ന്യൂ ഡൽഹി: മെയ് 8, 2024

പതിനാറാം ധനകാര്യ കമ്മീഷൻ (XVIFC) താഴെ വ്യക്തമാക്കിയിട്ടുള്ള റഫറൻസ് നിബന്ധനകളെക്കുറിച്ചും XVIFC സ്വീകരിച്ചേക്കാവുന്ന പൊതുവായ സമീപനത്തെക്കുറിച്ചും പൊതുജനങ്ങളിൽ നിന്നും താൽപ്പര്യമുള്ള സംഘടനകളിൽ നിന്നും വ്യക്തികളിൽ നിന്നും നിർദ്ദേശങ്ങൾ/അഭിപ്രായങ്ങൾ ക്ഷണിക്കുന്നു. XVIFC യുടെ പ്രവർത്തനവുമായി ബന്ധപ്പെട്ട മറ്റേതെങ്കിലും വിഷയത്തിലും അഭിപ്രായങ്ങൾ ക്ഷണിക്കുന്നു.

നിർദ്ദേശങ്ങൾ 16-ാം ധനകാര്യ കമ്മീഷൻ്റെ വെബ്സൈറ്റ് (https://fincomindia.nic.in/portal/feedback) വഴി ‘Call for Suggestions’ എന്ന വിഭാഗത്തിന് കീഴിൽ സമർപ്പിക്കാവുന്നതാണ്.

2023 ഡിസംബർ 31-ലെ വിജ്ഞാപന പ്രകാരം, ഡോ. അരവിന്ദ് പനഗരിയയുടെ അധ്യക്ഷതയിൽ പതിനാറാം ധനകാര്യ കമ്മീഷൻ, ഇന്ത്യൻ ഭരണഘടനയുടെ വ്യവസ്ഥകൾ പാലിച്ച് രാഷ്ട്രപതി രൂപീകരിച്ചു. ഇനിപ്പറയുന്ന കാര്യങ്ങളിൽ 2026 ഏപ്രിൽ 01 മുതൽ ആരംഭിക്കുന്ന അഞ്ച് വർഷത്തെ കാലയളവിലേക്ക് XVIFC ശുപാർശകൾ നൽകേണ്ടതാണ്:
 
i. ഭരണഘടനയുടെ അദ്ധ്യായം I, ഭാഗം XII പ്രകാരം യൂണിയനും സംസ്ഥാനങ്ങളും തമ്മിലുള്ള നികുതികളുടെ അറ്റവരുമാനത്തിൻ്റെ വിതരണവും അത്തരം വരുമാനത്തിൻ്റെ അതാത് ഓഹരികളുടെ സംസ്ഥാനങ്ങൾ തമ്മിലുള്ള വിഹിതവും;

ii. ഭരണഘടനയുടെ അനുഛേദം 275 പ്രകാരം കൺസോളിഡേറ്റഡ് ഫണ്ടിൽ നിന്നുള്ള സംസ്ഥാനങ്ങളുടെ വരുമാനത്തിൻ്റെ ഗ്രാൻ്റ്-ഇൻ-എയ്ഡും, അവരുടെ വരുമാനത്തിൽ നിന്ന് ഗ്രാൻ്റ്-ഇൻ-എയ്ഡ് വഴി സംസ്ഥാനങ്ങൾക്ക് നൽകേണ്ട തുകയും നിയന്ത്രിക്കേണ്ട തത്വങ്ങൾ - അനുഛേദം 275 ക്ലോസ് (1) ലെ വ്യവസ്ഥകളിൽ വ്യക്തമാക്കിയിട്ടുള്ളതല്ലാതെ മറ്റ് ആവശ്യങ്ങൾക്കായി;

iii. സംസ്ഥാന ധനകാര്യ കമ്മീഷൻ നൽകിയ ശുപാർശകളുടെ അടിസ്ഥാനത്തിൽ പഞ്ചായത്തുകളുടെയും മുനിസിപ്പാലിറ്റികളുടെയും വിഭവങ്ങൾ കൂട്ടുന്നതിന് ഒരു സംസ്ഥാനത്തിൻ്റെ കൺസോളിഡേറ്റഡ് ഫണ്ട് വർദ്ധിപ്പിക്കുന്നതിന് ആവശ്യമായ നടപടികൾ.
 
2005-ലെ ഡിസാസ്റ്റർ മാനേജ്‌മെൻ്റ് നിയമം (2005-ലെ 53) പ്രകാരം രൂപീകരിച്ച ഫണ്ടുകളെ പരാമർശിച്ച്, ദുരന്ത നിവാരണ സംരംഭങ്ങൾക്ക് ധനസഹായം നൽകുന്നതിനുള്ള നിലവിലെ ക്രമീകരണങ്ങൾ അവലോകനം ചെയ്യാനും ഉചിതമായ ശുപാർശകൾ നൽകാനും XVIFC നിർബന്ധിതമാണ്.