નેટવર્ક પ્લાનિંગ ગ્રુપ (એનપીજી)ની 72મી બેઠક 12મી જૂન, 2024ના રોજ નવી દિલ્હીમાં બોલાવવામાં આવી હતી. આ બેઠકની અધ્યક્ષતા ડિપાર્ટમેન્ટ ફોર પ્રમોશન ઑફ ઈન્ડસ્ટ્રી એન્ડ ઈન્ટરનલ ટ્રેડ (ડીપીઆઈઆઈટી)ના અધિક સચિવ શ્રી રાજીવ સિંહ ઠાકુરે કરી હતી. આ બેઠકમાં રોડ ટ્રાન્સપોર્ટ અને હાઈવે મંત્રાલય (એમઓઆરટીએચ), રેલ મંત્રાલય (એમઓઆર), અને આવાસ અને શહેરી બાબતોના મંત્રાલય (એમઓઓચયૂ)ની ત્રણ મહત્વપૂર્ણ માળખાકીય પ્રોજેક્ટના મૂલ્યાંકન પર ધ્યાન કેન્દ્રિત કરવામાં આવ્યું. પ્રોજેક્ટનું મૂલ્યાંકન પીએમ ગતિશક્તિ નેશનલ માસ્ટર પ્લાન (એનએમપી)ના સિદ્ધાંતો સાથે સુસંગતતા માટે કરવામાં આવ્યું. પ્રોજેક્ટ્સનું મૂલ્યાંકન અને તેના અપેક્ષિત અસરોમાં નીચેનાનો સમાવેશ થાય છે:

1. માર્ગ પરિવહન અને ધોરીમાર્ગ મંત્રાલય (MoRTH) ના જમ્મુ અને કાશ્મીરમાં રાષ્ટ્રીય ધોરીમાર્ગ પ્રોજેક્ટ

આ પ્રોજેક્ટમાં રાફિયાબાદથી ચમકકોટ સુધીના NH-701ના 51 કિલોમીટર લાંબા સેક્શનનું બાંધકામ અને અપગ્રેડેશન સામેલ છે. ગ્રીનફિલ્ડ (14.34 કિમી) અને બ્રાઉનફિલ્ડ (36.66 કિમી) બંને વિકાસ સાથે, પ્રોજેક્ટનો ખર્ચ 1,405 કરોડ રુપિયા થવાની ધારણા છે. અપગ્રેડેડ રૂટ કુપવાડા, ચોકીબલ અને તંગધાર જેવા ગામો માટે જોડાણમાં નોંધપાત્ર વધારો કરશે, સંરક્ષણ દળો માટે લોજિસ્ટિકલ સપોર્ટમાં સુધારો કરશે અને આરોગ્ય, શિક્ષણ અને વ્યવસાયની તકો સુધી વધુ સારી પહોંચ પ્રદાન કરીને સામાજિક-આર્થિક પરિસ્થિતિઓને વેગ આપશે.

2.  રેલવે મંત્રાલય (MoR)ની આંધ્રપ્રદેશમાં ગુડૂર-રેનિગુંટા ત્રીજી રેલ લાઇન

આંધ્રપ્રદેશના તિરુપતિ જિલ્લામાં ગુડૂર અને રેનિગુંટા સ્ટેશનો વચ્ચે ત્રીજી રેલ લાઇનના નિર્માણમાં  83.17 કિલોમીટરની લાઇનનો સામેલ છે જેનો ઉદ્દેશ્ય હાલની ડબલ લાઈનની ક્ષમતા વધારવાનો છે. 884 કરોડ રુપિયાના અંદાજિત ખર્ચ સાથે, આ પ્રોજેક્ટ પેસેન્જર અને કાર્ગો હિલચાલની કાર્યક્ષમતામાં સુધારો કરશે, જેમાં 36.58 હેક્ટર જમીનની જરૂર પડશે. ઈન્ફ્રાસ્ટ્રક્ચર અપગ્રેડમાં નવા પુલો, વિસ્તૃત અંડરપાસ અને અદ્યતન સિગ્નલિંગ સિસ્ટમનો સમાવેશ થશે, જે નોંધપાત્ર રીતે પ્રાદેશિક આર્થિક પ્રવૃત્તિઓને વેગ આપશે.

