ್ಥಿಕತೆಗೆ ಪರಿವರ್ತನೆ ಮಾಡಲು ಭಾರತವು ಜಾರಿಗೆ ತಂದ ಪರಿಣಾಮಕಾರಿ ಕ್ರಮಗಳು.
• ಜೆಎಎಂ (ಜನ್ ಧನ್, ಆಧಾರ್, ಮೊಬೈಲ್) ತ್ರಿಕೂಟದ ಅನುಷ್ಠಾನವು ನಗದು ವಹಿವಾಟಿನ ಮೇಲೆ ಕಟ್ಟುನಿಟ್ಟಾದ ನಿಯಮಗಳ ಜೊತೆಗೆ, ಹಣಕಾಸಿನ ಸೇರ್ಪಡೆ ಮತ್ತು ಡಿಜಿಟಲ್ ವಹಿವಾಟುಗಳಲ್ಲಿ ಗಮನಾರ್ಹ ಹೆಚ್ಚಳಕ್ಕೆ ಕಾರಣವಾಗಿದೆ; ಈ ಕ್ರಮಗಳು ವಹಿವಾಟುಗಳನ್ನು ಹೆಚ್ಚು ಪತ್ತೆಹಚ್ಚಲು ಸಾಧ್ಯವಾಗುವಂತೆ ಮಾಡಿದೆ, ಇದರಿಂದಾಗಿ ಅಕ್ರಮ ಹಣ ಸಾಗಣೆ ಮತ್ತು ಭಯೋತ್ಪಾದನೆಗೆ ಹಣಕಾಸು ಅಪಾಯಗಳನ್ನು ತಗ್ಗಿಸುತ್ತದೆ ಮತ್ತು ಹಣಕಾಸಿನ ಸೇರ್ಪಡೆಯನ್ನು ಹೆಚ್ಚಿಸುತ್ತದೆ.

ಎಫ್‌ ಎ ಟಿ ಎಫ್ ಪರಸ್ಪರ ಮೌಲ್ಯಮಾಪನದಲ್ಲಿ ಭಾರತದ ಕಾರ್ಯಕ್ಷಮತೆಯು ನಮ್ಮ ಬೆಳೆಯುತ್ತಿರುವ ಆರ್ಥಿಕತೆಗೆ ಗಮನಾರ್ಹ ಪ್ರಯೋಜನಗಳನ್ನು ನೀಡುತ್ತದೆ, ಏಕೆಂದರೆ ಇದು ಆರ್ಥಿಕ ವ್ಯವಸ್ಥೆಯ ಒಟ್ಟಾರೆ ಸ್ಥಿರತೆ ಮತ್ತು ಸಮಗ್ರತೆಯನ್ನು ತೋರಿಸುತ್ತದೆ. ಉತ್ತಮ ರೇಟಿಂಗ್‌ ಗಳು ಜಾಗತಿಕ ಹಣಕಾಸು ಮಾರುಕಟ್ಟೆಗಳು ಮತ್ತು ಸಂಸ್ಥೆಗಳಿಗೆ ಉತ್ತಮ ಪ್ರವೇಶವನ್ನು ನೀಡುತ್ತವೆ ಮತ್ತು ಹೂಡಿಕೆದಾರರ ವಿಶ್ವಾಸವನ್ನು ಹೆಚ್ಚಿಸುತ್ತವೆ. ಇದು ಭಾರತದ ವೇಗದ ಪಾವತಿ ವ್ಯವಸ್ಥೆಯಾದ ಯುನಿಫೈಡ್ ಪೇಮೆಂಟ್ಸ್ ಇಂಟರ್‌ಫೇಸ್ (ಯುಪಿಐ) ಅನ್ನು ಜಾಗತಿಕವಾಗಿ ವಿಸ್ತರಿಸಲು ಸಹಾಯ ಮಾಡುತ್ತದೆ.

