"সনফ্লাৱরস ৱেয়র দি ফর্স ৱান্স তু নো", কোর্স লোইরকপগী ফিল্ম অমসুং তেলিভিজন ইন্সতিত্যুত ওব ইন্দিয়া এফ.তি.আই.আই. গী মহৈরোই অমা ওইরিবা চিদানন্দ নাইককী ফিল্ম অসিনা ফ্রান্সকী ৭৭শুবা কান্স ফিল্ম ফেস্তিবেলগী কান্স' লা সিনেফ এৱার্দ ফোর বেস্ত শোর্তকী মনা ফংখ্রে। মায় পাকপা অসি মে ২৩, ২০২৪দা মহৈরোই ওইরিবা দিরেক্তর শ্রী চিদানন্দ নাইকনা মনা অসি ফংখিবা ফেস্তিবেল অসিদা ওফিসিএল ওইনা লাউথোকখি।

ফিল্ম অসি চিদানন্দ এস নাইকনা দিরেক্ত তৌখি, সুরজ থাকুরনা নমখি, মনোজ ভিনা ইদিত তৌখি অমসুং অভিশেক কদম্না সাউন্দ পীখি।

মসি ভারতকী সিনেমাগীদমক্তদি পুৱারীদা লৈহৌরগদবা মীকুপ অমনি। ভারতকী ফিল্মশিংনা অন্তর্জাতিগী থাক্তা মনা কয়া ফংলক্লি, মরুওইনা এফ.তি.আই.আই.না কান্সতা মখোয়গী মহৈরোইশিংগী ফিল্মশিংবু হৌখিবা চহি খরা অসিদা কাপ্লদুনা মশক থোক্না মফম কল্লক্লি। হৌজিক শকখঙবীরিবা অসিসু ৭৩শুবা কান্সতা এফ.তি.আই.আই. মহৈরোই অমগী ফিল্ম 'কেতদোগ'না মনা অমা লৌখ্রবা মতুং চহি মরিগী মতুংদনি। এফ.তি.আই.আই. এলুম্নি হায়বদি পায়ল কপাদিয়া, মাইসম অলি, সন্তোশ সিভন, চিদানন্দ এস নাইক অমসুং মহাক্কী কাংবুনা হন্দক্কী চহিগী কান্স অসিদা শকখঙবীখি।

"সনফ্লাৱরস ৱেয়র দি ফর্স ৱান্স তু নো" অসি খুঙ্গংগী অমগী য়েনবা অমা হুরাল্লুবী অহল ওইরবী নুপী অমগী ৱারী অমনি, মসিনা খুন্নাই অদুবু অৱাবদা তাহনখি। য়েনবা অদুবু অমুক হন্না পুরক্নবগীদমক, লাই ৱায়েল অমা পুরক্লদুনা অহল ওইরবী নুপীদুগী ইমুং মনুংবু লোই থারম্মি।

হায়রিবা এফ.তি.আই.আই. ফিল্ম অসি তিভি ৱিংসকী চহি অমগী প্রোগ্রাম অমনি, মসিদা তোঙান-তোঙানবা দিসিপ্লিন্দগী হায়বদি দিরেক্সন, ইলেক্ত্রোনিক সিনেমাতোগ্রাফী, ইদিতিং, সাউন্দগী মহৈরোই মরিনা অমত্তা ওইনা চহি লোইরকপগী অপুনবা এক্সর্সাইস অমা ওইনা প্রোজেক্ত অমদা হোৎনমিন্নখি। ফিল্ম অসি চিদানন্দ এস নাইকনা দিরেক্ত তৌখি, সুরজ থাকুরনা নমখি, মনোজ ভিনা ইদিত তৌখি অমসুং অভিশেক কদম্না সাউন্দ পীখি। হায়রিবা মহৈরোইশিং অসিনা ফিল্ম অসিদা মখোয়গী চহি লোইবগী পুনবা এক্সর্সাইসকী শরুক অমা ওইনা হোৎনখি অমসুং এফ.তি.আই.আই.দগী ২০২৩দা পাস আউত তৌখি।

