U Myntri Rangbah Duh, Narendra Modi u la shimti ia ka Ophis u Myntri Rangbah Duh mynta ka sngi. Ha ka jingai jingkren ia ki ophisar bad ki nongtrei ha ka Ophis u Myntri Rangbah Duh, u Modi u la ong ba ka la dei ka jingpyrshang ban pynlong ia ka Ophis u Myntri Rangbah Duh kum ka jaka jong ka jingai jingshakri bad ka Ophis u Myntri Rangbah Duh jong ki paidbah naduh ba dang sdang ia ki kam. “Ngi la pyrshang ban tei ia ka Ophis u Myntri Rangbah Duh kum ka jaka kaba wanrah jingkylla kaba dei ruh ka tyllong jong ka bor thymmai bad ka jaka ba ai mynsiem,” la ong u Myntri Rangbah Duh.

U Myntri Rangbah Duh Modi u la ong ba ka Sorkar ka mut ka bor thymmai jong ka jingkhlain, ka jingtheh met bad mynsiem ha ka kam bad ka jingkut jingmut bad u la ong ruh ba u ngeit skhem ba ka Ophis u Myntri Rangbah Duh ka la long kaba kloi ban ai jingshakri ia ki briew da ka jingtrei shitom. U la ong ba ym dei tang u Modi marwei uba pyniaid ia ka Sorkar hynrei ki dei da ki hajar tylli ki khlieh kiba iatreilang ban bah ia ki jingbahkhlieh bad namar kane, ki dei ki briew jong ka ri kiba sakhi ia ki jingseisoh.

U Modi u la ong ba ki dkhot jong ka kynhun jong u kim ju duna ka por, kim duna ka bor pyrkhat lane ha kano kano ka jingthew ia ka jingtrei shitom. “Baroh kawei ka ri ka don ka jingshaniah ha kane ka kynhun,” la ong u Myntri Rangbah Duh.

U Myntri Rangbah Duh u la ai jingsngewnguh ruh ia kito kiba la long dkhot jong ka kynhun jong u bad u la kyntu ia kito kiba kwah ban iasoh ha ka jingiaid lynti sha ka Viksit Bharat ha kine ki 5 snem ban wan ba kin trei shitom ha ka jingtei ia ka ri. “Ha ka jingiatreilang, ngin pynurlong ia ka thong ‘Ka Ri Hashuwa’ da ka jingthmu Viksit Bharat 2047,” la ong u Myntri Rangbah Duh. U la ong ruh ba baroh ka por ba u don ka dei na ka bynta ka ri.

U Myntri Rangbah Duh u la batai ba ka jingthrang bad ka jingryntih ki kam ka wanrah ia ka jingkut jingmut bad ba ka jingurlong ka wan haba ka jingkut  jingmut ka iaid lang bad ka jingtrei shitom. U la ong ruh ba haba ka jingthrang jong u briew kam kylla, ka kylla sha ka jingkut jingmut katba ka jingthrang ba kylla na ka por sha ka por ka dei tang ka jingsngew ba shipor.

U Myntri Rangbah Duh u la ong ba u kwah ban rah ia ka ri sha ki kliar ba thymmai bad u la kyntu ia ka kynhun jong u ba kin trei kham bha ha kine ki por ban wan ban ia kaba la dep leh ha kine ki 10 snem ba la dep. “Ngi dei ban rah ia ka ri sha ki kliar ba kiwei kiwei ki ri kim pat ju poi,” la ong u Myntri Rangbah Duh.

U Modi u la ong ba kaba donkam ban poi sha ka jingjop ka dei ka jingshai ka jingmut, ka jingngeit kaba skhem bad ka mynsiem ba shlur ban leh ia kaba hap ban leh. “Lada ngi don kine lai tylli ki jinglong, nga tip ba kan ym don ka jingshah rem,” u la bynrap.

U Myntri Rangbah Duh u la iaroh ia ki nongtrei Sorkar India kiba la trei shitom na ka bynta kawei ka thong bad u la ong ba ki dei ban ioh ia ki jingiaroh na ka bynta ki jingjop ka Sorkar. “Kane ka elekshon ka la pyni ia ka jingsngewhun ia ki jingpyrshang jong ki nongtrei Sorkar,” la ong u Myntri Rangbah Duh Modi. U la kyntu ia ka kynhun ba kan wanrah ia ki jingmut jingpyrkhat ba thymmai bad pyniar ia ki kam ba dang trei. U Myntri Rangbah Duh u la pynkut da kaba batai shaphang ka daw jong ka jingioh bor jong u bad u la ong ba u briew uba kiew shaphrang u dei uta uba beh ia ka jingnang jingstad.

***