ঙসি নিউ দিল্লিদা হোম অমসুং কোওপরেসনগী য়ুনিয়ন মিনিস্তর শ্রী অমিত সাহনা লুচিংদুনা মনিপুরগী ফিবম হন্না য়েংশিন্নবা অৱাংবা থাক্কী মীফম অমা পাংথোকখ্রে। মীফম অদুদা চীফ ওফ আর্মি স্তাফ জেনেরেল মনোজ পান্দে, য়ুনিয়ন হোম সেক্রেতরি, দিরেক্তর ইন্তিলিজেন্স ব্যুরো(আই বি), চীফ ওফ আর্মি স্তাফ(খল্লবা) লেপ্তনেন্ত জেনেরেল উপেন্দ্র দ্বিবেদি, মনিপুর সরকারগী সেকুরিতি এদভাইজর, অসাম রাইফলসকী দিরেক্তর জেনেরেল, চীফ সেক্রেতরি, মনিপুরগী দিরেক্তর জেনেরেল ওফ পুলিস, আর্মিগী সেনিয়র ওফিসিএলশিং অমসুং হোম এফেয়ার্স মিনিস্ত্রিগী সেনিয়র ওফিসিএলশিং শরুক য়াখি।

য়ুনিয়ন মিনিস্তর শ্রী অমিত সাহনা মনিপুরগী সেকুরিতিগী ফিবম য়েংশিনখি অমসুং মনিপুরদা মখা তানা হিংশাগী থবক থোকহন্দনবা য়াথং পীখি। শ্রী অমিত সাহনা হায়খি মনিপুরদা শান্তি অমসুং ইং-চিকপা হঞ্জিল্লক্নবা কেন্দ্রগী ফোর্সশিং থম্লে, করিগুম্বা দরকার ওইরবদি ফোর্স হেনগৎহনগনি। হিংশাগী থবক পাংথোকপা মীওইশিং অকনবা আইনগী থবক লৌখৎনবা হোম মিনিস্তরনা য়াথং পীখ্রে। 

য়ুনিয়ন হোম মিনিস্তরনা হায়খি প্রধান মন্ত্রী শ্রী নরেন্দ্র মোদীগী লমজিং মখাদা, ভারত সরকারনা, মনিপুরগী মীওই খুদিংমক অশোই-অঙাম থোক্তনবা অমসুং ঙাক-শেন্নবা থবক পায়খৎলে। হোম মিনিস্তরনা রিলিফ কেম্পশিংগী ফিবম হন্না য়েংশিনখি।  চীঞ্জাক, ঈশিং, হিদাক-লাংথকশিং অমসুং অতোপ্পা দরকার ওইবা পোৎলমশিং মতিক চানা ফংহন্নবা থবক পায়খৎনবা য়ুনিয়ন হোম মিনিস্তরনা চীফ সেক্রেতরিদা খঙহনখি। লাঞ্জেন্নরিবা মীয়াম মতিক চাবা হকশেল অমসুং লাইরিক-লাইশুগী খুদোংচাবশিং পীনবা অমসুং মখোয় খুন্দা-লৈতানবা থবক পায়খৎনবা শ্রী অমিত সাহনা মনিপুরগী চীফ সেক্রেতরিদা খঙহনখ্রে।

হৌজিক মায়োক্নরিবা কাংলুপকী ইরাং অসি লোইশিন্নবা পুন্না থবক তৌমিন্নবগী মরুওইবা অদু য়ুনিয়ন হোম মিনিস্তরনা পনখি। মহাক্না হায়খি হোম এফেয়ার্স মিনিস্ত্রিনা অথুবা মতমদা, কাংলুপকী মুক্নবা অসি য়াশিন্নবা পুরক্নবা মৈতৈশিং অমসুং কুকিশিং অনিমক ৱারি শান্নগনি। রাজ্য অসিগী সেকুরিতিগী ফিবম মপাঙ্গল কনখৎহন্নবা ভারত সরকারনা মনিপুর সরকার মপুংফানা শৌগৎলি।

*******