ঙসি জেনেভাদা পাংথোকপা ৭৭শুবা ৱার্ল্দ হেল্থ এসেমব্লিগী নাকলদা ব্রিক্স হেল্থ মিনিস্তরশিংগী মীফমদা য়ুনিয়ন হেল্থ সেক্রেতরি শ্রী অপুরবা চান্দ্রনা ৱা ঙাংখ্রে।

মীফম অদুদা ৱা ঙাংবদা য়ুনিয়ন হেল্থ সেক্রেতরিনা হায়খি ব্রিক্সকী হকশেলগী থবকশিংনা থৱায় য়াওনা শরুক য়ারিবা, ব্রিক্স লৈবাকশিং শীনবা থুংনা হকশেলগী থবকশিং মপাঙ্গল কনখৎহন্নবা পান্দমদা অপুনবা হকশেলগী পান্দমশিং ফংনবা পুন্না থবক তৌমিন্নবা পুক্নিং থৌগৎপা, মালেমগী হকশেলগী অরুবা ৱাফমশিং থেংননবা পায়খৎলিবা থবকশিংদা ভারতনা হোৎনরিবশিং উৎলে। মালেমগী হকশেলগী চৎন-কাংলোন মতুংইন্না পাক-শন্না শন্দোপা লৌনগনবা লায়নাশিং মাংজৌননা ঙাকথোক্নবা ব্রিক্সকী অপুনবা চেকশিনৱা লাউথোক্নবা হৌরাং অমা লৈহনবগী তঙাইফদবা অদু ভারনা প্রসিদেন্ত ওইরিঙৈদা পুথোকখ্রে অমসুং লায়না থিজিনবগী মতাংদা অমতা ওইবা হকশেলগী থবকশিংদা মীৎয়েং থম্লি।

য়ুনিয়ন হেল্থ সেক্রেতরিনা হায়খি ভারতনা প্রসিদেন্ত ওইরিঙৈদা ব্রিক্স ভেক্সিন রিছার্স এন্দ দিবলপমেন্ত সেন্তর ভর্চুএল ওইনা হৌদোকখ্রে অমসুং আই.সি.এম.আর-এন.আই.ভি অসি ভেক্সিন অমসুং আর অমসুং দিগী থবকশিংগী ব্রিক্সকী কোওর্দিনেতিং এজেন্সি ওইনা হাপ্লে। রিকম্বিনেন্ত দেঙ্গু ভেক্সিনগী অহুমশুবা তাঙ্কক্কী ক্লিনিকেল চাংয়েংশিংগীদমক আই.সি.এম.আরনা এন.আই.ভি অমসুং অতোপ্পা ইন্সতিতুৎশিংগা থবক তৌমিন্নরি। মসিগী মথক্তা লমদম অসিগী লায়নাশিং হায়বদি ক্যাসান্সুর ফোরেস্ত দিজিজ(কে এফ দি), নিপা ভাইরস, হুমেন পাপিল্লোমাভাইরস, মাইকোবেক্তেরিয়ম তুবরকুলোসিস ভেক্সিন অমসুং ইনফ্লুয়েঞ্জাগী রিছার্স অমসুং চাংয়েংশিং আই.সি.এম.আর অমসুং অতোপ্পা চৎমিন্নরিবশিংগা লোয়ননা পাংথোক্লি।

মহাক্না হায়খি ব্রিক্স লৈবাকশিংগী হকশেল অমসুং নুংঙাই-য়াইফবদা মালেমগী শিংনবা অমা ওইরিবা  এন্তিমাইক্রোবিএল রেজিসতেন্সগী মতাংদা ব্রিক্সকী মীফম পাংথোক্কদৌরবা অসিদা ভারতনা মপুংফানা শরুক য়াগনি। ২০১৭দা হৌদোকখিবা এ.এম.আরগী ভারতকী নেসনেল এক্সন প্লান্না সেক্তর খুদিংমক পুন্না থবক তৌমিন্নবা অমসুং ৱান হেল্থগী থৌরাংদা মীৎয়েং চঙলি অমসুং মসিগী পান্দম অসি দব্লিউ.ঐচ.ওগী গ্লোবেল এক্সন প্লানগা মান্নরি। এ.এম.আর অসি মালেমগী শিংনবা অমনি হায়বা ভারতনা খঙই অমসুং দেতা নৈনবা, লেবোরেতোরি ক্বালিতি কন্ত্রোল, ইপিদিমিওলোজিকেল এসেসমেন্ত অমসুং ত্রেনিংগুম্বা থবকশিংগী খুৎথাংদা এ.এম.আর থেংননবা চৎন-কাংলোনশিং চৎহন্নবা, প্রোজেকশিং অমসুং প্লেতফোর্মশিংগী মতাংদা ব্রিক্স লৈবাকশিংগী মরক্তা মতেং পাংনবা হেনগৎহন্নবা তকশিল্লি।

শ্রী অপুরবা চন্দ্রনা হায়খি রেদিও-ফার্মাসিউতিকেল সপ্লাই চেন মপাঙ্গল কনখৎহন্নবা অমসুং আইসোতোপস পুথোকপা হেনগৎহন্নবা মীৎয়েং চঙবগা লোয়ননা অৱাংবা থাক্কী দিজিতেলগী পাম্বৈশিং চাউখৎহনবা অমসুং ললোন-ইতিক্কী থবক হেনগৎহন্নবা লোয়ননা ব্রিক্স লৈবাকশিং মনুংদা নিউক্লিয়ার মেদিসিন অমসুং রেদিও-ফার্মাসিউতিকেল সাইন্সকী মতেং পাংনবগী মরুওইবা অদু ভারতনা খঙলে।

তোঙান-তোঙানবা হকশেলগী খুদোংচাদবশিং কোকহন্নবা মতেং পাংনবা অমসুং পুন্না থবক তৌমিন্নবা হেনগৎহন্নবা মেম্বর লৈবাকশিংদা তকশিল্লদুনা মহাক্কী ৱারোল লোইশিনখি।

মীফম অদুদা য়ুনিয়ন হেল্থ মিনিস্ত্রিগী এদিসনেল হেল্থ সেক্রেতরি হেকালি জিমোমি, য়ুনিয়ন হেল্থ মিনিস্ত্রিগী এদিসেনেল সেক্রেতরি অমসুং মেনেজিং দিরেক্তর(এন ঐচ এম) অরাধানা পাতনাইক অমসুং য়ুনিয়ন হেল্থ মিনিস্ত্রিগী অতোপ্পা সেনিয়র ওফিসিএলশিং শরুক য়াখি।

****