جیسے جیسے گرمیوں کے مہینوں میں درجہ حرارت بڑھتا ہے، ہسپتالوں میں  آگ ایک اہم خطرہ بن جاتی ہے۔ اس کو روکنے کے لیے، مرکزی وزارت صحت اور نیشنل ڈیزاسٹر مینجمنٹ اتھارٹی (این ڈی ایم اے) نے تمام تر ریاستوں/ مرکز کے زیر انتظام علاقوں کو ایک مشترکہ ایڈوائزری جاری کی ہے جس میں اس طرح کے تباہ کن واقعات کو روکنے کے لیے فعال اقدامات کی بنیادی اہمیت پر زور دیا گیا ہے۔

ریاستی محکمہ صحت اور ریاستی ڈیزاسٹر مینجمنٹ اتھارٹیز کو قریبی تعاون سے کام کرنے کی ہدایت دی گئی ہے تاکہ اس بات کو یقینی بنایا جا سکے کہ ان کے دائرہ اختیار میں تمام تر تسلیم شدہ ہسپتال درج ذیل امور پر فوری طور پر کارروائی کریں:

• مکمل معائنہ: فائر سیفٹی کی تعمیل کا اندازہ لگانے کے لیے تمام ہسپتالوں کا جامع فائر سیفٹی آڈٹ/ آن سائٹ معائنہ کریں۔ اس بات کو یقینی بنائیں کہ آگ بجھانے کے نظام، بشمول آگ کے الارم، آگ کے دھوئیں کا پتہ لگانے والے، آگ بجھانے والے آلات، فائر ہائیڈرنٹس، اور فائر لفٹیں، موجود ہیں اور مکمل طور پر فعال ہیں۔
• الیکٹریکل لوڈ آڈٹ: ناکافی برقی بوجھ کی گنجائش کے اہم مسئلے کو حل کریں۔ ہسپتالوں کو باقاعدگی سے الیکٹریکل لوڈ آڈٹ کرنا چاہیے، خاص طور پر جب نئے آلات کو شامل کیا جائے یا خالی جگہوں کو آئی سی یوز میں تبدیل کیا جائے۔ کسی بھی شناخت شدہ تضادات کو فوری طور پر درست کیا جانا چاہئے۔
• فائر این او سی کی تعمیل: ہسپتالوں کو ریگولیٹری تقاضوں پر سختی سے عمل کرنا چاہیے اور اپنے متعلقہ ریاست کے فائر ڈیپارٹمنٹس سے درست فائر نو-آبجیکشن سرٹیفکیٹ (این او سی) حاصل کرنا چاہیے۔ فائر سیفٹی کے اصولوں کو اپنانے سے پہلے تعمیر کی گئی پرانی عمارتوں میں برقی بوجھ کی ازسر نو پیمانہ بندی کو ترجیح دیں۔
• آگ سے حفاظت کی تعمیل کو یقینی بنانے کے لئے ہسپتالوں کے ذریعہ کیے جانے والے اقدامات کا خاکہ پیش کرنے والی ہدایات کا ایک تفصیلی مجموعہ تمام ریاستوں اور مرکز کے زیر انتظام علاقوں کے چیف سکریٹریوں کو بھی فراہم کیا گیا ہے، جس میں ان سے تمام تسلیم شدہ اسپتالوں میں معلومات کی ترسیل کی سفارش کی گئی ہے۔

ہسپتالوں اور دیگر طبی سہولیات میں آتشزدگی کے واقعات کو روکنے کے لیے درج ذیل ہدایات پر عمل کرنے کی ضرورت ہے۔

