مرکزی وزیر داخلہ اور تعاون کے وزیر جناب امت شاہ نے آج نئی دہلی میں منی پور میں سیکورٹی صورتحال کا جائزہ لینے کے لیے ایک اعلیٰ سطحی میٹنگ کی صدارت کی۔ میٹنگ میں آرمی چیف جنرل منوج پانڈے، مرکزی داخلہ سکریٹری، انٹیلی جنس بیورو (آئی بی) کے ڈائریکٹر، آرمی چیف (نامزد) لیفٹیننٹ جنرل اپیندر دویدی، منی پور حکومت کے سیکورٹی مشیر، ڈائریکٹر جنرل  آسام رائفلز، چیف سکریٹری، منی پور کے ڈائریکٹر جنرل آف پولیس (ڈی جی پی) اور فوج اور وزارت داخلہ (ایم ایچ اے) کے سینئر افسران نے شرکت کی۔

مرکزی وزیر داخلہ جناب امت شاہ نے منی پور میں سیکورٹی کی صورتحال کا مجموعی جائزہ لیا اور اس بات کو یقینی بنانے کی ہدایت دی کہ منی پور میں تشدد کا مزید کوئی واقعہ رونما نہ ہو۔ وزیر داخلہ نے منی پور میں امن و سکون کی بحالی کے لیے مرکزی فورسز کی اسٹریٹجک تعیناتی پر زور دیا۔ انہوں نے مزید کہا کہ ضرورت پڑنے پر فورسز میں اضافہ کیا جائے گا۔ وزیر داخلہ نے مزید ہدایت کی کہ تشدد کے مرتکب افراد کے خلاف قانون کے مطابق سخت کارروائی کی جائے۔

مرکزی وزیر داخلہ نے کہا کہ وزیر اعظم جناب نریندر مودی کی قیادت میں حکومت ہند منی پور کے تمام شہریوں کی حفاظت اور سلامتی کو یقینی بنانے کے لیے پوری طرح پرعزم ہے۔ جناب امت شاہ نے ریلیف کیمپوں کی صورتحال کا بھی جائزہ لیا، خاص طور پر خوراک، پانی، ادویات اور دیگر بنیادی سہولیات کی مناسب دستیابی کے سلسلے میں۔ وزیر داخلہ نے منی پور کے چیف سکریٹری کو ہدایت دی کہ وہ بے گھر لوگوں کے لیے صحت اور تعلیم کی مناسب سہولیات اور ان کی بازآبادکاری کو یقینی بنائیں۔

وزیر داخلہ نے جاری نسلی تنازعہ کو حل کرنے کے لیے مربوط نقطہ نظر کی اہمیت پر زور دیا۔ انہوں نے کہا کہ وزارت داخلہ میتیس اور کوکی دونوں گروہوں سے بات کرے گی تاکہ نسلی تقسیم کو جلد از جلد ختم کیا جا سکے۔ حکومت ہند ریاست میں سیکورٹی کی صورتحال کو مضبوط بنانے میں منی پور حکومت کی فعال مدد کر رہی ہے۔

-----------------------

ش ح۔س ب ۔ ع ن

U NO: 7513