জেনেভাদা পাংথোকপা ৭৭শুবা ৱার্ল্দ হেল্থ এসেমব্লিদা ভারতনা য়ুম্বু ওইদুনা নোরৱে, য়ুনিসেফ অমসুং পি.এম.এন.ঐচগা খুৎশম্নদুনা নুপীশিং, অঙাংশিং অমসুং ইনখৎলক্লবশিংগী হকশেলগী তোখায়বা থৌরম পাংথোকখ্রে। থৌরম অসিগী মরুওইবা পান্দমদি চাবোকপী, পোকপতা ঙাইরিবা অঙাং, অঙাং অমসুং ইনখৎলক্লিবশিংগী হকশেল অমসুং নুংঙাই-য়াইফনবগী লমদা শেন থাদনবা খন্ন-নৈনবা অমসুং অনৌবা পুথোকপা থবকশিং খন্নবনি। তোঙান-তোঙানবা মীওই কাংলুপশিংগী দরকার ওইবশিং ফংহনবা ঙম্নবা মখা তানা শেন থাদবা হেনগৎহনবা, থৌশিলশিং শেমদোক-শেমজিনা তৌনবা তকশিন্নবা থৌরম অসিনা পান্দম থমখি।

ইনখৎলক্লিবা মীওই কাংলুপকী হকশেলদা থৌরম অসিনা মীৎয়েং থমখি অমসুং হিরম অসিদা শেন হেন্না থাদবগী তঙাইফদবা য়াওনা ইনখৎলক্লিবশিংগী হকশিংগী তোঙান-তোঙানবা হিরমশিংদা ৱা ঙাংখি। য়ুনিয়ন হেল্থ সেক্রেতরি  শ্রী অপুর্বা চন্দ্র অমসুং ভারতকী মীহুৎকাংবুগী লুচিংবা অসিনা হিরম অসিগী মতাংদা থবক কয়া পায়খৎপগী মতাংদা ফোঙদোকখি।

মহাক্না হায়খি নুপীশিং, অঙাংশিং অমসুং ইনখৎলক্লবশিংগী হকশেল অমসুং নুংঙাইনা হিংনবা ভারতনা থবক কয়া মপুংফানা পায়খৎলে। ভারতকী রিপ্রদকতিপ এন্দ চাইল্দ হেল্থ-১ অমসুং রিপ্রদকতিপ এন্দ চাইল্দ হেল্থ-২গী থবকশিং অমসুং ইনখৎলক্লবশিংগী হকশেলগীদমক পায়খৎলিবা রাস্ত্রিয়া কিশোর শ্বাস্থ্যা করয়াক্রমগী মতাংদা মহাক্না ফোঙদোকখি।

ইনখৎলক্লিবা চহি কাংলুপকী মীওইশিংদা খঙহন্নবা ই-পাউগী চুনবা পাম্বৈশিং শীজিন্নবগী তঙাইফদবা অদু ভারতনা থমখি। থৌরম অমদা থৌরাং তৌবা অমসুং থবক ওইনা পাংথোকপা মতমদা নহারোলশিং মরুওইবা মরীলৈনবা কাংলুপ অমা ওইহন্নবগী মতাংদা খন্নখি।  

থৌরম অদুদা য়ুনিয়ন হেল্থ মিনিস্ত্রিগী এদিসনেল হেল্থ সেক্রেতরি হেকালি জিমোমি, য়ুনিয়ন হেল্থ মিনিস্ত্রিগী এদিসেনেল সেক্রেতরি অমসুং মেনেজিং দিরেক্তর(এন ঐচ এম) অরাধানা পাতনাইক অমসুং য়ুনিয়ন হেল্থ মিনিস্ত্রিগী অতোপ্পা সেনিয়র ওফিসিএলশিং শরুক য়াখি।

*****