مرکزی وزیر جناب کِنجاراپو رام موہن نائیڈو نے آج نئی دہلی میں سرکاری طور پر شہری ہوا بازی کی وزارت کا چارج سنبھال لیا۔ اس موقع پر شہری ہوابازی اور امداد باہمی  کے وزیر مملکت جناب مرلی دھر موہول، شہری ہوابازی کے سکریٹری جناب ووملنگ منگ وولنم  اور وزارت کے سینئر افسران اس موقع پر موجود تھے۔

اس موقع پر میڈیا سے خطاب کرتے ہوئے، جناب نائیڈو نے شہری ہوا بازی کی وزارت کی قیادت کی اہم ذمہ داری سونپنے پر وزیر اعظم جناب نریندر مودی کا شکریہ ادا کیا۔ انہوں نے اس بات پر زور دیا کہ ایک نوجوان اور پرجوش رہنما کا انتخاب مستقبل کے حوالے سے نظر آنے والے نقطہ نظر کی نشاندہی کرتا ہے، جو اگلے 25 سالوں کے لیے ہوا بازی کی صنعت کے مستقبل کی تشکیل پر مرکوز ہے۔

جناب نائیڈو نے سریکاکولم اور آندھرا پردیش کے عوام کی حمایت کو تسلیم کیا، آندھرا پردیش کے وزیراعلی  جناب این چندرا بابو نائیڈو کا شکریہ ادا کیا اور آندھرا پردیش کے ایک ممتاز سیاست دان آنجہانی کِنجاراپو ییرن نائیڈو کے کردار کو یاد کیا۔

انہوں نے مزید کہا کہ وزارت کی اہم ترجیحات میں 'آسان پرواز' کا منظر نامہ تیار کرنا ہو گا، جس سے ہوائی سفر ہر شہری کے لیے زیادہ قابل رسائی اور آسان ہو گا۔ انہوں نے اس بات پر زور دیا کہ دوسرے درجے اور تیسرے درجے کے شہروں پر توجہ مرکوز کرتے ہوئے ہوا بازی کے فوائد ملک کے کونے کونے تک پہنچنے چاہئیں۔

وزیر اعظم نریندر مودی کے وکست بھارت کے وژن کے مطابق، جناب نائیڈو نے کہا کہ ‘‘ہم ہندوستان کے ہوابازی کے شعبے میں فوری پیشرفت کو آگے بڑھانے کے لیے 100 روزہ ایکشن پلان بنانے اور اس پر عمل درآمد کرنے جا رہے ہیں۔ یہ منصوبہ وکست بھارت کے طویل مدتی وژن کو حاصل کرنے کی سمت ایک قدم کا کام کرے گا کیونکہ ہندوستان 2047 میں اپنی آزادی کے 100 سال کا جشن منا رہا ہے۔ مرکزی وزیر نے مسافروں کے تجربے کو بڑھانے میں ٹکنالوجی کے استعمال کی اہمیت پر بھی زور دیا اور مسافروں کی پریشانیوں کو مؤثر طریقے سے حل کرنے کے لیے مصنوعی ذہانت اور سوشل میڈیا سے فائدہ اٹھانے کی منصوبہ بندی کی۔ انہوں نے یقین دلایا کہ وزارت تمام پالیسی فیصلوں میں مسافروں کے آرام اور سہولت کو ترجیح دے گی۔

جناب نائیڈو نے مزید مخصوص اقدامات کا خاکہ پیش کیا جن کا مقصد ہوائی رابطہ کو بڑھانا، ماحول دوست طریقوں کو فروغ دینا اور ملک بھر میں بنیادی ڈھانچے کی ترقی کو تیز کرنا ہے۔ انہوں نے ان اہداف کو حاصل کرنے کے لیے ریاستی حکومتوں، صنعت کے اسٹیک ہولڈرز اور اتحادی شراکت داروں کے ساتھ مل کر کام کرنے کا عہد کیا۔ وجیا نگرم ضلع کے بھوگاپورم میں گرین فیلڈ ہوائی اڈے کی تکمیل کے بارے میں، وزیرموصوف  نے اس پروجیکٹ کو تیز کرنے کے لیے اپنی ذاتی وابستگی کا اظہار کیا۔

مرکزی وزیر نے ہندوستان کو دنیا کی سرکردہ گھریلو ایوی ایشن مارکیٹ بنانے کے لیے حکومت کی غیر متزلزل لگن کا اعادہ کیا۔ انہوں نے ایک خوشحال اور ترقی یافتہ ہندوستان کی تعمیر کے لئے این ڈی اے کی مضبوط اور مستحکم قیادت پر بھی اعتماد ظاہر کیا۔

-----------------------

ش ح۔ا م ۔ ن ا۔

U NO: 7412