1. فنکشنل فائر فائٹنگ سسٹم: ہسپتالوں کو آگ بجھانے والے آلات جیسے فائر ایکسٹنگویشر ، ہائیڈرنٹس اور الارم کا باقاعدگی سے معائنہ کرنا چاہیے۔ اس میں فائر ایکسٹنگویشر کی میعاد ختم ہونے کی تاریخوں کی جانچ کرنا، اس بات کو یقینی بنانا کہ ہائیڈرنٹس قابل رسائی ہیں اور پانی کا مناسب دباؤ ہے، اور یہ کہ فائر الارم پوری سہولت میں چل رہے ہیں اور قابل سماعت ہیں، وغیرہ بھی شامل ہیں۔
2. باقاعدگی سے دیکھ بھال اور جانچ: تمام حفاظتی آلات کے لیے دیکھ بھال کا شیڈول قائم کریں۔ اس میں فائر ایکسٹنگویشر کی ماہانہ جانچ، فائر الارم اور ہائیڈرنٹس کے سہ ماہی ٹیسٹ، اور متعلقہ ہندوستانی معیارات کے مطابق ان کی اثر انگیزی کی تصدیق کے لیے سالانہ پیشہ ورانہ معائنہ شامل ہونا چاہیے۔
3. باقاعدگی سے الیکٹریکل لوڈ آڈٹ: ہسپتال کی بجلی کی کھپت کا جائزہ لینے کے لیے سالانہ دو مرتبہ الیکٹریکل آڈٹ کروائیں، خاص طور پر آئی سی یوز جیسے زیادہ مانگ والے علاقوں میں۔ نیشنل الیکٹریکل کوڈ آف انڈیا-2023 کے مطابق سسٹم کو اوورلوڈ کیے بغیر اس بات کو یقینی بنانے کے لیے کہ وہ حفاظتی معیارات پر پورا اترتے ہیں، ایک تصدیق شدہ الیکٹریشن کے ذریعے اپ گریڈ یا ترمیم کا اندازہ لگایا جانا چاہیے۔
4. آکسیجن کی حفاظت: آکسیجن ٹینکوں یا پائپڈ آکسیجن والے علاقوں میں، سگریٹ نوشی نہ کرنے کی سخت پالیسیوں اور گرمی کے ذرائع پر کنٹرول کو لاگو کریں۔ اشاروں کے اسٹیکرس کے ذریعہ ان علاقوں کو واضح طور پر نشان زد کرنا چاہیے، اور عملے کو ہائی آکسیجن والے ماحول سے وابستہ خطرات کے بارے میں تربیت دی جانی چاہیے۔
5. دھوئیں کا پتہ لگانے والے آلات اور فائر الارم کی تنصیب: اس بات کو یقینی بنائیں کہ آگ کے دھوئیں کا پتہ لگانے والے اور فائر الارم ہسپتال کی تمام تر جگہوں ، خصوصاً مریضوں کے کمروں، دالانوں اور عام علاقوں میں نصب ہوں جیسا کہ آئی ایس 2189 میں بتایا گیا ہے ، ان سسٹمز کو ماہانہ ٹیسٹ کریں ، اور بیٹریاں سالانہ یا ضرورت کے مطابق تبدیل کریں۔
6. آتش گیر مواد کا کنٹرول: ہسپتال کی تعمیر اور فرنشننگ میں استعمال ہونے والے مواد کا آڈٹ کریں تاکہ آتش گیر مواد کو غیر آتش گیر یا آگ سے بچنے والے متبادلات سے تبدیل کیا جا سکے، خاص طور پر مریضوں کی دیکھ بھال کے علاقوں میں۔
7. برقی نالیوں کے لیے غیر آتش گیر مادّہ: برقی نالیوں کا معائنہ کریں تاکہ یہ یقینی بنایا جا سکے کہ ان کو انٹومیسینٹ فائر سٹاپ سیلنٹ جیسے مواد سے بند کیا گیا ہے جو اوپننگس کے توسط سے آگ اور دھوئیں کے پھیلاؤ کو روکتے ہیں۔
8. بجلی کے ذرائع کو اوور لوڈ کرنے سے احتراز کریں: بجلی کے بوجھ کی نگرانی اور اوور لوڈنگ کو روکنے کے لیے پاور مینجمنٹ سسٹم کا استعمال کریں۔ اس بات کو یقینی بنائیں کہ متعدد ہائی پاور ڈیوائسز ایک سرکٹ سے منسلک نہ ہوں ۔ نئے آلات کو محفوظ طریقے سے ایڈجسٹ کرنے کے لیے بجلی کی تقسیم کا باقاعدگی سے جائزہ لیں۔
9. پانی کے چھڑکاؤ اور ہوز پائپوں کی تنصیب: خودکار چھڑکاؤ والے نظاموں اور قابل رسائی ہوز پائپوں کے ساتھ آئی سی یو اور آپریشن تھیٹر سمیت اہم علاقوں کو فٹ کریں۔ آگ لگنے کی صورت میں ان سسٹمز کو فائر الارم سسٹم کے ساتھ ہم آہنگی میں جوڑا جانا چاہیے۔
10. نیشنل بلڈنگ کوڈ کی سختی سے پابندی: نیشنل بلڈنگ کوڈ 2016 میں بیان کردہ تازہ ترین فائر سیفٹی معیارات کی تعمیل کرنے کے لیے ہسپتال کے انفراسٹرکچر کا باقاعدگی سے جائزہ لیں اور اپ ڈیٹ کریں۔
11. فائر سیفٹی این او سی حاصل کرنا: مقامی فائر سیفٹی سے ریاستی فائر سیفٹی رولز کے مطابق فائر سیفٹی نو-آبجیکشن سرٹیفکیٹ کی سالانہ تجدید کریں۔ اس میں آگ سے حفاظت کے تازہ ترین منصوبے اور آلات کی دیکھ بھال اور عملے کی تربیت کا ریکارڈ جمع کرنا شامل ہے۔
12. عملے کی تربیت اور مشقیں: تمام عملے کے لیے آگ سے بچاؤ، ہنگامی طریقہ کار، اور آگ بجھانے کے آلات کے استعمال سے متعلق ایک مسلسل تربیتی پروگرام کو نافذ کریں۔ اس بات کو یقینی بنانے کے لیے کہ عملہ، ڈاکٹر، اور مریض جان لیں کہ ہنگامی صورت حال میں کیسے جواب دینا ہے۔
13. انخلاء کے منصوبے: انخلاء کے جامع منصوبے تیار کریں جس میں فرار کے واضح، اچھی طرح نشان زد راستے، رکاوٹوں سے پاک ہنگامی اخراج، اور مخصوص محفوظ اسمبلی علاقے شامل ہوں۔ منصوبے پورے ہسپتال اور عملے کے تربیتی پروگراموں میں نمایاں طور پر دکھائے جائیں۔ ہر ہسپتال کو آگ لگنے کی صورت میں ایک ایس او پی تیار کرنا ہوتا ہے۔

ریاستوں/ مرکز کے زیر انتظام علاقوں سے بھی تاکید کی گئی ہے کہ وہ ان اہم حفاظتی اقدامات کے نفاذ کو یقینی بنانے کے لیے فالو اپ جائزہ لیں۔

**********

 (ش ح –ا ب ن۔ م ف)

U.No:6327