মসিনা এফ.তি.আই.আই.গী চহি অমগী তেলিভিজন কোর্সতা য়াওবা মহৈরোই অমগী ফিল্ম অমবু খনবীদুনা কান্স ফিল্ম ফেস্তিভেলগুম্বা মমল লৈরবা মফম অমদা মায় পাকপা ঙম্বা অহানবনি।

২০২২দা এফ.তি.আই.আই.দা চঙদ্রিঙৈদা, চিদানন্দ এস নাইকপু ৭৫ ক্রিএতিব মাইন্স অমা ওইনা ৫৩শুবা ইন্তর্নেসনেল ফিল্ম ফেস্তিবেল ওব ইন্দিয়া (আই.এফ.এফ.আই.)দা খনখি, মসি আই. বি. মন্ত্রালয়গী সিনেমাগী লমদা নৌরিবা আর্তিস্তশিংবু শৌগৎনবা অমসুং শকখঙবীনবা হোৎনরিবা থৌরাং অমনি।

শ্রী আর মাধবন, এফ.তি.আই.আই.গী প্রেজিদেন্তনা ফিল্ম অসিগী মহৈরোই পুম্ববু হরাওবা ফোংদোকখি। মহাক্না হায়খি, "শ্রী চিদানন্দ নাইক অমসুং "সনফ্লাৱরস ৱেয়র দি ফর্স ৱান্স তু নো"গী অপুবা কাংবুগী মফমদা অসিগুম্বা মমল লৈরবা ইকাইখুম্নবা অসিগীগদমক হরাওবা ফোঙদোকচরি। তুংদা লাক্কদবা নুংশিবা অমসুং অখন্নবা খোঙচৎকী হৌরকফম অমা মসিনা পুরকপা ওইরসনু। মসিগী মথক্তা, এফ.তি.আই.আই.গী স্তাফ অমসুং এদমিনিস্ত্রেসনগী মইফমদা অসিগুম্বা মালেমগী থাক্তা লৈবা হৈশিংবা পুথোকপীরকপগীদমক থাগৎপা অমসুং ইকাইখুম্নবা উৎচরি।"

'লা সিনেফ' অসি ফেস্তিবেল অসিগী ওফিসিএল সেক্সন অমনি, মসিনা অনৌবা তেলেন্তশিংবু খঙদোক্নবা অমসুং মালেম পুম্বদা লৈরিবা ফিল্ম স্কুলশিংদগী ফিল্মশিং শকখঙবীনবা হোৎনরি। ফিল্ম অসি মালেমগী ফিল্ম স্কুল ৫৫৫তগী থাজিল্লকখিবা অপুনবা ফিল্ম ২২৬৩ গী মনুংদগী খনগৎপা শোর্ত ১৮ (লাইব এক্সন ১৪ অমসুং এনিমেতেদ ৪)গী মনুংদা অমনি।

এফ.তি.আই.আই.গী অখন্নবা পেদাগোজি অমসুং প্রেক্তিসতা য়ুম্ফম ওইবা সিনেমা অমসুং তেলিভিজনগী এজুকেসনদা কো লর্নিংদা মীৎয়েং থম্বনা ইন্সতিত্যুৎ অসিগী মহৈরোইশিং অমসুং এলুম্নিশিংনা তোঙান-তোঙানবা নেসনেল অমসুং ইন্তর্নেসনেল ফিল্ম ফেস্তিভেলশিংদা চহি খরা অসিদা মনা কয়া ফংলক্লিবনি। অসিগুম্বা অৱাংবা থাক্কী মনা অসি ফংলকপা অসি ভারতকী সিনেমাগী ওইনদি পুৱারীদা লৈহৌরগদবা থৌদক অমনি। ফিল্ম অমসুং তেলিভিওন ইন্সতিত্যুৎ ওব ইন্দিয়ানা মালেমগী খ্বাইদগী ফরবা ফিল্ম স্কুলশিংগী মনুংদা অমা ওইনা লংনা লেপ্লি অমসুং ভারতপু ঙসি চাউথোকপা পোকহনবীরি।  

***