ঙসি প্রধান মন্ত্রী শ্রী নরেন্দ্র মোদী ইতালিগী অপুলিয়াদা পাংথোকপা জি-৭ মীফমগী আর্তিফিসিএল ইন্তিলিজেন্স অমসুং ইনর্জি, অফ্রিকা অমসুং মেদিতেরিনিয়ানগী আউতরিচ সেসন্দা শরুক য়াখ্রে। কাংবু অসিনা চহি ৫০ মপুংফারকপদা জি-৭গী লৈবাকশিং মহাক্না থাগৎপা ফোঙদোকখ্রে।

মহাক্না হায়খি মীওইবা খুন্নাইগী পুৱারিদা খ্বাইদগী চাউবা মীখলদা মহাক অমুক হন্না মাইপাক্লবা মতুংদা মীফম অসি শরুক য়াবা অসি মহাক্কী ওইনা অপেনবা অমনি। মীওইবগী য়াইফনবা থবক তৌনবা তেক্নোলোজি মাইপাক্না শীজিন্নগদবনি। হিরম অসিদা, মীয়ামগী থবকশিং পাংথোক্নবা ভারতনা মাইপাক্না দিজিতেল তেক্নোলোজি শীজিন্নবগী মতাংদা মহাক্না পাউদমখি।

মহাক্না হায়খি আর্তিফিসিএল ইন্তিলিজেন্সকী লমদা লৈবাক্কী লাল্লোং শেম্বা অহানবা লৈবাক খরগী মনুংদা ভারত য়াওরি। লাল্লোং অসিগী মখাদা, চহি অসিদগী ঐখোয়না এ.আই মিসন হৌদোক্লে। মসি “এ.আই ফোর ওল” হায়বা লাইৱাদগী লৌথোকপনি। এ.আইগী মালেমগী পুন্না থবক তৌমিন্নবগী ফাউন্দিং মেম্বর অমসুং চিয়ার ওইনা, লৈবাকশিংগী মরক্তা মতেং পাংনবা ঐখোয়না পুক্নিং থৌগৎলি।

প্রধান মন্ত্রীনা হায়খি ইনর্জিগী লমদা ভারতনা পায়খৎলিবা থবক অসি মরুওইবা ৱাফম মরি- মরাং কাইহনবা, লাইনা ফংহনবা, মমল হোংহনবা অমসুং শীজিন্নবা য়াহনবা অসিদা য়ুম্ফম ওইবনি।  ২০৭০ ফাওবগী মনুংদা নেত জিরোগী পান্দম ফংনবা ঐখোয়না পীখিবা থাজবা অদু থবক ওইনা পাংথোক্নবা ঐখোয়না থবক খুদিংমক পায়খৎলি। ভারতনা মিসন লাইফ হায়বদি লাইফস্তাইল ফোর ইনভাইরোনমেন্ত হৌদোক্লে। মিসন অসি মাঙলোমদা চঙশিল্লদুনা, মালেমগী মহৌশাগী অকোয়বগী ফিবম নুমিৎ, জুন ৫দা, মহাক্না “উ পাম্বী অমা ইমাগী মিংদা” খোঙজং অমা হৌদোক্লে। মসিগী ৱাখল্লোন অসিগা লোয়ননা, মীনুংশিংগা লোয়ননা অমসুং মালেমগী ওইনা থৌদাং লৌদুনা উ থাবগী অচৌবা খোঙজং অমা চঙশিনবা ঐখোয়না পাম্মী।

প্রধান মন্ত্রীনা হায়খি মালেমগী খা থংবা শরুক্তা লৈরিবা লৈবাকশিংগী খুদোংচাদবশিং অমসুং মরুওইবশিং মালেমগী ফম্পাক্তা পুখৎপা হায়বদি লৈবাক অসিগী থৌদাংনি হায়না ভারতনা খল্লি। হায়রিবা থবকশিং অসিদা ঐখোয়না অফ্রিকা মরুওইনা লৌরি। ভারতনা চিয়ার্মেন ওইখিবা জি-২০গী মখাদা অফ্রিকান য়ুনিয়ন মসিগী লেংদবা মেম্বর অমা ওইহনখিবা অসি ঐখোয়গী চাউথোকচবনি।

****