U Myntri Kam Pohiing bad Cooperation, Amit Shah u la pyniaid ia ka jingialang ha New Delhi mynta ka sngi ban peit ia ka jinglong jingman jong ka jingshngain ha Jammu and Kashmir. Ha kane ka jingialang la wan iashim bynta da u National Security Advisor, Ajit Doval, u Lieutenant Governor ka J&K, Manoj Sinha, Chief of Army Staff General Manoj Pandey, Secretary ka Tnat Kam Pohiing, Director, Intelligence Bureau, ki heh shipai ba kynthup u Chief of Army Staff (Designate) Lt. General Upendra Dwivedi, Director General jong ki CAPF, Chief Secretary, DGP jong ka J&K bad kiwei kiwei ki ophisar.

U Mynti Kam Pohiing u la bthah ia ki kynhun ba kin pynbud ia ka jingseisoh ba la ioh ha ka them Kashmir lyngba ka Area Domination Plan bad Zero Terror Plan ha ka Jammu division. U Shah u la ong ba ka Sorkar ba la khlieh da u Myntri Rangbah Duh, Narendra Modi ka ieng skhem ban long ka nuksa da kaba ialeh pyrshah ia ki kam pyntriem lyngba ki sienjam ba saindur thymmai. U Amit Shah u la bthah ia ki kynhun pahara ba kin trei ha ka rukom mission mode bad pynthikna ia ka jingai jubab kaba sted ha ka rukom ba khlain ka jingiatrei lang.

U Myntri Kam Pohiing u la ong ba ka jingialeh pyrshah ia ki kam pyntriem ha Kashmir ka don ha ka khep kaba kongsan, ki jingjia ba dang shen ki pyni ba ki kam pyntriem ki la hap ban kham swai na ka kam pyntriem ba skhem bha, ngi kut jingmut wan rat dyngkhong ruh ia kane.

U Amit Shah u la ban jur halor ka jingiatreilang hapdeng ki kynhun pahara, ka jingwad ia ki jaka ba don jingma bad ka jingpynbeit ia ki jingkhuslai kiba iadei bad ka jingshngain ha kine ki jaka. Ha ka jingban biang ia ka Zero Tolerance Policy pyrshah ia ki kam pyntriem hapoh ka jingialam lynti jong u Myntri Rangbah Duh Narendra Modi, u Myntri Kam PohIing u la ong ba ka Sorkar kan leh ia katba donkam ban rat dyngkhong ia ki kam pyntriem na Jammu and Kashmir

U Myntri Kam Pohiing u la ong ba ki sienjam jong ka Sorkar India ki la wanrah ia ka jingseisoh ha ka them Kashmir ha kaba la duna bha ki jingjia ba iadei bad ki kam pyntriem. U la kdew sha ka jingkiew ka jingshngain kaba paw lyngba ka jingbun ki nongwanjngoh kai sha ka them Kashmir. U Shah u la iaroh ia ki kynhun pahara bad ki bor pyniaid ia ka J&K na ka bynta ka jingiaid beit ki elekshon Lok Sabha ha kaba la sakhi ia ka jingiashim bynta kaba bun tam jong ki nongjied nongmihkhmat ha Jammu and Kashmir.

*****