હોમિયોપેથીની વિશ્વવ્યાપી અસરકારકતા અને સ્વીકૃતિ વધારવા માટે વૈશ્વિક સહયોગ માટેના આહ્વાન સાથે હોમિયોપેથી સિમ્પોઝિયમનું આજે નવી દિલ્હી ખાતે સમાપન થયું હતું. આ બે દિવસીય સમારંભમાં ભારતનાં રાષ્ટ્રપતિ શ્રીમતી દ્રોપદી મુર્મૂ અને હોમિયોપેથી અને આયુષનાં ક્ષેત્રમાં સાત પદ્મ પુરસ્કાર વિજેતાઓ ઉપસ્થિત રહ્યાં હતાં. હોમિયોપેથી સિમ્પોઝિયમમાં 6,000થી વધુ સહભાગીઓ, ડૉક્ટરો, વૈજ્ઞાનિકો, સંશોધકો, શિક્ષણવિદો, વિદ્યાર્થીઓ અને અધ્યાપકો એક જ છત હેઠળ ઉપસ્થિત રહ્યા હતા, જેઓ હોમિયોપેથીના હેતુ માટે અર્થપૂર્ણ આદાનપ્રદાન ધરાવતા હતા. ઇવેન્ટની થીમને અનુરૂપ, "એમ્પાવરિંગ રિસર્ચ, એન્હાન્સિંગ પ્રોફિસિયન્સી ઇવેન્ટમાં હોમિયોપેથિક રિસર્ચ, ક્લિનિકલ પ્રેક્ટિસ અને માર્કેટ ઇન્સાઇટ્સ પર વિચાર-વિમર્શ કરવામાં આવ્યો હતો.

બીજા દિવસે રાષ્ટ્રીય હોમિયોપેથી આયોગના અધ્યક્ષ ડો. અનિલ ખુરાનાએ જણાવ્યું હતું કે, "ભારતમાં વિશ્વ હોમિયોપેથી દિવસની ઉજવણી એ તબીબી અનુભવો વહેંચવાની અને હોમિયોપેથીના વિકાસ માટે નીતિગત મુદ્દાઓ પર ચર્ચા કરવાની તક છે. સમય જતાં, સરકારી સમર્થનને કારણે, હોમિયોપેથીએ એક વિશાળ આંતરમાળખાનો વિકાસ કર્યો છે, અને ભારત આ ચિકિત્સા પદ્ધતિમાં વૈશ્વિક નેતા બની ગયું છે. અમારું માનવું છે કે જાહેર લાભમાં રૂપાંતરિત કરવા માટે પુરાવા-આધારિત સંશોધન હોમિયોપેથીની દૃશ્યતામાં વધુ વધારો કરશે."

વિવિધ સત્રો દરમિયાન, જાણીતા હોમિયોપેથી પ્રેક્ટિશનરોએ હોમિયોપેથી સાથેના મુશ્કેલ કિસ્સાઓના સંચાલન માટે તેમના અનુભવો શેર કર્યા હતા. પશુચિકિત્સકો દ્વારા પ્રાણીઓના કેસોમાં હોમિયોપેથીના સકારાત્મક પરિણામો પણ દર્શાવવામાં આવ્યા હતા. સંશોધનકારો અને વૈજ્ઞાનિકોએ તેમના દ્વારા હાથ ધરવામાં આવેલા મુખ્ય સંશોધન પ્રવૃત્તિઓના તારણો શેર કર્યા. તેમાં ટ્રાન્સલેશનલ રિસર્ચ, શિક્ષણ ક્ષેત્રમાં સુધારા, હોમિયોપેથીમાં વૈશ્વિક પરિપ્રેક્ષ્ય, હોમિયોપેથી દવાઓમાં ગુણવત્તાની ખાતરી અને આંતરશાખાકીય સંશોધન પર પેનલ ડિસ્કશન કરવામાં આવ્યા હતા. આ ચર્ચાઓએ નિષ્ણાતો, સંશોધકો, ઔદ્યોગિક પ્રતિનિધિઓ, વ્યાવસાયિક સંગઠનો અને અન્ય હિતધારકો વચ્ચે ફળદાયી સંવાદને પ્રોત્સાહન આપ્યું હતું, તેમના અનુભવો અને પડકારો વહેંચ્યા હતા તથા આ પડકારોને પહોંચી વળવા માટે જરૂરી પ્રયાસોની ચર્ચા કરી હતી. આ ચર્ચા વિચારણાને કારણે આ ક્ષેત્રોમાં સકારાત્મક પરિવર્તન લાવવા માટેના વ્યૂહરચનાના અભિગમો પર રચનાત્મક ભલામણો કરવામાં આવી.

