আন্তঃৰাষ্ট্ৰীয় যোগ দিৱস উপলক্ষে কেন্দ্ৰীয় গৃহ তথা সমবায় মন্ত্ৰী শ্ৰী অমিত শ্বাহে আজি আহমেদাবাদত যোগাভ্যাস কৰে। তেওঁ দেশৰ লগতে বিশ্বৰ সকলো যোগপ্ৰেমীক যোগ দিৱসৰ শুভেচ্ছা জনায়।

এই উপলক্ষে সভাত আগবঢ়োৱা ভাষণত শ্ৰী অমিত শ্বাহে কয় যে সমগ্ৰ বিশ্বই দশম আন্তঃৰাষ্ট্ৰীয় যোগ দিৱস উদযাপন কৰাটোৱে আজি এক বিশেষ তাৎপৰ্য বহন কৰিছে। তেওঁ কয় যে ২০১৪ চনত দেশে শ্ৰী নৰেন্দ্ৰ মোদীক ভাৰতৰ প্ৰধানমন্ত্ৰী হিচাপে ঐতিহাসিক জনাদেশ দিছিল। তেওঁ কয় যে প্ৰধানমন্ত্ৰী হোৱাৰ পিছত শ্ৰী নৰেন্দ্ৰ মোদীয়ে যেতিয়া প্ৰথমবাৰৰ বাবে ৰাষ্ট্ৰসংঘৰ সাধাৰণ পৰিষদলৈ গৈছিল তেতিয়া ২১ জুন তাৰিখটো আন্তঃৰাষ্ট্ৰীয় যোগ দিৱস হিচাপে পালন কৰাৰ প্ৰস্তাৱ আগবঢ়াইছিল। শ্ৰী শ্বাহে কয় যে শ্ৰী নৰেন্দ্ৰ মোদীয়ে তেওঁৰ প্ৰস্তাৱেৰে আমাৰ প্ৰাচীন বিজ্ঞান আৰু আমাৰ ঋষিসকলৰ অনন্য উপহাৰ বিশ্ব নেতাসকলৰ আগত চিনাকি কৰাই দিলে। তেওঁ কয় যে কেইদিনমানৰ ভিতৰতে ১৭০খনতকৈও অধিক দেশ যোগ দিৱস উদযাপন কৰিবলৈ সন্মত হৈছিল আৰু তাৰ পৰাই সমগ্ৰ বিশ্বই যোগৰ পথ অনুসৰণ কৰিছিল।

কেন্দ্ৰীয় গৃহমন্ত্ৰীগৰাকীয়ে কয় যে ভাৰতে সমগ্ৰ বিশ্ব আৰু মানৱ জাতিক বহুখিনি দিছে আৰু যোগাসন সকলোতকৈ ডাঙৰ উপহাৰ। তেওঁ কয় যে মন, শৰীৰ আৰু আত্মাৰ মাজত সমন্বয় আনিবলৈ যোগতকৈ ডাঙৰ কোনো বিজ্ঞান নাই আৰু আমাৰ মনৰ ভিতৰত থকা অপৰিসীম শক্তিৰ সাগৰত ডুব যোৱাৰ একমাত্ৰ মাধ্যম যোগ। শ্ৰী শ্বাহে কয় যে নিজৰ মনৰ ভিতৰৰ শক্তিসমূহক আত্মাৰ সৈতে সংযোগ কৰি জগতৰ কল্যাণৰ পথত আগবাঢ়িবলৈ যোগতকৈ উত্তম মাধ্যম একো নাই। ইয়াৰ সমান্তৰালকৈ আজিৰ দিনত প্ৰচলিত বহু ৰোগৰ সমাধানো যোগ। শ্ৰী শ্বাহে কয় যে প্ৰধানমন্ত্ৰী শ্ৰী নৰেন্দ্ৰ মোদীৰ প্ৰচেষ্টাত যোগে সমগ্ৰ মানৱতাৰ বাবে এক ডাঙৰ মঞ্চ লাভ কৰিলে। তেওঁ কয় যে আজি সমগ্ৰ বিশ্বই যোগ গ্ৰহণ কৰিছে, শিকিছে আৰু শিক্ষা দি আছে। তেওঁ কয় যে কেৱল ভাৰততে নহয় সমগ্ৰ বিশ্বৰ লাখ লাখ লোকে যোগাসন সম্পূৰ্ণ হৃদয়েৰে গ্ৰহণ কৰিছে আৰু একেলগে কাম কৰি ইয়াক আগুৱাই লৈ গৈছে।

শ্ৰী অমিত শ্বাহে কয় যে গুজৰাট চৰকাৰকে ধৰি সকলোৰে সহযোগত আজি পুৱা ৰাজ্যত প্ৰায় ১.২৫ কোটি লোকে যোগাসন কৰে। গুজৰাট চৰকাৰে যোগক প্ৰচাৰ কৰাৰ লগতে ইয়াক ক্ৰীড়া হিচাপেও স্বীকৃতি দিছে। শ্ৰী শ্বাহে কয় যে যোগে আমাৰ বেদত নিহিত ‘বসুধৈৱ কুটুম্বকম’ মন্ত্ৰ পূৰণ কৰিছে। তেওঁ কয় যে ২১ জুনত সমগ্ৰ বিশ্বতে কোনোবা নহয় কোনোবা সময়ত যোগাসন চলি আছে। শ্ৰী শ্বাহে কয় যে যোগৰ জৰিয়তে আমি নিষ্ঠা আৰু নিৰন্তৰ প্ৰচেষ্টাৰে নিস্বাৰ্থ কৰ্মৰ নীতি-নিয়ম উপলব্ধি কৰিব পাৰো। তেওঁ কয় যে সমগ্ৰ বিশ্বৰ কল্যাণৰ মন্ত্ৰ কাৰ্যকৰী কৰিবলৈ যোগৰ নিৰন্তৰ অনুশীলন প্ৰয়োজনীয়।

কেন্দ্ৰীয় গৃহ তথা সমবায় মন্ত্ৰীগৰাকীয়ে কয় যে আমাৰ ঋষিসকলে দিয়া জ্ঞানেহে আমাক আগুৱাই নিব পাৰে। আমাৰ শাৰীৰিক শক্তি, মানসিক শান্তি আৰু কল্পনাৰ সম্প্ৰসাৰণ, বিবেক শক্তিৰ একাগ্ৰতা আৰু সমগ্ৰ দেশৰ সামূহিক শক্তিৰ জাগৰণৰ বাবে যোগতকৈ ডাঙৰ কোনো উপায় থাকিব নোৱাৰে। শ্ৰী শ্বাহে কয় যে আন্তঃৰাষ্ট্ৰীয় যোগ দিৱসৰ উপহাৰ দি প্ৰধানমন্ত্ৰী মোদীয়ে সমগ্ৰ বিশ্বতে ভাৰতীয় সংস্কৃতি আৰু জ্ঞানৰ ধ্বজা উৰুৱাইছে।

***

RK/VV/RR/PR/PS/DB