ಎಫ್‌ ಎ ಟಿ ಎಫ್‌ ನ ಈ ಮನ್ನಣೆಯು ಭಾರತವು ತನ್ನ ಆರ್ಥಿಕ ವ್ಯವಸ್ಥೆಯನ್ನು ಅಕ್ರಮ ಹಣ ಸಾಗಣೆ ಮತ್ತು ಭಯೋತ್ಪಾದನೆಗೆ ಹಣಕಾಸು ಅಪಾಯಗಳಿಂದ ರಕ್ಷಿಸಲು ಕಳೆದ 10 ವರ್ಷಗಳಲ್ಲಿ ಜಾರಿಗೊಳಿಸಿದ ಕಠಿಣ ಮತ್ತು ಪರಿಣಾಮಕಾರಿ ಕ್ರಮಗಳಿಗೆ ಸಾಕ್ಷಿಯಾಗಿದೆ. ಇದು ಅಂತಾರಾಷ್ಟ್ರೀಯ ಮಾನದಂಡಗಳಿಗೆ ದೇಶದ ಬದ್ಧತೆಯನ್ನು ಮತ್ತು ಆರ್ಥಿಕ ಅಪರಾಧಗಳ ವಿರುದ್ಧ ಜಾಗತಿಕ ಹೋರಾಟದಲ್ಲಿ ಅದರ ಸಕ್ರಿಯ ನಿಲುವನ್ನು ಒತ್ತಿಹೇಳುತ್ತದೆ. ಇದು ಭಯೋತ್ಪಾದನೆಗೆ ಹಣಕಾಸಿನ ಮೇಲೆ ಅಂತಾರಾಷ್ಟ್ರೀಯ ಮಾನದಂಡಗಳನ್ನು ಪರಿಣಾಮಕಾರಿಯಾಗಿ ಜಾರಿಗೆ ತರಲು ನಮ್ಮ ಪ್ರದೇಶದ ದೇಶಗಳಿಗೆ ಮಾನದಂಡವನ್ನು ನಿಗದಿಪಡಿಸುತ್ತದೆ. ಭಾರತದ ಅತ್ಯುತ್ತಮ ರೇಟಿಂಗ್, ಗಡಿಯಾಚೆಗಿನ ಭಯೋತ್ಪಾದನೆಗೆ ಹಣಕಾಸು ಮತ್ತು ಅಕ್ರಮ ಹಣ ಸಾಗಣೆಯನ್ನು ಎದುರಿಸುವ ಜಾಗತಿಕ ಪ್ರಯತ್ನವನ್ನು ಮುನ್ನಡೆಸಲು ನಮ್ಮ ದೇಶದ ಸಾಮರ್ಥ್ಯವನ್ನು ಹೆಚ್ಚಿಸುತ್ತದೆ.

2014 ರಿಂದ, ಸರ್ಕಾರವು ಕಾನೂನು ಬದಲಾವಣೆಗಳ ಸರಣಿಯನ್ನು ಜಾರಿಗೊಳಿಸಿದೆ ಮತ್ತು ಅಕ್ರಮ ಹಣ ಸಾಗಣೆ ಮತ್ತು ಭಯೋತ್ಪಾದನೆಗೆ ಹಣಕಾಸು ಮತ್ತು ಕಪ್ಪು ಹಣವನ್ನು ನಿಭಾಯಿಸಲು ಜಾರಿ ಪ್ರಯತ್ನಗಳನ್ನು ಬಲಪಡಿಸಿದೆ. ಈ ಬಹುಮುಖಿ ಕಾರ್ಯತಂತ್ರವು ಈ ಕ್ರಮಗಳನ್ನು ಅಂತಾರಾಷ್ಟ್ರೀಯ ಮಾನದಂಡಗಳಿಗೆ ಅನುಗುಣವಾಗಿಸಿದೆ ಮತ್ತು ಸಕಾರಾತ್ಮಕ ಫಲಿತಾಂಶಗಳನ್ನು ನೀಡುವ ಮೂಲಕ ಪರಿಣಾಮಕಾರಿ ಎಂದು ಸಾಬೀತಾಗಿದೆ. ಕ್ರಮಯೋಗ್ಯವಾದ ಗುಪ್ತಚರ ಮಾಹಿತಿ ಬಳಸಿಕೊಂಡು ಭಯೋತ್ಪಾದಕ ಹಣಕಾಸು ಜಾಲವನ್ನು ಕಿತ್ತುಹಾಕುವಲ್ಲಿ ಭಾರತೀಯ ಸಂಸ್ಥೆಗಳು ಯಶಸ್ವಿಯಾಗಿವೆ. ಈ ಕಾರ್ಯಾಚರಣೆಗಳು ಕರಾವಳಿಯಲ್ಲಿಯೂ ಭಯೋತ್ಪಾದನೆಗೆ ಹಣಕಾಸು, ಕಪ್ಪು ಹಣ ಮತ್ತು ಮಾದಕ ವಸ್ತುಗಳ ಹರಿವನ್ನು ತಡೆಗಟ್ಟಿವೆ.

