ভারতকী মমিং লৈখৎলক্লিবী জুদো শান্নরোয় তুলিকা মান, নুপী কেজি ৭৮গী কাংলুপ্তা লাক্লিবা পেরিস ওলেম্পিক্সতা শরুক য়ারগনি। ওলেম্পিক্স গেমস অসিদা শরুক য়াগদবা ভারতকী ৯শুবা নুপী শান্নরোয় তুলিকানা ওইরে। মহাক সরকারগী তার্গেত ওলেম্পিক পোদিয়ম স্কিম(তোপস)তগী মতেং ফংখি হায়না তুলিকানা ফোঙদোকখি। মহাক্না হায়খি চহি চুপ্পা পাংথোক্লিবা থৌরমশিংদা চাংদম্নবা ঙম্নবা তোপসকী মখাদা শান্নরোয় কয়া কান্নবা ফংখি অমসুং মসিনা মখোয়গী রেঙ্কিংগী লেংদনা থম্বদা মতেং পাংখি। অচঙবা শেনফমশিং পুথোকপা মতমদা, ঐখোয়না ৱাখল ৱাদনা শান্নবা ঙম্মী অমসুং খ্বাইদগী ফজনা শান্নবা ঙম্মী।

বিরমিংহামদা পাংথোকপা কম্মনৱেল্থ গেমস ২০২২দা সিলভর মেদল অমা ফংলবা মতুংদা তুলিকা মমিং চৎপা হৌরকখি। হৌখিবা থাদা অবু ধাবীদা পাংথোকপা ৱার্ল্দ চেম্পিয়নশিপতা ৩২গী রাউন্দতা মহাক্না কনাদাগী পোর্তাউন্দো ইসাসি মাইথিবা পীদুনা ওলেম্পিক রেঙ্কিংদা মহাক্কী ফিবম ফগৎলকখি। হায়রিবা মাইপাকপা অদুনা মহাক পেরিস ওলেম্পিক্সকী ক্বালিফাই ওইবদা মতেং পাংখি।

হৌখিবা চহিদা হাংঝৌদা পাংথোকপা এসিয়ান গেমসতা মহাক মঙাশুবা মফমদা লৈখি অমসুং চহি অসিগী এপ্রিলদা হোং কোংদা পাংথোকপা এসিয়ান চেম্পিয়নশিপতা দরকার ওইবা পোইন্তশিং ফংনবা য়াম্না মরুওইবা অমা ওইখি। মহাক্না হায়খি ঐ এসিয়ান গেমস অমসুং এসিয়ান চেম্পিয়নশিপতা বাউত অহুম থোইখি। হোং কোংদা শান্নবা মতমদা ঐ ক্বালিফাই ওইবা ঙম্লগনি হায়না ঐনা অহানবা ওইনা খনখি। ৱার্ল্দ চেম্পিয়নশিপতা থোইখিবা অদুনা ঐগী মতেং পাংখি।

তোপস অসি য়ুথ এফেয়ার্স অমসুং স্পোর্তস মিনিস্ত্রিগী ভারতকী মকোক থোংবা শান্নরোয়শিং মতেং পাংনবা মাংজিল থাবা থৌরম অমনি। স্কিম অসিনা মপান লৈবাকশিংদা ত্রেনিং পীদুনা, মালেমগী চাংদম্নবশিং শরুক য়াহন্দুনা, খুৎলায় লৈদুনা, কোচিং কেম্পশিং পাংথোক্তুনা অমসুং থাগী শেনফম খর পীদুনা ওলেম্পিক অমসুং পেরালেম্পিক শরুক য়াবা ঙমগদবা শান্নরোয়শিংদা মতেং পাংলি।

****