3. આવાસ અને શહેરી બાબતોના મંત્રાલય (MoHUA)ના મહારાષ્ટ્રમાં પુણે મેટ્રો લાઇનનું વિસ્તરણ

આ MoHUA પ્રોજેક્ટનો ઉદ્દેશ્ય ઓપરેશનલ મેટ્રો કોરિડોરને વનાઝથી પુણેમાં રામવાડી સુધી વિસ્તારવાનો છે. આ પ્રોજેક્ટમાં વનાઝ-રામવાડી મેટ્રો કોરિડોરના પૂર્વ અને પશ્ચિમ છેડા પર બે લાઇનના વિસ્તરણનો સમાવેશ થાય છે. પશ્ચિમ બાજુનો આ વિસ્તરણ એ વનાઝથી ચાંદની ચોક સુધી 1.12 કિલોમીટરનો એલિવેટેડ વિભાગ છે, જ્યારે પૂર્વ તરફનો વિસ્તાર રામવાડીથી વાઘોલી/વિઠ્ઠલવાડી સુધીનો 11.63 કિલોમીટરનો એલિવેટેડ વિભાગ છે. આ એલિવેટેડ મેટ્રો કોરિડોરની કુલ લંબાઈ 12.75 કિલોમીટર હશે અને તેનું નિર્માણ અંદાજિત 3,757 કરોડ રૂપિયાના ખર્ચે કરવામાં આવશે.

આ લાઇન માટે દૈનિક રાઇડર્સ 2027 સુધીમાં 3.59 લાખ સુધી પહોંચવાની ધારણા છે, અને 2057 સુધીમાં તે વધીને 9.93 લાખ થવાનો અંદાજ છે. આ વિસ્તરણ મધ્ય પુણેને ઝડપથી વિકસતા ઉપનગરો સાથે જોડશે, મુસાફરીનો સમય અને રસ્તાની ભીડ ઘટાડશે અને શહેરના જાહેર પરિવહન ઈન્ફ્રાસ્ટ્રક્ચરની સંખ્યામાં નોંધપાત્ર વધારો કરશે.

મીટિંગ દરમિયાન, તમામ પ્રોજેક્ટ્સનું તેમના સંકલિત આયોજન અને પીએમ ગતિશક્તિ નેશનલ માસ્ટર પ્લાન (NMP)ના સિદ્ધાંતો સાથે સંરેખણ માટે મૂલ્યાંકન કરવામાં આવ્યું હતું. સામાજિક-આર્થિક લાભો, સુધારેલી કનેક્ટિવિટી, પરિવહન ખર્ચમાં ઘટાડો અને ઉન્નત કાર્યક્ષમતા પર ભાર મૂકવામાં આવ્યો હતો. પ્રોજેક્ટ્સનો ઉદ્દેશ મલ્ટિમોડલ એકીકરણને પ્રોત્સાહન આપવાનો, સમગ્ર પરિવહન અને લોજિસ્ટિક્સ નેટવર્કને વધારવાનો પણ છે.

આ પ્રોજેક્ટ્સ રાષ્ટ્રનિર્માણમાં મહત્વપૂર્ણ ભૂમિકા ભજવવા, પરિવહનના વિવિધ પ્રકારોને એકીકૃત કરવા અને નોંધપાત્ર સામાજિક-આર્થિક લાભો અને રહેવાની સરળતા પ્રદાન કરવા માટે મુખ્ય ભૂમિકા ભજવે તેવી અપેક્ષા છે, જેનાથી પ્રદેશોના સર્વાંગી વિકાસમાં યોગદાન મળશે.

AP/GP/JT

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com