ઇવેન્ટ દરમિયાન ઉપસ્થિત આંતરરાષ્ટ્રીય નિષ્ણાતોએ હોમિયોપેથીક સંશોધન અને પ્રેક્ટિસના ક્ષેત્રમાં તેમના અનુભવો શેર કર્યા હતા. કાઉન્સિલના વૈજ્ઞાનિકો દ્વારા ક્લિનિકલ સંશોધનના તારણોનું વર્ણન કરવામાં આવ્યું હતું, અને ચિકિત્સકોની સફળતાની વાર્તાઓએ પ્રેક્ષકોને તેમની પોતાની પ્રેક્ટિસમાં નવી વિદ્યાઓને લાગુ કરવા માટે પ્રોત્સાહિત કર્યા હતા. આ કાર્યક્રમ દરમિયાન વિદ્યાર્થીઓને એસટીએસએચ/એમડી શિષ્યવૃત્તિ પણ એનાયત કરવામાં આવી હતી.

સમાપન સત્ર દરમિયાન, મહાનુભાવોએ હોમિયોપેથિક બિરાદરો વચ્ચે એકતા વ્યક્ત કરી હતી અને પોતપોતાના ક્ષેત્રોમાં હાથ ધરવામાં આવનાર મહત્વના મુદ્દાઓ અને કાર્યોની વહેંચણી કરી હતી. બ્યુરો ઓફ ઇન્ડિયન સ્ટાન્ડર્ડ્સ (બીઆઇએસ)ના હોમિયોપેથિક સેક્શનલ કમિટીના ચેરપર્સન અને સીસીઆરએચના ભૂતપૂર્વ ડીજી ડો. રાજ કે. મનચંદાએ આયોજકોના પ્રયાસોની પ્રશંસા કરતાં કહ્યું હતું કે, "આ પરિસંવાદમાં નિર્ણાયક પાસાંઓને આવરી લેવામાં આવ્યા છેઃ નિયમનકારી આંતરદૃષ્ટિ, ધોરણો, નિકાસ અને સરકારી સમર્થન. પ્રથમ, સેવાઓની ગુણવત્તાની ખાતરી કરવી, જેમાં એનએબીએચ સાથે હોમિયોપેથીક શાળાઓ અને હોસ્પિટલોને પ્રમાણિત અને માન્યતા આપવાનો સમાવેશ થાય છે. બીજું, હોમિયોપેથીક ઔષધીય ઉત્પાદનોની ગુણવત્તા જાળવવા માટે ઉચ્ચ ગુણવત્તાવાળા કાચા માલના સોર્સિંગને ધ્યાનમાં લેવાની અને વધારાના ગુણવત્તાના માપદંડો અપનાવવાની જરૂર છે. હોમિયોપેથીમાં નવીનતાઓ અને નવા વિકાસની પણ શોધ કરવામાં આવી હતી."

આ પરિસંવાદનું સફળતાપૂર્વક સમાપન સત્ર સાથે સંપન્ન થયું હતું, જેમાં ઘણી જાણીતી હસ્તીઓએ હાજરી આપી હતી, જેમણે હોમિયોપેથીના ક્ષેત્રને આગળ ધપાવવાની પ્રતિબદ્ધતાનું પુનરાવર્તન કર્યું હતું. આ ઈવેન્ટમાં વિશ્વભરમાં હોમિયોપેથીની અસરકારકતા અને સ્વીકૃતિ વધારવા માટે સતત સંશોધન, ગુણવત્તાયુક્ત શિક્ષણ અને વૈશ્વિક સહયોગના મહત્વ પર ભાર મૂકવામાં આવ્યો હતો. આ કાર્યક્રમની સફળતાપૂર્વક પૂર્ણાહૂતિએ માત્ર આ ક્ષેત્રમાં થયેલી પ્રગતિને જ ઉજાગર કરી ન હતી, પરંતુ હોમિયોપેથીને હેલ્થકેરના મહત્વપૂર્ણ ભાગ તરીકે પ્રોત્સાહિત કરવાના ભવિષ્યના પ્રયાસો માટેનો માર્ગ પણ મોકળો કર્યો હતો. આ કાર્યક્રમનું સમાપન પ્રખ્યાત કલાકારોની પ્રસ્તુતીની સાથે એક સાંસ્કૃતિક સંધ્યા સાથે થઈ હતી. 
 

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com