ঙসি ভারতনা পুৱারি অমা শেমখ্রে। এপ্রিল ১৯দা অহানবা তাঙ্কক্কী ভোৎ থাদবা হৌখি অমসুং তাঙ্কক ৭ থোক্নবা চৎথদুনা ঙসি সাধারন মীখল ২০২৪গী ভোৎ থাদবা লোইশিনখ্রে। ১৮শুবা লোক সভা শেম্নবগীদমক ভারতকী ভোত্তরশিংনা মখোয়গী ভোৎ থাদবগী হকশিং শীজিন্নখি। মখোয়গী লাইনিং,  কাংলুপ-ফুরুপ, শেন-থুম অমসুং লাইরিক-লাইশুগী ফিবমগী খেন্নবা লৈতনা ভারতকী ভোত্তরশিংনা অমুক হন্না ভোৎ থাদখি। তশেংনা মাইপাকপা অসি ভারতকী ভোত্তরশিংনি।

সি.ই.সি শ্রী রজিব কুমারগা লোয়ননা ই.সিশিং শ্রী গ্যানেস কুমার অমসুং দোক্তর সুখবির সিংহ সন্ধু অমসুং ই.সি.আইগী ইমুং-মনুংনা শিংনবা কয়া মায়োক্নদুনা পোল্লিং স্তেসনশিংদা লাক্তুনা ভোৎ থাদখিবা ভোত্তরশিং থাগৎপা ফোঙদোকখি। কম্মিসন্না থম্মোয় শেনবা ভোত্তর খুদিংমক থাগৎলি। মখোয়না থৱায় য়াওনা শরুক য়াদুনা, ভোত্তরশিংনা ভারতকী সংবিধান শেম্লম্বশিংগী থাজবা অমুক হেনগৎহল্লে। গনতন্ত্রগী থবক অসিদা মীয়াম হুপ্না শরুক য়াবা অসিনা ভারতকী গনতন্ত্রগী চৎন-লোনচৎশিং অমসুং থৌনা অদু অমুক হন্না মপাঙ্গল হাপ্লে।

লৈবাক শীনবা থুংনা ভোত্তরশিং শান্তি ওইনা অমসুং হরাও-তয়াম্না  ভোৎ থাদবা য়ানবা ফিবম শেমখিবগীদমক ই.সি.আইনা সেকুরিতি ফোর্সশিং য়াওনা মীখলগী থবক তৌখিবা ওফিসিএলশিং থাগৎপা ফোঙদোকচরি। মখোয়না নোংজু-নুংশা, লম্বী-থোংগী অৱাবা, লো অমসুং ওর্দরগী ফিবম কয়া মায়োক্নখি।

ভারতকী মীখলশিংগী মরুওইবা শরুক অমা ওইরিবা রাজনিতি দলশিং অমসুং মীরেপশিংশু কম্মিসন্না থাগৎপা ফোঙদোক্লি। মখোয়না লৌখিবা থৌদাংগীদমক কম্মিসন্না প্রিন্ত, ইলেক্ত্রোনিক অমসুং দিজিতেল মেদিয়া থাগৎপা ফোঙদোক্লি। নিয়ম চুম্নবা মীখলশিং পাংথোকপদা মেদিয়া অসি মরুপ অমনি হায়না মতম পুম্নমক্তা কম্মিসন্না খল্লি।

চহি ১০০ শুরবা অহলশিং, হকচাংগী ফিবম মীমান্নদ্রবশিং অমসুং ত্রান্সজেন্দরশিংনা ভোৎ থাদবগী মরুওইবা অসিনা গনতন্ত্র মাঙলোমদা পুখৎলক্নবা মীওই কয়া মরুওইনা নহারোলশিংদা ইনোৎ পীরে। ভারতকী তুংগী মীরোলশিংগী ভোত্তরশিংনা মীখলগী থবকশিংদা হেন্না শরুক য়াগনি হায়না ই.সি.আইনা থাজবা থম্লি।

ভারতকী গনতন্ত্র মপাঙ্গল কনখৎহন্নবা ভোত্তরশিং, রাজনিতি দলশিং, মীরেপশিং, মীখলগী ওফিসিএলশিং অমসুং সেকুরিতি ফোর্সশিংনা মীখল মনুংদা পাংথোকখিবা থবকশিংগীদমক ইকায়খুম্নবা উৎচরি অমসুং থাগৎচরি। গনতন্ত্রগী কাংখোঙ উংহল্লিবা ঐখোয় মীয়ামগী অপুনবা থবকশিং থাগৎপা ফোঙদোকচরি।

***