ಎರಡು ವರ್ಷಗಳ ಅವಧಿಯಲ್ಲಿ, ಕಂದಾಯ ಇಲಾಖೆಯು (DoR) ಪರಸ್ಪರ ಮೌಲ್ಯಮಾಪನ ಪ್ರಕ್ರಿಯೆಯಲ್ಲಿ ಎಫ್‌ ಎ ಟಿ ಎಫ್ ನೊಂದಿಗೆ ಭಾರತದ ತೊಡಗಿಸಿಕೊಳ್ಳುವಿಕೆಯನ್ನು ಮುನ್ನಡೆಸಿತು. ವಿವಿಧ ಸಚಿವಾಲಯಗಳು, ರಾಷ್ಟ್ರೀಯ ಭದ್ರತಾ ಮಂಡಳಿಯ ಸಚಿವಾಲಯ (NSCS), ರಾಜ್ಯ ಆಡಳಿತಗಳು, ನ್ಯಾಯಾಂಗ, ಹಣಕಾಸು ವಲಯದ ನಿಯಂತ್ರಕರು, ಸ್ವಯಂ ನಿಯಂತ್ರಣ ಸಂಸ್ಥೆಗಳು, ಹಣಕಾಸು ಸಂಸ್ಥೆಗಳು ಮತ್ತು ವಿವಿಧ ಸಚಿವಾಲಯಗಳ ಪ್ರತಿನಿಧಿಗಳನ್ನು ಒಳಗೊಂಡಿರುವ ವೈವಿಧ್ಯಮಯ, ಬಹು ಶಿಸ್ತಿನ ತಂಡದ ಅಸಾಧಾರಣ ಪ್ರಯತ್ನಗಳು ಮತ್ತು ಅಮೂಲ್ಯ ಕೊಡುಗೆಯಿಂದ ಈ ಯಶಸ್ಸನ್ನು ಪಡೆಯಲಾಗಿದೆ. ಈ ಸಹಯೋಗದ ಪ್ರಯತ್ನವು ಭಾರತದ ಪರಿಣಾಮಕಾರಿ AML/CFT ಚೌಕಟ್ಟನ್ನು ಪ್ರದರ್ಶಿಸಿದೆ.

ಭಾರತವು ಈಗಾಗಲೇ ಎಫ್‌ ಎ ಟಿ ಎಫ್ ಚಾಲನಾ ತಂಡದ ಸದಸ್ಯ ರಾಷ್ಟ್ರವಾಗಿದೆ. ಭಾರತದ ಪ್ರಸ್ತುತ ಪ್ರದರ್ಶನವು ಗುಂಪಿನ ಒಟ್ಟಾರೆ ಕಾರ್ಯಚಟುವಟಿಕೆಗೆ ಗಣನೀಯವಾಗಿ ಕೊಡುಗೆ ನೀಡಲು ಭಾರತಕ್ಕೆ ಅವಕಾಶವನ್ನು ಒದಗಿಸುತ್ತದೆ.

ಭಾರತವು ತನ್ನ AML/CFT ಚೌಕಟ್ಟನ್ನು ಮತ್ತಷ್ಟು ಬಲಪಡಿಸಲು ಮತ್ತು ಆರ್ಥಿಕ ಅಪರಾಧಗಳನ್ನು ಎದುರಿಸಲು ಅಂತಾರಾಷ್ಟ್ರೀಯ ಪಾಲುದಾರರೊಂದಿಗೆ ತನ್ನ ಸಹಯೋಗವನ್ನು ಮುಂದುವರೆಸಲು ಬದ್ಧವಾಗಿದೆ. ಎಲ್ಲರಿಗೂ ಸುರಕ್ಷಿತ ಮತ್ತು ಪಾರದರ್ಶಕ ಆರ್ಥಿಕ ವಾತಾವರಣವನ್ನು ಖಚಿತಪಡಿಸಿಕೊಳ್ಳಲು ರಾಷ್ಟ್ರವು ಈ ಯಶಸ್ಸಿನ ಮೇಲೆ ಮುಂದುವರೆಯುತ್ತದೆ.

ಎಫ್‌ ಎ ಟಿ ಎಫ್ ಬಗ್ಗೆ:

ಫೈನಾನ್ಶಿಯಲ್ ಆಕ್ಷನ್ ಟಾಸ್ಕ್ ಫೋರ್ಸ್ (ಎಫ್‌ ಎ ಟಿ ಎಫ್) 1989 ರಲ್ಲಿ ಸ್ಥಾಪಿತವಾದ ಅಂತರ್‌ ಸರ್ಕಾರಿ ಸಂಸ್ಥೆಯಾಗಿದ್ದು, ಅಕ್ರಮ ಹಣ ಸಾಗಣೆ, ಭಯೋತ್ಪಾದನೆಗೆ ಹಣಕಾಸು ಮತ್ತು ಅಂತಾರಾಷ್ಟ್ರೀಯ ಹಣಕಾಸು ವ್ಯವಸ್ಥೆಯ ಸಮಗ್ರತೆಗೆ ಸಂಬಂಧಿಸಿದ ಇತರ ಬೆದರಿಕೆಗಳನ್ನು ಎದುರಿಸಲು ಅಂತಾರಾಷ್ಟ್ರೀಯ ಕಾವಲುಗಾರ ಸಂಸ್ಥೆಯಾಗಿದೆ. ಭಾರತವು 2010 ರಲ್ಲಿ ಎಫ್‌ ಎ ಟಿ ಎಫ್ ಸದಸ್ಯತ್ವವನ್ನು ಪಡೆದುಕೊಂಡಿತು.

*****