नवी दिल्‍ली, 15 मार्च 2024

भारतीय रेल्वे आर्थिक वर्ष 2023-24 मध्ये मालवाहतूक व्यवसाय, एकूण महसूल आणि रेल्वे मार्गांची निर्मिती यामध्ये आपल्या आतापर्यंतच्या इतिहासातील उत्कृष्ट कामगिरी नोंदवण्याच्या दिशेने अग्रेसर आहे.  

प्राथमिक आकडेवारीनुसार भारतीय रेल्वेने आज 15 मार्च 2024 रोजी  मालवाहतुकीचा 1500 दशलक्ष टनांचा टप्पा ओलांडला आहे. याआधी भारतीय रेल्वेने आर्थिक वर्ष 2022-23 मध्ये मालवाहतुकीत 1512 दशलक्ष टनांची आतापर्यंतची सर्वोत्कृष्ट कामगिरी नोंदवली होती.  

आर्थिक वर्ष 2023-24 मध्ये भारतीय रेल्वेचा आजपर्यंतचा एकूण महसूल 2. 40 लाख कोटी रुपये इतका आहे. गेल्या वर्षी 15 मार्च  रोजी, एकूण महसूल 2.23 लाख कोटी रुपये इतका होता, म्हणजेच यावर्षी 17000 कोटी रुपयांची वाढ झाली आहे. चालू आर्थिक वर्ष 2023-24 मध्ये भारतीय रेल्वेचा एकूण खर्च 2.26 लाख कोटी रुपये आहे.

आर्थिक वर्ष 2023-24 मध्ये प्रवाशांची एकूण संख्या 648 कोटी इतकी होती. गेल्या वर्षीच्या याच कालावधीच्या आकडेवारीच्या तुलनेत यामध्ये 52 कोटी इतकी वृद्धी झाली आहे. गेल्या वर्षी एकूण 596 कोटी प्रवाशांनी रेल्वेमधून प्रवास केला होता.

चालू आर्थिक वर्षात आजपर्यंत भारतीय रेल्वेने 5100 किलोमीटर इतके रेल्वेमार्ग (ट्रॅक) टाकण्याचे काम साध्य केले आहे. या आर्थिक वर्षात, दररोज सरासरी 14 किलोमीटर लांबीचे रेल्वेमार्ग टाकण्यात आले.

* * *

S.Kane/B.Sontakke/D.Rane

सोशल मिडियावर आम्हाला फॉलो करा:@PIBMumbai    /PIBMumbai    /pibmumbai  pibmumbai[at]gmail[dot]com  /PIBMumbai    /pibmumbai